Хариуцагч нэхэмжлэлийн шаардлагыг

                                 хүлээн зөвшөөрснийг баталж, хэргийг

                                            хэрэгсэхгүй болгох тухай

 

Дорноговь аймгийн Замын-Үүд сум дахь сум дундын шүүхийн шүүгч Э.Б  би, нэхэмжлэгч Х  ХК-ийн Замын-Үүд салбарын нэхэмжлэлтэй хариуцагч Б.О , Б.О нарт холбогдох зээлийн 11,052,688.21 төгрөг гаргуулах, төлөөгүй тохиолдолд үүргийг гүйцэтгэлийг барьцаа хөрөнгөөр хангуулах  тухай нэхэмжлэлийг 2026 оны 01 сарын 09-ний өдөр хүлээн авч 2026 оны 01 сарын 12-ны өдөр иргэний хэрэг үүсгэн хянаад

                                                     ТОДОРХОЙЛОХ нь:

Нэхэмжлэгч Дорноговь аймгийн Замын-Үүд сумын ..-р баг, .. байрлах, Х  банк ХК-ийн Замын-Үүд салбар /ХХД: .., РД: .., утас: ../ шүүхэд гаргасан нэхэмжлэлдээ: Зээлдэгч Б.О , Б.О  нар нь 2024 оны 11 дүгээр сарын 20-ний өдөр Х  Банктай 1390090275 дугаартай зээлийн гэрээ байгуулж 13,000,000 төгрөгийн зээлийг жилийн 24 хувийн хүүтэй, 36 сарын хугацаатай, Эргэлтийн хөрөнгө зориулалтаар авсан. Банк нь зээлдэгч Б.О-ийн Х  Банк дахь 5005719322 дугаартай дансанд 2024 оны 11 дугаар сарын 20-ны өдөр 13,000,000 төгрөгийг зээлийн төгрөгийг шилжүүлэн, гэрээгээр хүлээсэн үүргээ биелүүлсэн. Гэвч зээлдэгч нь зээлийн гэрээний гол нөхцөл болох гэрээний хавсралтад заасан зээлийн эргэн төлөлтийн хуваарийн дагуу сар бүр зээлийн төлбөрийг төлөх үүрэгтэй боловч 2025 оны 08 дугаар сараас хойш хугацаа хэтрэн гэрээний үүргээ зөрчиж эхэлсэн ба зээл, хүүний төлбөрийг төлөлгүй 106 хоног хугацаа хэтрүүлэн гэрээний үүргээ зөрчсөн. Банкны зүгээс зээлдэгчийг зээлийн төлбөрөө төлж, гэрээгээр хүлээсэн үүргээ биелүүлэхийг удаа дараа шаардаж, зээлдэгчид утсаар мэдэгдэж, биеэр уулзаж, зээл төлөх боломжийг удаа дараа өгсөн боловч зээлдэгч банкны шаардлагыг биелүүлэхгүй, зээлийг төлөх идэвх санаачилга гаргалгүй, санаатайгаар зайлсхийж өнөөдрийг хүрсэн.

1390090275 дугаартай Зээлийн гэрээний үүргийн гүйцэтгэлийг хангуулах зорилгоор 2024 оны 11 дугаар сарын 20-ны өдөр .. дугаартай Ипотекийн гэрээ, .. дугаартай Барьцааны гэрээ байгуулж, дараах хөрөнгийг барьцаалуулсан. Үүнд:

1. Дорноговь аймаг, Замын-Үүд сум 2-р баг .. тоотод байрлах ..улсын бүртгэлийн дугаартай, .... гэрчилгээний дугаартай, 48м.кв талбайтай хувийн сууц,

2. Дорноговь аймаг, Замын-Үүд сум.. тоотод байрлах .. улсын бүртгэлийн дугаартай, ... гэрчилгээний дугаартай, НТД-4401000680 нэгж талбарын дугаартай, 878 м.кв талбайтай эзэмших эрхтэй газар,

Нэхэмжлэлийн шаардлага:

1. Иргэний хуулийн 453 дугаар зүйлийн 453.1 дэх заалт, Банк, эрх бүхий этгээдийн мөнгөн хадгаламж, мөнгөн хөрөнгийн шилжүүлэг, зээлийн үйл ажиллагааны тухай хуулийн 21 дүгээр зүйлийн 21.2 дахь заалт болон 1390090275 тоот зээлийн гэрээг үндэслэн 2025 оны 12 дугаар сарын 09-ны өдрийн байдлаарх зээлийн үлдэгдэл 10,111,111.12 төгрөг, зээлийн хүү 926,998.10 төгрөг, нэмэгдүүлсэн 14,578.99 төгрөг, нийт 11,052,688.21 төгрөгийг хариуцагч талаас гаргуулах,

2. Хариуцагч нар нь сайн дураар шүүхийн шийдвэрийг биелүүлэхгүй бол үүргийн гүйцэтгэлийг барьцаа хөрөнгөөс хангуулах талаар шүүхийн шийдвэрт тусгаж өгнө үү. Нэхэмжлэлийн үнийн дүн болох 11,052,688.21 төгрөгөөс тооцож 191,793 төгрөгийг улсын тэмдэгтийн хураамжид төлсөн болно. Жич: Хэргийг шүүх хуралдаанаар хянан шийдвэрлэгдэх хүртэл хугацаанд тооцогдох хүү, нэмэгдүүлсэн хүүг тухайн үед нь зээлийн гэрээнд зааснаар тооцож нэмэгдүүлэн нэхэмжлэх болно гэжээ.

Хариуцагч Дорноговь аймгийн Замын-Үүд сумын ..-р баг, .. тоотод оршин суух, Б  овогт Б-ийн О /РД: .., утас: .../,

 Хариуцагч Дорноговь аймгийн Замын-Үүд сумын ..-р баг, .. тоотод оршин суух, Б овогт Б-ийн О  /РД: .., утас:../ нар нь шүүхэд ирүүлсэн тайлбартаа: Хариуцагч овогт Б-ийн  о, Б-ийн О бид Х банкнаас гаргасан нэхэмжлэлийн шаардлагатай танилцлаа. Х  банкнаас зээл авсан нь үнэн. Нэхэмжилж байгаа нэхэмжлэлийн үнийн дүн болох 11,052,688.21 төгрөгийг төлөхөө хүлээн зөвшөөрч байна. Хэрэв төлөөгүй тохиолдолд барьцаа хөрөнгө болох хашаа байшин, газраар буюу барьцаа хөрөнгөөр хангуулахыг хүлээн зөвшөөрч байна. Иймд хэргийг хялбаршуулсан журмаар шийдвэрлэж өгнө үү гэжээ.            

ҮНДЭСЛЭХ нь:

Нэхэмжлэгч Х банк ХК-ийн Замын-Үүд салбар нь хариуцагч Б.О , Б.О  нарт холбогдуулан зээлийн 11,052,688.21 төгрөг гаргуулахаар, хариуцагч нар нь сайн дураар шүүхийн шийдвэрийг биелүүлэхгүй бол үүргийн гүйцэтгэлийг барьцаа хөрөнгөөс хангуулах тус шүүхэд нэхэмжлэлийн шаардлага гаргажээ.

Хэрэг хянан шийдвэрлэх ажиллагааны явцад хариуцагч Б.О , Б.О нар нь зээлийн 11,052,688.21 төгрөг гаргуулах тухай нэхэмжлэлийн шаардлагыг төлөхөө хүлээн зөвшөөрсөн байна.

Хариуцагч нарын нэхэмжлэлийн шаардлагыг хүлээн зөвшөөрсөн нь хуульд харшлаагүй, гуравдагч этгээдийн эрх, хуулиар хамгаалагдсан ашиг сонирхлыг хөндөөгүй байна. Иймд хариуцагч нарын нэхэмжлэлийн шаардлагыг хүлээн зөвшөөрснийг баталж хэргийг хялбаршуулсан журмаар хянан шийдвэрлэх үндэслэлтэй байна.

Иргэний хэрэг шүүхэд хянан шийдвэрлэх тухай хуулийн 74, 75, 75⁸ дугаар зүйлийн 75⁸.1, 123 дугаар зүйлийн 1 дэх хэсэгт заасныг удирдлага болгон ЗАХИРАМЖЛАХ нь:

1. Нэхэмжлэгч Хас  банк ХК-ийн Замын-Үүд салбар нэхэмжлэлтэй хариуцагч Б.О , Б.О нарт холбогдох зээлийн 11,052,688.21 төгрөг гаргуулах, төлөөгүй тохиолдолд үүргийн гүйцэтгэлийг Дорноговь аймаг, Замын-Үүд сум ..-р баг .. тоотод байрлах ..улсын бүртгэлийн дугаартай, .. гэрчилгээний дугаартай, 48м.кв талбайтай хувийн сууц, Дорноговь аймаг, Замын-Үүд сум Борхойн 6 гудамж 35 тоотод байрлах .. улсын бүртгэлийн дугаартай, .. гэрчилгээний дугаартай, .. нэгж талбарын дугаартай, 878 м.кв талбайтай эзэмших эрхтэй газар зэргээр хангуулах тухай нэхэмжлэлийн шаардлагыг хариуцагч Б.О , Б.О нар нь зээлийн 11,052,688.21 төгрөгийг төлж барагдуулахаар, төлөөгүй тохиолдолд үүргийн гүйцэтгэлийг Дорноговь аймаг, Замын-Үүд сум 2-р баг ... тоотод байрлах .. улсын бүртгэлийн дугаартай, .. гэрчилгээний дугаартай, 48м.кв талбайтай хувийн сууц, Дорноговь аймаг, Замын-Үүд сум Борхойн 6 гудамж 35 тоотод байрлах .. улсын бүртгэлийн дугаартай, .. гэрчилгээний дугаартай, .. нэгж талбарын дугаартай, 878 м.кв талбайтай эзэмших эрхтэй газар зэргээр хангуулахаар шаардлагыг хүлээн зөвшөөрснийг баталж, хэргийг хэрэгсэхгүй болгосугай.

 2. Иргэний хэрэг шүүхэд хянан шийдвэрлэх тухай хуулийн 57, 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-т зааснаар нэхэмжлэгч байгууллагын улсын тэмдэгтийн хураамжид төлсөн 191,793 төгрөгийн 50 хувийг улсын орлогод хэвээр үлдээж, үлдэх 50 хувь буюу 95,896.5 төгрөгийг улсын орлогоос, үлдэх улсын тэмдэгтийн хураамжийн 50 хувь болох 95,896.5 төгрөгийг хариуцагчаас гаргуулж нэхэмжлэгч байгууллагад олгосугай.

3. Хариуцагч Б.О   , Б.О  нар нь шүүгчийн захирамжийг сайн дураар биелүүлээгүй бол шүүхийн шийдвэр гүйцэтгэлийн журмаар албадан гүйцэтгэхийг мэдэгдсүгэй.

4. Энэ захирамжид зохигчид давж заалдах, гомдол гаргах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

 

ШҮҮГЧ                                   Э.Б