МОНГОЛ УЛСЫН НЭРИЙН ӨМНӨӨС

 

Булган аймаг дахь сум дундын анхан шатны шүүхийн Ерөнхий шүүгч О.Одончимэг даргалж, тус шүүхийн шүүх хуралдааны танхимд хийсэн шүүх хуралдаанаар,

Хүсэлт гаргагч: **** аймаг, Х******* сум, **дүгээр багт оршин суух Ц.Б*******ийн хүсэлттэй,

Хүсэлтийн шаардлага: Ц.А*******ыг эрэн сурвалжлуулах тухай нэхэмжлэлийн шаардлага бүхий 304/2026/00015/И индэкстэй иргэний хэргийг хянан хэлэлцэв.

Шүүх хуралдааны оролцогчид:

Нэхэмжлэгч Ц.Б*******,

Шүүх хуралдааны нарийн бичгийн дарга Н.Эрдэнэбулган нар оролцов.

ТОДОРХОЙЛОХ нь:

Хүсэлт гаргагч Ц.Б******* шүүх хуралдаанд гаргасан тайлбартаа: Анх би 2024 онд А******* гэх хүнтэй газар худалдана гэх Х******* сумын фэйсбүүк группт тавигдсан зарын дагуу холбогдосон. Тэгээд иб зарын дагуу явж очоод А*******той уулзахад Х******* сумын 1 дүгээр багт зарна гээд байгаа газар нь байсан. Тэгээд би наад газрыг чинь авахгүй талаараа хэлсэн. Тэгэхэд та энэ орон нутгийн хүн үү? гэж асуухаар нь тиймээ гэж хэлэхэд тэгвэл та миний энэ газрыг зараад өгөөч гэх хүсэлтийг надад тавьсан. Би ч тухайн газрыг зарахаар нэлээдгүй хүн амьтантай уулзсан боловч тухайн газар нь огт зарагдаагүй юм. Ингээд тухайн газар нь зарагдахгүй удахад А******* нь надад яаралтай 5 сая төгрөг хэрэгтэй байна гээд надаас 5 сая төгрөгийг зээлж авсан юм. Тэгээд мөн наад газар чинь зарагдахгүй бол та өөрөө авна биз дээ гэж хэлсэн. Ингээд хэдэн сарын дараа утсаар яриад мөнгө нэхэхэд түр хүлээж байгаарай гэж байсан. Наад газар чинь зарагдахгүй юм байна гээд 05 дугаар 15-ны өдөр 1,500,000 төгрөгийг над руу шилжүүлсэн. Үлүдэгдэл 3,500,000 төгрөгийг удаахгүй өгнө гэсэн боловч өгөхгүй удсан. Сүүлдээ утас нь холбогдохгүй, фэйсбүүкдээ ч байхгүй хаана байгаа нь мэдэгдэхгүй, сураггүй болсон. Тэгээд цагдаагийн байгууллагад хандахад ийм хаяг дээр бүртгэлтэй байна гэсэн. Цагдаагийн байгууллагаас хаягийн тодорхойлолтыг нь аваад Ч******* дүүргийн хэсгийн цагдаад хандахад энэ хүн оршин суугаа хаяг дээрээ байхгүй, гэр бүлээсээ салсан, сүүлийн 2-3 сарын хугацаанд огт харагдаагүй гэж хэлсэн. Ингээд би цагдаа, шүүхээр явах болоод байна гэв.

1.  Нэхэмжлэгч талаас шүүхэд дараах нотлох баримтуудыг гаргаж өгсөн.

-улсын тэмдэгтийн хураамж төлсөн баримт /хэргийн 2-р хуудас/,

-Булган аймгийн Татварын газрын 2025 оны 12 дугаар сарын 15-ны өдрийн 01/1070 дугаартай улсын тэмдэгтийн хураамж буцаан аваагүй тухай тодорхойлолт /хэргийн 3-р хуудас/,

-Нэхэмжлэгч Ц.Б*******ийн иргэний үнэмлэхийн хуулбар /хэргийн 4-р хуудас/,

-Ч******* дүүргийн ** дугаар хорооны Засаг даргын 2025 оны 12 дугаар сарын 11-ний өдрийн 1313 дугаартай тодорхойлолт /хэргийн 5-р хуудас/,

-фото зураг /хэргийн 6-р хуудас/,

-депозит дансны дэлгэрэнгүй хуулга /хэргийн 7-10-р хуудас/,

-Булган аймаг дахь сум дундын анхан шатны шүүхийн шүүгчийн 2025 оны 07 дугаар сарын 09-ний өдрийн 304/ШЗ2025/01810 дугаартай нэхэмжлэлийг хүлээн авахаас татгалзах тухай захирамж /хэргийн-11-23-р хуудас/,

-Булган аймгийн Улсын бүртгэлийн хэлтсээс 2026 оны 01 дүгээр сарын 08-ны өдрийн 12/11 дугаартай хаягийн бүртгэлийн лавлагаа /хэргийн-19-21-р хуудас/,

ҮНДЭСЛЭХ нь:

Хүсэлт гаргагч Ц.Б*******ийн хүсэлтийн шаардлагыг хэрэгсэхгүй болгож шийдвэрлэв.

Хүсэлт гаргагч нь шүүхэд харуицагчаар оролцвол зохих Ц.А*******ыг шүүхээр эрэн сурвалжлуулж, хаягийг нь тогтоолгоно гэж хүсэлтийн үндэслэлээ тодорхойлжээ.

Хэрэгт авагдсан бөгөөд шүүх хуралдаанаар хэлэлцэгдсэн нотлох баримтаар дараах үйл баримт тогтоогдож байна.

Иргэний хэрэг шүүхэд хянан шийдвэрлэх тухай хуульд хариуцагчийг эрэн сурвалжлах үндэслэлийг иргэний эрх зүйн маргаанд хариуцагчаар оролцвол зохих этгээд оршин суугаа газар нь мэдэгдэхгүй бол түүнийг эрэн сурвалжлуулах тухай хүсэлтийг шүүхэд гаргаж болно гэж тогтоосон.

Шүүх санаачилгаараа Булган аймгийн Улсын бүртгэлийн хэлтсээс иргэний эрх зүйн маргаанд хариуцагчаар оролцол зохих этгээд Ц.А*******ын албан ёсны хаягийн лавлагааг гаргуулахад Ц.А******* нь РД:*******, гэрийн хаяг: У******* хот, Ч******* дүүрэг, ** дугаар хороо, Согоотын ** гудамж, ** тоот албан ёсны хаягийн бүртгэлийн лавлагаа ирүүлсэн байна.

Хүсэлт гаргагч нь Ц.А*******ын дээрх хаягаар зөрчигдсөн эрхээ сэргээлгэхээр шүүхэд нэхэмжлэл гаргаж шаардах эрхээ хэрэгжүүлсэн эсэх талаарх баримт хэрэгт авагдаагүй байна.

 

Иймд шүүх иргэний эрх зүйн харилцаанд хариуцагчаар оролцвол зохих этгээд болох Ц.А*******ыг эрэн сурвалжлах хүсэлтийг бүхэлд нь хэрэгсэхгүй болгох нь зүйтэй.

Хүсэлт гаргагчийн улсын тэмдэгтийн хураамжид төлсөн 70,200 төгрөгийг Төрийн санд үлдээж шийдвэрлэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.3, 116, 118 дугаар зүйлд тус тус заасныг удирдлага болгон

ТОГТООХ нь:

1. Хүсэлт гаргагч Ц.Б*******ийн шүүхэд гаргасан иргэний эрх зүйн харилцаанд хариуцагчаар оролцвол зохих этгээд болох Ц.А*******ыг эрэн сурвалжлуулах хүсэлтийг бүхэлд нь хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 60 дугаар зүйлийн 60.1, 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгчийн улсын тэмдэгтийн хураамжид төлсөн 70,200 /далан мянга хоёр зуу/ төгрөгийг Төрийн санд хэвээр үлдээсүгэй.

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7-д зааснаар шийдвэрийг танилцуулан сонсгож, 14 хоног өнгөрснөөс хойш 14 хоногийн дотор зохигч талууд шүүхэд хүрэлцэн ирж, шийдвэрийг өөрөө гардан авах үүргээ биелүүлээгүй нь давж заалдах журмаар гомдол гаргах хугацааг тоолоход саад болохгүйг тайлбарласугай.

5. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар нэхэмжлэгч шүүхийн шийдвэрийг эс зөвшөөрвөл гардан авснаас хойш 14 хоногийн дотор Булган аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай.

 

 

 

ДАРГАЛАГЧ, ШҮҮГЧ О.ОДОНЧИМЭГ