Хариуцагч нэхэмжлэлийн шаардлагыг

                                хүлээн зөвшөөрснийг баталж, хэргийг

                                          хэрэгсэхгүй болгох тухай

 

Дорноговь аймгийн Замын-Үүд сум дахь сум дундын шүүхийн шүүгч Э.Болормаа би, нэхэмжлэгч К банк ХК-ийн нэхэмжлэлтэй, хариуцагч Ч.Ч холбогдох зээлийн гэрээний үүрэгт 23,292,132 төгрөг гаргуулах тухай нэхэмжлэлийг 2026 оны 05 сарын 28-ны өдөр хүлээн авч, 2026 оны 05 сарын 29-ний өдөр иргэний хэрэг үүсгэн хянаад

                                                     ТОДОРХОЙЛОХ нь:

Нэхэмжлэгч У хот, С дүүрэг, .-р хороо, У гудамж Өөрийн байранд байрлах, К банк ХК /РД: .........., утас: ......./ шүүхэд гаргасан нэхэмжлэлдээ: Ч.Ч нь 2024 оны 09 сарын 06-ны өдөр No ........тоот Цахим цалингийн зээлийн гэрээг байгуулж 25,890,000.00 төгрөгийн зээлийг жилийн 20,4 хувийн хүүтэй 30 сарын хугацаатай авсан. Ч.Ч нь зээл авснаас хойш үндсэн зээлд 6,224,749.71 төгрөг, үндсэн хүүнд 3,689,417.15 төгрөг, нэмэгдүүлсэн хүүнд 7,116.66 төгрөг төлсөн. Зээлдэгч нь зээлийн гэрээгээр хүлээсэн үүргээ ноцтой зөрчиж, зээлийн хуваарьт төлбөрийг 2024 оны 11 дүгээр сараас хойш зөрчил үүсгэсээр байна. Энэ нь зээлийн гэрээний 7.2-т тусгагдсан ноцтой зөрчил байх тул зээлдэгч Ч.Ч байгуулсан зээлийн гэрээний үүрэг болох үндсэн зээл болон зээлийн хүүний төлөгдөөгүй үлдэгдэл нэхэмжлэл гаргах өдрийн байдлаар дараах байдалтай байна. Үндсэн зээл 19,665,250 төгрөг, үндсэн хүү 3,454,603 төгрөг, нэмэгдүүлсэн хүү 172,278 төгрөг. Иймд Ч.Ч зээлийн гэрээний үүргийн гүйцэтгэлд нийт 23,292,132 төгрөгийг гаргуулж өгнө үү  гэжээ.

Хариуцагч Д аймгийн З сум, .-р баг, Т .... тоотод оршин суух, Б овогт Ч.Ч /РД: ......., утас: ......../ нь шүүхэд ирүүлсэн тайлбартаа: Хариуцагч Ч.Ч би К банк ХК-аас гаргасан нэхэмжлэлтэй танилцлаа. Би зээл авсан нь үнэн. Нэхэмжилж байгаа нэхэмжлэлийн үнийн дүн нийт 23,292,132 төгрөгийг төлөхийг хүлээн зөвшөөрч байна. Иймд хэргийг хялбаршуулсан журмаар шийдэж өгнө үү гэжээ.

                                                ҮНДЭСЛЭХ нь:

Нэхэмжлэгч К банк ХК нь хариуцагч Ч.Ч холбогдуулан зээлийн гэрээний үүрэгт нийт 23,292,132 төгрөг гаргуулахаар тус шүүхэд нэхэмжлэлийн шаардлага гаргажээ.

Хэрэг хянан шийдвэрлэх ажиллагааны явцад хариуцагч Ч.Ч нь зээлийн 23,292,132 төгрөг гаргуулах тухай нэхэмжлэлийн шаардлагыг төлөхөө хүлээн зөвшөөрсөн байна.

Хариуцагчийн нэхэмжлэлийн шаардлагыг хүлээн зөвшөөрсөн нь хуульд харшлаагүй, гуравдагч этгээдийн эрх, хуулиар хамгаалагдсан ашиг сонирхлыг хөндөөгүй байна. Иймд хариуцагчийн нэхэмжлэлийн шаардлагыг хүлээн зөвшөөрснийг баталж хэргийг хялбаршуулсан журмаар хянан шийдвэрлэх үндэслэлтэй байна.

Иргэний хэрэг шүүхэд хянан шийдвэрлэх тухай хуулийн 74, 75, 123 дугаар зүйлийн 123.1-д заасныг удирдлага болгон ЗАХИРАМЖЛАХ нь:

1. Нэхэмжлэгч К банк ХК-ийн нэхэмжлэлтэй, хариуцагч Ч.Ч холбогдох зээлийн гэрээний үүрэгт нийт 23,292,132 төгрөг гаргуулах тухай нэхэмжлэлийн шаардлагыг хариуцагч Ч.Ч нь төлж барагдуулахаа хүлээн зөвшөөрснийг баталж, хэргийг хэрэгсэхгүй болгосугай.

 2. Иргэний хэрэг шүүхэд хянан шийдвэрлэх тухай хуулийн 57, 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-т зааснаар нэхэмжлэгч байгууллагын улсын тэмдэгтийн хураамжид төлсөн 274,411 төгрөгийн 50 хувийг улсын орлогод хэвээр үлдээж, үлдэх 50 хувь буюу 137,205.5 төгрөгийг улсын орлогоос, үлдэх улсын тэмдэгтийн хураамжийн 50 хувь болох 137,205.5 төгрөгийг хариуцагчаас гаргуулж нэхэмжлэгч байгууллагад олгосугай.

3. Хариуцагч нь шүүгчийн захирамжийг сайн дураар биелүүлээгүй бол шүүхийн шийдвэр гүйцэтгэлийн журмаар албадан гүйцэтгэхийг мэдэгдсүгэй.

4. Энэ захирамжид зохигчид давж заалдах, гомдол гаргах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

 

                 ШҮҮГЧ                             Э.БОЛОРМАА