2026             01              29  192/ШШ2026/01345

 

 

МОНГОЛ УЛСЫН НЭРИЙН ӨМНӨӨС

 

Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүхийн шүүгч Ч.Баярсүрэн даргалж, шүүгч Н.Батчимэг, Б.Ганцэцэг нарын бүрэлдэхүүнтэй, тус шүүхийн шүүх хуралдааны танхимд хийсэн иргэний хэргийн шүүх хуралдаанаар, 

Нэхэмжлэгч: ************ тоотод оршин суух, Т овогт Ш-ийн С- /рд:************/,

Хариуцагч: ***************** тоотод оршин суух, Б овогт Д-ын О- /рд:РЭ81112101/,

Нэхэмжлэлийн шаардлага: Гэм хорын хохиролд 33,312,900 төгрөг гаргуулах тухай иргэний хэргийг хянан хэлэлцэв.

Шүүх хуралдаанд оролцогч:

Нэхэмжлэгчийн итгэмжлэгдсэн төлөөлөгч О.Б,

Хариуцагчийн өмгөөлөгч И.Э,

Гэрч Б.О,

Иргэдийн төлөөлөгч Н.Б,

Шүүх хуралдааны тэмдэглэлийг нарийн бичгийн дарга З.Төвсайхан хөтлөв.

 

ТОДОРХОЙЛОХ нь:

 

1. Нэхэмжлэгч Ш.С- нь хариуцагч Д.О-гаас гэм хорын хохиролд 33,312,900 төгрөг гаргуулахаар нэхэмжлэл гаргасан. Нэхэмжлэгч нэхэмжлэлийн шаардлага, үндэслэлээ дараах байдлаар тодорхойлж байна. Үүнд:

Би 2003 онд Н.Б-тай гэр бүл болсон, бидний дундаас 2 хүү, 2 охин төрсөн бөгөөд бид 2023 оноос эхлэн гэр бүлийн маргаантай амьдрах болсон.Нөхөр Н.Б- нь Д.О-тай гэр бүлээс гадуур харилцаа үүсгэж, намайг Д.О- хэл амаар доромжилж, заналхийж мессежээр гүтгэж, дарамталж, миний хууль ёсны эрх ашиг сонирхлыг зөрчсөн хууль бус үйлдлүүд гаргаж байсан, энэ хугацаанд миний сэтгэл санаа их гутралд орж шээс чулуужих өвчтэй гэж оношлогдож, 2023 оны 4 дүгээр сарын 11, 2023 оны 6 дугаар сарын 14-ний өдрүүдэд хагалгаанд орж эмчлүүлсэн. Д.О-гийн зүй бус үйлдэл хэтэрч намайг Цагдаагийн байгууллагаар шалгуулж миний хуулиар хамгаалагдсан эрхэд халдсан. Д.О- намайг “сэтгэцийн өөрчлөлттэй болж авгай чинь” гэж хэлсэн нь надад сэтгэл зүйн хувьд хүнд туссан ба би ингэтлээ түүнд доромжлуулах нь гэр бүлээрээ хохироод зогсохгүй түүний намайг гүтгэж байгаа үйлдэл нь хууль бус ба миний хууль ёсны эрх ашиг сонирхлыг ноцтой зөрчсөн тул зөрчигдсөн эрхээ сэргээлгэхээр нэхэмжлэл гаргасан. Баянгол дүүргийн Иргэний хэргийн анхан шатны шүүхийн 2024 оны 6 дугаар сарын 5-ны өдрийн 102/ШШ2024/02946 дугаар захирамжаар Зохигчдын эвлэрлийг баталж, хэргийг хэрэгсэхгүй болгож шийдвэрлэсэн. Д.О-гаас болж Н.Б-гаас гэрлэлтээ цуцлуулах нэхэмжлэлийг шүүхэд гаргасан байгаа. Би жил гаруй хэл амаар доромжлуулж байх хугацаанд өмнө нь эмчлүүлж байсан хэвлий хэсгээр дахин хатгуулж өвдөх болсон тул БНСУ-ыг зорьж ходоод, бүдүүн гэдэсний дурангийн шинжилгээнд хамрагдаж, ходоодны үрэвсэл гэх оноштой эмийн эмчилгээ хийлгэж хохирч байгаа тул эрүүл мэндэд учирсан хохирол болон сэтгэцэд учирсан хохирлыг шаардаж байна. Үүнд 2023 оны 4 дүгээр сарын 11-ний өдөр хагалгаанд ороход 404,250 төгрөг, 2023 оны 6 дугаар сарын 14-ний өдөр хагалгаанд ороход 404,250 төгрөг, 2023 оны 4 дүгээр сарын 29-ний өдөр эм болон тариур 70,350 төгрөг, онгоцны зардал 1,653,640 төгрөг, 2024 оны 7 дугаар сарын 15-ны өдөр БНСУ-д хагалгаанд ороход 626,610 төгрөг, 2024 оны 8 дугаар сарын 6-ны өдөр эм болон тариур 153,800 төгрөг болсон. Иргэний хуулийн 497 дугаар зүйлийн 497.1-т заасны дагуу миний эрүүл мэндэд учирсан хохиролд 3,312,900 төгрөг, сэтгэцэд учирсан хохиролд 30,000,000 төгрөг, нийт 33,312,900 төгрөгийг Д.О-гаас гаргуулж өгнө үү гэжээ.

 

2. Хариуцагч хариу тайлбартаа: Д.О- нь нөхөр, гурван хүүхдийн хамт амьдардаг, тогтсон амьдралтай хүн бөгөөд нөхөртөйгөө хамтын амьдарлаа эхлүүлээд 23 жил болж байгаа амьдралыг бусниулах, гэр бүлээс гадуурх харилцаа үүсгэх сонирхол байхгүй. 2023 оны 9 дүгээр сараас хойш Д.О-г тайван байлгахгүй, ар гэрийнхэнд нь, 10 жилийн ангийн хүүхдүүдэд нь худал мэдээлэл тарааж, нэр төрийг нь гутаан доромжилж, ажлын байран дээр нь ирж сүрдүүлж байсан. Д.О- нь нэхэмжлэгчийн нөхөртэй гэр бүлээс гадуурх харилцаа үүсгэж байгаагүй бөгөөд нэхэмжлэгч нь өөрийн таамгаа бодит мэт андуурч Д.О-г залхаах зорилгоор шүүхэд хандаж байгаа. Д.О- нь нэхэмжлэгчийг байнга дарамтлах, үг хэлээр доромжилсон зүйл байхгүй, харин нэхэмжлэгч нь өөрийн нөхөртөйгөө хардан Д.О-г бүх хэлбэрээр доромжилж, дарамталж байгаа. Нэхэмжлэгчийн яриад байгаа дарамт шахалт, доромжлолыг өөрөө Д.О-д байнга мэдрүүлж байсан. Нэхэмжлэгч нь Д.О-г тасралтгүй утсаар болон мэссэжээр гүтгэж, доромжлоод, ар гэрийнхэнтэй холбоо бариад байсан тул аргагүйн эрхэнд цагдаад гомдол гаргасныг эрхэнд халдсан гэж тайлбарлаж байгаа нь үндэслэлгүй юм. Талуудын хоорондын маргаан 2023 оны 9 дүгээр сараас эхэлсэн бөгөөд маргаантай ямар ч холбоогүй, бүр өмнө нь оношлогдсон өвчнийхөө нөхцлийг хариуцагчтай холбож тайлбарлаж байгаа нь үндэслэлгүй, цаг хугацааны хамааралгүй байна. Д.О- нь нэхэмжлэгчийн эрүүл мэндийг хохироох гэм буруутай үйлдэл хийгээгүй тул гэм хорын, сэтгэл санааны хохирол нөхөн төлөх үндэслэлгүй тул нэхэмжлэлийг хэрэгсэхгүй болгож өгнө үү гэжээ. 

3. Иргэдийн төлөөлөгч шүүх хуралдаанд гаргасан дүгнэлтдээ: Нэхэмжлэгч С- нөхрийгөө хариуцагч О-тай гэр бүлийн гадуурх харилцаатай гэсэн нотлох баримт хангалтгүй. Мөн сэтгэл санааны хохирол гэх зардал мөнгө нэхэх нь зохимжгүй. Хариуцагч О- нь нэхэмжлэгч С-г элдэв бусаар хэлж бичиж доромжилсон нь буруу гэжээ. 

 

4. Нэхэмжлэгчээс дараах баримтуудыг шүүхэд гаргаж өгсөн. Үүнд: Амбулаториор эмчлүүлэгсдийн карт /хх 5-14/, Эйр Транс ХХК-ийн 2024 оны 8 дугаар сарын 5-ны өдрийн 06AUG2024-136 нэхэмжлэх /хх 15, 168/, Улсын нэгдүгээр төв эмнэлгийн 2023 оны 4 дүгээр сарын 11-ний өдрийн, 2023 оны 6 дугаар сарын 14-ний өдрийн төлбөрийн баримтууд /хх 16, 23/, Улсын нэгдүгээр төв эмнэлгийн Яаралтай тусламжийн хуудас №7260, №7290, №11554 /хх 17-19, 20-22, 24-26/, Эх, хүүхдийн эрүүл мэндийн төвийн  Яаралтай тусламжийн хуудас №1, №0920, №1 /хх 27, 28, 29/, Ньюрмеди ХХК-ийн зарлагын баримтууд /хх 30-31/, Солонгос улсын Cheonghae Medical Foundation Cheil Hospital-ын амбулторын эмчилгээний төлбөрийн баримт, Сумоннури эмийн сангийн баримт, дуран бусад шинжилгээний баримтууд /хх 32-50/, Нэхэмжлэгчийн Хаан банкны депозит дансны хуулга /хх 51-52, 54/, Хаан банкны шилжүүлгийн мэдээлэл /хх 53/, Баянгол дүүргийн Иргэний хэргийн анхан шатны шүүхийн шүүгчийн 2024 оны 6 дугаар сарын 5-ны өдрийн 102/ШШ2024/02946 дугаар захирамж /хх 55-56/, Итгэмжлэл /хх 70/, Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүхийн шүүгчийн 2025 оны 2 дугаар сарын 05-ны өдрийн 192/ШШ2025/00991 дугаар захирамж /хх 72/, Улсын Нэгдүгээр төв эмнэлгийн Хэвлийн болон бага аарцгийн хөндийн эрхтэнүүдийн тодосгогчтой компьютерт томографийн шинжилгээнд /хх 116/, Улсын Нэгдүгээр төв эмнэлгийн Дүрс оношилгооны төвийн Хэвлийн болон бага аарцгийн хөндийн эрхтэнүүдийн тодосгогчтой компьютерт томографийн шинжилгээнд /хх 167/, Баянгол, Хан-Уул, Сонгинохайрхан дүүргийн иргэний хэргийн анхан шатны тойргийн шүүхийн шүүгчийн Шийдвэр албадан гүйцэтгүүлэх тухай захирамж, гүйцэтгэх хуудас /хх 168-171/, Шийдвэр гүйцэтгэх ажиллагаа үүсгэх тухай тогтоол /хх 191/, Нийслэлийн шүүхийн шийдвэр гүйцэтгэх газарт гаргасан Д.О-гийн хүсэлт /хх 192/, Иргэний шийдвэр гүйцэтгэх ажиллагааны зардал гаргуулах тухай гэрээ /хх 193/, Нийслэлийн шүүхийн шийдвэр гүйцэтгэх газарт гаргасан Ш.С-гийн тайлбар /хх 194-198/, Шийдвэр гүйцэтгэгчийн тэмдэглэл /хх 199-201, 203/, Нийслэлийн шүүхийн шийдвэр гүйцэтгэх газрын 04-204/26070 тоот Мэдэгдэл хүргүүлэх тухай албан бичиг /хх 202/,                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

 

5. Хариуцагчаас дараах баримтуудыг шүүхэд гаргаж өгсөн. Үүнд: Итгэмжлэл /хх 63, 152, 182/, Хариу тайлбар гаргах тухай /хх 65-66/,  

 

6. Шүүхээс дараах баримтыг бүрдүүлсэн. Үүнд: Нэхэмжлэгчийн хүсэлтээр Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүхийн Тамгын газраас 197 тоот албан бичгээр Нийслэлийн Баянгол дүүргийн Прокурорын газрын прокурорын 2023 оны 12 дугаар сарын 22-ны өдрийн Хэрэг бүртгэлтийн хэрэг нээхээс татгалзах тухай 43 дугаар тогтоол, Д.О-гийн цагдаад гаргасан өргөдөл, харилцан ярианы бичвэр, гэрлэсний бүртгэлийн лавлагаа, иргэний үнэмлэнийн лавлагаа, харилцан ярианы бичвэр, нотариатчийн 2024 оны 5 дугаар сарын 27-ны өдрийн гарын үсэг гэрчилсэн үйлдэл, Б.Содмандахын шүүхэд гаргасан тодорхойлолтыг /хх 73-116/, 

 

ҮНДЭСЛЭХ нь:

 

1. Нэхэмжлэлийг хангах үндэслэлгүй гэж үзэв.

 

2. Нэхэмжлэгч дараах үндэслэлээр шаардах эрхээ тодорхойлсон. Үүнд: Нэхэмжлэгч нь манай нөхөр Н.Б- Д.О-тай гэр бүлээс гадуур харилцаа үүсгэж, Д.О- намайг хэл амаар доромжилж, гүтгэж, дарамталж, миний хууль ёсны эрх ашиг сонирхлыг зөрчсөн хууль бус үйлдлүүд гаргаж байснаас болж миний сэтгэл санаа гутралд орж шээс чулуужих өвчтэй гэж оношлогдож, 2023 оны 4 дүгээр сарын 11, 2023 оны 6 дугаар сарын 14-ний өдрүүдэд хагалгаанд орж эмчлүүлсэн, Д.О- намайг Цагдаагийн байгууллагаар шалгуулж миний эрхэд халдсан, намайг “сэтгэцийн өөрчлөлттэй болж авгай чинь” гэж хэлсэн зэрэг үйдлээс болж 2 удаа хагалгаанд орж, БНСУ-д ходоод, бүдүүн гэдэсний дурангийн шинжилгээнд хамрагдаж, ходоодны үрэвсэл гэх оноштой эмийн эмчилгээ хийлгэж хохирч байгаа тул эрүүл мэндэд учирсан хохиролд 3,312,900 төгрөг, сэтгэцэд учирсан хохиролд 30,000,000 төгрөг, нийт 33,312,900 төгрөгийг Д.О-гаас гаргуулна.

 

3. Хариуцагч нэхэмжлэлийг дараах үндэслэлээр үгүйсгэсэн. Үүнд: Д.О- нь нэхэмжлэгчийн нөхөртэй гэр бүлээс гадуурх харилцаа үүсгэж байгаагүй, нэхэмжлэгчийг байнга дарамтлах, үг хэлээр доромжилсон зүйл байхгүй, нэхэмжлэгчийн яриад байгаа дарамт шахалт, доромжлолыг өөрөө Д.О-д байнга мэдрүүлж байсан, Д.О-г тасралтгүй утсаар болон мэссэжээр гүтгэж, доромжлоод байхаар нь цагдаад гомдол гарган, нэхэмжлэгч өмнө нь оношлогдсон өвчнийхөө нөхцлийг хариуцагчтай холбож тайлбарлаж байгаа нь үндэслэлгүй. Д.О- нь нэхэмжлэгчийн эрүүл мэндийг хохироох гэм буруутай үйлдэл хийгээгүй тул гэм хорын, сэтгэл санааны хохирол нөхөн төлөх үндэслэлгүй гэж үгүйсгэж байна.

 

4. Хэрэгт авагдсан болон шүүх хуралдаанаар хэлэлцэгдсэн нотлох баримт, зохигчдын тайлбараар дараах үйл баримт тогтоогдож байна.

 

Нэхэмжлэгч Ш.С- Улсын нэгдүгээр төв эмнэлэгт 2023 оны 4 дүгээр сарын 10-ны өдөр үзүүлсэн болох нь Яаралтай тусламжийн хуудас №7260 баримтаар тогтоогдож байх бөгөөд уг баримтаас үзвэл, үндсэн онош хэсэгт Хэвлийн доод хэсгийн бусад байрлалын өвдөлт гэж бичигдсэн, мөн 2023 оны 4 дүгээр сарын 11-ний өдөр Улсын нэгдүгээр төв эмнэлэгт үзүүлсэн болох нь Яаралтай тусламжийн хуудас №7290 баримтаар тогтоогдож байх бөгөөд уг баримтаас үзвэл, үндсэн онош хэсэгт Бөөрний чулуу гэж бичигдсэн, мөн 2023 оны 6 дугаар сарын 13-ны өдөр Улсын нэгдүгээр төв эмнэлэгт үзүүлсэн болох нь Яаралтай тусламжийн хуудас №11554 баримтаар тогтоогдсон бөгөөд уг баримтаас үзвэл, үндсэн онош хэсэгт Хэвлийн бусад ба тодорхойгүй өвдөлт гэж бичсэн байна.

    

Түүнчлэн нэхэмжлэгч Ш.С- нь 2024 оны 7 дугаар сарын 14-ний өдөр Солонгос улсын Cheonghae Medical Foundation Cheil Hospital /Чеонгае медикал фаундэшн чэйл хоспитал/ гэсэн эмнэлэгт үзүүлсэн, үйлчилгээ авсан болох нь тус эмнэлгийн Амбулаторийн эмчилгээний төлбөрийн баримт, Ходоод-Бүдүүн гэдэс дотор эрхтэний дуран бусад шинжилгээ гэх баримтаар тогтоогдож байна.

Нэхэмжлэгч нь 2024 оны 6 дугаар сарын 04-ний өдрөөс 8 дугаар сарын 15-ны өдөр хүртэл хугацаанд Эмэгтэйчүүдийн эмчид үзүүлсэн, эмчлүүлсэн болох нь Амбулаториор эмчлүүлэгсдийн карт баримтаар тогтоогдож байна.

Баянгол дүүргийн Иргэний хэргийн анхан шатны шүүхийн шүүгчийн 2024 оны 6 дугаар сарын 5-ны өдрийн 102/ШШ2024/02946 дугаар захирамжаар “Зохигчийн эвлэрлийг баталж, хэргийг хэрэгсэхгүй болгож шийдвэрлэсэн байна. Уг захирамжид “Нэхэмжлэгч Ш.С-гийн эрх зөрчсөн ноцтой үйлдлийг таслан зогсоолгож, зөрчихөөс өмнөх байдалд сэргээлгэх тухай нэхэмжлэлийн шаардлагын хүрээнд зохигчид нь цаашид мэссэж, чат, утсаар бие биедээ доромжилсон, гүтгэсэн агуулгатай үйлдэл үзүүлэхгүй гэдгээ хүлээн зөвшөөрч, бие биенийхээ гэр бүл рүү дайрсан, дарамталсан, доромжилсон гүтгэлгийг тараахгүйгээр тохирсон зохигчийн эвлэрлийг баталж, хэргийг хэрэгсэхгүй болгож, зохигчид цаашид мэссэж, чат, утсаар бие биедээ доромжилсон, гүтгэсэн агуулгатай үйлдэл үзүүлж бие биенийхээ гэр бүл рүү дайрсан, дарамталсан, доромжилсон гүтгэлгийг тараахгүй байхыг үүрэг болгосугай” гэжээ.

Мөн Д.О-гийн Цагдаагийн байгууллагад гаргасан хувийн мэдээлэлд халдаж, дарамталсан гэх гомдлыг Нийслэлийн Баянгол дүүргийн Прокурорын газрын прокурорын 2023 оны 12 дугаар сарын 22-ны өдрийн 43 дугаар тогтоолоор Хэрэг бүртгэлтийн хэрэг нээхээс татгалзаж шийдвэрлэсэн байх бөгөөд уг тогтоолд-“Д.О-г гэр бүлээс гадуурх харилцаагаа зогсоох талаар Ш.С- болон тэдний хүүхдэд хандаж мессеж, чат бичсэн үйлдэл нь эрүүгийн хуульд заасан заналхийлэх гэмт хэргийн шинжгүй байх тул Д.О-гийн гомдолд хэрэг бүртгэлтийн хэрэг нээхээс татгалзаж шийдвэрлэсэн” гэжээ.

Зохигчын хооронд бий болсон мэссэж, чат, утсаар бие биедээ доромжилсон, гүтгэсэн агуулгатай үйлдэл үзүүлэхгүй, бие биенийхээ гэр бүл рүү дайрсан, дарамталсан, доромжилсон гүтгэлгийг тараахгүй гэж талууд 2024 оны 6 дугаар сарын 5-ны өдөр тохиролцсон боловч хариуцагчийн дээрх үйл явдлын улмаас нэхэмжлэгч өөрийн эрүүл мэнд болон сэтгэцэд хохирол учирсан гэж үзэж байна.

Хариуцагч Д.О- нь нэхэмжлэгчийн нөхөр Н.Б-тай гэр бүлээс гадуурх харилцаа үүсгэж, Ш.С-г хэл амаар доромжилж, гүтгэж, дарамталж байсан, үүний улмаас нэхэмжлэгч нь шээс чулуужих өвчтэй, мөн ходоодны үрэвсэлтэй болсон гэх нөхцөл байдалд Д.О-гийн хууль бус үйлдэл, эс үйлдэхүй шууд нөлөөлсөн болохыг нотолсон баримтгүй байна.

Ийнхүү хариуцагч Д.О-гийн хууль бус үйлдэл нь баримтаар тогтоогдоогүй байхад Ш.С-гийн эмчилгээ хийлгэсэн зардлыг хариуцагчийн үйлдлээс болж учирсан хохирол гэж үзэхгүй бөгөөд хуульд заасан шалтгаант холбоог тогтоох боломжгүй байна.

Нөгөө талаар мөн хариуцагчийн гэм буруугийн байдал баримтаар нотлогдож тогтоогдоогүй байх тул Ш.С-гийн эрүүл мэндэд учирсан гэм хорын хохирлыг арилгах үүрэг Д.О-д үүсэх боломжгүй байна. Иймд Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2.2 дахь хэсэгт шүүхэд гаргасан нэхэмжлэлийн шаардлага, үндэслэл, тайлбар түүнтэй холбоотой баримтыг өөрөө нотлох, нотлох баримтыг цуглуулах, гаргаж өгөх гэж заасан үүргээ нэхэмжлэгчийг биелүүлээгүй гэж үзнэ.    

5. Иргэдийн төлөөлөгч нь хариуцагч Д.О-г нэхэмжлэгчийг элдэв бусаар хэлж, бичиж доромжилсон гэм буруутай гэсэн дүгнэлт хийсэн. 

6. Эрүүл мэнд болон сэтгэцэд учирсан хохиролд 33,312,900 төгрөгийг Д.О-гаас гаргуулах тухай нэхэмжлэгч Ш.С-гийн нэхэмжлэлийг хэрэгсэхгүй болгох нь зүйтэй гэж шүүх бүрэлдэхүүн дүгнэлээ.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.3, 116, 118 дугаар зүйлүүдэд заасныг удирдлага болгон

 

ТОГТООХ нь: 

 

1. Иргэний хуулийн 497 дугаар зүйлийн 497.1, 505 дугаар зүйлийн 505.1, 511 дүгээр зүйлийн 511.1 дэх хэсгүүдэд заасныг баримтлан хариуцагч Д.О-д холбогдох 33,312,900 төгрөг гаргуулах тухай нэхэмжлэгч Ш.С-гийн нэхэмжлэлийг бүхэлд нь хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсэгт зааснаар нэхэмжлэгчийн улсын тэмдэгтийн хураамжид төлсөн 324,520 төгрөгийг улсын орлогод үлдээсүгэй.

 

3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар энэ шийдвэрийг зохигчид, гуравдагч этгээд, тэдгээрийн  төлөөлөгч  буюу  өмгөөлөгч  эс  зөвшөөрвөл шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай.

 

 

 

         ДАРГАЛАГЧ ШҮҮГЧ                                  Ч.БАЯРСҮРЭН

                          

                          ШҮҮГЧИД                                  Н.БАТЧИМЭГ

 

                                                                              Б.ГАНЦЭЦЭГ