Зохигчийн эвлэрлийг баталж,

хэргийг хэрэгсэхгүй болгох тухай

 

Хэргийн индекс: 307/2025/00740/и

 

Дархан-Уул аймаг дахь сум дундын анхан шатны шүүхийн шүүгч Б.Номин би,

Нэхэмжлэгч: Улаанбаатар хот, ******* тоотод оршин суух ******* овогт ******* ******* (утас: *******)-ийн нэхэмжлэлтэй,

Хариуцагч: Дархан-Уул аймаг, ******* тоотод оршин суух ******* овогт ******* ******* (утас: *******)-д холбогдох,

“2,520,000 төгрөг гаргуулах тухай” иргэний хэргийг хүлээн авч хянаад,

ТОДОРХОЙЛОХ нь:

Нэхэмжлэгч Э.******* нь шүүхэд ирүүлсэн нэхэмжлэлдээ:

“... Ч.******* нь 2024.09.19-ний өдөр 5,000,000 төгрөг зээлэхийг хүссэн бөгөөд хүсэлтийг нь хүлээн авч нэг сарын хугацаатай, 8 хувийн хүүтэй зээлсэн. 2024.10.19-ний өдрийн дотор зээлээ төлж барагдуулснаар гэрээ дуусгавар болохоор харилцсан тохиролцсон. Гэрээнээс 2,520,000 төгрөгийг төлөхгүй чирэгдэл учруулж байна. Нэхэмжлэгчийн зүгээс зээлээ төлөхийг удаа дараа шаардсан боловч удахгүй төлнө гэсэн тайлбарыг өгсөөр өдийг хүрсэн. Иймд Ч.*******гаас 2,520,000 төгрөгийг гаргуулж өгнө үү” гэжээ.

Хариуцагч Ч.******* нь шүүхэд ирүүлсэн хариу тайлбартаа:

“...Би Э.*******гаас 5 сая төгрөгийг зээлж өөрийн дансаар авч гэдэг хүнд өгч зуучилсан. Э.*******д энэ үлдэгдэл мөнгийг 2025 оны 04 дүгээр сарын 25-ны өдөр дансанд нь үлдэгдэл 2,520,000 төгрөгийг шилжүүлнэ” гэжээ.

ҮНДЭСЛЭХ нь:

1.Нэхэмжлэгч Э.******* нь хариуцагч Ч.*******д холбогдуулан “2,520,000 төгрөг гаргуулах тухай” нэхэмжлэлийн шаардлагыг шүүхэд гаргажээ.

2.Хариуцагч Ч.******* нь нэхэмжлэлийн шаардлагыг хүлээн зөвшөөрч байх бөгөөд мөнгөн төлбөрийг 2025 оны 04 дүгээр сарын 25-ны өдрийн дотор төлж барагдуулахаар нэхэмжлэгчтэй хугацаа тохирч, талууд эвлэрч байна.

3.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1-д “Хэрэг үүсгэснээс хойш шүүх хуралдаан хүртэлх хугацаанд нэхэмжлэгч нэхэмжлэлээсээ татгалзсан, хариуцагч нэхэмжлэлийн шаардлагыг хүлээн зөвшөөрсөн, эсхүл зохигч эвлэрсэн, нэхэмжлэлийн шаардлагыг хариуцагч биелүүлсэн бол хэргийг хялбаршуулсан журмаар хянан шийдвэрлэнэ” гэж, мөн хуулийн 74.2-т “Хэргийг хялбаршуулсан журмаар хянан шийдвэрлэх боломжтой гэж үзвэл шүүгч нэхэмжлэгчийн татгалзал, хариуцагчийн зөвшөөрөл, зохигч талуудын эвлэрэл, нэхэмжлэлийн шаардлагыг хариуцагч биелүүлснийг баталж, хэргийг хэрэгсэхгүй болгосон тухай захирамж гаргана” гэж заасан.

4.Талуудын эвлэрэл нь Иргэний хуульд нийцсэн, гуравдагч этгээдийн хуулиар хамгаалагдсан ашиг сонирхлыг хөндөөгүй байх тул зохигчийн эвлэрлийг баталж, хэргийг хялбаршуулсан журмаар шийдвэрлэх нь зүйтэй байна.

5.Нэхэмжлэгчийн улсын тэмдэгтийн хураамжид урьдчилан төлсөн 55,270 төгрөгийг төрийн сангийн орлогод хэвээр үлдээж, хариуцагч Ч.*******гаас 27,635 төгрөг, төрийн сангийн орлогоос 27,635 төгрөгийг тус тус гаргуулан нэхэмжлэгч Э.*******д олгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 123 дугаар зүйлийн 123.1-д заасныг удирдлага болгон

ЗАХИРАМЖЛАХ нь:

1.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар нэхэмжлэгч Э.*******гийн нэхэмжлэлтэй, хариуцагч Ч.*******д холбогдох “2,520,000 төгрөг гаргуулах тухай” иргэний хэрэгт зохигчийн эвлэрлийг баталж, хэргийг хэрэгсэхгүй болгосугай.

2.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжид урьдчилан төлсөн 55,270 төгрөгийг төрийн сангийн орлогод хэвээр үлдээж, хариуцагч Ч.*******гаас 27,635 төгрөг, төрийн сангийн орлогоос 27,635 төгрөг тус тус гаргуулан нэхэмжлэгч Э.*******д олгосугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэсүгэй.

4.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар хэргийг хялбаршуулсан журмаар хянан шийдвэрлэсэн тул зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

ШҮҮГЧ                                Б.НОМИН