Хариуцагч нэхэмжлэлийн шаардлагыг

хүлээн зөвшөөрснийг баталж, хэргийг хэрэгсэхгүй

болгох тухай

 

Дорноговь аймаг дахь сум дундын анхан шатны шүүхийн ерөнхий шүүгч Ц.Ариунзул би,

Нэхэмжлэгч: У хот, С дүүрэг, ** дугаар хороо, ** дүгээр байрны ** тоотод оршин суух, Ө овогт Цийн У,

Хариуцагч: Д аймаг, С сум, * дугаар баг, Н ш хн, ** дугаар байрны ** тоотод оршин суух, Б овогт Цын Б,

Нэхэмжлэлийн шаардлага:  7,000,000 төгрөг гаргуулах тухай иргэний хэргийг хянаад

                                               ТОДОРХОЙЛОХ нь:

Нэхэмжлэгч Ц.У шүүхэд гаргасан нэхэмжлэлдээ: “...2025 оны 01 дүгээр сарын 18-ны өдөр 5,000,000 төгрөгийг сарын 10 хувийн хүүтэй, 2025 оны 07 дугаар сарын 18-ны өдрийг хүртэл 6 сарын хугацаатай зээлдүүлж бичгээр гэрээ байгуулсан. Ц.Бий Х банкны *********** дугаар данс руу шилжүүлсэн. ... гэрээний үүргийн дагуу нийт 7,000,000 төгрөгийг гаргуулж өгнө үү.” гэжээ.

Хариуцагч Ц.Б нь шүүхэд гаргасан хариу тайлбартаа: ... 7,000,000 төгрөг гаргуулах тухай нэхэмжлэлийн шаардлагыг бүхэлд нь хүлээн зөвшөөрч байна. Төлж барагдуулах болно. Иймд хэргийг хялбаршуулсан журмаар шийдвэрлэж өгнө үү... гэжээ.

Нэхэмжлэл, улсын тэмдэгтийн хураамж төлсөн баримт, иргэний үнэмлэхийн хуулбар, гэрээ, дансны хуулга, тооцооны хүснэгт зэргийг нотлох баримтаар ирүүлсэн байна.

                                                   ҮНДЭСЛЭХ нь:

Ц.Уын нэхэмжлэлтэй Ц.Бд холбогдох 7,000,000 төгрөг гаргуулах тухай иргэний хэрэгт хариуцагч нэхэмжлэлийн шаардлагыг хүлээн зөвшөөрчээ.

Хариуцагчийн зөвшөөрөл нь Иргэний хуульд нийцсэн, гуравдагч этгээдийн хуулиар хамгаалагдсан ашиг сонирхлыг хөндөөгүй байх тул хариуцагчийн зөвшөөрлийг баталж, хэргийг хэрэгсэхгүй болгож шийдвэрлэх үндэслэлтэй байна.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2, 123 дугаар зүйлийн 123.1 дэх хэсгийг удирдлага болгон

                                               ЗАХИРАМЖЛАХ нь:

1.Ц.Уын нэхэмжлэлтэй Ц.Бд холбогдох 7,000,000 төгрөг гаргуулах тухай иргэний хэргийг хариуцагчийн зөвшөөрлийг баталж, хэрэгсэхгүй болгосугай.

2.Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.5, 74 дүгээр зүйлийн 74.5 дахь хэсэгт зааснаар нэхэмжлэгчийн улсын тэмдэгтийн хураамжид урьдчилан төлсөн 127,000 төгрөгөөс 63,500 төгрөгийг улсын төсвийн орлогод хэвээр үлдээж, хариуцагчаас 63,500 төгрөгийг, 63,500 төгрөгийг улсын төсвийн орлогоос тус тус гаргуулж нэхэмжлэгчид олгосугай.

3.Захирамжийг талууд сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4.Хэргийг хялбаршуулсан журмаар хянан шийдвэрлэсэн тохиолдолд зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

ЕРӨНХИЙ ШҮҮГЧ                                     Ц.АРИУНЗУЛ