2025 11 27 321/ШШ2025/00869

 

 

 

МОНГОЛ УЛСЫН НЭРИЙН ӨМНӨӨС

 

 

Хэнтий аймаг дахь сум дундын шүүхийн шүүх хуралдааныг шүүгч Б.Уранзаяа даргалж, тус шүүхийн танхимд хаалттай хийсэн хуралдаанаар,

 

Нэхэмжлэгч: Хэнтий аймгийн Хэрлэн сумын 2 дугаар баг, өргөө ******* тоотод оршин суух, ******* овогт *******ийн *******,

 

Хариуцагч: Улаанбаатар хот, Баянзүрх дүүрэг, 7 дугаар хороо, 2 байр, *******од оршин суух, ******* овогт *******ын *******,

 

Нэхэмжлэлийн шаардлага: Гэрлэлт цуцлуулах тухай иргэний хэргийг хянан хэлэлцэв.

 

Шүүх хуралдааны оролцогчид: 

Нэхэмжлэгч: С.******* /цахимаар/

Хариуцагч: П.******* /цахимаар/

Шүүх хуралдааны нарийн бичгийн дарга Э.Баярсайхан нар оролцов.

 

ТОДОРХОЙЛОХ нь:

 

1.Нэхэмжлэгч С.******* шүүхэд гаргасан нэхэмжлэл болон шүүх хуралдаанд гаргасан тайлбартаа: ... Миний бие А.*******той 2004 онд танилцаж, 2005 онд гэр бүл болсон, 2006, 2009 онуудад дундаасаа 2 хүүхэдтэй болсон. Хамт амьдрах сүүлийн жилүүдэд архи, дарс ууж гэр орондоо хэрүүл маргаан хийж таарч тохирохгүй болсон. 2019 оноос хойш тусдаа амьдарсан. Одоо миний бие өөрийн гэр бүлтэй. ******* өөрийн гэр бүлтэй болсон. Бид хоёрын дундаас гарсан ******* аавын асаргаанд үлдэх ба дундын өмч хуваах, тэтгэлэг тогтоох маргаан байхгүй тул гэр бүл цуцлуулж өгнө үү... гэв.

 

2.Хариуцагч П.******* шүүхэд болон шүүх хуралдаанд гаргасан тайлбартаа: Миний бие С.*******ын нэхэмжлэлийн шаардлага болох гэрлэлт цуцлуулахыг хүлээн зөвшөөрч байна. Ямар нэгэн санал гомдол байхгүй .... гэв.

 

3. Нэхэмжлэгч талаас дараах нотлох баримтуудыг гаргаж өгсөн байна.

 

3.1 Нэхэмжлэгчийн иргэний үнэмлэхийн хуулбар (хх-ийн 03 хуудас)

 

3.2 Хэнтий аймгийн Хэрлэн сумын Булаг багийн Засаг даргын 2025 оны 10 дугаар сарын 24-ний өдрийн 183 дугаартай С.******* нь тус багийн Өргөө 4А-9 тоотод ам бүл 3, хоёр хүүхдийн хамт оршин суудаг нь үнэн гэх тодорхойлолт,

 

3.3 2009 оны 12 дугаар сарын 03-ны өдөр төрсөн Хүү *******ын  төрсний бүртгэлийн лавлагаа (хх-ийн 05 хуудас)

 

3.4 Улаанбаатар хот, Баянзүрх дүүрэг, Нийслэлийн ерөнхий боловсролын 97 дугаар сургуулийн 2025 оны 10 дугаар сарын 23-ны өдрийн 49 дугаартай ******* нь тус сургуульд 11ж ангид суралцдаг нь үнэн тухай тодорхойлолт (хх-ийн 07 хуудас)

 

3.5 Зохигчийн гэрлэсний бүртгэлийн гэрчилгээний нотариатаар баталгаажуулсан хуулбар (хх-ийн 08 хуудас)

 

3.6 Хэнтий аймаг дахь сум дундын анхан шатны шүүхийн Эвлэрүүлэн зуучлагчийн 2025 оны 10 дугаар сарын 15-ны өдрийн Эвлэрүүлэн зуучлах ажиллагаа дуусгавар болсон тухай 321/ЭТ2025/00197 дугаар тэмдэглэл (хх-ийн 09 хуудас) зэрэг баримтууд хэрэгт авагджээ.

 

4. Хариуцагч талаас баримт өгөөгүй байна.

 

Шүүх зохигчийн тайлбар хэрэгт цугларсан бичгийн баримтыг шинжлэн судлаад

 

ҮНДЭСЛЭХ нь:

 

1. Нэхэмжлэгч С.******* нь хариуцагч П.*******д холбогдуулан гэрлэлт цуцлуулах тухай нэхэмжлэл гаргасан байна.

 

Шүүх нэхэмжлэгч, хариуцагч нарын шүүхэд болон шүүх хуралдаанд гаргасан тайлбар, хуульд заасан журмын дагуу гаргаж өгсөн бичмэл баримтуудад тулгуурлан нэхэмжлэлийн шаардлагыг хангах нь зүйтэй гэж дүгнэв.

 

2. Гэр бүлийн тухай хуулийн 14 дүгээр зүйлийн 14.1-д зааснаар гэрлэлт цуцлуулах тухай нэхэмжлэл нь шүүхийн харьяалан шийдвэрлэх маргаан байх тул нэхэмжлэлийг хүлээн авч шийдвэрлэх нь үндэслэлтэй байна.

 

3. Нэхэмжлэгч С.*******, хариуцагч П.******* нь 2004 онд танилцан, 2006 оны 5 дугаар сарын 01-ний өдөр гэрлэлтээ батлуулж, тэдний дундаас 2009 оны 12 дугаар сарын 03-ны өдөр хүү ******* төрсөн болох нь зохигчийн тайлбар, хэрэгт авагдсан гэрлэлтийн гэрчилгээний болон хүүхдүүдийн төрсний гэрчилгээний нотариатаар баталгаажуулсан хуулбар зэрэг нотлох баримтуудаар тогтоогдож байна.

 

4. Нэхэмжлэгч С.*******ын нэхэмжлэлийн шаардлагын үндэслэлээ: ... хариуцагч П.*******той зан харилцаа таарахгүйн улмаас тусдаа амьдраад 6 жил болж байгаа, бид тусдаа гэр бүлтэй болсон тул гэрлэлтийг цуцалж өгнө үү, хүүхдийн асрамж, тэтгэлэг эд хөрөнгийн маргаангүй ..гэж

 

Хариуцагч С.******* нь нэхэмжлэлийн шаардлагатай холбогдуулан .... нэхэмжлэлийг бүхэлд нь хүлээн зөвшөөрч байна, ямар нэгэн маргаан байхгүй, тэтгэлэг болон эд хөрөнгийн маргаангүй ... хэмээн маргааны байр суурь илэрхийлэхгүй байна.

 

5.Гэрлэгчдийн гэрлэлтээ цуцлуулах болсон шалтгаан нь зан харилцааны таарамжгүй байдлын улмаас харилцаа хөндийрч, тусдаа амьдраад 6 жил болсон, одоог хүртэл эвлэрэн хэлэлцээгүй, шүүхийн эвлэрүүлэн зуучлагчид хандсан боловч эвлэрэн хэлэлцээгүй эвлэрүүлэн зуучлах ажиллагаа дуусгавар болсон байна.

 

6.Зохигчийн хэн аль нь цаашид хамтын амьдралаа үргэлжлүүлэх боломжгүй гэдгээ илэрхийлсэн, гэр бүлийн харилцаа хөндийрсөн, Гэр бүлийн тухай хуулийн 12 дугаар зүйлийн 12.2-т заасан гэр бүл цуцлахад хориглох шалтгаан байхгүй, нэхэмжлэгч С.******* тусдаа гэр бүлтэй болсон, хариуцагч П.******* нэхэмжлэлийн шаардлагыг бүхэлд нь хүлээн зөвшөөрсөн тул шүүхээс мөн хуулийн 4 дүгээр зүйлийн 4.1 дэх хэсэгт зааснаар гэрлэлт сайн дурын харилцаан дээр үндэслэх зарчим, хэргийн нөхцөл байдлыг харгалзан гэрлэлтийг цуцалж шийдвэрлэв.

 

7.Шүүхийн шийдвэрээр гэрлэгчдийн гэр бүлийн харилцаа дуусгавар болж байгаа ч эцэг, эх нь үр хүүхдийнхээ өмнө хүлээх үүрэг хариуцлага, Гэр бүлийн тухай хуулийн 26 дугаар зүйлийн 26.2-т заасан эцэг, эх гэрлэлтээ цуцлуулсан тохиолдолд хүүхдээ өсгөн бойжуулах, тэжээн тэтгэх, хүмүүжүүлэх үүрэг хэвээр үлдэнэ, Хүүхдийн эрхийг хамгаалах тухай хуулийн 12 дугаар зүйлийн 1-д эцэг эх, асран хамгаалагч, харгалзан дэмжигч хүүхдийн эрүүл мэндийг хамгаалах, амьдрах эрүүл саруул, аюулгүй орчин бүрдүүлэх, нэн шаардлагатай хоол хүнс, орон байр, хувцас тоглоом, бусад шаардлагатай зүйлээр хангах үүрэг хүлээнэ, энэ хуулийн 12 дугаар зүйлийн 2-т эцэг эх тусдаа амьдрах болсон, гэрлэлтээ цуцлуулсан нь тэднийг энэ зүйлийн 1 дэх хэсэгт заасан үүргээс чөлөөлөх үндэслэл болохгүй гэж зааснаар хэвээр хадгалагддаг болохыг зохигчид тайлбарлавал зохино.

  

8. Зохигчид нь эд хөрөнгийн маргаангүй гэснийг дурдав.

 

9. Хүүхэд эцэг П.*******ийн асрамжид байгаа гэх бөгөөд хүүхдийн эрх ашгийг хамгаалахыг эцэг П.*******д тайлбарлаж, хүүхдийн эрх ашиг сөргөөр хөндөгдвөл нэхэмжлэгч С.******* маргах эрх нээлттэй.

 

Мөн хүүхдүүдийн тэтгэлэг гаргуулах асуудлаар анхан шатны шүүхэд хариуцагч П.******* нэхэмжлэл гаргахад энэхүү шийдвэр саад болохгүй болно.

 

Нэхэмжлэлийн шаардлагыг хангаж шийдвэрлэсэн тухай нэхэмжлэгчийн улсын тэмдэгтийн хураамжид төлсөн 70,200 төгрөгийг улсын орлогод хэвээр үлдээж, хариуцагчаас 70,200 төгрөг гаргуулан нэхэмжлэгчид олгох нь зүйтэй.

  

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118, 132 дугаар зүйлийн 132.6-д заасныг удирдлага болгон ТОГТООХ нь:

 

1.Гэр бүлийн тухай хуулийн 14 дүгээр зүйлийн 14.1-д зааснаар ******* овогт *******ийн *******, ******* овогт *******ын ******* нарын гэрлэлтийг цуцалсугай.

 

2. 2009 оны 12 дугаар сарын 03-ны өдөр төрсөн хүү ******* эцэг П.*******ын асрамжид байгаа гэснийг дурдаж, цаашид хүүхдийн эрх ашгийг хамгаалахыг эцэг П.*******д тайлбарласугай.

 

3.Зохигч хүүхдийн асрамж, тэтгэлгийн талаар маргаангүй гэх ба хүүхдүүдийг асрамждаа авч буй хариуцагч П.*******ын хүүхдийн тэтгэлгийн талаар цаашид нэхэмжлэл гаргахад энэхүү шийдвэр саад болохгүйг дурдсугай.

 

4.Зохигч эд хөрөнгийн маргаангүй гэснийг дурдсугай.

 

5. Гэр бүлийн тухай 26 дугаар зүйлийн 26.2, 26.4, 26.6-д зааснаар эцэг эх гэрлэлтээ цуцлуулсан хэдий ч хүүхдээ эрүүл чийрэг өсгөж, хүмүүжүүлэх сэтгэхүйн хувьд зан төлөвийг төлөвшүүлэх тэжээн тэтгэх хүүхдээ үндэсний соёл заншил уламжлалаа дээдлэх үзлээр хүмүүжүүлэх суурь боловсрол эзэмшүүлэх хөдөлмөрийн анхны дадлага олгох зэрэг эцэг, эхийн үүрэг зохигчдын хувьд хэвээр үлдэх болохыг тайлбарлаж, хүүхдийн эрх ашигт сөргөөр нөлөөлөхгүй бол эцэг эхийн хэн нэг нь нөгөөдөө хуулиар хүлээсэн үүрэгт саад учруулахгүй байхыг зохигчид тайлбарласугай.

 

6. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 60 дугаар зүйлийн 60.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгчийн улсын тэмдэгтийн хураамжид төлсөн 70,200 улсын орлогод хэвээр үлдээж, хариуцагч П.*******оос 70,200 төгрөгийг гаргуулан нэхэмжлэгч М.Энх-Амгаланд олгосугай.

 

7. Гэр бүлийн тухай хуулийн 14 дүгээр зүйлийн 14.9-д зааснаар шийдвэрийн хувийг хүчин төгөлдөр болсноос хойш ажлын 3 өдрийн дотор гэрлэлтийг бүртгэсэн Иргэний бүртгэлийн байгууллагад хүргүүлэхийг шүүгчийн туслах Г.Батсүрэнд даалгасугай.

 

8. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2-т зааснаар шийдвэр танилцуулан сонсгомогц хүчинтэй болох бөгөөд мөн хуулийн 120 дугаар зүйлийн 120.2-т зааснаар зохигч, тэдгээрийн төлөөлөгч, өмгөөлөгч нь уг шийдвэрийг эс зөвшөөрвөл гардаж авсан өдрөөс хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд гомдол гаргах эрхтэй, зохигчид хуульд заасан хугацааны дотор шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдсугай.

                                       

  

 

ДАРГАЛАГЧ ШҮҮГЧ                                   Б.УРАНЗАЯА