Дархан-Уул аймаг дахь Сум дундын Эрүүгийн хэргийн анхан шатны шүүхийн шүүгч Б.Ихтамир даргалж,

Шүүх хуралдааны нарийн бичгийн дарга Б.Энх-Амгалан,

Улсын яллагч Д.Энхтуяа,

Шүүгдэгч О.Буянт-Ирээдүйн өмгөөлөгч Н.Баярмаа,

Шүүгдэгч О.Буянт-Ирээдүй, Г.Одбаяр нарыг оролцуулан тус шүүхийн шүүх хуралдааны танхимд нээлттэй хийсэн шүүх хуралдаанаар Дархан-Уул аймгийн Прокурорын газраас Эрүүгийн хуулийн тусгай ангийн 17.2 дугаар зүйлийн 1, 11.6 дугаар зүйлийн 1-д зааснаар яллах дүгнэлт үйлдэж ирүүлсэн Нэмэлт боржигон овогт Отгонбаярын Буянт-Ирээдүй, Эрүүгийн хуулийн тусгай ангийн 11.6 дугаар зүйлийн 1-д зааснаар яллах дүгнэлт үйлдэж ирүүлсэн Хиад боржигон овогт Ганбаатарын Одбаяр нарт холбогдох эрүүгийн 1718003520133 дугаартай хэргийг 2018 оны 5 дугаар сарын 01-ний өдөр хүлээн авч, хялбаршуулсан журмаар хянан хэлэлцэв.

Шүүгдэгч нарын биеийн байцаалт:

1. Монгол улсын иргэн, Нэмэлт боржигон овогт Отгонбаярын Буянт-Ирээдүй /РД: УХ94050831/, 1994 оны 5 дугаар сарын 08-ны өдөр Улаанбаатар хотод төрсөн, 24 настай, бүрэн дунд боловсролтой, Хүмүүнлэгийн их сургуулийн Дархан салбарын Санхүү менежментийн банк санхүүгийн 4 дүгээр дамжааны оюутан, ам бүл 2, ээжийн хамт Дархан-Уул аймаг, Дархан сум, 14 дүгээр баг, 35 дугаар байр, 02 тоотод оршин суух, урьд ял шийтгэлгүй,

2. Монгол Улсын иргэн, Хиад боржигон овогт Ганбаатарын Одбаяр /РД: ТГ88081571/, 1988 оны 08 дугаар сарын 15-нд Дархан-Уул аймгийн Дархан суманд төрсөн, 29 настай, эрэгтэй, дээд боловсролтой, уул уурхайн баяжуулалтын инженер мэргэжилтэй, Дархан, Сэлэнгийн Цахилгаан түгээх сүлжээ” ХК-нд ашиглалт засварын монтёр ажилтай, ам бүл 5, эцэг, эх, эхнэр, хүүгийн хамт Дархан-Уул аймгийн Дархан сум, 12 дугаар баг, 16 дугаар байр, 30 тоотод оршин суух, урьд ял шийтгэлгүй,

Холбогдсон хэргийн талаар:

Шүүгдэгч О.Буянт-Ирээдүй нь согтууруулах ундаа хэрэглэсэн үедээ 2017 оны 11 дүгээр сарын 01-ний шөнө 03 цагийн орчимд Дархан-Уул аймгийн Дархан сумын 12 дугаар багийн нутаг дэвсгэрт иргэн Г.Одбаярын Самсунг нөт-2 загварын гар утсыг хүч хэрэглэхгүйгээр, хууль бусаар авсан, улмаар Г.Одбаяр гар утас авлаа хэмээн маргалдахад түүнийг духан тус газарт нь цохиж эрүүл мэндэд нь хөнгөн хохирол учруулсан,

шүүгдэгч Г.Одбаяр нь согтууруулах ундаа хэрэглэсэн үедээ 2017 оны 11 дүгээр сарын 01-ний өдрийн шөнө 03 цагийн орчимд Дархан-Уул аймгийн Дархан сумын 16 дугаар багийн нутаг дэвсгэрт иргэн О.Буянт-Ирээдүйг гар утсыг нь авч зугтаалаа гэх шалтгаанаар зодож эрүүл мэндэд нь хөнгөн хохирол учруулсан гэмт хэрэгт тус тус холбогджээ. /Яллах дүгнэлтэд бичигдсэнээр/

ТОДОРХОЙЛОХ нь:

1. Гэм буруугийн талаар:

Шүүгдэгч О.Буянт-Ирээдүй нь согтууруулах ундаа хэрэглэсэн үедээ 2017 оны 11 дүгээр сарын 01-ний шөнө 03 цагийн орчимд Дархан-Уул аймгийн Дархан сумын 12 дугаар багийн нутаг дэвсгэрт иргэн Г.Одбаярт “гар утсаар чинь ярьчхаад өгье” гэж хэлэн 180.000 төгрөгийн үнэ бүхий Самсунг нөт-2 маркийн гар утсыг нь авангуутаа зугтсан, улмаар Г.Одбаяр нь О.Буянт-Ирээдүйг араас нь хөөж барьж аваад “гар утас өг” гэж хэлэхэд түүний духанд нь цохиж эрүүл мэндэд нь духны шарх бүхий хөнгөн хохирол учруулсан,

шүүгдэгч Г.Одбаяр нь согтууруулах ундаа хэрэглэсэн үедээ 2017 оны 11 дүгээр сарын 01-ний өдрийн шөнө 03 цагийн орчимд Дархан-Уул аймгийн Дархан сумын 16 дугаар багийн нутаг дэвсгэрт иргэн О.Буянт-Ирээдүйг гар утсыг нь авч зугтаалаа гэх шалтгаанаар зодож эрүүл мэндэд нь зулайн хуйхны шарх, дух, хамар, хацар, доод эрүүний зулгаралт бүхий хөнгөн хохирол учруулсан болох нь:  

Шүүхийн хэлэлцүүлэгт

Шүүгдэгч О.Буянт-Ирээдүйн өгсөн: 2017 оны 11 дүгээр сарын 01-ний шөнө би найзтайгаа 16-н давхар байрны урд шар айраг уусан. Шар айргаа ууж дуусаад харих замдаа Г.Одбаяртай таараад утсаар чинь ярья гэж хэлээд гар утсыг нь авангуутаа зугтаасан. Г.Одбаярыг хэрэгт холбогдуулсандаа гэмшиж байна. Тухайн өдөр Г.Одбаяр намайг “Дархан-50” цогцолборын хажуугийн зам дээр нэг цохисон. Зам гарсныхаа дараа дахиад нэг цохисон. Г.Одбаяр миний биед хөнгөн хохирол учруулсан үйлдэлд гомдол санал, нэхэмжлэх зүйл байхгүй гэх мэдүүлэг,

Шүүгдэгч Г.Одбаярын өгсөн: Би гар утсаа авсан тул одоо гомдол санал, нэхэмжлэх зүйл байхгүй гэх мэдүүлэг,

Мөрдөн байцаалтад

Шүүгдэгч Г.Одбаярын өгсөн: ...Т.Батбаяр бид хоёр 2017 оны 11 дүгээр сарын 01-ний 03 цагийн үед 16 дугаар багийн 14 дүгээр байраас гараад “Дархан-50” цогцолбороор гарч 16-н давхар байр луу чиглэн алхаж байсан. Тэгэхэд О.Буянт-Ирээдүй бид хоёр дээр ирээд “гар утас байна уу? Утсаар чинь ярьчхаад өгье” гэж хэлэхээр нь би өөрийнхөө Самсунг нөт-2 загварын гар утсыг өгсөн. О.Буянт-Ирээдүй миний гар утсаар нэг дугаар луу залгаж байгаад буцааж өгөлгүй аваад “Дархан-50” цогцолборын зүгт зугтсан. Тэгэхээр нь би Т.Батбаярын 99845546 дугаарын утсаар Г.Гантүвшиний 88000441 дугаар луу залгаад “саарал юүдэнтэй цамцтай нэг залуу миний гар утсыг аваад “Дархан-50” цогцолборын зүгт зугтчихлаа. Чи өмнөөс тосоод барьж аваад байж бай” гэж хэлсэн. Тэгээд араас нь “Дархан-50” цогцолбор луу явахад Г.Гантүвшин, О.Буянт-Ирээдүй хоёр хамт зогсож байхаар нь би “наад хүнээ бариад байж байгаарай” гээд орилсон. Тэгтэл О.Буянт-Ирээдүй цаашаа хуучин хорооллын 18 дугаар байрны зүгт зугтсан. Тэгээд Г.Гантүвшин араас нь хөөгөөд “Ану” кафены орчимд О.Буянт-Ирээдүйг барьж авсан. Би очоод гар утас өг гэж хэлэхэд О.Буянт-Ирээдүй юун гар утас гэхээр нь би түүнийг 2-3 удаа нүүр лүү гараараа цохисон. Тэгээд Г.Гантүвшингийн 88000441 дугаарын утсаар Цагдаагийн газарт “миний гар утсыг булаасан хүнийг хуучин хорооллын 18 дугаар байрны орчимд бариад авчихлаа” гэсэн дуудлага өгсөн. Тэгээд би О.Буянт-Ирээдүйгээс гар утсаа авах санаатай халаасыг нь ухах гэтэл О.Буянт-Ирээдүй намайг толгойгоороо мөргөчхөөд зугтаасан. Тэр үед миний духнаас цус гарч эхэлсэн. Тэгэхэд О.Буянт-Ирээдүйтэй маргалдаж байсан газар миний гар утас унасан байхаар нь би авсан гэх мэдүүлэг /хх-ийн 128-131/,

Гэрч Н.Бавуржаны өгсөн: Би 2017 оны 10 дугаар сарын 31-ний өдөр найз О.Буянт-Ирээдүйтэй хамт “Сатурн” нэртэй бааранд орчхоод гарсан. Тэгээд 16-н давхар байрны гадна том савтай шар айраг нэгийг хувааж уусан. Шар айргаа ууж дуусаад гэр рүүгээ харих гэж байтал О.Буянт-Ирээдүй 17 дугаар байрны хажуугийн замаар өөдөөс ирж байсан 2 хүнийг харчхаад надад “би утсаар ярьчхаад ирье” гэж хэлээд тэр 2 хүнтэй очиж уулзсан. О.Буянт-Ирээдүй тэр 2 хүнээс гар утсыг нь аваад ярьж байх шиг байсан. Тэгснээ О.Буянт-Ирээдүй гэнэт зугтаарай гэсэн. Тэгээд би зугтаад хуучин хорооллын 18 дугаар байрны ард, “Ану” кафены орчимд О.Буянт-Ирээдүйтэй таарсан. О.Буянт-Ирээдүй хүнд зодуулсан байдалтай “энд утсаа хаячихсан чинь байхгүй байна” гэж хэлсэн гэх мэдүүлэг /хх-ийн 16/,

Гэрч Н.Гантүвшиний өгсөн: ...би О.Буянт-Ирээдүйн араас хөөгөөд хуучин хорооллын 18 дугаар байрны ард барьсан. Араас Г.Одбаяр ирээд гар утас өг гээд О.Буянт-Ирээдүйн нүүр лүү нь 2-3 удаа цохиод авсан. Тэгсэн О.Буянт-Ирээдүй “би утсыг чинь аваагүй шүү дээ” гэхэд Г.Одбаяр “чи аваад зугтаасан биз дээ” гэж хэлээд О.Буянт-Ирээдүйн халаасыг нь ухах гэтэл О.Буянт-Ирээдүй Г.Одбаярыг мөргөсөн. Тэгтэл Г.Одбаяр ёо ёо гээд толгойгоо барьсан. Тэгээд О.Буянт-Ирээдүй зугтаад явчихсан гэх мэдүүлэг /хх-ийн 19, 79/,

Гэрч Т.Батбаярын өгсөн: ...Г.Одбаяр бид 2 шинэ хорооллын 17 дугаар байрны орчимд явж байсан чинь бид хоёроос бага зэрэг өндөр нуруутай нэг залуу таарсан. Тэр залуу “гар утсаа өгч байгаач” гэж хэлсэн. Тэгтэл тэр залуу Г.Одбаярын утсыг аваад зугтаасан. Г.Одбаяр араас нь гүйсэн... гэх мэдүүлэг /хх-ийн 22/,

Гэрч Г.Мөнх-Очирын өгсөн: Би 2017 оны 11 дүгээр сарын 01-ний шөнө Дархан-Уул аймгийн Дархан сумын 14 дүгээр багийн 14 дүгээр байр буюу гэрийнхээ гадна тамхи татаад зогсож байтал Г.Одбарын найз Т.Батбаяр манай байрны хажуугаар гүйж байхаар нь юу болсон талаар асуусан. Тэгэхэд Т.Батбаяр “Г.Одбаярын гар утсыг танихгүй хүн аваад зугтаачихлаа” гэж хэлсэн. Тэгээд би Т.Батбаярын араас гүйгээд 18 дугаар байрны ард очиход Н.Гантүвшин, Г.Одбаяр хоёр зогсож байсан. Т.Батбаяр бид хоёрыг яваад очиход Г.Одбаярын нүүр нь цус болчихсон байсан. Гар утсыг нь авч зугтаасан хүнийг барьж авсан боловч алдчихлаа гэж байсан гэх мэдүүлэг /хх-ийн 23, 78/,

Гэрч Д.Саруулбямбын өгсөн: Би 2017 оны 10 дугаар сарын 31-ний өдрөөс 11 дүгээр сарын 01-ний өдрийн хугацаанд Дархан-Уул аймаг дахь Цагдаагийн газрын жижүүрийн албанд мэдээлэл хүлээн авагчаар үүрэг гүйцэтгэсэн. Тухайн үед нийт 35 дуудлага ирсэн ба 2017 оны 11 дүгээр сарын 01-ний 03 цагт 88000441 дугаараас “хуучин хорооллын 18 дугаар байрны ард байдаг “Ану” кафены хажууд миний гар утсыг булаагаад зугтаасан хүнийг барьчихсан байна” гэсэн дуудлага ирсэн гэх мэдүүлэг /хх-ийн 25/,

Шинжээч эмч Д.Туяагийн өгсөн: Г.Одбаярын биед духны шарх үүсгэгдсэн нь хүний гараар болон толгойгоор мөргөх, цохигдох үеийн аль алинаас нь үүсгэгдсэн байх боломжтой. Мөн 2017 оны 11 дүгээр сарын 01-ний өдөр дээрх шарх үүсгэгдсэн байж болно гэх мэдүүлэг /хх-ийн 26/,

Дархан-Уул аймаг дахь Цагдаагийн газрын Эрүүгийн цагдаагийн тасгийн эрүүгийн мөрдөгч, цагдаагийн хошууч Ө.Амарсанаагийн 2017 оны 11 дүгээр сарын 08-ны өдрийн “Гэрч Г.Одбаяр 2017 оны 11 дүгээр сарын 02-ны өдөр өгсөн мэдүүлэгтээ “Тэгээд нөгөө залуу дээр очоод халаасанд нь гар утас байна уу гээд үзэх гэсэн чинь тэр залуу намайг мөргөчихсөн үү эсвэл цохисон уу тэрийг сайн мэдэхгүй байна, миний толгойноос цус гараад эхэлсэн юм” гэсний дагуу түүний толгойд үзлэг хийхэд түүний духанд баруун хөмсөгний дээр 1 см хэмжээтэй босоо зүсэгдсэн, эдгэж буй шархтай байлаа. Үзлэгийн явц байдлыг 2 кадр гэрэл зургаар бэхжүүлэн тэмдэглэлд хавсаргав” гэх хүний биед үзлэг хийсэн тэмдэглэл, гэрэл зургийн үзүүлэлт /хх-ийн 27-28/,

Дархан-Уул аймгийн Шүүхийн шинжилгээний албаны 2017 оны 11 дүгээр сарын 08-ны өдрийн 1104 дугаартай “Г.Одбаярын биед духны шарх тогтоогдлоо. Дээрх гэмтэл нь хатуу мохоо зүйлийн хүчин үйлчлэлээр үүсгэгдэх боломжтой. Уг гэмтэл нь Гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах хөнгөн зэргийн гэмтэл болно. Г.Одбаярт учирсан гэмтэл нь цаашдын эрүүл мэнд, хөдөлмөрийн чадварт нөлөөлөхгүй” гэх шинжээчийн дүгнэлт /хх-ийн 100/,

Дархан-Уул аймгийн Шүүхийн шинжилгээний албаны 2017 оны 11 дүгээр сарын 03-ны өдрийн 1087 дугаартай “О.Буянт-Ирээдүйн биед зулайн хуйхны шарх, дух, хамар, хацар, доод эрүүний зулгаралттай гэмтэл тогтоогдлоо. Дээрх гэмтэл нь хатуу мохоо зүйлийн үйлчлэлээр үүсгэгдэх боломжтой. Шүүх эмнэлгийн гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. Цаашдын эрүүл мэнд, хөдөлмөрийн чадварын тогтонги алдалтад нөлөөлөхгүй” гэх шинжээчийн дүгнэлт /хх-ийн 105/,

Дархан-Уул аймгийн Нэгдсэн эмнэлгийн нүүр амны их эмч З.Лхагварагчаагийн “О.Буянт-Ирээдүйн толгойн оройн хэсэгт 1.5 см шархтай, баруун дух, хацар зулгарсан, хөхөрсөн, хүзүү, цээж баруун хэсгээр эмзэглэнэ” гэх тэмдэглэл /хх-ийн 104/

“Капитал зууч” ХХК-ний 2017 оны 11 дүгээр сарын 09-ний өдрийн “Г.Одбаярын эзэмшлийн Самсунг нөт-2 загварын хуучин гар утас 180.000 төгрөгийн үнэтэй” гэх шинжээчийн дүгнэлт /хх-ийн 109-110/,

Шүүгдэгч О.Буянт-Ирээдүйн яллагдагчаар өгсөн мэдүүлгийг газар дээр нь шалгасан тэмдэглэл, гэрэл зургийн үзүүлэлт /хх-ийн 121-125/ зэрэг хэрэгт авагдсан, шүүх хуралдаанаар хэлэлцэгдсэн бичгийн нотлох баримтуудаар нотлогдож байна.

Шүүх хуралдаанаар тогтоогдсон хэргийн нөхцөл байдал болох шүүгдэгч О.Буянт-Ирээдүйгийн согтууруулах ундаа хэрэглэсэн үедээ Г.Одбаярт “гар утсаар чинь ярьчхаад өгье” гэж хэлэн 180.000 төгрөгийн үнэ бүхий Самсунг нөт-2 загварын гар утсыг нь авангуутаа зугтсан үйлдэл нь Эрүүгийн хуулийн тусгай ангийн 17.2 дугаар зүйлийн 1-д заасан дээрэмдэх гэмт хэргийн шинжийг, Г.Одбаяр нь О.Буянт-Ирээдүйг араас нь хөөж барьж аваад “гар утас өг” гэж хэлэхэд түүний духанд нь цохиж эрүүл мэндэд нь духны шарх бүхий хөнгөн хохирол учруулсан үйлдэл нь Эрүүгийн хуулийн тусгай ангийн 11.6 дугаар зүйлийн 1-д зааснаар хүний эрүүл мэндэд хөнгөн хохирол учруулах гэмт хэргийн шинжийг,

Шүүгдэгч Г.Одбаярын согтууруулах ундаа хэрэглэсэн үедээ О.Буянт-Ирээдүйг гар утас нь авч зугтаалаа гэх шалтгаанаар зодож эрүүл мэндэд нь зулайн хуйхны шарх, дух, хамар, хацар, доод эрүүний зулгаралт бүхий хөнгөн хохирол учруулсан үйлдэл нь Эрүүгийн хуулийн тусгай ангийн 11.6 дугаар зүйлийн 1-д зааснаар хүний эрүүл мэндэд хөнгөн хохирол учруулах гэмт хэргийн шинжийг тус тус бүрэн агуулж байна.

Иймд шүүгдэгч О.Буянт-Ирээдүйг Эрүүгийн хуулийн тусгай ангийн 17.2 дугаар зүйлийн 1-д зааснаар бусдын хөрөнгийг илээр, хүч хэрэглэхгүйгээр, хууль бусаар авсан, 11.6 дугаар зүйлийн 1-д зааснаар хүний эрүүл мэндэд хөнгөн хохирол учруулсан гэмт хэрэг үйлдсэн гэм буруутайд, шүүгдэгч Г.Одбаярыг Эрүүгийн хуулийн тусгай ангийн 11.6 дугаар зүйлийн 1-д зааснаар хүний эрүүл мэндэд хөнгөн хохирол учруулсан гэмт хэрэг үйлдсэн гэм буруутайд тус тус тооцох үндэслэлтэй байна.

Шүүгдэгч Г.Одбаярын гэм буруутай үйлдлийн улмаас шүүгдэгч О.Буянт-Ирээдүйн биед зулайн хуйхны шарх, дух, хамар, хацар, доод эрүүний зулгаралт бүхий хөнгөн хохирол хохирол, шүүгдэгч О.Буянт-Ирээдүйн гэм буруутай үйлдлийн улмаас шүүгдэгч Г.Одбаярын биед духны шарх бүхий хөнгөн хохирол тус учирсан боловч шүүгдэгч нар нь бие биеэсээ хохирол төлбөр нэхэмжлээгүй байна.

Мөн шүүгдэгч О.Буянт-Ирээдүй нь Г.Одбаярын Самсунг нөт-2 загварын гар утсыг илээр, хүч хэрэглэхгүйгээр, хууль бусаар авч 180.000 төгрөгийн хохирол учруулсан боловч хэрэг болсон өдөр шүүгдэгч Г.Одбаяр нь өөрийн гар утсыг шүүгдэгч О.Буянт-Ирээдүйтэй маргалдсан гэх Хуучин хорооллын 18 дугаар байрны ард газраас олж авсан болох нь Г.Одбаярын “...Тэгэхэд О.Буянт-Ирээдүйтэй маргалдаж байсан газар миний гар утас унасан байхаар нь би авсан” гэх мэдүүлэг /хх-ийн 128-131/, гэрч Н.Гантүвшиний “...сүүлд нь бүх зүйл дууссан хойно тэр шөнө нь Г.Одбаяр өөрийнхөө утсаар миний утас руу залгаж ярихад гар утсаа авсныг нь мэдсэн” гэх мэдүүлэг /хх-ийн 69/, гэрч Г.Мөнх-Очирын “Н.Гантүвшин, Г.Одбаяр, Т.Батбаяр бид 4 манайд орж ирээд сууж байхад Г.Одбаярын утас куртикний халаасанд байсан” гэх мэдүүлэг /хх-ийн 78/, Н.Гантүвшиний 88000441 дугаарт 2017 оны 10 дугаар сарын 29-ний өдрөөс 2017 оны 11 дүгээр сарын 03-ны өдрүүдэд орсон, гарсан дуудлагын жагсаалтыг хавсаргасан “Юнител” ХХК-ний 2018 оны 01 дүгээр сарын 03-ны өдрийн 05-01/029 дугаарын албан бичиг /хх-ийн 56-60/, Г.Одбаярын 95502323 дугаараас 2017 оны 10 дугаар сарын 29-ний өдрөөс 2017 оны 11 дүгээр сарын 03-ны өдрүүдэд гарсан дуудлагын жагсаалтыг хавсаргасан “Мобиком корпорац” ХХК-ний 2018 оны 01 дүгээр сарын 11-ний өдрийн 18/219 дугаартай албан бичиг /хх-ийн 61, 64-65/ зэрэг нотлох баримтаар тогтоогдож байна.

Иймд шүүгдэгч нар нь бусдад төлөх төлбөргүй, хохирогч нар нэхэмжлэх зүйлгүй, гомдол саналгүй гэснийг дурдах нь зүйтэй гэж үзлээ.  

1. Эрүүгийн хариуцлага, бусад асуудлын талаар:

Эрүүгийн хариуцлага нь эрүүгийн хуульд заасан ял, албадлагын арга хэмжээнээс бүрддэг ба шүүгдэгч О.Буянт-Ирээдүй, Г.Одбаяр нар нь эрүүгийн хариуцлага хүлээлгэх насанд хүрсэн, хэрэг хариуцах чадвартай байна.

Шүүгдэгч Г.Одбаяр нь шүүгдэгч О.Буянт-Ирээдүйн хууль бус үйлдлийн улмаас гэмт хэрэг үйлдсэн, шүүгдэгч О.Буянт-Ирээдүй нь гэм буруугаа хүлээн зөвшөөрч учруулсан хохирлоо нөхөн төлсөн зэргийг эрүүгийн хариуцлага хүлээлгэхэд харгалзан үзэх хөнгөрүүлэх нөхцөл байдалд тооцлоо.

Шүүгдэгч нар нь анх удаа гэмт хэрэг үйлдсэн, шүүгдэгч Г.Одбаяр нь “Дархан Сэлэнгийн цахилгаан түгээх сүлжээ” хувьцаат компанид ашиглалт засварын монтёроор ажилладаг болох нь урьд ял шийтгэгдсэн эсэхийг шалгах хуудас /хх-ийн 32-33/, “Дархан Сэлэнгийн цахилгаан түгээх сүлжээ” хувьцаат компанийн тодорхойлолт /хх-ийн 136/ зэрэг нотлох баримтуудаар тогтоогдож байна.

Шүүгдэгч Г.Одбаярт эрүүгийн хариуцлага хүлээлгэхэд харгалзан үзэх хүндрүүлэх нөхцөл байдал тогтоогдоогүй ба шүүгдэгчийн гэмт хэрэг үйлдсэн нөхцөл байдал, учирсан хохирол, хор уршгийн шинж чанар, хувийн байдал, эрүүгийн хариуцлага хүлээлгэхэд харгалзан үзэх хөнгөрүүлэх нөхцөл байдал болон улсын яллагчийн санал зэргийг харгалзан түүнд Эрүүгийн хуулийн ерөнхий ангийн 11.6 дугаар зүйлийн 1-д зааснаар 450 нэгжтэй тэнцэх буюу 450.000 төгрөгөөр торгох ял оногдуулах нь зүйтэй гэж үзлээ.

Харин шүүгдэгч О.Буянт-Ирээдүйд эрүүгийн хариуцлага хүлээлгэхэд харгалзан үзэх хүндрүүлэх нөхцөл байдал тогтоогдоогүй ба шүүгдэгчийн гэмт хэрэг үйлдсэн нөхцөл байдал, учирсан хохирол, хор уршгийн шинж чанар, эрүүгийн хариуцлага хүлээлгэхэд харгалзан үзэх хөнгөрүүлэх нөхцөл байдал болон улсын яллагчийн санал зэргийг харгалзан түүнд Эрүүгийн хуулийн тусгай ангийн 17.2 дугаар зүйлийн 1-д зааснаар 6 сарын хугацаагаар хорих ял, Эрүүгийн хуулийн ерөнхий ангийн 11.6 дугаар зүйлийн 1-д зааснаар 240 цагийн хугацаагаар нийтэд тустай ажил хийлгэх ял тус тус оногдуулж Эрүүгийн хуулийн ерөнхий ангийн 6.8 дугаар зүйлийн 2-т зааснаар түүнд оногдуулсан ялыг тус тусад нь эдлүүлэх нь зүйтэй гэж үзлээ.

Шүүгдэгч О.Буянт-Ирээдүй нь анх удаа гэмт хэрэг үйлдсэн, гэм буруугаа хүлээн зөвшөөрч учруулсан хохирлоо нөхөн төлсөн, хувийн байдал зэргийг нь харгалзан Эрүүгийн хуулийн ерөнхий ангийн 6.7 дугаар зүйлийн 1.1-д зааснаар түүнд оногдуулсан 6 сарын хугацаагаар хорих ялыг 1 жилийн хугацаагаар тэнсэж, мөн хуулийн ерөнхий ангийн 7.3 дугаар зүйлийн 3.3-т зааснаар тэнссэн хугацаанд согтууруулах ундаа хэрэглэхийг хориглох хязгаарлалт тогтоох нь зүйтэй гэж үзлээ.

Шүүгдэгч нар нь цагдан хоригдсон хоноггүй, хэрэгт эд мөрийн баримтаар хураагдсан эд зүйлгүй, битүүмжлэгдсэн эд хөрөнгөгүй болохыг тус тус дурдах нь зүйтэй байна.  

Эрүүгийн хэрэг хянан шийдвэрлэх тухай хуулийн 17.5 дугаар зүйлийн 8, 9, 36.1 дүгээр зүйл, 36.2 дугаар зүйлийн 4, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйл, 37.1 дүгээр зүйлийн 2-т  заасныг тус тус удирдлага болгон

ТОГТООХ нь:

1. Шүүгдэгч Нэмэлт боржигон овогт Отгонбаярын Буянт-Ирээдүйг Эрүүгийн хуулийн тусгай ангийн 17.2 дугаар зүйлийн 1-д заасан бусдын эд хөрөнгийг илээр, хүч хэрэглэхгүйгээр, хууль бусаар авах, Эрүүгийн хуулийн тусгай ангийн 11.6 дугаар зүйлийн 1-д заасан хүний эрүүл мэндэд хөнгөн хохирол учруулах гэмт хэрэг үйлдсэн гэм буруутайд, Хиад боржигон овогт Ганбаатарын Одбаярыг Эрүүгийн хуулийн тусгай ангийн 11.6 дугаар зүйлийн 1-д хүний эрүүл мэндэд хөнгөн хохирол учруулах гэмт хэрэг үйлдсэн гэм буруутайд тус тус тооцсугай.

2. Шүүгдэгч О.Буянт-Ирээдүй, Г.Одбаяр нар нь бусдад төлөх төлбөргүйг дурдсугай.

3. Шүүгдэгч О.Буянт-Ирээдүйг Эрүүгийн хуулийн 17.2 дугаар зүйлийн 1-д зааснаар 6 /зургаа/ сарын хугацаагаар хорих ялаар, Эрүүгийн хуулийн тусгай ангийн 11.6 дугаар зүйлийн 1-д зааснаар 240 /хоёр зуун дөч/ цагийн хугацаагаар нийтэд тустай ажил хийлгэх ялаар, шүүгдэгч Г.Одбаярыг Эрүүгийн хуулийн 11.6 дугаар зүйлийн 1-д зааснаар 450 нэгжтэй тэнцэх буюу 450.000 /дөрвөн зуун тавин мянга/ төгрөгөөр торгох ялаар тус тус шийтгэсүгэй.

4. Эрүүгийн хуулийн ерөнхий ангийн 6.8 дугаар зүйлийн 2-т зааснаар шүүгдэгч О.Буянт-Ирээдүйд Эрүүгийн хуулийн 17.2 дугаар зүйлийн 1-д зааснаар оногдуулсан 6 /зургаа/ сарын хугацаагаар хорих ял, Эрүүгийн хуулийн тусгай ангийн 11.6 дугаар зүйлийн 1-д зааснаар оногдуулсан 240 /хоёр зуун дөч/ цагийн хугацаагаар нийтэд тустай ажил хийлгэх ялыг тус тусад нь эдлүүлсүгэй.

5. Эрүүгийн хуулийн ерөнхий ангийн 5.6 дугаар зүйлийн 4-т зааснаар шүүгдэгч О.Буянт-Ирээдүйд оногдуулсан 6 сарын хорих ялыг нээлттэй хорих байгууллагад эдлүүлсүгэй.

6. Эрүүгийн хуулийн ерөнхий ангийн 5.4 дүгээр зүйлийн 1-д зааснаар шүүгдэгч О.Буянт-Ирээдүйд оногдуулсан 240 цагийн нийтэд тустай ажил хийлгэх ялыг Дархан-Уул аймгийн Нийтийн аж ахуй үйлчилгээний газарт эдлүүлэхээр тогтоосугай.

7. Эрүүгийн хуулийн ерөнхий ангийн 5.4 дүгээр зүйлийн 4-т зааснаар ялтан нийтэд тустай ажил хийлгэх ялыг биелүүлээгүй бол биелэгдээгүй нийтэд тустай ажил хийлгэх ялын найман цагийг нэг хоногоор тооцож хорих ялаар солихыг шүүгдэгч О.Буянт-Ирээдүйд мэдэгдсүгэй.

8. Эрүүгийн хуулийн ерөнхий ангийн 5.3 дугаар зүйлийн 5-д зааснаар ялтан торгох ялыг биелүүлээгүй бол биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг шүүгдэгч Г.Одбаярт мэдэгдсүгэй.

9. Эрүүгийн хуулийн ерөнхий ангийн 6.7 дугаар зүйлийн 1.1, 7.3 дугаар зүйлийн 3.3-т зааснаар шүүгдэгч О.Буянт-Ирээдүйд оногдуулсан 6 сарын хугацаагаар хорих ялыг нэг жилийн хугацаагаар тэнсэж, тэнссэн хугацаанд согтууруулах ундаа хэрэглэхийг хориглох хязгаарлалт тогтоосугай.

10. Эрүүгийн хуулийн ерөнхий ангийн 7.3 дугаар зүйлийн 4-т зааснаар шүүхээс тогтоосон хязгаарлалтыг зөрчсөн бол прокурорын дүгнэлтийг үндэслэн шүүх ял оногдуулахыг мэдэгдсүгэй.

11 Шүүгдэгч нар нь цагдан хоригдсон хоноггүй, хэрэгт эд мөрийн баримтаар хураагдсан эд зүйлгүй, битүүмжлэгдсэн хөрөнгөгүй болохыг дурдсугай.

12. Шийтгэх тогтоол уншиж сонсгосноор хүчинтэй болох ба тогтоол хүчин төгөлдөр болтол шүүгдэгч О.Буянт-Ирээдүй, Г.Одбаяр нарт өмнө авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

13. Давж заалдах гомдол гаргах, эсэргүүцэл бичих эрх бүхий этгээд тогтоолыг эс зөвшөөрвөл гардуулсан буюу хүргүүлснээс хойш 14 хоногийн дотор Дархан-Уул аймгийн Эрүүгийн хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

14. Давж заалдах гомдол гаргасан, эсэргүүцэл бичигдсэн тохиолдолд тогтоолын биелэлтийг түдгэлзүүлсүгэй.

 

 

 

ДАРГАЛАГЧ ШҮҮГЧ                                 Б.ИХТАМИР