МОНГОЛ УЛСЫН НЭРИЙН ӨМНӨӨС

 

 

Багануур дүүргийн Иргэний хэргийн анхан шатны шүүхийн иргэний шүүх хуралдааныг шүүгч Т.Эрдэнэтунгалаг даргалж, шүүх хуралдааны танхимд явуулсан хуралдаанаар

Хүсэлт гаргагч: ******* банкны Багануур салбарын Б.*******ийг эрэн сурвалжлуулах тухай хүсэлтийг 2025 оны 12 дугаар сарын 26-ны өдөр хүлээн авч хянан хэлэлцэв.

Шүүх хуралдаанд:

Хүсэлт гаргагч байгууллагын төлөөлөгч: Х.*******,

Шүүх хуралдааны нарийн бичгийн дарга: Б.Долгоржав нар оролцов.

ТОДОРХОЙЛОХ нь:

******* банкны Багануур салбар нь Б.*******ийг эрэн сурвалжлуулах тухай хүсэлтийг шүүхэд гаргажээ. Хүсэлт гаргагч хүсэлтээ дараах байдлаар тодорхойлж байна. Үүнд:

1.Зээлдэгч *******ы ******* /РД:**********/ нь Багануур салбарын Архуст тооцооны төвөөс 2023 оны 06 дугаар сарын 17-ны өдөр 31/51820321 дугаартай зээлийн гэрээ болон БГХ/51820321 дугаартай барьцааны гэрээ байгуулан 5,605,800 төгрөгийн зээлийг сарын 1.55 хувийн хүүтэй, 30 сарын хугацаатайгаар цалингийн зээлийн зориулалтаар зээлж авсан бөгөөд уг зээлийн барьцаанд ирээдүйд орж ирэх цалингийн орлогоо барьцаалуулан зээлийг авсан. Гэрээнд зааснаар зээлийн эргэн төлөлтийн хуваарь нь үндсэн зээл ба ашигласан хугацааны хүүний төлбөрийг сар бүр төлөх ёстой. Гэтэл зээлдэгч нь гэрээ ёсоор төлбөл зохих төлбөрүүдийг хугацаандаа төлөлгүй удаа дараа хугацаа хэтрүүлж, 2024 оны 09 дүгээр сарын 10-ны өдрөөс хойш төлөлт хийлгүй нийт 464 хоног хугацаа хэтрүүлж гэрээний үүргээ зорчиж байна. Зээлдэгч нь зээлийн төлбөрийг хуваарийн дагуу төлөхгүй байгаа тул зээлийн гэрээг цуцлах нөхцөл байдал үүссэн бөгөөд 2025 оны 12 дугаар сарын 17-ны өдрийн байдлаар үндсэн зээлийн үлдэгдэлд 1,890,284 төгрөг, зээлийн хүүгийн төлбөрт 584,202 төгрөг, нэмэгдүүлсэн хүүгийн төлбөр 54,394 төгрөг, нийт 2,528,880 төгрөг төлөгдөөгүй зээлийн төлбөрийн үлдэгдэлтэй байгаа болно. Зээлдэгч Б.******* нь ******* банкнаас зээл авах үедээ Төв аймгийн Архуст сумын * дугаар баг, *********хаягт оршин сууж байсан бөгөөд одоо уг хаягт амьдардаггүй болох нь Төв аймгийн Архуст сумын ****** багийн Засаг даргын 2025 оны 10 дугаар сарын 03-ны өдрийн 05/58 дугаартай тодорхойлолтоор тогтоогддог. Иймд зээлдэгч Б.******* нь зээлийн гэрээний үүргээ удаа дараа зөрчиж зээлээ төлөхгүй, хаана оршин суугаа газар нь тодорхой бус байгаа учир эрэн сурвалжилж, оршин суугаа газрыг тогтоолгож өгнө үү гэжээ.

Хүсэлт гаргагчийн итгэмжлэгдсэн төлөөлөгч Х.******* шүүх хуралдаанд өгсөн тайлбартаа: ******* зээл авах үедээ Сүхбаатар дүүргийн Улаанбаатар Цахилгаан түгээх сүлжээний газар тоолуурын ажилтан, Төв аймгийн Архуст суманд хаягтай байсан. 2024 оны 5 сараас хойш зээлээ төлөөгүй, хугацаа хэтэрсэн. Банкнаас холбогдоход жирэмсний амралттай байгаа, декритний мөнгөөр зээлээ төлнө гэж тохирсон боловч төлөөгүй. Нөхөр *******ын *******-******* гэж хүн байгаа, *********** гэсэн дугаартай, нөхөртэй нь холбогдоход эхнэр жирэмсний амралттай байгаа, би уурхайд ажилладаг, зээлийг нь төлнө гэсэн боловч төлөөгүй, холбогдоогүй, дуудлага авахгүй байна. Хадам ээж нь ******* ******* гэж хүн байгаа, *************** гэсэн дугаартай, залгахаар утсаа авдаггүй, хадам аав нь ын ******* гэж хүн байгаа, ********** гэсэн дугаартай, залгахаар авдаггүй, хариу өгөхгүй байдаг, ******* нь хадмуудтайгаа хамт амьдардаг байх магадлалтай гэв.

Хүсэлт гаргагчаас: Улсын тэмдэгтийн хураамж төлсөн баримт, нэхэмжлэгч байгууллагын Улсын бүртгэлийн гэрчилгээний хуулбар, итгэмжлэл, Төв аймгийн Архуст сумын ******** багийн Засаг даргын тодорхойлолт, ЗГ/51820321 дугаартай зээлийн гэрээ, барьцааны гэрээ, зээлийн дансны дэлгэрэнгүй хуулга, зөвшөөрлийн хуудас зэргийг нотлох баримтаар ирүүлсэн болно.

Шүүхээс хэрэгт авагдсан шүүх хуралдаанаар хэлэлцэгдсэн бичгийн баримтуудыг шинжлэн судлаад:

ҮНДЭСЛЭХ нь:

Шүүх хүсэлтийг хангах үндэслэлтэй байна гэж үзлээ.

Б.******* нь иргэний эрх зүйн маргаанд хариуцагчаар оролцвол зохих этгээд мөн болох нь ******* банк ХК, Б.******* нарын хооронд байгуулагдсан зээлийн болон барьцааны гэрээ, зээлийн дансны дэлгэрэнгүй хуулга, ******* банкны Багануур салбарын шүүхэд гаргасан хүсэлт зэргээр тогтоогдож байгаа бөгөөд хариуцагч нь албан ёсны хаягтаа байхгүй, хаана оршин суугаа газар нь мэдэгдэхгүй байх тул эрэн сурвалжлах шийдвэр гаргах нь зүйтэй гэж үзлээ. Боржигон овогт *******ы ******* /РД:***********/ гэсэн регистрийн дугаартай, зээл авах үедээ Төв аймгийн Архуст сумын 2 дугаар баг, Нарст хаягт амьдарч байсан, нөхөр Б.*******-******* нь ***********дугаарын гар утастай гэх мэдээллийг Багануур дүүрэг дэх Цагдаагийн хэлтэст хүргүүлэх нь зүйтэй байна.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.9 дэх хэсэгт заасныг тус тус

удирдлага болгон ТОГТООХ нь:

1.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3 дахь хэсэгт зааснаар Боржигон овогт *******ы *******ийг /РД:***********/ эрэн сурвалжилж, оршин суугаа албан ёсны хаягийг тогтоосугай.

2.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4 дэх хэсэгт зааснаар хариуцагчийг эрэн сурвалжлах, түүний хаана оршин суугаа газрыг тогтоох ажиллагааг шүүхийн шийдвэрийн дагуу гүйцэтгэхийг Багануур дүүргийн Цагдаагийн хэлтэст даалгасугай.

3.Б.******* нь хаана байж болох бүхий л хаяг мэдээллийг тухай бүр Цагдаагийн байгууллагад мэдэгдэж байхыг хүсэлт гаргагч ******* банкны Багануур салбарт анхааруулсугай.

4.Шүүхийн шийдвэр хүчин төгөлдөр болмогц шийдвэрийн хувийг Цагдаагийн байгууллагад хүргүүлэхийг шүүгчийн туслахад үүрэг болгосугай.

5.Б.*******ийг хаана оршин сууж байгаа газрыг тогтоосон нөхцөлд хаягийг хүсэлт гаргагчид албан ёсоор мэдэгдэхийг Багануур дүүргийн Цагдаагийн хэлтэст үүрэг болгосугай.

6.Улсын тэмдэгтийн хураамжийн тухай хуулийн 7 дугаар зүйлийн 7.1, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1 дэх хэсэгт зааснаар хүсэлт гаргагчийн урьдчилан төлсөн улсын тэмдэгтийн хураамж 70,200 төгрөгийг улсын төсөвт хэвээр үлдээсүгэй.

7.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар нэхэмжлэгч нь анхан шатны шүүхийн шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

 

 

ДАРГАЛАГЧ ШҮҮГЧ Т.ЭРДЭНЭТУНГАЛАГ