2025 08 18

191/ШШ2025/06905

 

 

 

 

Зохигчдын эвлэрлийг баталж,

хэргийг хэрэгсэхгүй болгох тухай

 

Баянзүрх, Сүхбаатар, Чингэлтэй дүүргийн Иргэний хэргийн анхан шатны тойргийн шүүхийн шүүгч Л.Золзаяа даргалж, тус шүүхийн танхимд хийсэн иргэний хэргийн шүүх хуралдаанаар,

Нэхэмжлэгч:  М ХХК /РД:***/-ийн нэхэмжлэлтэй

 

Хариуцагч:  Гийн Г /РД: ****/-т холбогдох

 

Нэхэмжлэлийн шаардлага: 60,726,000 төгрөг гаргуулах тухай иргэний хэргийг хянан хэлэлцэв.

 

Шүүх хуралдаанд:

Нэхэмжлэгчийн итгэмжлэгдсэн төлөөлөгч Б.Т,

Нэхэмжлэгчийн өмгөөлөгч Ч.Г,

Хариуцагч Г.Г,

Шүүх хуралдааны нарийн бичгийн дарга Ж.Хан нүри нар оролцов.

 

ТОДОРХОЙЛОХ НЬ:

 

Нэхэмжлэгчийн итгэмжлэгдсэн төлөөлөгч нь шүүх хуралдаанд гаргасан нэхэмжлэл, хүсэлтдээ: ..Хариуцагч Г.Гээс 2023 оны 12 дугаар сарын 04-ний өдөр байгуулагдсан Үйл ажиллагаа зохион байгуулах, үйлчилгээ үзүүлэх гэрээ-ний дагуу үлдэгдэл төлбөр болох 40,400,000 төгрөг, алдангид 20,200,000 төгрөг, хохиролд 126,000 төгрөг нийт 60,726,000 төгрөг гаргуулахаар нэхэмжлэл гаргасан.

Манай зүгээс хариуцагчийн эвлэрэх саналын хүрээнд нэхэмжлэлийн шаардлагаас 15,726,000 төгрөгөөр татгалзаж, үлдэх төлбөр дээр эвлэрэх саналыг хүлээн зөвшөөрч байна. гэв.

 

Хариуцагч нь шүүх хуралдаанд гаргасан хүсэлтдээ: Нэхэмжлэлийн шаардлагын хүрээнд алдангийн тодорхой хувиас татгалзвал нэхэмжлэгч талтай эвлэрэх хүсэлтэй байна. гэв.

 

Зохигчдын хооронд байгуулсан эвлэрлийн гэрээнд: М ХХК-ийн зүгээс Г.Гт холбогдуулж нийт 60,726,000 төгрөгийн нэхэмжлэл гаргасан. Үүнээс алданги 20,200,000 төгрөгийн 15,726,000 төгрөгөөс татгалзаж, үлдэх 45,000,000 төгрөгийг 2 сарын хугацаанд төлүүлэхээр тохиролцов. гэжээ.

ҮНДЭСЛЭХ нь:

 

Нэхэмжлэгч М ХХК-иас хариуцагч Г.Гт холбогдуулан үйл ажиллагаа зохион байгуулах гэрээний үүрэгт 60,726,000.00 төгрөг гаргуулах тухай нэхэмжлэл гаргасан ба энэ хэрэгт шүүхээс иргэний хэрэг үүсгэж, хариуцагч нарт нэхэмжлэлийг хувийг гардуулж, талуудад хуульд заасан эрх, үүргийг танилцуулж, тайлбарлажээ.

 

Зохигчдын байгуулсан эвлэрлийн гэрээгээр нэхэмжлэлийн нэхэмжлэлийн шаардлагын 15,726,000 төгрөгөөс татгалзаж, хариуцагч нь нэхэмжлэлийн шаардлагын үлдэх 45,000,000 төгрөгийг бүхэлд нь хүлээн зөвшөөрч, тодорхой хугацаанд хэсэгчлэн төлөхөөр эвлэрэн хэлэлцсэн байна.

 

Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.4-т Хариуцагч шүүхийн шийдвэр гарах хүртэл нэхэмжлэлийн шаардлагыг бүхэлд нь буюу зарим хэсгийг хүлээн зөвшөөрөх буюу зохигч эвлэрч болно гэж заасан. Тодруулбал, тус хуулийн 106 дугаар 106.5-д зааснаар талууд эвлэрсэн нь бусдын эрх, эрх чөлөө, хуулиар хамгаалсан ашиг сонирхлыг хөндөөгүй, хуульд харшлаагүй бол шүүх тухайн эвлэрлийг баталж, хэргийг хэрэгсэхгүй болгох захирамж гаргах зохицуулалттай ба энэ тохиолдолд Иргэний хууль зөрчөөгүй, гуравдагч этгээдийн хуулиар хамгаалагдсан ашиг сонирхлыг хөндөөгүй байх ёстой.

 

Шүүх хуралдаанд зохигчид уг хэрэг маргааныг эвийн журмаар шийдвэрлэх хүсэлт гаргасан ба шүүхээс тэдгээрт хэргийг хялбаршуулсан журмаар хянан шийдвэрлэхийн үр дагаврын талаар тайлбарлахад талууд эвлэрэх хүсэл зориг нь хэвээр байгаагаа илэрхийлсэн тул эвлэрлийг батлав.

 

Учир нь, энэ хуулийн 26 дугаар зүйлийн 26.2, 26.3-д зааснаар хэргийн нэхэмжлэгч тал нэхэмжлэлийн шаардлагаа багасгах, нэмэгдүүлэх, өөрчлөх, хариуцагч талтай эвлэрэх эрхтэй бол хариуцагч нь нэхэмжлэлийн шаардлагыг хүлээн зөвшөөрөх, биелүүлэх буюу хүлээн зөвшөөрөхөөс татгалзах, сөрөг нэхэмжлэл гаргах, эвлэрэх эрхтэй юм.

 

Хэрэгт авагдсан баримтаар шүүх болон зохигч нарт илэрхий байдлаар тус хэрэгт хуулиар хамгаалагдсан эрх ашиг нь хөндөгдөж буй зайлшгүй татан оролцуулбал зохих бусад гуравдагч этгээд байхгүй, гагцхүү нэхэмжлэгч болон хариуцагч нарын хооронд үүссэн харилцаанаас улбаатай шаардлагын хүрээнд талууд эвлэрч, шүүхийн тогтоолыг сайн дураар биелүүлээгүйгээс үүсэх эрх зүйн үр дагавар нь зохигчдод хамаарах учир гуравдагч этгээдийн хуулиар хамгаалагдсан ашиг сонирхлыг хөндөж байна гэж үзэх нөхцөл байдал алга байна.

 

Нэхэмжлэгч нь уг хэрэг хянан шийдвэрлэх ажиллагаанд итгэмжлэгдсэн төлөөлөгчөөр дамжуулан оролцохоор Б.Тд итгэмжлэл олгож, Иргэний хэрэг шүүхэд хянан шийдвэрлэх тухай хуульд заасан зохигчийн бүхий л эдлэх эрх, үүргийг эдлүүлэхээр болжээ. Тус хуулийн 36 дугаар зүйлийн 36.2-т зааснаар төлөөлүүлэгчээс бичгээр олгосон итгэмжлэлд заасан хүрээ, хязгаараар итгэмжлэгдсэн төлөөлөгчийн эрх хэмжээ тодорхойлогдох ба итгэмжлэгдсэн төлөөлөгч нь эвлэрэн хэлэлцэх эрхтэй байна.

 

Иймд, нэгэнт зохигчид эвлэрч, хэргийг хялбаршуулсан журмаар шийдвэрлүүлэх хүсэлт гаргасан нь тодорхой бүрэн эрхтэй этгээдийн илэрхийлсэн хүсэл зориг учраас эвлэрлийг баталж, хэргийг хэрэгсэхгүй болгохоор шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5, 123 дугаар зүйлийн 123.3-д заасныг тус тус удирдлага болгон

 

ЗАХИРАМЖЛАХ нь:

 

1. Нэхэмжлэгч М ХХК-иас хариуцагч Г.Гт холбогдуулан холбогдуулан үйл ажиллагаа зохион байгуулах гэрээний үүрэгт 60,726,000.00 төгрөг гаргуулах тухай иргэний хэрэгт, нэхэмжлэгч нь нэхэмжлэлийн шаардлагаас 15,726,000.00 төгрөгөөс татгалзаж, үлдэх 45,000,000.00 төгрөгийг хариуцагч Г.Г 2025 оны 10 дугаар сарын 18-ны өдөр төлж барагдуулахаар эвлэрсэн зохигчдын эвлэрлийг баталж, хэргийг хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6, 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.1-д тус тус заасныг үндэслэн нэхэмжлэгчээс улсын тэмдэгтийн хураамжид төлсөн 471,580.00 төгрөгийг улсын орлогод хэвээр үлдээж, улсын тэмдэгтийн хураамжийн тал хувь 235,790.00 төгрөгийг Татварын хэлтсээс, хариуцагчаас үлдэх 235,790.00 төгрөгийг гаргуулж нэхэмжлэгчид олгосугай.

 

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар захирамжийг зохигчид сайн дураар биелүүлээгүй тохиолдолд шүүхийн шийдвэрийн нэгэн адил албадан гүйцэтгэхийг мэдэгдсүгэй.

 

4. Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5, 74 дүгээр зүйлийн 74.4-т зааснаар зохигч давж заалдах, хяналтын шатны журмаар болон тухайн асуудлаар анхан шатны шүүхэд нэхэмжлэл, гомдол гаргахгүй болохыг тус тус тайлбарласугай.

 

 

 

 

ДАРГАЛАГЧ ШҮҮГЧ               Л.ЗОЛЗАЯА