МОНГОЛ УЛСЫН НЭРИЙН ӨМНӨӨС

 

 

Нийслэл дэх Захиргааны хэргийн анхан шатны шүүхийн шүүх хуралдааныг Ерөнхий шүүгч Н.Дуламсүрэн даргалж, тус шүүхийн шүүх хуралдааны 3 дугаар танхимд нээлттэй хийсэн шүүх хуралдаанаар,

Гомдол гаргагч: Дл ХХК /РД:/,

Хариуцагч: Эм, эмнэлгийн хэрэгслийн хяналт, зохицуулалтын газрын улсын байцаагч Д.А нарын хоорондын 2025 оны 02 дугаар сарын 21-ний өдрийн дугаар шийтгэлийн хуудсыг хүчингүй болгуулах тухай маргааныг хянан хэлэлцэв.

Шүүх хуралдаанд: Гомдол гаргагчийн төлөөлөгч Ш.Т, хариуцагч Д.А, хариуцагчийн итгэмжлэгдсэн төлөөлөгч Л.Б, шүүх хуралдааны нарийн бичгийн дарга Б.Мандах нар оролцов.

ТОДОРХОЙЛОХ нь:

1. Гомдол гаргагч Дл ХХК-иас Эм, эмнэлгийн хэрэгслийн хяналт, зохицуулалтын газрын улсын байцаагч Д.Ад холбогдуулан Эм, эмнэлгийн хэрэгслийн хяналт, зохицуулалтын газрын улсын байцаагч Д.Агийн 2025 оны 02 дугаар сарын 21-ний өдрийн дугаар шийтгэлийн хуудсыг хүчингүй болгуулах-аар гомдлын шаардлага гарган маргаж байна.

2. Хэрэгт цугларсан нотлох баримтууд, тогтоогдсон үйл баримтууд:

2.1. Баянгол дүүргийн 26-р хороо Ц хотхоны ******* байрны ******* тоотод оршин суух иргэн С овогтой Баас 2024 оны 01 дүгээр сарын 07-ны өдөр Эм, эмнэлгийн хэрэгслийн хяналт, зохицуулалтын газарт Дл ХХК-ийн үйлдвэрлэсэн О******* нэрийн чихний дусаагуурыг хэрэглээд чих, толгойгоор хүчтэй хатгуулж өвдсөн тул уг бүтээгдэхүүнийг шалгаж өгнө үү гэх өргөдлийг гаргасан,

2.2. Эм, эмнэлгийн хэрэгслийн хяналт зохицуулалтын газрын 2025 оны 01 дүгээр сарын 07-ны 07/01 дугаар хяналт шалгалтын удирдамжид Иргэн С овогтой Б (РД:)-аас албан бичгээр ирүүлсэн хүсэлтийн дагуу хяналт шалгалт хийж, илэрсэн зөрчлийг арилгуулах, мэргэжил арга зүйн зөвлөгөө өгөх,...Чингэлтэй дүүргийн 5-р хороонд байрлах Д ХХК хамрагдана..шалгалтыг 2025 оны 01 дүгээр сарын 07-ны өдрөөс ажлын 10 хоногт хийж гүйцэтгэх-ээр заасан,

2.3. 2025 оны 01 дүгээр сарын 08-ны өдрийн Үзлэг хийсэн тухай тэмдэглэлд Үзлэгийг 2025 оны 01 дүгээр сарын 08-ны өдрийн 14 цаг 30 минутад эхлүүлж, цэлмэг цаг агаартай, агаарын дулаан -16 хэм байх үед өдрийн гэрэлд явуулав. 1.Үзлэгээр тогтоогдсон нөхцөл байдал: Чингэлтэй дүүргийн 5-р хороо О******* төвийн ******* тоотод байрлах Д ХXK нь 2008 онд үүсгэн байгуулагдсан мод үржүүлэг, хүнсний нэмэлт бүтээгдэхүүний үйлдвэрлэл худалдаа чиглэлээр үйл ажиллагаа явуулдаг. О******* нэрийн 18 нэр төрлийн бүтээгдэхүүн үйлдвэрлэдэг. Оффисын байрны нэг өрөөнд үйлдвэрлэлийн үйл ажиллагаагаа эрхлэн явуулдаг. Бүтээгдэхүүний найрлагад ордог орц найрлагуудыг Н сүлжээ дэлгүүр, Ш ХХК, XXK, S ХХК болон эмийн сангаас авдаг. Үйлдвэрлэж буй 13 нэрийн бүтээгдэхүүнийг 2023 онд Хүнсний аюулгүй байдлын лавлагaa лабораторид шинжилгээнд өгч байсан бөгөөд 3 нэрийн бүтээгдэхүүнээс бактери илэрсэн байна. Компанийн хүний нөөцийн хувьд 2 ажилтантай бөгөөд захирал ажилтай Ш.Т нь бүтээгдэхүүн үйлдвэрлэлийн үйл ажиллагааг ганцаараа хариуцан гүйцэтгэдэг, нөгөө ажилтан нь утсанд хариулах, бүтээгдэхүүн худалдах ажил гүйцэтгэдэг. 2.Үзлэгийн явцад ашигласан техник хэрэгслийн нэр төрөл, үзүүлэлт, хэдэн минутын бичлэг хийсэн, хэдэн ширхэг гэрэл зураг авсан болох талаар: Үйлдвэрлэж буй бүтээгдэхүүнүүдийг оффисын байранд худалдан борлуулдаг. Худалдан борлуулж бүтээгдэхүүнтэй холбоотой 4 ширхэг зургийг хавсаргав. 3.Үзлэгийн явцад шинжилгээнд зориулж хэв загвар, дээж авах, эд хөрөнгө битүүмжлэх, эд зүйл, баримт бичиг хураан авах ажиллагаа хийсэн байдал: Үзлэгийн явцад гомдолд дурдсан О******* нэрийн чихний дусаалга болон О******* нэрийн нүдний дусаалгаас тус бүр 14 ширхэг дээж авч Эм шинжлэх лабораторид тэмдэглэл үйлдэн хүлээлгэн өгөв. Шинжилгээний хариу гартал уг бүтээгдэхүүнийг худалдан борлуулахгүй байх тухай мэдэгдэв. О******* нэрийн бүтээгдэхүүний үйлдвэрлэлийн технологийн заавар, орц найрлагын мэдээлэл, бүтээгдэхүүний борлуулалтын мэдээлэл болон бусад холбогдох бичиг баримтыг хуулбарлан авав. гэж тэмдэглэн улсын байцаагч Д.А, тэмдэглэлтэй танилцсан Ш.Т гэж гарын үсэг зурсан,

2.4. Хэв загвар, дээж авсан тухай актад...1. О******* чих үйлдвэрлэсэн он сар өдөр 2024.09.13, дээж авсан тоо 14, 2. О******* нүд үйлдвэрлэсэн он сар өдөр 2024.09.13, дээж авсан тоо 14 гэж тэмдэглэн, Лабораторид дээж өгсөн тэмдэглэлд Иргэний гомдлын дагуу лабораторийн шинжилгээнд хамруулах зорилгоор 1. О******* нүд, 2. О******* чи бүтээгдэхүүнийг хими микробиологийн шинжлэх үзүүлэлтээр дээж хүлээлгэн өгсөн улсын байцаагч Д.А, дээж хүлээн авсан албан тушаалтан З.Г******* хэмээн гарын үсэг зурсан,

2.5. 2025 оны 01 дүгээр сарын 10-ны өдөр холбогдогчоос мэдүүлэг авсан тэмдэглэлд ...Асуулт: Манай газарт танай компанийн үйлдвэрлэдэг О******* чихний дусаагуурыг хэрэглээд чих, толгойгоор хүчтэй өвдсөн учраас хэрэглэхээ зогсоосон. Ингэхэд зовиур байхгүй болсон эмч нь цаашид хэрэглэж болохгүй гэж зөвлөсөн. Энэ бүтээгдэхүүнийг шалгаж өгнө үү гэсэн иргэний гомдол ирсэн. Энэ талаар дэлгэрэнгүй ярина уу. Хариулт: Намайг байхгүй хойгуур ирж авсан хүн байсан. Энэ хүний гомдлыг шалгуулнаа. Яг хаана нь яаж өвдснийг нь шалгуулна. Асуулт: Гомдолд дурдсан О******* нэрийн чихний дусаагуурын найрлагын талаар тодорхой ярина yy? Хариулт: Найрлагад оливын тос, сармис орсон байгаа. Устөрөгчийн хэт ислийг цаашид нэмэлтээр хийхээр төлөвлөж байгаа. Асуулт: О******* бүтээгдэхүүний хаяг шошго дээрхи нүдний дусаалга, чихний дусаалга supplement зэрэг нэршлийг ямар учраас, ямар эрх зүйг үндэслэн өгсөн бэ? Хариулт: Supplement гэсэн нэмэлт гэсэн утгаар бичсэн. Асуулт: Танай компани 18 нэр төрлийн бүтээгдэхүүн үйлдвэрлэж байгаан байна. Эдгээр бүтээгдэхүүнүүд нь хүнсний нэмэлт бүтээгдэхүүнүүд үү? Та үйлдвэрлэгч хүний хувьд тодорхойлох yy? Хариулт: Манай үйлдвэрлэдэг бүтээгдэхүүнүүд нь хүнсний нэмэлт бүтээгдэхүүн мөн. Шинжилгээнд өгөхдөө хүнсний нэмэлт бүтээгдэхүүнээр ХАБҮЛЛ-т шинжилгээ хийлгүүлсэн. Шинжилгээгээр зарим бүтээгдэхүүн шаардлага хангахгүй гарсан. Тухайн үед нь шууд устгал хийсэн... гэж тэмдэглэжээ.

2.6. 2025 оны 01 дүгээр сарын 14-ний өдрийн Зөрчлийн талаар амаар болон харилцаа холбооны хэрэгслээр ирүүлсэн гомдол, мэдээллийг хүлээн авсан тухай тэмдэглэлээр Эм, эмнэлгийн хэрэгслийн хяналт, зохицуулалтын газрын Чанарын хяналтын газрын Эм, биобэлдмэлийн хяналтын улсын байцаагч Д.А би, Баянгол дүүргийн 26-р хороо Ц хотхоны ******* байрны ******* тоотод оршин суух иргэн С овогтой Б /РД:, утас:/-аас 2024 оны 01 дүгээр сарын 07-ны өдөр ирүүлсэн өргөдөлд Дл ХХК /ЧД 5-р хороо О******* төвийн ******* тоот/-ийн үйлдвэрлэсэн О******* нэрийн чихний дусаагуурыг хэрэглээд чих, толгойгоор хүчтэй хатгуулж өвдсөн тул уг бүтээгдэхүүнийг шалгаж өгнө үү гэх зөрчлийн талаар харилцаа холбооны хэрэгслээр гаргасан гаргасан гомдол, мэдээллийг 2025 оны 01 дүгээр сарын 07-ны өдрийн 10 цаг 00 минутад хүлээн авч, Монгол Улсын Зөрчил шалган шийдвэрлэх тухай хуулийн 6.2 дугаар зүйлийн 3 дахь хэсэгт заасны дагуу тэмдэглэл үйлдэж

2.7. Ийнхүү эрх бүхий албан тушаалтны зөрчлийн хэрэг нээх тухай 2025 оны 01 дүгээр сарын 14-ний өдрийн тогтоолоор ...Чингэлтэй дүүргийн 5 дугаар хороо, О******* төвийн ******* тоотод байрлах Дл ХХК-ийн худалдсан борлуулсан О******* нэрийн чихний дусаалгыг зохих журмын дагуу бүртгүүлээгүй гэх гомдолд үзлэг хийсэн, дээж авсан, "Дл" ХХК-ийн захирал Ш.Тээс холбогдогчоор мэдүүлэг авах зэрэг ажиллагааг хийсэн боловч цаашид зөрчлийн хэрэг бүртгэлт явуулах шаардлагатай байх тул Монгол Улсын Зөрчил шалган шийдвэрлэх тухай хуулийн 6.7 дугаар зүйлийн 1 дэх хэсэгт заасныг удирдлага болгон Эрүүл мэндийн нэмэлт бүтээгдэхүүнийг зохих журмын дагуу бүртгүүлээгүй үйлдэлд Зөрчлийн тухай хуулийн тусгай ангийн 6.6 дугаар зүйлийн 11 дэх хэсэгт зааснаар 2502 дугаар зөрчлийн хэргийг нээсэн байна.

2.8. Эм, эмнэлгийн хэрэгслийн хяналт зохицуулалтын газрын Эм шинжлэх итгэмжлэгдсэн лабораторийн шинжилгээний дүн 2025-242-т Хүлээн авсан он, сар, өдөр 2025/01/09, шинжилгээ дууссан он, сар, өдөр 2025/01/31, шинжилгээний дүнг хэвлэсэн огноо 2025/02/01 гээд Шинжилсэн үзүүлэлтийн нэр (Tests) Агаартан бактерийн тоо Шаардлага, хэмжих нэгж (Specification) 10² КҮН/-с ихгүй Шинжилгээний дүн (Results) 10.0-с ихгүй, Шинжилсэн үзүүлэлтийн нэр (Tests) Хөгц мөөгөнцөрийн тоо Шаардлага, хэмжих нэгж (Specification) 10² КҮН/-с ихгүй Шинжилгээний дүн (Results) 10.0-с ихгүй, Шинжилсэн үзүүлэлтийн нэр (Tests) Энтеробактерийн бүлгийн нян Шаардлага, хэмжих нэгж (Specification) 10² КҮН/-с ихгүй, Шинжилгээний дүн (Results) 10.0-с ихгүй, Шинжилсэн үзүүлэлтийн нэр (Tests) Pseudomonos aeruginosa Шаардлага, хэмжих нэгж (Specification) Илрэх ёсгүй /1г/, Шинжилгээний дүн (Results) Илрээгүй, Шинжилгээний дүн (Results) 10.0-с ихгүй, Шинжилсэн үзүүлэлтийн нэр (Tests) Staphylococcus aureus Шаардлага, хэмжих нэгж (Specification) Илрэх ёсгүй /1г/, Шинжилгээний дүн (Results) Илрээгүй, гээд Шинжилгээний тохирлын тухай мэдэгдэл (Reporting statements of conformity): Цувралын дугаар тодорхойгүй О******* чихний дусаалга 25мл хамар, нүд, чихний дусал эм нь бактериологийн шинжилгээгээр АНУ-ын фармакопей шаардлага хангаж байна,

Мөн дугаар 2025-243-т Хүлээн авсан он, сар, өдөр 2025/01/09, шинжилгээ дууссан он, сар, өдөр 2025/02/03, шинжилгээний дүнг хэвлэсэн огноо 2025/02/01 гээд Шинжилсэн үзүүлэлтийн нэр (Tests) Ариун чанар Шаардлага, хэмжих нэгж (Specification) Ариун чанартай Шинжилгээний дүн (Results) Ариун чанартай, Шинжилсэн үзүүлэлтийн нэр (Tests) Эмийн бодисын жижиг хэсгийн хэмжээ Шаардлага, хэмжих нэгж (Specification) 10мкм≤6000, 25мкм≤600 Шинжилгээний дүн (Results) 0, 0 гээд Шинжилгээний тохирлын тухай мэдэгдэл (Reporting statements of conformity): Цувралын дугаар тодорхойгүй О******* нүд 25мл хамар, нүд, чихний дусал эм нь бактериологийн шинжилгээгээр АНУ-ын фармакопей шаардлага хангаж байна гэж тус тус дүгнэсэн,

2.9. Эм, эмнэлгийн хэрэгслийн хяналт, зохицуулалтын газрын 2025 оны 01 дүгээр сарын 09-ний өдрийн 07/35 дугаар Мэдээлэл хүсэх тухай албан бичгээр Хүний эмийн зөвлөлийн дэргэдэх Биологийн идэвхт бүтээгдэхүүний салбар зөвлөлийн дарга М.У*******д хандан ...Д ХХК нь О******* нэрийн 21 нэр төрлийн...бүтээгдэхүүнүүд нь эрүүл мэндийн нэмэлт бүтээгдэхүүний ангилалд хамаарах эсэх мэдээлэл шаардлагатай... гэсний хариуд 2025 оны 01 дүгээр сарын 15-ны өдрийн Биологийн идэвхт бүтээгдэхүүний бүртгэлийн шинжээчийн 25-01/01 дугаар дүгнэлтээр Шинжээчийн овог нэр: Э.Э*******, Д ХХК-ны үйлдвэрлэж буй О******* нэрийн 21 бүтээгдэхүүнтэй холбоотой бүтээгдэхүүний танилцуулга, бичиг баримтууд, хэрэглэх заавар болон зориулалтыг судалж үзээд дараах дүгнэлтийг гаргаж байна.

Шинжээчийн дүгнэлт:

1. Д ХХК-ны үйлдвэрлэж буй "О*******" нэрийн бүтээгдэхүүнүүдийн:

1. Монгол о*******н увдис,

2. О*******н яс бэхжүүлэгч,

3 . О*******н түрүү булчирхай,

4. О*******н ашигтай бактери,

5. О*******н уушиг саплемент,

6. О*******н нойр булчирхай,

7. О*******н хелико саплемент,

8. О*******н шүд.

9. О*******н чих,

10. О*******н нүүрний арьс,

11. О*******н шамбарам,

12. О*******н бамбай,

13. О*******н бөөр саплемент,

14. О*******н эрчүүд даавар, 15. о*******н нүд бэлдмэл,

16. О*******н эмэгтэйчүүдийн сав,

17. О*******н цөс угаагч, дотор цэвэрлэгч цай,

18. О*******н гэрийн нөхцөлд ям ургалтыг

19. Жоом, шавьны хоолтой хор

20. О*******н таргалуулагч,

21. О*******н архинаас гаргах бэлдмэл, зэрэг нэрийн бүтээгдэхүүн нь Эрүүл мэндийн нэмэлт бүтээгдэхүүний ангилалд хамаарч болох бүтээгдэхүүнүүд гэж үзэж байна. Иймд эдгээр бүтээгдэхүүнүүдийг холбогдох журмын дагуу материалаа бүрдүүлэн Хүний эмийн зөвлөлийн дэргэдэх Биологийн идэвхт бүтээгдэхүүний салбар зөвлөлийн хурлаар хэлэлцүүлэн шийдвэрлүүлэх шаардлагатай байна. гэж дүгнэсэн,

2.10. 2025 оны 2 дугаар сарын 21-ний өдрийн дугаар шийтгэлийн хуудсаар Эм, эмнэлгийн хэрэгслийн хяналт, зохицуулалтын газрын улсын байцаагч Д.А нь Дл ХХК-нд Монгол Улсын бүртгэлд бүртгэгдээгүй эрүүл мэндийн нэмэлт бүтээгдэхүүн худалдсан болох нь бүтээгдэхүүний мэдээлэл, шинжээчийн дүгнэлт, бусад бичиг баримтаар тогтоогдож байна,...бүртгэлгүй эрүүл мэндийн нэмэлт бүтээгдэхүүн худалдсан зөрчилд Зөрчлийн тухай хуулийн 6.6 дугаар зүйлийн 11 дэх хэсэгт заасны дагуу 20000 нэгжээр торгох шийтгэлийг ногдуулсан байна.

3.1. Гомдол гаргагчаас шүүхэд гаргасан гомдлын шаардлагын үндэслэлдээ: 1.О*******н бэлдмэлийг СХЗГ-ын Хүнсний аюулгүй байдлын үндэсний лавлагаа лабораторийн шинжилгээгээр бэлдмэл гэж дүгнэлттэй байсаар атал бүтээгдэхүүн гэж үзсэн, 2.Шинжээчээр дүгнэлт гаргуулахдаа манай компанийн бэлдмэлүүдийн найрлагыг нь шинжээчид явуулж үзүүлж, танилцуулаагүй нь шинжээчид бодит дүгнэлт гаргах боломж олгоогүй, 3.Шинжээч Биологийн идэвхт бүтээгдэхүүний салбар зөвлөлийн хурлаар хэлэлцүүлэн шийдвэрлүүлэх шаардлагатай гэж үзсэн боловч энэ хурлаар дахин оруулаагүй, 4.Эм шинжлэх лабораторид шинжлүүлэхдээ манай дээжийг битүүмжилж явуулах шаардлагыг хангасан эсэх нь тодорхойгүй, яг манай дээжинд шинжилгээ хийсэн эсэх тухай баримт байхгүй төдийгүй түүнийг доторхи найрлагын лабораторийн үзүүлэлт билл үзүүлээгүй. 5.Эм шинжлэх лабораторийн үзүүлэлтээр эмийн шаардлага, хэмжих нэгжийн үзүүлэлтийг хангаагүй байхад Эрүүл мэндийн нэмэлт гэж үзсэн. Эмийн бодисын жижиг хэсгийн хэмжээ 6000 нэгжээс бага бол эмийн үйлдвэрлэлийн шаардлага хангаж байна гэж үзэхгүй. Иймд энэхүү таван асуудалд гомдолтой байна. 6.Тусгай зөвшөөрөлтэй байх үед 5 жилийн турш 5 удаа хандсан зөвшөөрөлгүй зөвхөн бүртгүүлдэг болсноос хойш 3 удаа хандаад тодорхой ямар нэгэн шалтгаангүйгээр бүртгэж өгөөгүй. Дээрхи гомдолтой холбоотой дараах тайлбарыг хүргүүлж байна

Зөрчлийн тухай хуулийн 6.6 зүйлийн 11 дахь хэсэгт Эрүүл мэндийн нэмэлт бүтээгдэхүүнийг зохих журмын дагуу бүртгүүлээгүй бол хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно гэжээ. Гэтэл тус компани нь Эрүүл мэндийн нэмэлт бүтээгдэхүүнийг үйлдвэрлэсэн биш Хүнсний нэмэлт бэлдмэл үйлдвэрлэсэн тул энэ заалтад хамаарахгүй.

Байцаагч Д.А нь Биологийн идэвхт бүтээгдэхүүнд бүртгэлийн шинжээчийн дүгнэлт /№ 25-01/01/ гаргуулахдаа манай бэлдмэлийн найрлагыг шинжээчид явуулж үзүүлж танилцуулаагүй, дүгнэлтийн албан бичгийг хаана, хэн төлөвлөсөн тухай тодорхойгүй байна. Яагаад гэвэл шинжээч Э******* хэлэхдээ: Надад танай үйлдвэрлэсэн бэлдмэлийн найрлагыг ирүүлж танилцуулаагүй би бичиг төлөвлөөгүй зүгээр л гарын үсэг зурсан гэсэн.

Мөн шинжээч дүгнэлтэндээ: Эрүүл мэндийн нэмэлт бүтээгдэхүүний ангилалд хамаарч болох эсвэл хүний эмийн зөвлөлөөр Эрүүл мэндийн нэмэлт бүтээгдэхүүнд хамаарахгүй гэж дүгнэгдэж болох талтай тул Тэрээр цааш бичихдээ ...холбогдох журмын дагуу материал бүрдүүлэн хүний эмийн зөвлөлийн дэргэдэх Биологийн идэвхт бүтээгдэхүүний салбар зөвлөлийн хурлаар хэлэлцүүлэн шийдвэрлүүлэх шаардлагатай гэж албан дүгнэлтэндээ дурьдсан нь шинжээч Эрүүл мэндийн нэмэлт бүтээгдэхүүн гэдэгт эргэлзэж дахин нягтлах шаардлагатай гэж үзсэн байна.

Байцаагч Д.А нь ЭЭХХЗГ-ын Эм шинжлэх лабораторид шинжлүүлэхдээ бактериологийн шинжилгээгээр АНУ-ын фармакопей шаардлага хангаж байна гэсэн боловч түүнийг дагалдах шинжилгээний үзүүлэлт хэвлэгдсэн билл найрлагыг нотлох баримтын хамт бидэнд үзүүлээгүй, материалд хавсргүй төдийгүй манай дээжийг лабораторид гардуулж өгсөн баримт, нотлох бичлэг акт бидэнд танилцуулаагүй. Өөрөөр хэлбэл Биологийн идэвхт бүтээгдэхүүнд бүртгэлийн шинжээчийн № 25-01/01 тоот дүгнэлт гаргуулахдаа манай бэлдмэлийн найрлагыг явуулж танилцуулаагүй нэгэн адил биднээс авсан бодит дээжийг тавигдах шаардлага, журмын дагуу хүргүүлсэн эсэх, яг бидний бэлдмэлд шинжилгээ хийсэн эсэх тухай акт баримт тодорхойгүй байна. Манай бэлдмэлд ямарч эмийн найрлага байхгүй төдийгүй манай ажлаас дээж авч явах үедээ ямар нэгэн битүүмжлэл дээжинд хийгээгүй нь манай дээж мөн эсэх ямар дээжинд шинжилгээг хэрхэн хийгдсэн нь тодорхойгүй, эргэлзээтэй байна.

Дл компани нь Чихний бэлдмэлийг 2023 оны 12-р сарын 05-ны өдөр СХЗГ-ын Хүнсний аюулгүй байдлын үндэсний лавлагаа лабораторид шинжилгээнд хамруулахдаа /Чихний дусаалга саплемент буюу хүнсний нэмэлт гэдгээр шинжлүүлсэн хэрэв эрүүл мэндийн нэмэлт бол энэ лабораторид шинжлүүлэхэд Эрүүл мэндийн нэмэлт бүтээгдэхүүний бүртгэл шаарддаг гэвч биднээс шаардаагүй. гэжээ.

4.1. Хариуцагчаас шүүхэд бичгээр ирүүлсэн хариу тайлбартаа: 1.Стандарт хэмжилзүйн газрын Хүнсний аюулгүй байдлын үндэсний лавлагаа лабораторийн 2023 оны 12 дугаар сарын 20-ны өдрийн 24-149 дугаар бүхий шинжилгээний дүнгээр Дл ХХК-иас шинжилгээнд хамруулахаар өгсөн О******* нэрийн 4 нэрийн бүтээгдэхүүнээс 2 нэрийн бүтээгдэхүүнд, мөн уг өдрийн 24-41 дугаар бүхий шинжилгээний дүнд Дл ХХК-иас шинжилгээнд хамруулахаар өгсөн О******* нэрийн 7 нэрийн бүтээгдэхүүнээс 1 нэрийн бүтээгдэхүүнд тус тус бактери илэрсэн байдаг. Мөн дээрх хоёр шинжилгээний дүнд О******* нэрийн бүтээгдэхүүнийг хүнсний нэмэлт бүтээгдэхүүн гэж тодорхойлсон дүгнэлт тусггүй байна. 2.Хяналт шалгалтын явцад Хүний эмийн зөвлөлийн дэргэдэх Биологийн идэвхт бүтээгдэхүүний салбар зөвлөлд Дл ХХК-ийн үйлдвэрлэн, худалдан борлуулж буй О******* нэрийн бүтээгдэхүүнүүд нь эрүүл мэндийн нэмэлт бүтээгдэхүүний ангилалд хамаарах эсэхийг тодорхойлуулах асуудлаар 2025 оны 01 дүгээр сарын 09-ний өдрийн 07/35 дугаар албан бичгээр хандсан. Албан бичигт хавсралтаар Дл ХХК-аас хяналт шалгалтын явцад хуулбарлаж өгсөн О******* нэрийн бүтээгдэхүүний танилцуулга, бичиг баримтууд, хэрэглэх заавар, найрлага болон зориулалтыг бичсэн баримтуудыг хавсарган явуулсан болно. 3.Эрүүл мэндийн сайдын 2022 оны А/415 дугаар Бүртгэлийн шинжээч томилох тухай тушаалаар батлагдсан Биологийн идэвхт бүтээгдэхүүний бүртгэлийн шинжээч Э.Э*******ын гаргасан №25-01/01 дугаар дүгнэлтэд Дл ХХК-ийн үйлдвэрлэн, худалдан борлуулж буй О******* нэрийн бүтээгдэхүүнүүд нь Эрүүл мэндийн нэмэлт бүтээгдэхүүний ангилалд хамаарч болох бүтээгдэхүүнүүд гэж дүгнэсэн. Эм, эмнэлгийн хэрэгслийн тухай хуулийн 41 дүгээр зүйлийн 41.3-д Эрүүл мэндийн нэмэлт бүтээгдэхүүнийг үйлдвэрлэгч, үйлдвэрлэгчтэй гэрээ байгуулсан Монгол Улсад үйл ажиллагаа явуулдаг хуулийн этгээд бүртгүүлнэ гэж заасан байдаг. Зөрчлийн тухай хуулийн тусгай ангийн 6.6 дугаар зүйлийн 11 дэх хэсэгт Эрүүл мэндийн нэмэлт бүтээгдэхүүнийг зохих журмын дагуу бүртгүүлээгүй бол хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно гэж заасны дагуу дугаар бүхий шийтгэлийн хуудсаар Дл ХХК-д 20000 нэгж буюу 20,000,000 сая төгрөгийн торгуулийн шийтгэл оногдуулсан болно. 4.О******* чихний дусаалгыг үйлдвэрлэн, худалдан борлуулдаг Дл ХХК-д 2025 оны 01 дүгээр сарын 08-ны өдөр төлөвлөгөөт бус хяналт шалгалт хийсэн. Хяналт шалгалтын явцад О******* нэрийн чихний дусаалга болон О******* нэрийн нүдний дусаалгаас дээж авч Эм шинжлэх лабораторид шинжилгээнд өгсөн. Бүтээгдэхүүнээс дээж авах болон лабораторид дээж өгөхдөө Монгол Улсын Шадар сайдын 2023 оны 10 дугаар сарын 13-ны өдрийн 68 дугаар тушаалын хоёрдугаар хавсралтаар батлагдсан Бүтээгдэхүүнээс дээж авах акт-ыг үйлдэн Дл ХХК-ийн захирал Ш.Тэд танилцуулан гарын үсэг зуруулсан ба уг тушаалын гуравдугаар хавсралтаар батлагдсан Лабораторид дээж өгсөн тэмдэглэл-ийг хөтлөн ЭЭХХЗГ-ын Эм шинжлэх лабораторид дээжийг дээж хүлээн авах ажилтан 3.Г*******т хүлээлгэн өгч гарын үсэг зуруулсан байна. 5.Шинжилгээнд өгсөн О******* нэрийн 2 төрлийн бүтээгдэхүүн нь ЭЭХХЗГ-ын Эм шинжлэх итгэмжлэгдсэн лабораторийн бактериологийн шинжилгээгээр АНУ-ын фармакопей шаардлага хангаж байна гэсэн шинжилгээний дүн гарсан. Эм шинжлэх лабораторийн шинжилгээний дүнд О******* нэрийн бүтээгдэхүүнийг эрүүл мэндийн нэмэлт бүтээгдэхүүн гэж дүгнэсэн дүгнэлт тусггүй байна. 6.Эм, эмнэлгийн хэрэгслийн тухай хуулийн 22 дугаар зүйлийн 22.1. Монгол Улсад үйлдвэрлэх, импортлох, худалдах, эм, эмийн түүхий эд, биологийн идэвхт бүтээгдэхүүнийг энэ хуулийн 22.7-д зааснаас бусад тохиолдолд улсын бүртгэлд бүртгүүлсэн байна гэж тусгасан. Мөн Эрүүл мэндийн сайдын 2019 оны А/*******5 дугаар Эм, эмийн түүхий эд, биологийн идэвхт бүтээгдэхүүний бүртгэлийн журам батлах тухай тушаалын дагуу эрүүл мэндийн нэмэлт бүтээгдэхүүнийг бүртгүүлэх асуудлаар 2022 оноос хойших хугацаанд Дл ХХК-аас манай газарт албан бичгээр хандсан бүртгэл байхгүй байна. гэжээ.

ҮНДЭСЛЭХ нь:

1. Шүүх энэ хэрэгт цугларсан бичгийн нотлох баримтууд, гомдол гаргагч, хариуцагч тэдгээрийн итгэмжлэгдсэн төлөөлөгч нараас шүүх хуралдаанд гаргасан тайлбар зэргийг шинжлэн судалж үнэлээд дараахь хууль зүйн үндэслэлүүдээр гомдол гаргагчийн гомдлын шаардлагыг бүхэлд нь хэрэгсэхгүй болгож шийдвэрлэх нь зүйтэй гэж үзлээ. Үүнд:

2. Гомдол гаргагч Дл ХХК-иас Эм, эмнэлгийн хэрэгслийн хяналт, зохицуулалтын газрын улсын байцаагч Д.Агийн 2025 оны 02 дугаар сарын 21-ний өдрийн дугаар шийтгэлийн хуудсыг хүчингүй болгуулахаар гомдлын шаардлага гаргасныг хариуцагч бүхэлд нь эс зөвшөөрч маргаж байна.

3. 2025 оны 2 дугаар сарын 21-ний өдрийн дугаар шийтгэлийн хуудсаар Эм, эмнэлгийн хэрэгслийн хяналт, зохицуулалтын газрын улсын байцаагч Д.А нь Дл ХХК-нд Монгол Улсын бүртгэлд бүртгэгдээгүй эрүүл мэндийн нэмэлт бүтээгдэхүүн худалдсан болох нь бүтээгдэхүүний мэдээлэл, шинжээчийн дүгнэлт, бусад бичиг баримтаар тогтоогдож байна гээд тус бүртгэлгүй эрүүл мэндийн нэмэлт бүтээгдэхүүн худалдсан зөрчилд Зөрчлийн тухай хуулийн 6.6 дугаар зүйлийн 11 дэх хэсэгт заасны дагуу 20 000 нэгжээр торгох шийтгэл ногдуулжээ.

4. Хэрэгт авагдсан баримтуудаас үзвэл иргэн С.Баас 2024 оны 01 дүгээр сарын 07-ны өдөр Эм, эмнэлгийн хэрэгслийн хяналт, зохицуулалтын газарт хандаж гаргасан Дл ХХК-ийн үйлдвэрлэсэн О******* нэрийн чихний дусаагуурыг хэрэглээд чих, толгойгоор хүчтэй хатгуулж өвдсөн тул уг бүтээгдэхүүнийг шалгаж өгнө үү гэх өргөдлийн дагуу Эм, эмнэлгийн хэрэгслийн хяналт зохицуулалтын газрын 2025 оны 01 дүгээр сарын 07-ны 07/01 дугаар удирдамжийг үндэслэн хариуцагч Зөрчил шалган шийдвэрлэх ажиллагаа явуулсан, уг ажиллагааны явцад Эрүүл мэндийн сайдын 2022 оны 08 дугаар сарын 19-ний өдрийн А/415 дугаар тушаалаар Эм, биологийн идэвхт бүтээгдэхүүн, оношлуурын бүртгэлийн шинжээчээр ажиллах шинжээчээр томилогдсон Биологийн идэвхт бүтээгдэхүүний шинжээч Э.Э*******ын 2025 оны 01 дүгээр сарын 15-ны өдрийн 25-01/01 дугаар дүгнэлтээр ...Эрүүл мэндийн нэмэлт бүтээгдэхүүний ангилалд хамаарч болох бүтээгдэхүүнүүд гэж үзэж байна, иймд эдгээр бүтээгдэхүүнүүдийг холбогдох журмын дагуу материалаа бүрдүүлэн Хүний эмийн зөвлөлийн дэргэдэх Биологийн идэвхт бүтээгдэхүүний салбар зөвлөлийн хурлаар хэлэлцүүлэн шийдвэрлүүлэх шаардлагатай гэж дүгнэгдсэн болох нь тус тус тогтоогдож байна.

5. Зөрчлийн тухай хуулийн 6.6 дугаар зүйлийн 11-д Эрүүл мэндийн нэмэлт бүтээгдэхүүнийг зохих журмын дагуу бүртгүүлээгүй бол хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно гэж,

6. Эм, эмнэлгийн хэрэгслийн тухай хуулийн 4 дүгээр зүйлийн 4.1.40-д эрүүл мэндийн нэмэлт бүтээгдэхүүн гэж хүний бие махбодын үйл ажиллагааг дэмжих зорилгоор тодорхой хэлбэр, тунгаар хүнснээс гадна нэмэлтээр хэрэглэх байгалийн болон нийлэг гаралтай, тарилгаас бусад хэлбэрийн бүтээгдэхүүнийг хэлэхээр, мөн хуулийн 41 дүгээр зүйлийн 41.1-д Эм, эмнэлгийн хэрэгслийн асуудал хариуцсан төрийн захиргааны байгууллага эрүүл мэндийн нэмэлт бүтээгдэхүүн үйлдвэрлэгчийн хүсэлт, баримт бичиг, түүнд хийсэн шинжээчийн дүгнэлт, лабораторийн шинжилгээний дүнг үндэслэн уг бүтээгдэхүүнийг бүртгэнэ., 41.2-т Эрүүл мэндийн нэмэлт бүтээгдэхүүнийг нэр, үйлдвэрлэсэн улс, үйлдвэрлэгч, хэлбэр, тун тус бүрээр энэ хуулийн 41.7-д зааснаас бусад тохиолдолд бүртгэнэ., 41.3-т Эрүүл мэндийн нэмэлт бүтээгдэхүүнийг үйлдвэрлэгч, үйлдвэрлэгчтэй гэрээ байгуулсан Монгол Улсад үйл ажиллагаа явуулдаг хуулийн этгээд бүртгүүлнэ гэж тус тус заасан.

7. Түүнчлэн Эрүүл мэндийн сайдын 2019 оны 06 дугаар сарын 21-ний өдрийн А/*******5 дугаар тушаалаар батлагдсан Эм, эмийн түүхий эд, биологийн идэвхт бүтээгдэхүүнийг бүртгэх журам-ын 1.1-д Төрөөс эрүүл мэндийн талаар баримтлах бодлого, Эм, эмнэлгийн хэрэгслийн тухай хууль-д нийцүүлэн Монгол Улсын эмийн бүртгэлд хүн амын эмнэлгийн тусламж, үйлчилгээнд хэрэглэх...баталгаатай эм, биобэлдмэл...биологийн идэвхт бүтээгдэхүүнийг бүртгэх...харилцааг энэхүү журмаар зохицуулна., 1.14-д Биологийн идэвхит бүтээгдэхүүний бүртгэл, өөрчлөлт, сунгалт, бүртгэлээс хасах асуудлыг Хүний эмийн зөвлөлийн Биологийн идэвхт бүтээгдэхүүний салбар зөвлөл шийдвэрлэнэ гэж нарийвчлан зохицуулжээ.

8. Гомдол гаргагч нь шаардлагын үндэслэлээ ...манай бүтээгдэхүүнүүд нь эрүүл мэндийн нэмэлт бүтээгдэхүүн биш, хүнсний нэмэлт бүтээгдэхүүн, мөн шинжээч Э.Э******* нь шинжилгээг зохих журмын дагуу хийгээгүй, шинжилгээ хийх эрхгүй этгээдийн дүгнэлтээр шийтгэл ногдуулсан нь хууль бус гэж маргасан.

9. Хүнсний тухай хуулийн 3 дугаар зүйлийн 3.1.9-т хүнсний нэмэлт гэж дангаараа бүтээгдэхүүн, эсхүл хүнсний үндсэн бүрэлдэхүүн хэсэг болж чаддаггүй, тэжээллэг чанаргүй, амт, үнэр, өнгө оруулах, биежүүлэх, сийрэгжүүлэх, хадгалах хугацааг уртасгах болон технологи ажиллагааг хурдасгах зорилгоор хүнсний үйлдвэрлэлийн явцад зориудаар нэмдэг бодис, хольцыг хэлэхээр заасан, уг зөрчлийн хэрэгт шинжээчээр ажилласан Э.Э*******ыг 2022 оны 08 дугаар сарын 19-ний өдрийн А/415 дугаар тушаалаар Эм, биологийн идэвхт бүтээгдэхүүн, оношлуурын бүртгэлийн шинжээчээр томилсон, тэрээр дүгнэлтээ Дл ХХК-ийн үйлдвэрлэж буй О******* нэрийн 21 бүтээгдэхүүнтэй холбоотой бүтээгдэхүүний танилцуулга, бичиг баримтууд, хэрэглэх заавар, зориулалтыг судалсны үндсэн дээр гаргасан зэргээс үзвэл Э.Э******* нь шинжилгээ хийх эрх бүхий этгээд байх бөгөөд дүгнэлтэнд нэхэмжлэгч компанийн бүтээгдэхүүнийг эрүүл мэндийн нэмэлт бүтээгдэхүүнд хамаарахаар байна гэснийг үгүйсгэх үндэслэл тогтоогдохгүй байна.

10. Түүнчлэн гомдол гаргагч нь Монгол Улсын бүртгэлд бүртгэгдээгүй эрүүл мэндийн нэмэлт бүтээгдэхүүн худалдсан болох нь зөрчлийн хэрэгт цугларсан нотлох баримтуудаар тогтоогдсон, иргэн С.Баас гаргасан гомдлын дагуу хариуцагч нь зөрчил шалган шийдвэрлэх ажиллагааг хуульд заасан журмын дагуу явуулсан нь зөв байх тул хариуцагчийн гаргасан маргаан бүхий шийтгэлийн хуудсыг хүчингүй болгох хууль зүйн үндэслэлгүй гэж шүүх дүгнэв.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3, 106.3.14-т заасныг тус тус удирдлага болгон ТОГТООХ нь:

1. Зөрчлийн тухай хуулийн 6.6 дугаар зүйлийн 11, Эм, эмнэлгийн хэрэгслийн тухай хуулийн 41 дүгээр зүйлийн 41.3-д заасныг тус тус баримтлан Гомдол гаргагч Дл ХХК-иас Эм, эмнэлгийн хэрэгслийн хяналт, зохицуулалтын газрын улсын байцаагч Д.Ад холбогдуулан гаргасан Эм, эмнэлгийн хэрэгслийн хяналт, зохицуулалтын газрын улсын байцаагч Д.Агийн 2025 оны 02 дугаар сарын 21-ний өдрийн дугаар шийтгэлийн хуудсыг хүчингүй болгуулах гомдлын шаардлагыг бүхэлд нь хэрэгсэхгүй болгосугай.

2. Захиргааны хэрэг шүүхэд хянан шийдвэрлэх тухай хуулийн 47 дугаар зүйлийн 47.2 дахь хэсэгт зааснаар гомдол гаргагчийн улсын тэмдэгтийн хураамжид урьдчилан төлсөн 70,200 төгрөгийг улсын орлогод хэвээр үлдээсүгэй.

Захиргааны хэрэг хянан шийдвэрлэх тухай хуулийн 113 дугаар зүйлийн 113.2 дахь хэсэгт зааснаар хэргийн оролцогч, тэдгээрийн төлөөлөгч буюу өмгөөлөгч нь энэхүү шийдвэрийг гардан авснаас хойш таван хоногийн дотор давж заалдах журмаар гомдол гаргах эрхтэй.

 

 

 

ДАРГАЛАГЧ, ЕРӨНХИЙ ШҮҮГЧ Н.ДУЛАМСҮРЭН