Өвөрхангай аймгийн Хархорин сум дахь Сум дундын шүүхийн шүүгч Г.Энх-Амгалан даргалж, тус шүүхийн шүүх хуралдааны танхимд нээлттэй хийсэн иргэний хэргийн шүүх хуралдаанаар,

Хүсэлт гаргагч: ***** хүсэлттэй,

“Үрчлэгдсэн болохоо тогтоолгох”-ыг хүссэн иргэний хэргийг хянан хэлэлцэв.

Шүүх хуралдаанд: Хүсэлт гаргагч **** /цахимаар/, шүүх хуралдааны нарийн бичгийн дарга А.Баасансүрэн нар оролцов.

                                              ТОДОРХОЙЛОХ нь:

1. Хүсэлт гаргагч **** нь “Үрчлэгдсэн болохоо тогтоолгох тухай” хүсэлт гаргасан ба хүсэлтийн шаардлагын үндэслэлээ дараах байдлаар тодорхойлж байна. Үүнд:

1.1 Хүсэлт гаргагч шүүхэд гаргасан нэхэмжлэл болон шүүх хуралдаанд гаргасан хүсэлтдээ: “...Би аавынхаа ах хөгшин дээр багаасаа өссөн. Тэгээд тэр **** гэх хүний нэр дээр манай амьдарч байгаа газар байдаг. Намайг өргөж авсан аав **** гэх хүн нас бараад 2 жил болж байна. Тэгээд газраа өөрийн нэр дээр шилжүүлэх гэтэл газрын албанаас өв залгамжлах хийж ирж байж газраа шилжүүлж ав гэж хэлсэн. Тэгээд өв залгамжлах хийлгэх гэтэл үрчлүүлж байсан болохоо тогтоолгох шаардлагатай болсон. Манай аав төрсөн ах болох **** гэдэг хүнд намайг өргүүлж байсан. Тэгээд овог нэрээ солиулахгүй явж байгаад сая газраа шилжүүлж авах гэтэл зөрчил үүссэн. Тиймээс **** гэдэг хүнд үрчлэгдэж байсан болохоо шүүхээр орж тогтоолгох шаардлагатай болсон...” гэв.

2. Хүсэлт гаргагч **** нь өөрийн иргэний үнэмлэхийн хуулбар /хх-ийн 2/, улсын тэмдэгтийн хураамж төлсөн баримт /хх-ийн 3/, Өвөрхангай аймгийн **** дугаартай тодорхойлолтууд /хх-ийн 4-5/, Үндэсний төв архивын **** дугаартай лавлагаанууд /хх-ийн 29, 31/, Өвөрхангай аймгийн **** дугаартай тодорхойлолт /хх-ийн 32/ зэрэг бичгийн баримтуудыг шүүхэд нотлох баримтуудаар гаргаж өгсөн байна.

3. Шүүхээс хүсэлт гаргагчийн хүсэлтээр **** нарын гэрчийн мэдүүлгийг нотлох баримтаар бүрдүүлсэн.

Шүүх хуралдаанаар хавтаст хэрэгт авагдсан бичгийн нотлох баримтуудыг шинжлэн судлаад

    ҮНДЭСЛЭХ нь:

            1.  Шүүх хуульд заасан журмаар хэрэгт авагдсан нотлох баримт, зохигчийн шүүхэд болон шүүх хуралдаанд гаргасан тайлбаруудыг үндэслэн хүсэлтийн шаардлагыг хангаж шийдвэрлэх нь зүйтэй гэж дүгнэв.

           2. Онцгой ажиллагааны журмаар иргэний хэрэг хянан шийдвэрлэх ажиллагааны нэг төрөл нь Иргэний хэрэг шүүхэд хянан шийдвэрлэх тухай хуулийн 133 дугаар зүйлийн 133.1.1-д заасан эрх зүйн ач холбогдол бүхий үйл явдлыг тогтоох ажиллагаа юм.

           2.1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.1-д “Иргэн, хуулийн этгээдийн эдийн ба эдийн бус баялагтай холбоотой эрх үүсэх, өөрчлөгдөх, дуусгавар болоход шууд хамаарах үйл явдлыг эрх зүйн ач холбогдол бүхий үйл явдал гэнэ.” гэж заажээ.

           2.2. Уг зохицуулалтаар ...эдийн ба эдийн бус баялагтай холбоотой эрх үүсэх, өөрчлөгдөх, дуусгавар болоход шууд хамаарах... үйл явдал байх шинжийг нэхэмжлэгчийн шүүхэд гаргасан нэхэмжлэлийг хангасан байх тул шүүх хүсэлтийг хүлээн авч, иргэний хэрэг хянан шийдвэрлэх ажиллагааны журмаар шийдвэрлэх нь зүйтэй гэж үзлээ.

           3. Хүсэлт гаргагч **** нь ...Өөрийн төрсөн аав **** төрсөн ах **** гэдэг хүнд үрчлэгдэж байсан болохоо тогтоолгох... гэж тус хүсэлтийн шаардлагаа тодорхойлсон.

                        4. Үрчлэгдсэн болохоо тогтоолгох хүсэлтийн тухайд:

            Хүсэлт гаргагч **** нь **** гэдэг хүнд үрчлэгдэж байсан болох нь хүсэлт гаргагчийн шүүх хуралдаанд гаргасан тайлбар, Өвөрхангай аймгийн **** дугаартай тодорхойлолтууд /хх-ийн 4-5/, Үндэсний төв архивын **** дугаартай лавлагаанууд /хх-ийн 29, 31/, Өвөрхангай аймгийн Хархорин сумын ***** дугаартай албан бичиг /хх-ийн 32/, гэрч *******... гэх мэдүүлэг зэрэг баримтуудаар тогтоогдож байна.

            Иймд шүүх нэхэмжлэлийн шаардлагыг хангаж шийдвэрлэх нь зүйтэй гэж үзэв.

6. Шүүх нэхэмжлэлийн шаардлагыг хангаж шийдвэрлэсэн тул хүсэлт гаргагчийн улсын тэмдэгтийн хураамжид төлсөн 70,200 төгрөгийг улсын орлого болгох нь зүйтэй.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.1-д заасныг тус тус удирдлага болгон                                                

                                                 ТОГТООХ нь:

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.14-д заасныг баримтлан *****-ыг 1984 онд *****-д үрчлэгдсэн болохыг тогтоосугай.

2. Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар хүсэлт гаргагч **** улсын тэмдэгтийн хураамжид урьдчилан төлсөн 70,200 төгрөгийг орон нутгийн төсвийн орлогод хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2 дахь хэсэгт зааснаар шийдвэр танилцуулан сонсгомогц хүчинтэй болохыг дурдсугай.

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.3, 119.4 дэх хэсэгт зааснаар шийдвэр хүчинтэй болсноос хойш 14 хоногийн дотор бичгийн хэлбэрээр гарах бөгөөд ийнхүү гарснаас хойш хүсэлт гаргагч нь 14 хоногийн дотор шүүхэд хүрэлцэн ирж шийдвэрийг өөрөө гардан авахыг мэдэгдсүгэй.

5. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар хүсэлт гаргагч нь шийдвэрийг гардан авснаас хойш 14 хоногийн дотор Өвөрхангай аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай.

 

                   ДАРГАЛАГЧ, ШҮҮГЧ                               Г.ЭНХ-АМГАЛАН