МОНГОЛ УЛСЫН НЭРИЙН ӨМНӨӨС

 

 

Нийслэл дэх Захиргааны хэргийн анхан шатны шүүхийн шүүх хуралдааныг шүүгч Б.Ууганзаяа би даргалж, шүүх хуралдааны 01 дүгээр танхимд нээлттэй хийсэн шүүх хуралдаанаар,

Нэхэмжлэгч: Ч ХХК /РД:5860725/,

Нэхэмжлэгчийн төлөөлөгч: Д.Б,

Хариуцагч: Чингэлтэй дүүргийн худалдан авах ажиллагааны алба,

Хариуцагч: Чингэлтэй дүүргийн Засаг даргын 2026 оны 03 дугаар сарын 31-ний өдрийн дугаар захирамжаар байгуулагдсан Үнэлгээний хороо,

Хариуцагч нарын итгэмжлэгдсэн төлөөлөгч: Б.М нарын хоорондын Чингэлтэй дүүргийн Худалдан авах ажиллагааны газрын 2026 оны 05 дугаар сарын 13-ны өдрийн дугаартай Мэдэгдэл хүргүүлэх тухай албан бичгийн Нийтийн зориулалттай орон сууцны дээвэр, фасад засварын ажил Багц-1-ийг шийдвэрлэсэн хэсгийг, мөн Нийтийн зориулалттай орон сууцны дээвэр, фасад засварын ажил Багц-1-ийг сонгон шалгаруулах үнэлгээний хорооны тэмдэглэлийг тус тус хууль бус болохыг тогтоож хүчингүй болгуулах шаардлага бүхий захиргааны хэргийг хянан хэлэлцэв.

Шүүх хуралдаанд: нэхэмжлэгчийн итгэмжлэгдсэн Д.Б, нэхэмжлэгчийн өмгөөлөгч Б.М, шүүх хуралдааны нарийн бичгийн дарга Б.Хүслэн нар оролцов.

ТОДОРХОЙЛОХ нь:

 

Нэг. Нэхэмжлэлийн шаардлага:

1.1. Чингэлтэй дүүргийн Худалдан авах ажиллагааны газрын 2026 оны 05 дугаар сарын 13-ны өдрийн дугаартай Мэдэгдэл хүргүүлэх тухай албан бичгийн Нийтийн зориулалттай орон сууцны дээвэр, фасад засварын ажил Багц-1-ийг шийдвэрлэсэн хэсгийг, мөн Нийтийн зориулалттай орон сууцны дээвэр, фасад засварын ажил Багц-1-ийг сонгон шалгаруулах үнэлгээний хорооны тэмдэглэлийг тус тус хууль бус болохыг тогтоож хүчингүй болгуулах тухай

Хоёр. Хэргийн үйл баримт, процессын түүхийн талаар:

2.1. Чингэлтэй дүүргийн Засаг даргын 2026 оны 03 дугаар сарын 31-ний өдрийн Үнэлгээний хороо байгуулах тухай дугаар захирамжаар Нийслэлийн төсвийн хөрөнгөөр 2026 онд хэрэгжүүлэх хөрөнгө оруулалтын төсөл, арга хэмжээ-г гүйцэтгэгчийг сонгон шалгаруулах Үнэлгээний хороог байгуулжээ.

2.2. Үнэлгээний хороо 2026 оны 03 дугаар сарын 31-ний өдөр хуралдаж, тендерийн баримт бичгийг баталж, мөн өдөр тендер шалгаруулалтын зарлалыг байршуулжээ. Уг тендерийн багц 1-т нэхэмжлэгч Ч ХХК оролцсон байна.

2.3. Үүний дараа Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах үнэлгээний хорооны 2026 оны 05 дугаар сарын 07-ны өдрийн 02 дугаар тэмдэглэлээр ... материал ирүүлсэн 4 оролцогчоос хуулийн 28 дугаар зүйлийн 28.1.3 дахь заалтад зааснаар татгалзаж шийдвэрлэжээ. Чингэлтэй дүүргийн Худалдан авах ажиллагааны газрын 2026 оны 05 дугаар сарын 13-ны өдрийн дүгээр албан бичгээр Нийтийн зориулалттай орон сууцны дээвэр, фасад засварын ажил Багц 1-д тендерийн баримт бичигт шаардсан шаардлагыг бүрэн хангах оролцогч байхгүй тул хуулийн 28 дугаар зүйлийн 28.1.3 дахь хэсэгт заасны дагуу бүх тендерээс татгалзаж дээрх төсөл, арга хэмжээг дахин зарлахаар шийдвэрлэснийг тендерт оролцогч нарт мэдэгджээ.

2.4.Дээрх маргаан бүхий тендер шалгаруулалттай холбоотой асуудлаар Ч ХХК-ийн зүгээс Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 59 дугаар зүйлд заасны дагуу Сангийн яаманд гомдол гаргасан байна.

2.5.Дээрх гомдлыг Сангийн яам хүлээн авч хянаад, 2026 оны 05 дугаар сарын 25-ны өдрийн Гомдол хянасан тухай ******* дугаар албан бичгээр ... Ч ХХК-ийн ирүүлсэн 2023, 2024 оны ижил төстэй гэрээний мэдээлэл нь тендер шалгаруулалтын баримт бичгийн өгөгдлийн хүснэгтэд заасан 2023, 2024, 2025 онуудад багц тус бүрийн батлагдсан төсөвт өртгийн үнийн дүнгийн 50 хувиас багагүй төсөвт өртөгтэй ижил төстэй Барилга угсралтын ажил, фасад засварын ажил, дээвэр засварын ажлын гүйцэтгэгчээр ажилласан байх шаардлагад нийцэж байх боловч 2025 онд хийж гүйцэтгэсэн ижил төстэй ажлын гэрээний мэдээлэл ирүүлээгүй байх тул 2025 оны ижил төстэй ажил ирүүлээгүй гэж татгалзсан захиалагчийн шийдвэр үндэслэлтэй байна гээд, тендер шалгаруулалтыг хууль тогтоомжид заасны дагуу цааш үргэлжлүүлэхээр шийдвэрлэжээ.

2.6. Улмаар нэхэмжлэгч Ч ХХК-иас Чингэлтэй дүүргийн Худалдан авах ажиллагааны албанд холбогдуулан Сангийн яамны 2026 оны 05 дугаар сарын 25-ны өдрийн №******* дугаарт Гомдол хянасан тухай шийдвэр, мөн Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн дугаартай Мэдэгдэл хүргүүлэх тухай албан бичгийн Нийтийн зориулалттай орон сууцны дээвэр, фасад засварын ажил Багц-1-ийг шийдвэрлэсэн хэсгийг тус тус хууль бус болохыг тогтоож, хүчингүй болгуулах шаардлага бүхий нэхэмжлэл гаргасныг тус шүүхийн шүүгчийн 2026 оны 06 дугаар сарын 04-ний өдрийн дугаар Нэхэмжлэлийн зарим хэсэгт захиргааны хэрэг үүсгэж, үлдэх хэсгийг хүлээн авахаас татгалзах тухай захирамжаар Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн дугаар Мэдэгдэл хүргүүлэх тухай албан бичгийн Нийтийн зориулалттай орон сууцны дээвэр, фасад засварын ажил Багц-1-ийг шийдвэрлэсэн хэсгийг хууль бус болохыг тогтоож, хүчингүй болгуулах шаардлага бүхий нэхэмжлэлээр захиргааны хэрэг үүсгэж хэрэг хянан шийдвэрлэх ажиллагааг явуулсан.

2.7. Хэрэг хянан шийдвэрлэх ажиллагааны явцад нэхэмжлэгчээс Нийтийн зориулалттай орон сууцны дээвэр, фасад засварын ажил Багц-1-ийг сонгон шалгаруулах Үнэлгээний хорооны тэмдэглэлийг хууль бус болохыг тогтоож, хүчингүй болгуулах гэж нэхэмжлэлийн шаардлагаа ихэсгэсэн байна.

Гурав. Нэхэмжлэлийн үндэслэл:

3.1. Нэхэмжлэгчээс шүүхэд гаргасан нэхэмжлэлийн үндэслэлдээ: ...Ч ХХК нь Чингэлтэй дүүргийн Худалдан авах ажиллагааны албанаас зарласан Нийтийн зориулалттай орон сууцны дээвэр, фасад засварын ажил Багц-1 Орон сууцны дээвэр, фасад засвар /Чингэлтэй дүүрэг, 1 дүгээр хороо, 41,23 дугаар байрны фасад засвар, М100-р байрны дээвэр засвар/ тендерт оролцсон болно.

3.2. Гэвч Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн дугаартай Мэдэгдэл хүргүүлэх тухай албан бичгээр манай саналаас 2023-2025 онуудад тус бүрд төсөвт өртгийн 50 хувиас дээш ижил төстэй ажил гүйцэтгэсэн байх шаардлага хангаагүй гэж үзэж татгалзсан.

3.3. Гэтэл тендер шалгаруулалтын явцад дараах хууль зөрчсөн үйл ажиллагаа гарсан. Үүнд: Тус сонгон шалгаруулалтын ТШӨХ-д тодруулбал ТШЗ 19.2-т Ижил төстэй ажил гүйцэтгэсэн туршлага шаардана. Сүүлийн 3 жил буюу 2023, 2024, 2025 онуудад багц тус бүрийн батлагдсан төсөвт өртгийн үнийн дүнгийн 50 хувиас багагүй төсөвт өртөгтэй ижил төстэй Барилга угсралтын ажил, фасад засварын ажил, дээвэр засварын ажил гүйцэтгэгчээр ажилласан байна гэж заасан нь жил тус бүрд гэж заагаагүй. Иймд Захиргааны хэрэг шүүхэд хянан шийдвэрлэх тухай хуулийн дагуу нэхэмжлэлийн шаардлагыг гаргаж байна гэжээ.

3.4. Нэхэмжлэгчийн төлөөлөгч Д.Б шүүх хуралдаанд гаргасан тайлбартаа: Манай компани үүсгэн байгуулагдаад нийт 10 жил болсон. Тухайлбал, барилга угсралт, тээвэр, фасадын засвар хийдэг үндэсний үйлдвэрлэгч компани. Чингэлтэй дүүргийн Худалдан авах ажиллагааны газраас зарласан Чингэлтэй дүүргийн дээвэр засварын ажил багц 1-д оролцож хууль, дүрэм, журмын дагуу бичиг баримтаа бүрдүүлж өгсөн. Тендерийн шалгаруулалтын өгөгдлийн хүснэгтэд 3 жил тус бүр гэсэн 1 ч үг, өгүүлбэр, үсэг байгаагүй. Гэтэл манай компанийн энэ үндэслэлээр тендер сонгон шалгаруулалтаас хассан. Энэхүү шийдвэртэй санал нийлэхгүй байгаа учраас шүүхэд хандаж байна. гэв.

Дөрөв. Хариуцагчийн хариу тайлбар, татгалзал:

4.1. Хариуцагчаас шүүхэд бичгээр ирүүлсэн хариу тайлбартаа: ...Чингэлтэй дүүргийн Засаг даргын Тамгын газраас 2026 оны 03 дугаар сарын 27-ны өдөр Худалдан авах ажиллагаа зохион байгуулах тухай албан бичиг ирүүлсэн. 2026 оны 03 дугаар сарын 31-ний Чингэлтэй дүүргийн Засаг даргын Үнэлгээний хороо байгуулах тухай дугаар тоот захирамжаар үнэлгээний хороо байгуулагдан, Нийслэлийн Засаг даргын Эрх шилжүүлэх тухай 2026 оны 02 дугаар сарын 10-ны өдрийн дугаар захирамжаар Нийслэлийн төсвийн хөрөнгөөр 2026 онд санхүүжигдэх Нийтийн зориулалттай орон сууцны дээвэр, фасад засварын ажил (Улаанбаатар хот, Чингэлтэй дүүрэг) ажлыг 2026 оны 03 дугаар сарын 31-ний өдөр худалдан авах ажиллагааг Төрийн худалдан авах ажиллагааны цахим системээр нээлттэй зарласан.

4.2. Тус тендер шалгаруулалтын явцад Монгол улсын Засгийн газрын хэрэгжүүлэгч агентлаг Монополын эсрэг газрын 2026 оны 04 дүгээр сарын 07-ны ******* дугаартай тендер түдгэлзүүлэх тухай албан бичиг ирсний дагуу холбогдох баримт бичгийг хүргүүлж 2026 оны 04 дүгээр сарын 13-ны ******* дугаартай албан бичгээр Тендерийн баримт бичиг хянасан бөгөөд тус тендер шалгаруулалтыг үргэлжлүүлэн явуулахыг мэдэгдсэн тухай албан бичиг хүлээн авч тендер шалгаруулалтыг үргэлжлүүлсэн. 2026 оны 04 дүгээр сарын 28-ны өдрийн 09 цаг 10 минутад нээлтийг хийхэд Багц 1 тендерт нийт 4 оролцогч үнийн санал ирүүлсэн.

4.3. 2026 оны 05 дугаар сарын 07-ны өдөр оролцогчдын материалд хуульд заасан шаардлагыг хангасан эсэхэд үнэлгээ хийж Ч ХХК-ийн тендер туршлагын шалгуур үзүүлэлт болох ижил төстэй ажил сүүлийн 3 жил 2023, 2024, 2025 онуудад багц тус бүрийн батлагдсан төсөвт өртгийн 50 хувиас багагүй ижил төстэй дээвэр, фасад, барилга угсралтын ажлын гүйцэтгэгчээр ажилласан байна гэж тендерийн баримт бичигт шаардсаныг 2023 оны ижил төстэй ажил төсөвт өртгийн 50 хувьд хүрэхгүй мөн, 2025 оны ижил төстэй ажил ирүүлээгүй тул шаардлагад нийцээгүй гэж үнэлгээний хорооны гишүүд 100 хувь санал нэгдэв. Мөн бусад гурван оролцогчдын материал шаардлагад нийцээгүй тул Багц-1 тендерээс татгалзаж шийдвэрлэсэн. Иймд дээрх тендер сонгон шалгаруулалтын үйл ажиллагаа хуулийн дагуу зохион байгуулагдаж дууссан тул нэхэмжлэлийн шаардлагаар тодорхойлогдох нэхэмжлэлийн шаардлагыг бүхэлд нь хэрэгсэхгүй болгож шийдвэрлэж өгнө үү гэжээ.

4.4. Хариуцагчийн итгэмжлэгдсэн төлөөлөгч Б.М шүүх хуралдаанд гаргасан нэмэлт тайлбартаа: Манайх анх тендерийн баримт бичгийг Үнэлгээний хороогоор батлаад цахим системд урилгаа нийтэлсэн. Нэхэмжлэгч компани 2026 оны 04 дүгээр сарын 13-ны өдөр Монополын эсрэг газарт ******* ХХК-иас ТШЗ 19.2 буюу туршлага дээр сүүлийн 3 жил буюу 2023, 2024, 2025 онуудад батлагдсан төсөвт өртгийн үнийн дүнгийн 5-аас багагүй төсөвт өртөгтэй ижил төстэй барилга угсралтын ажил, тусгай засвар, тээвэр засварын ажлыг гүйцэтгэгчээр ажилласан байна гэж заасан нь хуульд нийцэхгүй байна гэж гомдол гаргасан. Үүний дагуу манайх тендерийн баримт бичиг болон холбогдох материалуудаа Монополын эсрэг газарт явуулж хянуулсан. Монополын эсрэг газраас захиалагч, гэрээний үүрэг гүйцэтгэхэд сонирхогч этгээд болон оролцогчдод тавигдах зайлшгүй шаардлагад үндэслэн санхүүгийн болон техникийн чадавх, туршлагын талаар хангавал зохих доод шаардлага, шалгуур үзүүлэлтийг тендер шалгаруулалтын баримт бичигт заана гэж тус тус заасантай нийцэж байна, иймд тус тендер шалгаруулалтыг үргэлжлүүлэн явуулахыг мэдэгдэж байна гэж хариу ирүүлсэн. Нэхэмжлэгчийн төлөөлөгч тус бүр гэдэг үг байхгүй гэж тайлбарлалаа. Гэхдээ сүүлийн 3 жил буюу 2023, 2024, 2025 онуудад гэдэг нь ерөнхийдөө тус бүр гэсэн утгыг илэрхийлж байгаа юм. Манайх нийт оролцогчдоос цахим системээрээ дамжуулж тодруулга авч энэ асуудлыг тодорхой тайлбарласан. Мөн манай дээд шатны байгууллага болон Монополын эсрэг газар, Сангийн яамнаас манай шийдвэрийг үндэслэлтэй гэж үзсэн учраас нэхэмжлэлийн шаардлагыг бүхэлд нь хэрэгсэхгүй болгож өгнө үү. гэв.

 

ҮНДЭСЛЭХ нь:

1.  Шүүх нэхэмжлэл, түүний үндэслэл, нэхэмжлэгч, хариуцагчийн итгэмжлэгдсэн төлөөлөгч нарын зүгээс гаргасан тайлбар, хэрэгт цугларсан нотлох баримтуудыг судлан үзэж, дараах үндэслэлээр нэхэмжлэгчийн гаргасан нэхэмжлэлийг бүхэлд нь хэрэгсэхгүй болгож шийдвэрлэлээ.

2. Анх нэхэмжлэгч Ч ХХК-иас Чингэлтэй дүүргийн Худалдан авах ажиллагааны албанд холбогдуулан Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн мэдэгдэл хүргүүлэх тухай дүгээр албан бичгийн Нийтийн зориулалттай орон сууцны багц-1-ийг шийдвэрлэсэн хэсгийг хууль бус болохыг тогтоож хүчингүй болгуулах шаардлага бүхий нэхэмжлэлийг гаргасан. Хэрэг хянан шийдвэрлэх ажиллагааны явцад нэхэмжлэгчээс нэхэмжлэлийн шаардлагаа Чингэлтэй дүүргийн Худалдан авах ажиллагааны албаны Үнэлгээний хороонд холбогдуулан Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах Үнэлгээний хорооны 2026 оны 05 дугаар сарын 07-ны өдрийн 2 дугаар тэмдэглэлийн Багц 1-ийн шийдвэрлэсэн хэсгийг хууль бус болохыг тогтоож, хүчингүй болгуулах гэж нэмэгдүүлсэн болно.

2.1. Хэрэгт авагдсан баримтуудаас үзэхэд, нийслэлийн Засаг даргын 2026 оны 02 дугаар сарын 10-ны өдрийн дугаар захирамжаар ... Нийслэлийн төсвийн хөрөнгөөр 2026 онд санхүүжүүлэх Чингэлтэй дүүрэгт хэрэгжүүлэх хөрөнгө оруулалтын төсөл, арга хэмжээг хавсралтаар баталж, уг төсөл, арга хэмжээний худалдан авах ажиллагааны эрхийг Чингэлтэй дүүргийн Засаг даргад шилжүүлэн, худалдан авах ажиллагааг холбогдох хууль, журамд нийцүүлэн зохион байгуулж, үр дүнг танилцуулж ажиллахыг даалгаж шийдвэрлэсэн байх бөгөөд үүний хавсралтад Нийтийн зориулалттай орон сууцны дээвэр, фасад засварын ажил орсон байна.

2.2. Улмаар Чингэлтэй дүүргийн Засаг даргын 2026 оны 03 дугаар сарын 31-ний өдрийн дугаар захирамжаар Нийслэлийн төсвийн хөрөнгөөр 2026 онд хөрөнгө оруулалтын төсөл, арга хэмжээг нэгдүгээр, гүйцэтгэгчийг сонгон шалгаруулах үнэлгээний хороог хоёрдугаар хавсралтаар тус тус баталж, уг Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах үнэлгээний хороо 2026 оны 03 дугаар сарын 31-ний өдөр хуралдаж, тендерийн баримт бичгийг баталж, мөн өдөр тендер шалгаруулалтын зарлалыг байршуулжээ. Уг тендерийн багц 1-т нэхэмжлэгч Ч ХХК оролцсон байна.

2.3. Үүний дараа Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах үнэлгээний хорооны 2026 оны 05 дугаар сарын 07-ны өдрийн 02 дугаар тэмдэглэлээр ... материал ирүүлсэн 4 оролцогчоос хуулийн 28 дугаар зүйлийн 28.1.3 дахь заалтад зааснаар татгалзаж шийдвэрлэжээ. Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн дүгээр албан бичгээр Нийтийн зориулалттай орон сууцны дээвэр, фасад засварын ажил Багц 1-д тендерийн баримт бичигт шаардсан шаардлагыг бүрэн хангах оролцогч байхгүй тул хуулийн 28 дугаар зүйлийн 28.1.3 дахь хэсэгт заасны дагуу бүх тендерээс татгалзаж дээрх төсөл, арга хэмжээг дахин зарлахаар шийдвэрлэснийг тендерт оролцогч нарт мэдэгджээ. Үүний 3 дугаар хавсралтад зааснаар нэхэмжлэгч компанийг 2023 оны ажил төсөвт өртгийн 50 хувьд хүрээгүй, 2025 оны ижил төстэй ажил ирүүлээгүй гэжээ.

2.4. Дээрх шийдвэрийг эс зөвшөөрч нэхэмжлэгчээс гаргасан гомдлыг Сангийн яамнаас гуравдагч этгээдийн гомдлыг хянаад 2026 оны 05 дугаар сарын 25-ны өдрийн ******* дугаар албан бичгээр ...Ч ХХК-ийн ирүүлсэн 2023, 2024 оны ижил төстэй гэрээний мэдээлэл нь тендер шалгаруулалтын баримт бичгийн өгөгдлийн хүснэгтэд заасан 2023, 2024, 2025 онуудад багц тус бүрийн батлагдсан төсөвт өртгийн үнийн дүнгийн 50 хувиас багагүй төсөвт өртөгтэй ижил төстэй Барилга угсралтын ажил, фасад, засварын ажил дээвэр засварын ажлын гүйцэтгэгчээр ажилласан байх шаардлагад нийцэж байх боловч 2025 онд хийж гүйцэтгэсэн ижил төстэй ажлын гэрээний мэдээлэл ирүүлээгүй байх тул 2025 оны ижил төстэй ажил ирүүлээгүй гэж татгалзсан захиалагчийн шийдвэр үндэслэлтэй гэх хариуг өгчээ.

2.5. Түүнчлэн, Монополын эсрэг газрын 2026 оны 04 дүгээр сарын 13-ны өдрийн ******* дугаар ... Захиалагч дээрх шалгуур үзүүлэлтэд он тус бүр ижил төстэй ажил гүйцэтгэсэн гэж заасан нь хуулийн 17 дугаар зүйлийн 17.2.1-д Ажил гүйцэтгэх тендер шалгаруулалтын хувьд сүүлийн гурав хүртэл жилийн хугацаанд гүйцэтгэсэн ажлын жагсаалт, тэдгээрээс ижил төстэй ажлын өртөг, хугацаа, байршил, гэрээний үүргийг гүйцэтгэсэн болохыг нотлох баримт гэж, мөн үнийн дүнгээс 50 хувиас багагүй гэж заасан нь хуулийн 15 дугаар зүйлийн 15.1-д Захиалагч гэрээний үүрэг гүйцэтгэхэд сонирхогч этгээд болон оролцогчид тавигдах зайлшгүй шаардлагад үндэслэн санхүүгийн болон оролцогчид тавигдах зайлшгүй шаардлагад үндэслэн санхүүгийн болон техникийн чадавх, туршлагын талаар хангавал зохих доод шаардлага, шалгуур үзүүлэлтийг тендер шалгаруулалтын баримт бичигт заана гэж тус тус заасантай нийцэж байна гэх хариуг Чингэлтэй дүүргийн Худалдан авах ажиллагааны албанд ирүүлсэн үйл баримт тогтоогдож байна.

2.6. Нэхэмжлэгчээс шүүхэд гаргасан нэхэмжлэлийн шаардлагын үндэслэлээ ...ТШЗ 19.2-т Ижил төстэй ажил гүйцэтгэсэн туршлага шаардана. Сүүлийн 3 жил буюу 2023, 2024, 2025 онуудад багц тус бүрийн батлагдсан төсөвт өртгийн үнийн дүнгийн 50 хувиас багагүй төсөвт өртөгтэй ижил төстэй барилга угсралтын ажил, фасад засварын ажил, дээвэр засварын ажил гүйцэтгэгчээр ажилласан байна гэж заасан нь жил тус бүр гэж заагаагүй, бусад хоёр компанийг мөн уг үндэслэлээр татгалзсан, бид нар 1 жил гэж ойлгосон гэж,

Хариуцагчаас...сүүлийн 3 жил буюу онуудад гэж заасан байгаа тул он тус бүр гэж ойлгоно. Энэ талаар Монополын эсрэг газраас хянаад он тус бүр ижил төстэй ажил гүйцэтгэсэн гэж заасан нь хуульд нийцсэн гэх албан бичгийг ирүүлж байсан гэж тус тус тайлбарлан маргасан.

2.7. Захиргааны хэрэг шүүхэд хянан шийдвэрлэх тухай хуулийн 1 дүгээр зүйлийн 1.1-д Энэ хуулийн зорилт нь хүн, хуулийн этгээдээс захиргааны байгууллагын хууль бус үйл ажиллагааны улмаас зөрчигдсөн, эсхүл зөрчигдөж болзошгүй эрх, хууль ёсны ашиг сонирхлоо хамгаалуулахаар, ... нэхэмжлэлийн дагуу захиргааны хэргийг шүүхэд хянан шийдвэрлэхтэй холбогдсон харилцааг зохицуулахад оршино гэж зааснаар захиргааны хэргийн шүүхийн гол зорилго нь захиргааны байгууллагын хууль бус шийдвэрийн улмаас зөрчигдсөн нэхэмжлэгчийн эрх ашгийг сэргээх, хууль ёсны ашиг сонирхлыг хамгаалах зарчимтай.

2.8. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 17 дугаар зүйлийн 17.1-д Захиалагч техникийн чадавх болон туршлагын шаардлагыг хангах нотлох баримт ирүүлэхийг оролцогчоос шаардаж болно, 17.2-д Техникийн чадавх, туршлагын талаарх мэдээллийг дараах баримт бичгээр нотолж болно, 17.2.1-д ажил гүйцэтгэх тендер шалгаруулалтын хувьд сүүлийн гурав хүртэл жилийн хугацаанд гүйцэтгэсэн ажлын жагсаалт, тэдгээрээс ижил төстэй ажлын өртөг, хугацаа, байршил, гэрээний үүргийг гүйцэтгэсэн болохыг нотлох баримт, 17.4-д Оролцогч захиалагчийн тогтоосон техникийн чадавх болон туршлагын шаардлагыг хангасан байна, 26.4-д Захиалагч тендерийг тендер шалгаруулалтын баримт бичигт заасан шаардлагад нийцэх эсэхийг дараах байдлаар хянан үзнэ, 26.4.1-д энэ хуулийн 15, 16, 17 дугаар зүйлд заасан чадавхын болон туршлагын доод шаардлагыг хангасан байх, 26.4.4-д тендер шалгаруулалтын баримт бичигт заасан бусад нөхцөл, шаардлага хангасан байх, 26.9-д Тендер шалгаруулалтын баримт бичгийн бүх шаардлагыг нэгэн зэрэг хангасан тендерийг шаардлагад нийцсэн тендер гэж үзнэ, 28 дугаар зүйлийн 28.1-д Захиалагч тендер тус бүрд дараах шийдвэрээс аль тохирохыг гаргана, 28.1.3-д шаардлагад нийцээгүй тендер ирүүлсэн оролцогчийн тендерээс татгалзах гэж, тендер шалгаруулалтын баримт бичгийн өгөгдлийн хүснэгтийн 2.1-д Багц-1 төсөвт өртөг-*******,*******,******* төгрөг гэж, тендер шалгаруулалтын зааварчилгааны 19.2-д 1. Ижил төстэй ажил гүйцэтгэсэн туршлага: Шаардана. Сүүлийн 3 жил буюу 2023, 2024, 2025 онуудад багц тус бүрийн батлагдсан төсөвт өртгийн үнийн дүнгийн 50 хувиас багагүй төсөвт өртөгтэй ижил төстэй Барилга угсралтын ажил, фасад засварын ажил, дээвэр засварын ажлын гүйцэтгэгчээр ажилласан байна. Ижил төстэй ажил гүйцэтгэсэн туршлагыг нотлох дараах баримт бичиг ирүүлнэ. Сүүлийн 3 жил буюу 2023, 2024, 2025 онуудад гүйцэтгэсэн ижил төстэй ажлын гэрээний талаар V бүлгийн маягт 2, 3-ын дагуу бэлтгэж ирүүлнэ. Ижил төстэй ажил гүйцэтгэснийг нотлох дараах баримт бичиг ирүүлнэ. Үүнд: Ажил гүйцэтгэсэн гэрээний хуулбар, эрх бүхий байгууллагын ашиглалтад хүлээн авсан комиссын дүгнэлт эсхүл акт гэж тус тус заажээ.

2.9. Дээрх хуулийн зохицуулалтаас үзэхэд туршлагын шаардлагыг хангах нотлох баримтыг ирүүлэхийг тендерт оролцогчоос шаардаж болох бөгөөд уг шаардлагыг ажил гүйцэтгэсэн ажлын жагсаалт, гэрээ, үүргээ гүйцэтгэсэн болохыг нотолсон бусад баримтаар тогтоохоор байх бөгөөд тендерт оролцогч нь туршлагын шаардлагыг хангасан байхаас гадна тендер шалгаруулалтын баримт бичигт заасан нөхцөл, шаардлагыг хангасан байх шаардлага тавигджээ. Мөн шаардлагад нийцээгүй тендер ирүүлсэн тохиолдолд оролцогчийн тендерээс татгалзаж болохоор байна.

2.10. Маргаан бүхий энэ тохиолдолд Ч ХХК-иас ижил төстэй ажлын туршлага нотлохоор 2024 оны 06 дугаар сарын 12-ны өдрийн Э******* ХК-тай байгуулсан гэрээ, Уурхайн бүсийн хамгаалалтын хашаа суурилуулах ажил гүйцэтгэх гэрээ, техникийн комиссын дүгнэлт, 2023 оны 11 дүгээр сарын 06-ны ******* ХХК-тай байгуулсан ажил гүйцэтгэх гэрээ, барилга угсралтын ажлыг ашиглалтад оруулах комиссын дүгнэлтийг тус тус өгсөн байна. Уг баримтуудаас үзэхэд 2023 оны ажил төсөвт өртгийн 50 хувьд хүрээгүй гэж үзэхээргүй байх төдийгүй 2025 оны ижил төстэй ажил ирүүлээгүй болох нь тогтоогдож байна.

2.11. Нэхэмжлэгчээс ...жил тус бүр гэж заагаагүй гэж маргах боловч тендер шалгаруулалтын зааварчилгааны 19.2-д ижил төстэй ажил гүйцэтгэсэн туршлагыг заавал шаардахаар сүүлийн 3 жил буюу 2023, 2024, 2025 онуудад гэж он тус бүрийг тодорхой нэрлэн заасан байна. Үүнийг 3 жилийн ижил төстэй ажлуудаас сонгох буюу 2022, 2023, 2024 онуудын аль нэг жилд гэдэг байдлаар ойлгохооргүй байх төдийгүй бусад тухайн багц 1 тендерт оролцогчдыг мөн уг үндэслэлээр татгалзаж шийдвэрлэсэн байх тул энэхүү үндэслэлээр хариуцагчийг буруутгаж, маргаан бүхий шийдвэрийг хүчингүй болгох нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 5 дугаар зүйлийн 5.1-д заасан өрсөлдөх тэгш боломжтой, ил тод, үр ашигтай, хэмнэлттэй, хариуцлагатай байх зарчимд нийцэхгүй.

2.12. Өөрөөр хэлбэл нэхэмжлэгч нь Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах тендер шалгаруулалтын зааварчилгаанд заасан шалгуурыг хангаагүй байх тул маргаан бүхий актын улмаас нэхэмжлэгчийн эрх, хууль ёсны ашиг сонирхол зөрчигдсөн гэж үзэхээргүй байна.

2.13. Түүнчлэн, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 4 дүгээр зүйлийн 4.1.14-д сонирхогч этгээд гэж тендер шалгаруулалтын баримт бичигт зааснаар оролцох сонирхлоо илэрхийлсэн, эсхүл энэ хуульд заасан урилга хүлээн авсан аж ахуй эрхлэгчийг, 19 дүгээр зүйлийн 19.1-д Сонирхогч этгээд тендер шалгаруулалтын баримт бичигт заасан асуудлаар тодруулга авах хүсэлтийг захиалагчид тендерийн нээлтээс ажлын таваас доошгүй өдрийн өмнө бичгээр гаргаж болно, 19.2-д Захиалагч тодруулга авах хүсэлт хүлээн авснаас хойш тодруулгыг тендер хүлээн авах эцсийн хугацаанаас ажлын хоёроос доошгүй өдрийн өмнө бичгээр гаргана, 19.3-д Тодруулгыг цахим системд нээлттэй байршуулснаар сонирхогч этгээдэд хүргүүлсэнд тооцно, 19.4-д Захиалагч тендер ирүүлэхийн өмнө сонирхогч этгээд, түүний төлөөлөлтэй тендер бэлтгэхтэй холбоотой асуултад хариулт өгөх уулзалт зохион байгуулах, эсхүл ажлын талбайтай танилцуулах бол энэ тухай тендер шалгаруулалтын баримт бичигт заана гэж зааснаар тендер шалгаруулалтын баримт бичигт заасан асуудлаар тодруулга авч болохоор заасан байхад уг эрхээ хэрэгжүүлээгүй байна.

2.14. Иймд дээрх үндэслэлээр нэхэмжлэгч Ч ХХК-иас Чингэлтэй дүүргийн Худалдан авах ажиллагааны алба, тус албаны Үнэлгээний хороонд холбогдуулан гаргасан Чингэлтэй дүүргийн Худалдан авах ажиллагааны газрын 2026 оны 05 дугаар сарын 13-ны өдрийн мэдэгдэл хүргүүлэх тухай дүгээр албан бичгийн Нийтийн зориулалттай орон сууцны багц 1-ийг шийдвэрлэсэн хэсэг, Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах Үнэлгээний хорооны 2026 оны 05 дугаар сарын 07-ны өдрийн 2 дугаар тэмдэглэлийн Багц 1-ийн шийдвэрлэсэн хэсгийг тус тус хууль бус болохыг тогтоож, хүчингүй болгуулах нэхэмжлэлийг бүхэлд нь хэрэгсэхгүй болгож шийдвэрлэв.

Захиргааны хэрэг шүүхэд хянан шийдвэрлэх тухай хуулийн 47 дугаар зүйлийн 47.1-д нөхөн төлүүлэх шүүхийн зардлыг нэхэмжлэл бүрэн хангагдсан тохиолдолд хариуцагчаар, нэхэмжлэлийг хэрэгсэхгүй болгосон тохиолдолд нэхэмжлэгчээр нөхөн төлүүлнэ гэж заасан тул нэхэмжлэгчээс мөн хуулийн 48 дугаар зүйлийн 48.1-д зааснаар урьдчилан төлсөн тэмдэгтийн хураамжийн төлбөрийг төсвийн орлогод хэвээр үлдээж шийдвэрлэв.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3, 106.3.14-д заасныг тус тус удирдлага болгон

ТОГТООХ нь:

1.   Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 17 дугаар зүйлийн 17.1, 17.4, 19 дүгээр зүйлийн 19.1, 26 дугаар зүйлийн 26.9, 28 дугаар зүйлийн 28.1, 28.1.3-д тус тус заасныг баримтлан Ч ХХК-иас гаргасан Чингэлтэй дүүргийн Худалдан авах ажиллагааны албаны 2026 оны 05 дугаар сарын 13-ны өдрийн мэдэгдэл хүргүүлэх тухай дүгээр албан бичгийн Нийтийн зориулалттай орон сууцны багц 1-ийг шийдвэрлэсэн хэсэг, Нийтийн зориулалттай орон сууцны дээвэр, фасад засварын ажил төсөл арга хэмжээний гүйцэтгэгчийг сонгон шалгаруулах Үнэлгээний хорооны 2026 оны 05 дугаар сарын 07-ны өдрийн 2 дугаар тэмдэглэлийн Багц 1-ийн шийдвэрлэсэн хэсгийг тус тус хууль бус болохыг тогтоож, хүчингүй болгуулах шаардлага бүхий нэхэмжлэлийг бүхэлд нь хэрэгсэхгүй болгосугай.

2.   Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.1-д зааснаар нэхэмжлэгчээс улсын тэмдэгтийн хураамжид урьдчилан төлсөн 70.200 төгрөгийг улсын орлогод хэвээр үлдээсүгэй.

Захиргааны хэрэг шүүхэд хянан шийдвэрлэх тухай хуулийн 113 дугаар зүйлийн 113.2-д зааснаар хэргийн оролцогчид, тэдгээрийн итгэмжлэгдсэн төлөөлөгч, өмгөөлөгч нь шийдвэрийг эс зөвшөөрвөл шийдвэрийг гардан авснаас хойш тав хоногийн дотор Захиргааны хэргийн давж заалдах шатны шүүхэд гомдол гаргах эрхтэй

 

 

 

 

ДАРГАЛАГЧ, ШҮҮГЧ Б.УУГАНЗАЯА