Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Дорнод аймаг дахь Захиргааны хэргийн анхан шатны шүүхийн ерөнхий шүүгч П.Амаржаргал би, Дорнод аймгийн Прокурорын газрын Хяналтын прокурор, хууль цаазын ахлах зөвлөх ******* дүгнэлттэй, Автотээврийн төвийн Автотээврийн хяналтын улсын байцаагч ******* холбогдуулан гаргасан “Зөрчилд шийтгэл оногдуулсан 2024 оны 10 дугаар сарын 15-ны өдрийн 0771915 дугаартай шийтгэлийн хуудсыг хүчингүй болгуулах тухай” зөрчлийн хэргийг хянаад

ТОДОРХОЙЛОХ  нь:

Нэхэмжлэгч Дорнод аймгийн Прокурорын газрын хяналтын прокурор, хууль цаазын ахлах зөвлөх ******* шүүхэд ирүүлсэн дүгнэлтдээ: ... Зөрчил шалган шийдвэрлэх тухай хуульд заасан журмыг зөрчиж шийтгэл оногдуулсан эрх бүхий албан тушаалтны шийдвэрийг хүчингүй болгуулах үндэслэлтэй байх тул Монгол улсын Зөрчил шалган шийдвэрлэх тухай хуулийн 7.2 дугаар зүйлийн 8 дахь хэсгийг удирдлага болгон Автотээврийн хяналтын улсын байцаагч *******гээс 2024 оны 10 дугаар сарын 15-ны өдөр холбогдогч ******* шийтгэл оногдуулсан шийтгэлийн хуудасны шийдвэрлэх хэсгийн 1 дэх заалтад ...“150,000 төгрөгөөр торгох”... гэснийг ... “15,000 төгрөгөөр торгох” ... гэж өөрчлөхөөр прокурорын дүгнэлт бичив гэжээ.

Автотээврийн төвийн Автотээврийн хяналтын улсын байцаагч ******* шүүхэд ирүүлсэн хариу тайлбартаа: Дорнод аймгийн Авто тээврийн хяналтын улсын байцаагч ******* би Прокурорын газраас ирүүлсэн дүгнэлттэй танилцлаа. Нэхэмжлэлийн шаардлага буюу эрх бүхий албан тушаалтны шийтгэл оногдуулсан шийдвэрийг өөрчлүүлэх тухай нэхэмжлэлийн шаардлагыг бүхэлд нь хүлээн зөвшөөрч байна. Алдаа дутагдал гаргасан үйлдэл гаргасан байна. Цаашид ийм алдааг дахин гаргахгүй байх боломжтой. Нэхэмжлэлийн шаардлагыг хүлээн зөвшөөрч байгаа тул хэргийг хяларшуулсан журмаар шийдвэрлэж өгнө үү. Маргах зүйлгүй гэжээ.

ҮНДЭСЛЭХ нь:

Дорнод аймгийн Прокурорын газрын Хяналтын прокурор, хууль цаазын ахлах зөвлөх ******* нь ... ******* нь ээлжийн жолоочгүй 800км газар улс хооронд нийтийн зорчигч тээврийн үйлчилгээ эрхэлсэн зөрчил үйлдсэн болох нь зөрчлийн материалд авагдсан нотлох баримтуудаар тогтоогдож байх ба Авто тээврийн хяналтын улсын байцаагч ******* уг зөрчилд 2024 оны 10 дугаар сарын 15-ны өдөр шийтгэл оногдуулахдаа ******* нь аялал жуулчлалын үйлчилгээ эрхэлдэг хуулийн этгээдийн жолооч бол тухайн хуулийн этгээдийг зөрчил шалган шийдвэрлэх ажиллагаанд төлөөлөн оролцохоор албан ёсоор томилогдсон албан тушаалтан эсхүл тус хуулийн этгээдийг итгэмжлэлгүйгээр төлөөлөх эрх бүхий албан тушаалтныг холбогдогчийн хууль ёсны төлөөлөгчөөр тогтоох тогтоол үйлдэн зөрчил шалган шийдвэрлэх ажиллагаанд оролцуулж мэдүүлэг авалгүйгээр Зөрчлийн тухай хуулийн 14.6 дугаар зүйлийн 5 дахь хэсэгт заасныг баримтлан жолооч *******г 200,000 төгрөгөөр торгож, хуулийн этгээдэд оногдуулвал зохих торгуулийн хэмжээгээр хүнд шийтгэл оногдуулсан эрх бүхий албан тушаалтны шийдвэрийг хүчингүй болгуулах дүгнэлтийг шүүхэд ирүүлжээ.          

Хэрэг хянан шалгах ажиллагааны явцад Автотээврийн төвийн Автотээврийн хяналтын улсын байцаагч ******* нь “Зөрчилд шийтгэл оногдуулсан 2024 оны 10 дугаар сарын 15-ны өдрийн 0771915 дугаартай шийтгэлийн хуудсыг хүчингүй болгуулах тухай” прокурорын дүгнэлтийг бүхэлд нь хүлээн зөвшөөрч буйгаа бичгээр илэрхийлсэн нь ...бусад этгээдийн эрх, эрх чөлөө, хууль ёсны ашиг сонирхлыг хөндөхөөргүй, хуульд харшлаагүй байх тул Захиргааны хэрэг шүүхэд хянан шийдвэрлэх тухай хуулийн  67 дугаар зүйлийн 67.1-д зааснаар хариуцагчийн зөвшөөрлийг баталж, хэргийг хэрэгсэхгүй болгох үндэслэлтэй байна.  

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1 дэх хэсэгт заасныг тус тус удирдлага болгон ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1, Зөрчил шалган шийдвэрлэх тухай хуулийн 7.2 дугаар зүйлийн 8-д  заасныг баримтлан, “Зөрчилд шийтгэл оногдуулсан 2024 оны 10 дугаар сарын 15-ны өдрийн 0771915 дугаартай шийтгэлийн хуудсыг хүчингүй болгуулах”-ыг хүссэн хяналтын прокурор ******* дүгнэлтийг, хариуцагч Автотээврийн төвийн Автотээврийн хяналтын улсын байцаагч ******* хүлээн зөвшөөрч байх тул хариуцагчийн зөвшөөрлийг баталж, хэргийг хэрэгсэхгүй болгосугай.      

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3-д  заасны дагуу нэхэмжлэгч нь улсын тэмдэгтийн хураамж төлөхөөс чөлөөлөгдсөн болохыг дурдсугай.

Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т зааснаар хэргийн оролцогчид энэхүү захирамжид гомдол гаргах эрхгүй бөгөөд шүүхийн шийдвэрийн нэгэн адил биелүүлэхийг дурдсугай.

 

ЕРӨНХИЙ ШҮҮГЧ                           П.АМАРЖАРГАЛ