Хариуцагчийн зөвшөөрлийг баталж,хэргийг хэрэгсэхгүй болгох тухай

Нийслэл дэх Захиргааны хэргийн анхан шатны шүүхийн шүүгч Х.Нямдэлгэр би, Нийслэлийн Хан-Уул дүүргийн Прокурорын газрын хяналтын прокурор, Хууль цаазын ахлах зөвлөх Н.Н******* дүгнэлттэй, Хан-Уул дүүргийн Улсын бүртгэлийн хэлтсийн хяналтын улсын байцаагч Ч.Б*******д холбогдох захиргааны хэргийг хянаад,

ТОДОРХОЙЛОХ нь:

Хан-Уул дүүргийн Прокурорын газрын хяналтын прокурор, Хууль цаазын ахлах зөвлөх Н.Н******* шүүхэд ирүүлсэн дүгнэлтдээ: “...Эрх бүхий албан тушаалтан Ч.Б******* нь Д.Н*******д холбогдох гомдол, мэдээллийг прокурорын зөрчлийн бүртгэл мэдээллийн санд бүртгүүлэлгүйгээр 2025 оны 09 дүгээр сарын 02-ны өдөр хүлээн авч, мөн торгох шийтгэл оногдуулж шийдвэрлэснээс 1 сарын дараа буюу 2025 оны 10 дугаар сарын 20-ны өдөр прокурорт ирүүлж, гомдол, мэдээллийн нэгдсэн санд бүртгүүлсэн. Иймд “Зөрчил шалган шийдвэрлэх тухай хуулийн  7.2 дугаар зүйлийн 8 дахь хэсгийг удирдлага болгон, тус дүүргийн Улсын бүртгэлийн хяналтын улсын байцаагч Ч.Б*******ийн 2025 оны 09 дүгээр сарын 02-ны өдрийн 0993426 дугаартай шийтгэлийн хуудсаар Зөрчлийн тухай хуулийн 15.24 дүгээр зүйлийн 1 дэх хэсэгт зааснаар Д.Н*******г 20 нэгжтэй тэнцэх хэмжээний буюу 20,000 төгрөгийн торгох шийтгэл оногдуулж шийдвэрлэсэн шийдвэрийг хүчингүй болгуулах” прокурорын дүгнэлт бичив гэв.

Хариуцагч Хан-Уул дүүргийн Улсын бүртгэлийн хэлтсийн хяналтын улсын байцаагч Ч.Б******* шүүхэд ирүүлсэн тайлбартаа: “...Иргэний улсын бүртгэлийн тухай хуулийн 16.6-д заасны дагуу иргэн Д.Н******* нь хугацаа хэтрүүлсэнд зөрчилд Зөрчлийн тухай хуулийн 15.24.1-д зааж тогтоосон хугацаанд “иргэний улсын бүртгэлд” бүртгүүлээгүй гэсэн заалтын дагуу 20 нэгжээр торгосон. Миний бие 9 болон 10 сард компьютер эвдэрсэн байсан учир гомдол, мэдээллийг прокурорын зөрчлийн бүртгэл мэдээллийн санд бүртгүүлээгүй нь үнэн болно.

Иймд 2025 оны 11 дүгээр сарын 05-ны өдрийн 218 дугаар бүхий Хан-Уул дүүргийн прокурор Н.Н******* дүгнэлтийг хүлээн зөвшөөрч байна” гэв.

ҮНДЭСЛЭХ нь:

Хан-Уул дүүргийн Прокурорын газрын хяналтын прокурор Н.Н******* нь Хан-Уул дүүргийн Улсын бүртгэлийн хэлтсийн хяналтын улсын байцаагч Ч.Б*******д холбогдуулан дүгнэлт гаргасан бөгөөд уг дүгнэлтдээ “Улсын бүртгэлийн хяналтын улсын байцаагч Ч.Б*******ийн 2025 оны 09 дүгээр сарын 02-ны өдрийн 0993426 дугаартай шийтгэлийн хуудсаар Зөрчлийн тухай хуулийн 15.24 дүгээр зүйлийн 1 дэх хэсэгт зааснаар Д.Н*******г 20 нэгжтэй тэнцэх хэмжээний буюу 20,000 төгрөгийн торгох шийтгэл оногдуулж шийдвэрлэсэн шийдвэрийг хүчингүй болгуулах” гэжээ.

Хариуцагч Хан-Уул дүүргийн Прокурорын газрын хяналтын прокурор, Хууль цаазын ахлах зөвлөх Н.Н******* нь шүүхэд бичгээр ирүүлсэн хариу тайлбартаа прокурорын дүгнэлтийг бүхэлд нь хүлээн зөвшөөрч байгаагаа илэрхийлж, хэргийг хялбаршуулсан журмаар шийдвэрлэж өгөхийг хүсжээ.  

Иймд Захиргааны хэрэг шүүхэд хянан шийдвэрлэх тухай хуулийн 21 дүгээр зүйлийн 21.1.1-д “Нэхэмжлэлийн шаардлагыг хүлээн зөвшөөрөх ...,” мөн хуулийн 67 дугаар зүйлийн 67.1-д “Хариуцагч нэхэмжлэлийн шаардлагыг бүхэлд нь хүлээн зөвшөөрсөн нь бусад этгээдийн эрх, эрх чөлөө, хууль ёсны ашиг сонирхлыг хөндөхөөргүй, хуульд харшлаагүй байвал шүүх хариуцагчийн зөвшөөрлийг баталж, хэргийг хэрэгсэхгүй болгоно” гэж тус тус  заасны  дагуу  хариуцагчийн  зөвшөөрлийг баталж, хэргийг хэрэгсэхгүй болгох нь зүйтэй байна.

Мөн Захиргааны хэрэг  шүүхэд   хянан  шийдвэрлэх    тухай   хуулийн   69  дүгээр зүйлийн 69.2-т “Энэ хуулийн 66-68 дугаар зүйлд заасны дагуу шийдвэрлэсэн шүүгчийн  захирамж,  шүүхийн  тогтоолд  гомдол   гаргах   эрхгүй   бөгөөд  шүүхийн шийдвэрийн нэгэн адил биелүүлнэ” гэж зааснаар хариуцагчийн зөвшөөрлийг баталж, хэргийг хэрэгсэхгүй болгох тухай шүүгчийн захирамжид хэргийн оролцогчид, тэдгээрийн төлөөлөгч, өмгөөлөгчид гомдол гаргах эрхгүй, шүүхийн шийдвэрийн нэгэн адил биелэгдэхийг тэмдэглэв.

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1-д заасныг удирдлага болгон ЗАХИРАМЖЛАХ нь:

1.Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасныг баримтлан Нийслэлийн Хан-Уул дүүргийн Прокурорын газрын хяналтын прокурор, Хууль цаазын ахлах зөвлөх Н.Н*******ээс Хан-Уул дүүргийн Улсын бүртгэлийн хэлтсийн хяналтын улсын байцаагч Ч.Б*******ийн 2025 оны 09 дугаар сарын 02-ны өдрийн 0993426 дугаартай шийтгэлийн хуудсыг хүчингүй болгуулах тухай дүгнэлтийг хариуцагч хүлээн зөвшөөрснийг баталж, хэргийг хэрэгсэхгүй болгосугай.

2.Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар улсын тэмдэгтийн хураамжаас чөлөөлөгдсөн болохыг дурдсугай.

Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т заасны дагуу хэргийн оролцогч, тэдгээрийн төлөөлөгч буюу өмгөөлөгч энэхүү шүүгчийн захирамжид гомдол гаргах эрхгүй.

ШҮҮГЧ                               Х.НЯМДЭЛГЭР