МОНГОЛ УЛСЫН НЭРИЙН ӨМНӨӨС

 

Өвөрхангай аймгийн Хархорин сум дахь Сум дундын шүүхийн Ерөнхий шүүгч Б.Сарантуяа даргалж, тус шүүхийн танхимд хийсэн иргэний шүүх хуралдаанаар:

Хүсэлт гаргагч: *******************************хүсэлттэй,

 

********************архины албадан эмчилгээнд явуулах тухай хүсэлтийг 2025 оны 11 дүгээр сарын 03-ны өдөр хүлээн авч хэргийг хянан хэлэлцэв.

 

Шүүх хуралдаанд: Хүсэлт гаргагчийн итгэмжлэгдсэн төлөөлөгч **************, бие даасан шаардлага гаргаагүй гуравдагч этгээд *****************, шүүх хуралдааны нарийн бичгийн дарга Н.Ням нар оролцов.

 

ТОДОРХОЙЛОХ нь:

 

Хүсэлт гаргагч ***************** нь шүүхэд гаргасан хүсэлтдээ:

***************** нь архи согтууруулах ундаа тогтмол хэрэглэж гудамж талбай, олон нийтийн газар танхайрч, бусдын амгалан тайван байдал алдагдуулж агсан согтуу тавьдаг удаа дараа саатуулагдсан эрүүлжүүлэгдсэн. Архинд донтох эмгэгийн 3 дугаар үе шаттай болох нь эрүүл мэндийн байгууллагын дүгнэлтээр тогтоогдсон тул албадан эмчилгээнд явуулах шийдвэрийг гаргаж өгнө үү.

 

Хүсэлт гаргагчийн итгэмжлэгдсэн төлөөлөгч нь шүүх хуралдаанд гаргасан тайлбартаа:

********************* эхнэрийн хүсэлтийн дагуу архины албадан эмчилгээнд явуулах талаар хамтарсан багийн хурал хуралдсан байгаа. Эхнэрийнх нь хүсэлт гаргасан үндэслэл нь ******************** архи согтууруулах ундааны зүйлийг өдөр болгон хэрэглэдэг. Архи согтууруулах ундааны зүйл хэрэглээд эхнэр, хүүхдээ дээрэлхэж зодно, хэл амаар доромжилдог, энэ талаар дуудлага мэдээлэл цагдаагийн хэлтэс дээр ирсэн байгаа. *************************нь одоо бага охинтойгоо, эхнэртэйгээ гурвуулаа амьдардаг. Том охин нь 9 дүгээр ангиа төгсөөд Улаанбаатар хотод коллежид сурч байгаа. Эмнэлгийн дүгнэлтээр архины хамаарлын 3-р зэрэгтэй байна гэсэн дүгнэлт гарсан. Тэгээд эмч нь архины албадан эмчилгээнд явж болно гэсэн дүгнэлт гаргасан байгаа. Иймд ****************** албадан эмчилгээнд явуулж өгнө үү гэсэн саналыг гаргаж байна гэв.

 

Бие даасан шаардлага гаргаагүй гуравдагч этгээд **************** нь шүүхэд гаргасан тайлбартаа:

Би архины албадан эмчилгээнд явмааргүй байна. Өчигдөр эмнэлэг дээр очоод үзүүлсэн чинь таны даралт 180 хүрсэн байна. Та даралтны эм уудаг уу гэхээр нь уудаггүй гэсэн чинь та ингэж явж болохгүй. Та эмнэлгийн хяналтад байгаа шүү дээ гэж хэлсэн. Тэгээд тэр эмч одоо эндээ таныг эмчилмээр байна ахаа гэж хэлсэн. Таны зүрх хатгаж өвддөг үү гэхээр нь өвддөг гэсэн чинь та одоо архиа боль таныг хэвтүүлээд эмчилмээр байна гэж хэлсэн гэв.

 

Нэхэмжлэгчээс Өвөрхангай аймгийн Хархорин сумын 3 дугаар багийн засаг даргын 2025 оны 09 дүгээр сарын 11-ний өдрийн 401 дугаартай тодорхойлолт, Өвөрхангай аймаг дахь Бүсийн оношилгоо эмчилгээний төвийн хэвлийн хөндийн эрхтэнүүдийн хэт авиан оношилгооны маягт, Өвөрхангай аймгийн БОЭТөвийн сэтгэц-Наркологийн тасгийн 2025 оны 02 дугаар сарын 25-ны өдрийн архины хамааралтай эсэхийг оношлох мичиганы сорил, эмч нарын хамтарсан үзлэгийн тэмдэглэл, 2025 оны 10 дугаар сарын 20-ны өдрийн согтуурах, мансуурах донтой эсэхийг тогтоох эрүүл мэндийн дүгнэлт, *******************************нарын иргэний үнэмлэхийн хуулбар, гэрлэсний бүртгэлгүй тухай лавлагаа, иргэний оршин суугаа газрын хаягийн бүртгэлийн лавлагаа, Өвөрхангай аймгийн Хархорин сумын Эрдэнэтолгой багийн хамтарсан багийн хурлын тэмдэглэл, Д.Батцэцэгийн Өвөрхангай аймгийн Цагдаагийн газрын харьяа Хархорин сум дахь сум дундын Цагдаагийн хэлтэст гаргасан өргөдөл, захиргааны, зөрчлийн шийдвэрлэлтийн бүртгэл зэргийг шүүхэд гаргаж өгсөн.

 

ҮНДЭСЛЭХ нь:

 

Хүсэлт гаргагч *********************** архины албадан эмчилгээнд явуулах тухай нэхэмжлэлийн шаардлагыг хангах үндэслэлтэй байна.

************ нь архинд донтох өвчтэй /3 дугаар зэрэг/, нийгмийн хэв журмыг зөрчин танхайрдаг, архидан согтуурдаг болох нь Өвөрхангай аймаг дахь Бүсийн оношилгоо эмчилгээний төвийн хэвлийн хөндийн эрхтэнүүдийн хэт авиан оношилгооны маягт, Өвөрхангай аймгийн БОЭТөвийн сэтгэц-Наркологийн тасгийн 2025 оны 02 дугаар сарын 25-ны өдрийн архины хамааралтай эсэхийг оношлох мичиганы сорил, эмч нарын хамтарсан үзлэгийн тэмдэглэл, 2025 оны 10 дугаар сарын 20-ны өдрийн согтуурах, мансуурах донтой эсэхийг тогтоох эрүүл мэндийн дүгнэлт, Өвөрхангай аймгийн Хархорин сумын Эрдэнэтолгой багийн хамтарсан багийн хурлын тэмдэглэл,***************Өвөрхангай аймгийн Цагдаагийн газрын харьяа Хархорин сум дахь сум дундын Цагдаагийн хэлтэст гаргасан өргөдөл, захиргааны, зөрчлийн шийдвэрлэлтийн бүртгэл, зохигчийн тайлбар, архинд донтох өвчтэй болохыг тогтоосон эмнэлгийн дүгнэлт зэрэг нотлох баримтуудаар тогтоогдож байна.

Согтуурах, мансуурах донтой хүнийг захиргааны журмаар албадан эмчлэх тухай хуулийн 8 дугаар зүйлийн 8.1-т Цагдаагийн байгууллага... ...албадан эмчилгээнд явуулах хүнийг шүүхэд шилжүүлнэ гэж, 3 дугаар зүйлийн 3.1-т Согтуурсан, мансуурсны улмаас өөртөө болон бусдад аюул учруулах эрсдэлтэй байдалд орсон хүн согтуурах, мансуурах донтой болох нь эрүүл мэндийн тусламж, үйлчилгээ үзүүлэх байгууллагын дүгнэлтээр тогтоогдсон боловч сайн дураараа эмчлүүлэхээс татгалзсан тохиолдолд шүүхийн шийдвэрээр албадан эмчилгээнд хамруулна. гэж тус тус заасан байна.

Иймд Өвөрхангай аймгийн Цагдаагийн газрын харьяа Хархорин сум дахь сум дундын Цагдаагийн хэлтсийн хүсэлтийг хүлээн авч, ************************** архины албадан эмчилгээнд явуулахыг хүссэн нэхэмжлэлийн шаардлагыг хангах нь зүйтэй.

Архинд донтох өвчтэй эсэхийг тогтоосон эмнэлгийн үзлэгээр дүгнэлт гаргасан эмч нарын баг ************** архины албадан эмчилгээнд явуулах шаардлагатай гэж дүгнэсэн, нэхэмжлэгч нь улсын тэмдэгтийн хураамж төлөхөөс чөлөөлөгдсөн болохыг тус тус дурдав.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлд заасныг тус тус удирдлага болгон

 

ТОГТООХ нь:

 

1. Согтуурах, мансуурах донтой хүнийг захиргааны журмаар албадан эмчлэх тухай хуулийн 3 дугаар зүйлийн 3.1, 9 дүгээр зүйлийн 9.1-т зааснаар **************************албадан эмчлүүлсүгэй.

 

2. Согтуурах, мансуурах донтой хүнийг захиргааны журмаар албадан эмчлэх тухай хуулийн 9 дүгээр зүйлийн 9.6-д зааснаар***************** албадан эмчлэх эмнэлэгт хүргэх ажиллагааг Шүүхийн шийдвэр гүйцэтгэх байгууллагаар гүйцэтгүүлсүгэй.

 

3. Согтуурах, мансуурах донтой хүнийг захиргааны журмаар албадан эмчлэх тухай хуулийн 9 дүгээр зүйлийн 9.7-д зааснаар ********************албадан эмчлэх тухай шийдвэр гарсан талаар түүний гэр бүлийн гишүүн, төрөл садангийн хүнд ажлын 5 өдрийн дотор мэдэгдэхийн ******************* даалгасугай.

 

4. Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч улсын тэмдэгтийн хураамжаас чөлөөлөгдсөн болохыг дурдсугай.

 

5. Согтуурах, мансуурах донтой хүнийг захиргааны журмаар албадан эмчлэх тухай хуулийн 17 дугаар зүйлийн 17.2-т зааснаар албадан эмчлэх хугацаа нь эмчлүүлэгчийн эмчилгээний үр дүнг харгалзан мэргэжлийн эмч нарын зөвлөгөөний дүгнэлтийг үндэслэн гаргасан шүүхийн шийдвэрээр дуусгавар болохыг дурдсугай.

 

6. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7-д зааснаар шийдвэр танилцуулан сонсмогц хүчинтэй болох ба шийдвэр хүчинтэй болсон өдрөөс хойш 14 хоногийн хугацаа өнгөрмөгц хуралдаанд оролцсон тал 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэй бөгөөд шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг мэдэгдсүгэй.

 

7. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар хүсэлт гаргагч нь анхан шатны шүүхийн шийдвэрийг гардан авснаас хойш 14 хоногийн дотор шийдвэр гарсан шүүхээр дамжуулан Өвөрхангай аймгийн Эрүү, Иргэний хэргийн давж заалдах шатны шүүхэд давж заалдах журмаар гомдол гаргах эрхтэй.

 

 

 

 

ДАРГАЛАГЧ, ЕРӨНХИЙ ШҮҮГЧ Б.САРАНТУЯА