Б.*******гийн нэхэмжлэлтэй С.*******д

холбогдох иргэний хэргийн тухай

Баянхонгор аймгийн Эрүү, Иргэний хэргийн давж заалдах шатны шүүхийн Иргэний хэргийн шүүх хуралдааныг Ерөнхий шүүгч М.Мөнхдаваа даргалж, шүүгч Б.Болор-Эрдэнэ, Г.Уламбаяр нарын бүрэлдэхүүнтэй, тус шүүхийн шүүх хуралдааны танхимд хийсэн шүүх хуралдаанаар

Баянхонгор аймаг дахь Сум дундын иргэний хэргийн анхан шатны шүүхийн

2018 оны 10 дугаар сарын 30-ны өдрийн 131/ШШ2018/00880 дугаар шийдвэртэй

Нэхэмжлэгч *******гийн *******гийн нэхэмжлэлтэй

Хариуцагч *******гийн *******д холбогдох

 Зээлийн гэрээний үүргийн 16.865.000 төгрөг гаргуулахыг хүссэн нэхэмжлэлтэй иргэний хэрэгт хариуцагч С.*******ийн давж заалдах гомдлыг үндэслэн хэргийг 2018 оны 11 дүгээр сарын 27-ны өдөр хүлээн авч шүүгч Г.Уламбаярын илтгэснээр хянан хэлэлцэв.

Шүүх хуралдаанд: Нэхэмжлэгч Б.*******, нэхэмжлэгчийн өмгөөлөгч *******, хариуцагчийн итгэмжлэгдсэн төлөөлөгч *******, нарийн бичгийн дарга В.Ундрах-Оргил нар оролцов.

Нэхэмжлэгч *******гийн *******гаас шүүхэд гаргасан нэхэмжлэлдээ:

С.******* надаас 2018 оны 4 дүгээр сарын 02-ны өдөр өөрийн 5046308299 данс руу 525000 төгрөг, 2018 оны 4 дүгээр сарын 02-ны өдөр 52252771243 тоот данс руу 3.250.000 төгрөг, 6.000.000 төгрөг, 2018 оны 4 дүгээр сарын 03-ны өдөр 5.000.000 төгрөг, 1.090.000 төгрөг, 2018 оны 4 дүгээр сарын 06-ны өдөр 500.000 төгрөгөөр 2 удаа нийт 1.000.000 бүгд 16.865.600 төгрөг шилжүүлж авсан.

Ингэхдээ мөнгийг өсгөж өгнө найдвартай хөрөнгө оруулагч компани байгаа гэж хэлсэн. Гэтэл өнөөдрийг хүртэл миний С.*******д өгсөн мөнгө өсөх нь битгий хэл үндсэн мөнгө орж ирээгүй өдий хүрлээ. 2018 оны 5 дугаар сараас хойш надад ямар ч мөнгө өгөөгүй тул энэ мөнгөө буцаан гаргуулахаар шаардаж эхэлсэн.

Иймд С.*******ээс 16.865.600 төгрөгийг гаргуулж өгнө үү. С.******* нь өөрийн фэсбүүк дээр тавьсан мэдээллийн дагуу асууж тодруулахад С.******* нь 10.000 долларийг Стеймфорд гэх компанид төвлөрүүлэх юм бол 7 хоног бүр 7.000 долларын ашиг авч 3 сарын дотор үндсэн мөнгөө авна, дахин хөрөнгө оруулахгүйгээр ашиг аваад явдаг компани байна гэж хэлсэний дагуу би дээрх мөнгийг шилжүүлсэн. Энэ мөнгөнөөс би ашиг гэж 65 доллар авсан, энэ мөнгийг уг компани биш С.******* өөрийн данснаасаа шилжүүлсэн байдаг. Эндээс үзсэн ч Стеймфорд компани гэж байдаг эсэх нь ч эргэлзээтэй байгаа юм. Иймд С.*******ээс 16.865.600 төгрөгийг гаргуулж өгнө үү гэжээ.

Нэхэмжлэгч Б.******* анхан шатны шүүх хуралдааны хэлэлцүүлэгт гаргасан тайлбартаа:

С.******* надаас бүгд 16.865.600 төгрөг шилжүүлж авсан. Ингэхдээ мөнгийг өсгөж өгнө найдвартай хөрөнгө оруулагч компани байгаа гэж хэлсэн. Гэтэл өнөөдрийг хүртэл миний С.*******д өгсөн мөнгө өсөх нь битгий хэл үндсэн мөнгө орж ирээгүй өдий хүрлээ. 2018 оны 5 дугаар сараас хойш надад ямар ч мөнгө өгөөгүй тул энэ мөнгөө буцаан гаргуулахаар шаардаж эхэлсэн.

С.******* нь өөрийн фэйсбүүк дээр тавьсан мэдээллийн дагуу асууж тодруулахад С.******* нь 10.000 долларийг Стеймфорд гэх компанид төвлөрүүлэх юм бол 7 хоног бүр 7000 долларийн ашиг авч 3 сарын дотор үндсэн мөнгөө авна, дахин хөрөнгө оруулахгүйгээр ашиг аваад явдаг компани байна гэж хэлсэний дагуу би дээрх мөнгийг шилжүүлсэн. Энэ мөнгөнөөс би ашиг гэж 65 доллар авсан, энэ мөнгийг уг компани биш С.******* өөрийн данснаасаа шилжүүлсэн байдаг гэжээ.

Хариуцагч С.******* шүүхэд болон анхан шатны шүүх хуралдааны хэлэлцүүлэгт гаргасан тайлбартаа:

Миний бие энэ нэхэмжлэлийн шаардлагыг зөвшөөрөхгүй байна. Би анх 2018 оны 02 дугаар сарын 01-нд Ирландын Stamford-markting гэх компанид 10.000 долларын хөрөнгө оруулалт хийсэн. Энэ компани нь Forex арилжаанд орж ашиг олон түүнээсээ ашгаа хувиарладаг компани гэж тайлбарласан. Монголд үйл ажиллагаа явуулаад нэг жил болсон байсан. Компанийн сайт монгол хэл дээр мөн Улаанбаатар хотод 3 том оффис ажиллаж байсан. Монголд оруулж ирсэн хүмүүс нь энэ онлайн бизнес ойрын 2 жилдээ эрсдэлгүй гэж хэлсэн. Тиймээс би энэ компанид үнэхээр итгэж цалингийн зээл авч хөрөнгө оруулсан. Энэ компани 7 хоног бүрийн хагас сайн өдөр бүр ашигаа хувиарладаг байсан. Миний бие энэ компанид 10.000 долларын хөрөнгө оруулаад үүнээсээ ердөө 4000 долларыг буцаан авсан

 Б.******* эгч 219 долларыг 525.600 төгрөгөөр худалдан авч 525.600 төгрөгөө Б.******* эгч өөрөө доллар авсан хүнийхээ 5046308299 данс руу шилжүүлсэн. 5046308299 данс нь надад ямар ч хамааралгүй данс юм.

 Б.******* эгч 2018 оны 4 дүгээр сарын 02-ны өдөр миний 5225271243 тоот данс руу 3250.000 төгрөг, 6000.000 төгрөг, 2018 оны 4 дүгээр сарын 03-ны өдөр 5.000.000 төгрөг, 1090.000 төгрөг, 2018 оны 4 дүгээр сарын 06-ны өдөр 500.000 төгрөгөөр 1 удаа нийт 15.840.000 төгрөгийг над руу шилжүүлсэн мөнгө шилжүүлэхдээ Б.******* эгч доллар өгч авна гэдэг бас төвөгтэй юм байна. Эгч нь сайн мэдэхгүй болохоор би чиний данс руу мөнгө олоод хийгээд байя эгч нь мөнгөө олно гээд угаасаа зав ч гарахгүй байна гэж хэлээд шилжүүлсэн.

Б.******* эгчийн өөрийнх нь хүсэлтээр би шилжүүлсэн мөнгөөр нь доллар худалдан авч компанийн дансанд өөрийн нь нэрэн дээр 12.000 доллар байршуулж өгсөн. Үүнээс 2 мянган доллар нь компанийн урамшуулал. Үлдсэн 10.000 долларыг бүрдүүлэхдээ 562.028 доллар нь 13.906.992 төгрөгөөр худалдан авч энэ мөнгийг нь Намсрайн Сандагсүрэн 5540354742 гэх дансанд шилжүүлсэн. 1.433.008 төгрөгөөр нь 597 доллар дотоодоос худалдан авч мөнгийг нь шилжүүлсэн. ******* эгчийг элсүүлсний цалин гэж надад 6.5 хувь цалин болох 780 доллар орж ирсэнийг би өөрөө аваагүй ******* эгчид өгсөн. ******* эгч өөрийнхөө мөнгөөр нийт 643.628 доллар надаар дамжуулан 15.340.000 төгрөгөөр худалдан авсан.

 Энэ компанийн талаар ******* эгч тодорхой мэдээлэлтэй байсан. Би ******* эгчид өөрсдөө шийдвэрээ гарга одоогийн байдлаар үйл ажиллагаа нь хэвийн л байна, ирээдүйд ямар байхыг нь мэдэхгүй гэж хэлсэн. ******* эгч яадаг ч байсан орно мөнгө хайна гэсэн. ******* эгчид 10.000 доллар хийх мөнгө олдохгүй байсан. Би тус мөнгийг төлөх хариуцах эзэн биш учраас нэхэмжлэлийг хүлээн зөвшөөрөхгүй гэжээ.

Шүүх: Иргэний хуулийн 492 дугаар зүйлийн 492.1.1-д заасныг баримтлан хариуцагч С.*******ээс 15.840.000 төгрөг гаргуулж нэхэмжлэгч Б.*******д олгож, нэхэмжлэлийн шаардлагаас 1.025.600 төгрөгийг хэрэгсэхгүй болгож, Иргэний хэрэг шүүхэд хянан шийдвэрлэх тухай хуулийн 60 дугаар зүйлийн 60.1, 56 дугаар зүйлийн 56.2-д заасныг тус тус баримтлан нэхэмжлэгчээс улсын тэмдэгтийн хураамжид төлсөн 242.950 төгрөгийг төвлөрсөн төсвийн орлогод хэвээр үлдээж, хариуцагч С.*******ээс улсын тэмдэгтийн хураамж 237.150 төгрөг гаргуулж нэхэмжлэгч Б.*******д олгож шийдвэрлэжээ.

Хариуцагч С.******* давж заалдах шатны шүүхэд гаргасан гомдолдоо:

Анхан шатны шүүхээс Иргэний хуулийн 492 дугаар зүйлийн 492.1.1-д зааснаар С.******* намайг үндэслэлгүйгээр хөрөнгөжсөн гэх дүгнэлт хийжээ. Б.******* нь хөрөнгийг шилжүүлэхдээ ******* компанид хөрөнгө оруулалт хийж, үүнээсээ ашиг олох зорилготой байсан /үүнийгээ өөрөө хүлээн зөвшөөрдөг, шүүх хуралдааны тэмдэглэл болон нэхэмжлэлд бичигдсэн/ бөгөөд харин тухайн хөрөнгийг шилжүүлэхдээ өөрийн цахим интернетийн мэдлэг дутуу байдлаас шалтгаалан миний туслалцааг хүсч, миний данс руу хөрөнгөө шилжүүлэн надаар доллар худалдан авахуулуулж тухайн компанид Б.******* өөрөө эзэмшдэг 1113438 тоот аккаунт буюу дансандаа доллар байршуулуулсан байдаг.

Миний бие Б.*******гийн хүсэлтээр тухайн компанид Б.*******гийн нэр дээр аккаунт буюу стэймфорд компаний орчинд ажиллах 1113438 тоот дансыг нь нээж өгсөн ба энэхүү дансанд нь долларыг нь байршуулан түүнд өөрт нь хүлээлгэн өгсөн байдаг. Б.******* өөрийн аккаунтаараа нэвтрэн орж, өөрөө цаашид үйл ажиллагааг нь үргэлжлүүлэн явуулсан байдаг бөгөөд энэ нь миний шүүхэд гаргаж өгсөн нотлох баримтуудаар хангалттай нотлогддог.

Тухайлбал, Б.******* бид хоёрын хооронд харилцсан фэйсбүүк мессенжер чатад шүүхээс хийсэн үзлэгийн тэмдэглэл, Б.*******гийн нэр дээр “*******” компанийн вэб хуудас дахь түүний 1113438 тоот данс буюу аккаунтыг баримтжуулсан гэрэл зураг мөн фэйсбүүк чатаар түүний 1113438 дансыг нь баримтжуулан түүнд илгээж тэр өөрөө хүлээн аваад нэвтрэн орсон гэсэн утга бүхий чат зэргээр нотлогдоно. Уг нотлох баримтуудтай нэхэмжлэгчийн зүгээс маргадаггүй бөгөөд хүлээн зөвшөөрдөг. Зохигчид тухайн асуудлаар маргаагүй хүлээн зөвшөөрсөнөөр тухайн үйл баримт болон нотлох баримт нь үнэлэгдэх баримтад тооцогдохоор хуульчлагдсан байдаг.

Гэтэл Б.*******гийн миний данс руу мөнгө хийх болсон шалтгаан нь зөвхөн ******* компанид хөрөнгө оруулалт хийх зорилго байсан, Б.******* бид хоёрын хооронд маргаж буй мөнгөтэй холбоотой ямар ч харилцаа үүсээгүй, миний бие хөрөнгөжөөгүй, Б.******* нь надад хөрөнгө оруулж би мөнгийг нь өсгөж өгнө гэсэн зүйл огт байхгүй харин ******* компанид хөрөнгө оруулалт хийх хүсэл зоригийнхоо дагуу цахим орчин дахь мэдлэг дутуу шалтгаанаар миний дансанд мөнгөө хийж, би мөнгийг нь стэймфорд компаний хөрөнгө оруулагч нараас болон ******* компаний менежер Намсрайн Сандагсүрэн гэх эмэгтэйгээс доллар худалдан авч Б.*******гийн эзэмшдэг ******* компанийн 1113438 тоот дансанд нь байршуулан түүнд хүлээлгэн өгсөн байдаг. Үүнийг ч нэхэмжлэгч өөрөө мэдэж байгаа боловч ******* компанийг дампуурангуут буух эзэн нь намайг болгож, надаас үндэслэлгүйгээр мөнгө нэхэмжилж байгааг шүүхээс ялган зааглаж, нэхэмжлэгчийн хүсэл зоригийг тайлбарлаж чадахгүй байна.

Нэхэмжлэгч нь өөрөө миний хувьд интернэт орчинд ажиллаж чадахгүй гэсэн тул туслах зорилгоор мөнгийг нь өөрийн дансанд байршуулж, доллар болгон, 1113438 тоот дансыг буюу аккаунтыг нээн, доллар байршсан талаар өөрт нь мэдэгдэж, хүлээлгэн өгсөн. Ингэсээр хөрөнгө олж авсан этгээд нь би биш ******* компани бөгөөд тус компани Б.******* хоёрын хооронд үүрэг үүссэн энэ нь хэрэгт авагдсан тус компанийн эрх нээгдсэн баримт, чатаар холбогдох линкийг явуулж ******* нь тухайн линк рүү орж харж өөрийнхөө бүртгэлийг баталгаажуулснаа илэрхийлсэн байхад намайг үндэслэлгүй хөрөнгөжсөн гэж дүгнэж байгаа нь үндэслэлгүй юм.

Хамгийн гол нь нэхэмжлэгч Б.*******, ******* компани нарын хооронд эрх зүйн харилцаа үүссэн болохыг шүүх анхаарч үзэх ёстой байсан.

Б.*******гийн шилжүүлсэн мөнгийг Намсрайн Сандагсүрэнд доллар болгуулахаар шилжүүлсэн бөгөөд энэ баримтыг шүүхэд нотлох баримтаар өгсөн. Үүнийг баримтжуулсан давхар нотлох баримт нь Б.*******гийн нэр дээр үүссэн *******ын аккаунт хаяг, мөн Намсрайн Сандагсүрэнтэй чаталсан фэйсбүүк чат юм. Тухайн компанид хөрөнгө оруулалт хийсэн хүн л аккаунт хаягтай болох бөгөөд үүнийгээ ч нэхэмжлэгч Б.******* мэдэж байгаа, энэ нь фэйсбүүк чатаар нотлогдоно.

Дээрхээс нэгтгэн дүгнэвэл миний бие ямар нэг байдлаар хөрөнгөжөөгүй, нэхэмжлэгчээс надад хандан хөрөнгийн шилжүүлэг хийгээгүй, бидний хооронд тухайн маргаж буй хөрөнгийг надад шилжүүлэхтэй холбоотой ямар ч харилцаа үүсээгүй юм.

Гэтэл анхан шатны шүүхээс тухайн баримтуудыг хэрхэн үнэлсэн болохоо шүүхийн шийдвэрт дурдаж бичээгүй, нэхэмжлэлийн шаардлагыг хангаж шийдвэрлэхдээ ямар баримтыг үнэлсэн мөн няцаасан, ямар баримтыг ямар баримт няцааж байгаа болохыг харьцуулан дүгнээгүй нь тухайн шийдвэрийг үндэслэл бүхий биш болохыг харуулна.

Нэхэмжлэгчийн зүгээс нэхэмжлэлийн үндэслэлээ нотлох баримтыг гаргаж өгөөгүй бөгөөд харин шүүгчээс өөрийн анхнаасаа төрсөн итгэл үнэмшилдээ тулгуурлан өөрийнхөө таамаглалд үндэслэн шийдвэр гаргасанд гомдолтой байна.

Шүүгчээс миний гаргаж өгсөн дээрх нотлох баримтыг үнэлж бичээгүй атлаа хариуцагч талаас гаргаж өгсөн баримтаар хангалттай нотлогдохгүй, татгалзлаа нотлох үүргээ хэрэгжүүлээгүй гэж өрөөсгөл дүгнэлт хийж буйд гомдолтой байна. Иймд нэхэмжлэлийг хэрэгсэхгүй болгож өгнө үү гэжээ.

Нэхэмжлэгч Б.******* давж заалдах гомдолд гаргасан тайлбартаа:

Хариуцагч С.*******ийн гаргасан гомдлыг хүлээн авч эс зөвшөөрөн дараах тайлбарыг гаргаж байна.

Баянхонгор аймаг дахь сум дундын иргэний хэргийн анхан шатны шүүхийн 2018 оны 10 дугаар сарын 30-ны өдрийн 131/ШШ2018/00880 дугаартай шийдвэр хууль ёсны бөгөөд үндэслэл бүхий гарсан. Би 2018 оны 04 дүгээр сарын 02-ны өдрөөс 2018 оны 4 дүгээр сарын 06-ны өдрийн хооронд С.*******ийн 5225271243 тоот дансанд 15.840.000 төгрөгийг шилжүүлсэн бөгөөд дээрх мөнгийг С.******* буцаан төлөөгүй мөн энэ мөнгийг стэймфорд ХХК-д шилжүүлээгүй өөрөө хэрэглэсэн нь тогтоогдсон. Иймд Баянхонгор аймаг дахь сум дундын иргэний хэргийн анхан шатны шүүхийн 2018 оны 10 дугаар сарын 30-ны өдрийн 131/ШШ2018/00880 дугаартай шийдвэрийг хэвээр үлдээж өгнө үү гэжээ.

ҮНДЭСЛЭХ нь:

Нэхэмжлэгч Б.******* нь хариуцагч С.*******д холбогдуулж зээлсэн 16.865.600 төгрөгийг гаргуулахаар нэхэмжлэлийн шаардлага гаргаж, анхан шатны шүүх нэхэмжлэлийн шаардлагыг бүхэлд нь хангаж шийдвэрлэжээ.

Нэхэмжлэгч нь шүүхэд гаргасан тайлбартаа С.******* нь мөнгийг өсгөж өгдөг компани байна гээд ******* гэдэг компанийн тухай танилцуулж 16.865.600 төгрөгийг Хаан банкинд байдаг өөрийнхөө дансаар шилжүүлж аваад буцааж төлөөгүй гэж тайлбарладаг бол хариуцагч С.*******ээс тайлбарлахдаа би ******* гэдэг компанид хөрөнгө оруулж ашиг хүртдэг байсан энэ байдлыг Б.******* мэдээд надад хандаж компанид хөрөнгө оруулахаар шийдэж, өөрөө цахим орчинд программ хангамж дээр ажиллаж чадахгүй байсан учир надаар дамжуулан миний дансанд өөрийнхөө мөнгийг шилжүүлж би уг мөнгийг ******* компанид доллар болгон шилжүүлж өгсөн тул энэ мөнгийг хариуцахгүй гэж маргадаг байна.

Б.******* нь С.*******ийн данс руу мөнгө шилжүүлэх болсон гол зорилго нь тухайн компанид хөрөнгө оруулах мөнгөө өсгөж авах зорилготой байсан нь тодорхой байна.

Б.******* нь мөнгийг шилжүүлэхдээ ******* компанид хөрөнгө оруулалт хийж, үүнээсээ ашиг олох зорилготой байсан. Харин мөнгийг шилжүүлэхдээ монгол төгрөгийг долларт хөрвүүлэх зэрэг шалтгаанаас үүдэж С.******* миний данс руу мөнгийг шилжүүлсэн бөгөөд шилжүүлсэн мөнгөөрөө доллар худалдан авахуулж ******* компанид Б.******* өөрөө эзэмшдэг 1113438 тоот аккаунт буюу дансандаа доллар байршуулуулсан байдаг болох нь /хх-ийн 43-44 дүгээр тал/ хэрэгт авагдсан бид хоёрын хооронд харилцсан фэйсбүүк мессенжер чатад шүүхээс хийсэн үзлэгийн тэмдэглэл зэргээр тогтоогдож байхад шүүхээс энэ нотлох баримтыг үнэлээгүй гэж хариуцагч С.*******ээс тайлбарлаж байгаа боловч эдгээр нотлох баримтууд нь эргэлзээтэй, Б.*******гийн мөнгийг ******* компани хүлээн авчээ гэж үзэх хангалттай нотлох баримт болж чадахгүй байна.

 Нэхэмжлэгч Б.*******гийн С.*******д шилжүүлсэн мөнгө нь С.*******ийн данснаас ******* компанийн дансанд шилжсэн тухай санхүүгийн баримт, нотолгоо хэрэгт авагдаагүй, хэдийд ямар хугацаанд тухайн компанийн дансанд орсон болох мөн тухайн компани мөнгийг хүлээн авсан тухайгаа харилцагчдаа албан ёсоор мэдэгдсэн баримт хэрэгт авагдаагүй болох нь тогтоогдож байна.

Харин ******* компанид Б.*******гийн 15.840.000 төгрөг нь долларт хөрвөж байршсан гэж үзэж байгаа бол хөрөнгө оруулалт хийсэн харилцагчдаа тухайн компани мэдэгдэх үүрэгтэй бөгөөд энэ үүргээ биелүүлээгүй. Мөн хөрөнгө оруулсан харилцагчдаа ногдол ашиг, орлого цалин хувиарласан тухай баримт байхгүй байгаа нь Иргэний хуулийн 196 дугаар зүйлийн 196.1.1, 196.1.2, 196.1.3-т зааснаар нэхэмжлэгч Б.******* болон ******* компанийн хооронд гэрээ байгууллагдсан, ямар нэг эрх зүйн харицлаа үүссэн байна гэж үзэх үндэслэлгүй байна.

Иргэний хуулийн 42¹ дугаар зүйлийн 42¹.2-т зааснаар нэхэмжлэгч Б.******* болон ******* компанийн хооронд цахим хэлбэрээр хэлцэл хийгдсэн хүчин төгөлдөр гэж үзэх боломжгүй юм.

Нэхэмжлэгч Б.*******гаас тайлбарлахдаа С.******* надад цалин гэж 65 долларыг өөрийн данснаас шилжүүлсэн гэж тайлбарладаг байдал нь ******* компаниас цалин олгожээ гэж үзэх үндэслэл болохгүй байна.

Талуудын тайлбарт дурьдаад байгаа ******* компани нь Монгол улсад үйл ажиллагаа явуулах зөвшөөрөл, компанийн иргэний эрх зүйн чадвар, улсын бүртгэлийн гэрчилгээ, үйл ажиллагааны чиглэл зэрэг эрх зүйн баримт, баталгаа байхгүй байгааг дурьдах нь зүйтэй байна.

Харин нэхэмжлэгч Б.*******гийн 15.840.000 төгрөг нь 2018 оны 4 дүгээр сарын 2-ны өдрөөс 4 дүгээр сарын 6-ны өдрийг хүртэл хугацаанд С.*******ийн ХААН банкин дахь 5249051412 тоот дансанд шилжиж орсон, хариуцагч С.******* нь Б.*******гийн 15.840.000 төгрөгийг хүлээн авсан болох нь хэрэгт авагдсан нэхэмжлэгч, хариуцагч нарын харилцах дансны мэдээлэл болон зохигчидын тайлбараар тогтоогджээ.

Нэхэмжлэгч Б.******* нь С.*******ээс 15.840.000 төгрөгийг шаардах эрхтэй байна. Анхан шатны шүүх хууль буруу хэрэглэсэн гэж үзэх үндэслэлгүй байна гэж үзлээ.

Иймд анхан шатны шүүхийн шийдвэрийг хэвээр үлдээж, хариуцагч С.*******ийн давж заалдах гомдлыг хангах үндэслэлгүй гэж шүүх бүрэлдэхүүн дүгнэв.

 Хариуцагч С.*******ээс давж заалдах гомдол гаргахдаа улсын тэмдэгтийн хураамжинд төлсөн 237.150 төгрөгийг төрийн сангийн дансанд хэвээр үлдээх үндэслэлтэй байна.

Иргэний хэрэг шүүхэд хянан шийдвэрлэх тухай хуулийн 167 дугаар зүйлийн 167.1.1-д заасныг удирдлага болгон

ТОГТООХ нь:

1. Баянхонгор аймаг дахь Сум дундын иргэний хэргийн анхан шатны шүүхийн 2018 оны 10 дугаар сарын 30-ны өдрийн 131/ШШ2018/00880 дугаар шийдвэрийг хэвээр үлдээж, хариуцагч С.*******ийн давж заалдах гомдлыг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1-д зааснаар хариуцагч С.*******ээс улсын тэмдэгтийн хураамжинд төлсөн 237.150 төгрөгийг төвлөрсөн төсвийн дансанд хэвээр үлдээсүгэй.

3. Давж заалдах шатны шүүх хэргийг шийдвэрлэхдээ хэрэг хянан шийдвэрлэх ажиллагааны журам зөрчсөн, хуулийг буруу хэрэглэсэн гэж үзвэл зохигчид магадлалыг гардан авсан, эсхүл хүргүүлснээс хойш 14 хоногийн дотор Улсын дээд шүүхэд хяналтын журмаар гомдол гаргах эрхтэй болохыг дурдсугай.