Дархан-Уул аймаг дахь Сум дундын Эрүүгийн хэргийн анхан шатны шүүхийн шүүгч Б.Ихтамир даргалж,

Шүүх хуралдааны нарийн бичгийн дарга Д.Адъяа,

Улсын яллагч Н.Дуламсүрэн,

Шүүгдэгч Э.Мишээл нарыг оролцуулан тус шүүхийн шүүх хуралдааны танхимд нээлттэй хийсэн шүүх хуралдаанаар Монгол овогт Эрдэнэбулганы Мишээлд холбогдох эрүүгийн 1818001260195 дугаартай хэргийг 2018 оны 6 дугаар сарын 05-ны өдөр хүлээн авч, хялбаршуулсан журмаар хянан хэлэлцэв.

Шүүгдэг чийн биеийн байцаалт:

Монгол Улсын иргэн, Монгол овогт Эрдэнэбулганы Мишээл /РД: ТА97081110/, 1997 оны 8 дугаар сарын 11-нд Дархан-Уул аймагт төрсөн, 20 настай, эрэгтэй, бүрэн дунд боловсролтой, үсчин мэргэжилтэй, эрхэлсэн тодорхой ажилгүй, ам бүл 2, эмээгийн хамт Дархан-Уул аймгийн Дархан сумын 15 дугаар баг, Мангиртын 8 дугаар хэсэг, хаб гудамж 66 тоотод оршин суух, урьд ял шийтгэлгүй,

Дархан-Уул аймгийн Прокурорын газраас шүүгдэгч Э.Мишээлийг Эрүүгийн хуулийн тусгай ангийн 11.6 дугаар зүйлийн 1-д заасан хүний эрүүл мэндэд хөнгөн хохирол учруулах гэмт хэрэг үйлдсэн гэж яллах дүгнэлт үйлдэж хэргийг шүүхэд шилжүүлжээ.

ТОДОРХОЙЛОХ нь:

1. Гэм буруугийн талаар:

Шүүгдэгч Э.Мишээл нь 2018 оны 02 дугаар сарын 12-ны орой шинэ хорооллын 5 дугаар байрны ойролцоо иргэн А.Энх-Амартай маргалдан улмаар зодож эрүүл мэндэд нь хамар ясны хугарал, хамрын таславчийн мурийлт, тархи доргилт, нүүрний цус хуралт бүхий хөнгөн хохирол учруулсан болох нь:  

Хэрэгт авагдсан

Хохирогч А.Энх-Амарын: ...Мишээл миний нүүрэн тус газарт гараараа 2 удаа цохисон. Тэгсэн Мөнгөнчимэг миний хамрыг сонин болсон байна гэж хэлэхээр нь хартал хамрын баруун хэсэг цаашаа чихэгдээд орчихсон байсан гэх мэдүүлэг /хх-ийн 8, 10-12/,

Гэрч А.Мөнхчимэгийн: ...2018 оны 02 дугаар сарын 12-ны өдөр 22 цагийн үед Дархан-Уул аймгийн Дархан сумын 11 дүгээр багийн 5 дугаар байрны гадна Мишээл гэх хүн манай найз Энх-Амарыг гараараа цохисон. Тэгээд гэрэлтэй газар очиход Энх-Амарын хамраас цус гараад хавдчихсан байсан гэх мэдүүлэг /хх-ийн 13-14/,

Гэрч М.Билгүүний: 2018 оны 02 дугаар сарын 12-ны өдрийн орой 23 цагийн үед Мишээл нэг залуутай маргалдаад тухайн залууг гараараа цохисон... гэх мэдүүлэг /хх-ийн 15/,

Гэрч А.Ганцэцэгийн: ...Мишээл, Энх-Амар хоёр заамдалцсан. Намайг харж байхад Мишээл нь Энх-Амарын нүүр рүү 2 удаа цохисон... гэх мэдүүлэг /хх-ийн 16/,

Шүүгдэгч Э.Мишээлийн мөрдөн байцаалтын шатанд өгсөн: 2018 оны 02 дугаар сарын 12-ны өдрийн орой найзуудтайгаа явж байхдаа Энх-Амар болон түүний найзуудтай таараад маргалдсан. Би Энх-Амарын нүүр болон мөр рүү цохисон. Энх-Амар миний хүзүү рүү нэг удаа цохиж, шагай руу нэг удаа өшиглөсөн гэх мэдүүлэг /хх-ийн 25-27/,

Дархан-Уул аймгийн Шүүхийн шинжилгээний албаны 2018 оны 02 дугаар сарын 13-ны өдрийн 261 дугаартай “А.Энх-Амарын биед хамар ясны хугарал, хамрын таславчийн мурийлт, тархи доргилт, нүүрний цус хуралт тогтоогдлоо. Дээрх гэмтэл хатуу мохоо зүйлийн хүчин үйлчлэлээр үүсгэгдэх боломжтой. Уг гэмтэл нь гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах хөнгөн зэргийн гэмтэл болно. А.Энх-Амарт учирсан гэмтэл нь цаашдын эрүүл мэнд, хөдөлмөрийн чадварт нөлөөлөхгүй” гэх шинжээчийн дүгнэлт /хх-ийн 20/ зэрэг нотлох баримтуудаар нотлогдож байна.

Шүүгдэгч Э.Мишээлийн дээрх үйлдэл нь Эрүүгийн хуулийн тусгай ангийн 11.6 дугаар зүйлийн 1-д заасан хүний эрүүл мэндэд хөнгөн хохирол учруулах гэмт хэргийн шинжийг бүрэн агуулж байх тул түүнийг гэмт хэрэг үйлдсэн гэм буруутайд тооцох нь зүйтэй гэж шүүх дүгнэлээ.

Шүүгдэгч Э.Мишээлийн гэм буруутай үйлдлийн улмаас хохирогч А.Энх-Амарын биед хамар ясны хугарал, хамрын таславчийн мурийлт, тархи доргилт, нүүрний цус хуралт бүхий хөнгөн хохирол учирсан ба шүүгдэгч нь хохирогчид 70.000 төгрөг өгсөн, хохирогч нь санал гомдол, нэхэмжлэх зүйлгүй болох нь хэрэгт авагдсан хохирогч А.Энх-Амарын бичсэн “Миний бие Э.Мишээлээс 70.000 төгрөг авсан. Гомдол санал байхгүй” гэх тодорхойлолт /хх-ийн 55/-оор нотлогдож байна.

Иймд шүүгдэгч нь бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй, хохирогч гомдол саналгүй, нэхэмжлэх зүйлгүй гэснийг дурдах нь зүйтэй.  

1. Эрүүгийн хариуцлага, бусад асуудлын талаар:

Эрүүгийн хариуцлага нь эрүүгийн хуульд заасан ял, албадлагын арга хэмжээнээс бүрддэг ба шүүгдэгч Э.Мишээл нь эрүүгийн хариуцлага хүлээлгэх насанд хүрсэн, хэрэг хариуцах чадвартай байна.

Шүүгдэгч нь анх удаа гэмт хэрэг үйлдсэн болох нь урьд ял шийтгэгдсэн эсэхийг шалгах хуудсаар нотлогдож байгаа ба гэмт хэргийн улмаас учирсан хохирлоо нөхөн төлснийг эрүүгийн хариуцлага хүлээлгэхэд харгалзан үзэх хөнгөрүүлэх нөхцөл байдалд тооцов.

Шүүгдэгч Э.Мишээлд эрүүгийн хариуцлага хүлээлгэхэд харгалзан үзэх хүндрүүлэх нөхцөл байдал тогтоогдоогүй ба шүүгдэгчийн гэмт хэрэг үйлдсэн нөхцөл байдал, учирсан хохирол, хор уршгийн шинж чанар, хувийн байдал, эрүүгийн хариуцлага хүлээлгэхэд харгалзан үзэх хөнгөрүүлэх нөхцөл байдал болон улсын яллагчийн санал зэргийг харгалзан түүнд Эрүүгийн хуулийн тусгай ангийн 11.6 дугаар зүйлийн 1-д зааснаар 450 нэгжтэй тэнцэх буюу 450.000 төгрөгөөр торгох ял оногдуулах нь зүйтэй гэж үзлээ.

Шүүгдэгч нь цагдан хоригдсон хоноггүй, хэрэгт эд мөрийн баримтаар хураагдсан эд зүйлгүй, битүүмжилсэн хөрөнгөгүй болохыг тус тус дурдах нь зүйтэй байна.  

Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5, 36.1 дүгээр зүйл, 36.2 дугаар зүйлийн 4, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйл, 37.1 дүгээр зүйлийн 2-т заасныг тус тус удирдлага болгон

ТОГТООХ нь:

1. Шүүгдэгч Монгол овогт Эрдэнэбулганы Мишээлийг хүний эрүүл мэндэд хөнгөн хохирол учруулах гэмт хэрэг үйлдсэн гэм буруутайд тооцсугай.

2. Шүүгдэгч Э.Мишээл нь бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй, хохирогч А.Энх-Амар нь санал гомдолгүй, нэхэмжлэх зүйлгүй болохыг дурдсугай.

3. Эрүүгийн хуулийн тусгай ангийн 11.6 дугаар зүйлийн 1-д зааснаар Э.Мишээлийг 450 нэгжтэй тэнцэх буюу 450.000 /дөрвөн зуун тавин мянга/ төгрөгөөр торгох ялаар шийтгэсүгэй.

4. Шүүгдэгч нь цагдан хоригдсон хоноггүй, хэрэгт эд мөрийн баримтаар хураагдсан эд зүйлгүй, битүүмжилсэн хөрөнгөгүй болохыг дурдсугай.

5. Шийтгэх тогтоол уншиж сонсгосноор хүчинтэй болох ба тогтоол хүчин төгөлдөр болтол шүүгдэгч Э.Мишээлд өмнө авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

6. Давж заалдах гомдол гаргах, эсэргүүцэл бичих эрх бүхий этгээд тогтоолыг эс зөвшөөрвөл гардуулсан буюу хүргүүлснээс хойш 14 хоногийн дотор Дархан-Уул аймгийн Эрүүгийн хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

7. Давж заалдах гомдол гаргасан, эсэргүүцэл бичигдсэн тохиолдолд тогтоолын биелэлтийг түдгэлзүүлсүгэй.

 

 

 

ДАРГАЛАГЧ ШҮҮГЧ                                 Б.ИХТАМИР