2018        11            07                                   855

            

 

 

МОНГОЛ УЛСЫН НЭРИЙН ӨМНӨӨС

 

 

Баянгол дүүргийн Эрүүгийн хэргийн анхан шатны шүүхийн шүүгч Л.Оюун даргалж,

нарийн бичгийн дарга: С.Буянхишиг, 

улсын яллагч: Баянгол дүүргийн прокурорын газрын хяналтын прокурор Н.Ням-Очир,

шүүгдэгч: Б.Өлзий, түүний өмгөөлөгч Т.Барамсай /1864/,

шүүгдэгч: Б.Жаргал  нарыг оролцуулан тус шүүхийн шүүх хуралдааны танхимд нээлттэй хийсэн шүүх хуралдаанаар

 

Баянгол дүүргийн прокурорын газраас 2002 оны Эрүүгийн хуулийн тусгай ангийн 145 дугаар зүйлийн 145.2-т зааснаар яллах дүгнэлт үйлдэж ирүүлсэн Өлзий, Жаргал  нарт холбогдох эрүүгийн 2015 2602 2004 дугаартай хэргийг 2018 оны 10 дугаар сарын 26-ны өдөр хүлээн авч, хянан хэлэлцэв.

 

Монгол Улсын иргэн, 1980 оны 6 дугаар сарын 26-ны өдөр Улаанбаатар хотод төрсөн, 38 настай, эрэгтэй, дээд боловсролтой, эрх зүйч мэргэжилтэй, хувиараа хөдөлмөр эрхэлж, интэрнет кафе, зочид буудал ажиллуулдаг, ам бүл 4, эхнэр, 2 хүүхдийн хамт оршин суух,

2007 оны 12 дугаар сарын 19-ний өдөр Сүхбаатар дүүргийн шүүхийн 360 дугаартай шийтгэх тогтоолоор Эрүүгийн хуулийн тусгай ангийн 145 дугаар зүйлийн 145.2-т зааснаар 6 сарын баривчлах ялаар шийтгүүлж байсан, Өлзий.

 

Монгол улсын иргэн, 1990 оны 01 дүгээр сарын 29-ний өдөр Булган аймгийн Хялгант суманд төрсөн, эмэгтэй, 28 настай, тусгай дунд боловсролтой, нягтлан бодогч мэргэжилтэй, хувиараа хөдөлмөр эрхэлдэг, ам бүл 4, нөхөр, 0-9 насны 2 хүүхдийн хамт оршин суух, ял шийтгэлгүй, Жаргал .

 

Шүүгдэгч Б.Өлзий, Б.Жаргал  нар нь Ээгий гэх хүнтэй бүлэглэж, 2015 оны 10 дугаар сарын 26-ны шөнө Баянгол дүүргийн 7 дугаар хорооны нутагт байрлах “Эко”-ийн 101 дүгээр байранд үйл ажиллагаа явуулдаг Фитнес клубын 1 000 000 төгрөгийн үнэ бүхий лед гэрлэн урсдаг хаяг самбарыг машин механизм ашиглан хулгайлж, бусдад бага бус хэмжээний хохирол учруулсан гэмт хэрэгт холбогджээ. (яллах дүгнэлтэд дурдсанаар)

ТОДОРХОЙЛОХ НЬ:

 

Шүүхийн хэлэлцүүлэгт хэлэлцэгдсэн яллах болон цагаатгах нотлох баримтуудыг шинжлэн судлав.

 

Шүүхийн хэлэлцүүлэгт шүүгдэгч-Б.Өлзий мэдүүлэхдээ:

Би хулгай хийгээгүй тул надад холбогдуулан үйлдсэн яллах дүгнэлтийг хүлээн зөвшөөрөхгүй байна. Ээгий гэгч залуу би эхнэрээсээ салж байгаа, гэрээсээ өөрийнхөө эд зүйлийг авах гэсэн юм, та машинаараа яваад өгөөч гэж гуйсан. Тэгээд ажил тарсны дараа түүнтэй хамт явсан. Б.Жаргал  манай тогтлоомын газар админаар ажиллаж байсан. Манай ажил шөнө тардаг учраас би түүнийг гэрт нь машинаараа хүргэж өгдөг байсан юм. Намайг Ээгийн гуйлтаар явж байхад Б.Жаргал  хамт явсан.

Ээгий Гэмтлийн эмнэлгийн тэнд машинаас буугаад цүнхтэй юм авчирч хийгээд дараа нь лед гэрлийг авчирсныг би машиндаа өөрөө хийсэн. Тэр үед миний машин шинэхэн байсан тул машин зурж, муухай болгох вий гэж бодоод би машинаасаа бууж, өөрөө ачсан. Гэтэл тэр зүйл машинд багтахгүй, машины хойд хаалга бүрэн хаагдахгүй байсан тул Гэмтлийн эмнэлгийн тэнд би бууж, тэр зүйлийг урагш нь болгож ачсан. Мөн гэрэл машинаас унахаас сэргийлсэн юм. Тэгээд Ээгий Баянзүрх захын ард талд юмнуудаа авч буугаад, надад 20 000 төгрөг өгсөн. Би Ээгийг хулгай хийсэн гэж бодоогүй, би машинаас бууж түүнтэй хамт хулгай хийгээгүй. Харин түүний авчирсан юмнуудыг машиндаа ачсан нь үнэн. Манай ажил шөнө тардаг тул тэр үед надад зав гарч, Ээгий гэдэг хүнд тусласан маань буруу боллоо. Жаргал  энэ хэрэгт оролцоогүй. Тэр ажлаа тараад миний машинд дайгдаж л явсан. Би хулгай хийгээгүй тул хохирол төлөхгүй. Ээгий гэх хүн байдаг, түүнд холбогдох хэргийг тусгаарласан. Анх мөрдөн байцаагч хэрэг шалгаж байхдаа бичлэг үзүүлэхэд Ээгий гэдэг хүн тодоос тод бичигдсэн байсан. Гэтэл анхны бичлэг шаардлага хангахгүй гацалттай, зарим дүрс хасагдсан байна. Хэргийг үнэн зөв шийдвэрлэнэ үү гэв.

 

Шүүхийн хэлэлцүүлэгт шүүгдэгч-Б.Жаргал  мэдүүлэхдээ:

Би Б.Өлзий, Ээгий гэх хүмүүстэй хамт хулгай хийгээгүй. Харин ажил тараад Б.Өлзийын машинд гэртээ хүргүүлэхээр сууж явж байсан нь үнэн. Энэ үед би унтаж явсан тул Б.Өлзий, Ээгий нарыг хулгай хийхийг мэдээгүй, надад мэдэх юм байхгүй. Хэргийг үнэн зөв шийдвэрлэж өгнө үү гэв.

 

Мөрдөн байцаалтад хохирогч-Б.Туул мэдүүлэхдээ:

Би Баянгол дүүргийн 7 дугаар хорооны нутаг 101 дүгээр байрны 121 тоотод фитнес, гоо сайхан ажиллуулдаг юм. Манай лед гэрлэн урсдаг самбарыг 2015 оны 10 дугаар сарын 26-наас 27-нд шилжих шөнө машинтай хүн ирээд хулгайлаад авсан байсан. Тэгээд маргааш нь цагдаад хандсан. Манай камерын бичлэгт улаан хүрэн өнгийн комби загварын машинтай хүн ирээд, аваад явж байгаа нь бичигдсэн байсан. Камерт тэр машины улсын дугаар нь харагдахгүй байсан. Лед гэрлийг 1 300 000 сая төгрөгөөр хийлгэж байсан. Ямар нэгэн содон тэмдэг байхгүй. Ямар ч хаяг реклам хийж ашиглах боломжтой. Хохирлоо барагдуулмаар байна гэжээ. (хавтаст хэргийн 22 дугаар хуудас)

 

2016 оны 5 дугаар сарын 16-ны өдрийн мэдүүлгийг газар дээр нь шалгасан тэмдэглэлд:

Б.Өлзийаас: Баянгол дүүргийн 7 дугаар хороо, Эко 101 байрны ертөнцийн зүгээр талд машины тавьсан байсан гэснийг шинжээч Тэмүүжин гэрэл зургаар бэхжүүлэн авав. Тэгээд Айрон фитнесс клубын хашааны гадна 35-33 УБЕ улсын дугаартай, “Тоёота румен” машинаа зүүн тийш харуулж зогсоож байгаад багажаа онгойлгож ачсан гэснийг шинжээч Тэмүүжин гэрэл зургаар бэхжүүлэн авав. Ачих үед машины багааж онгорхой байсан. Лед гэрлэн самбар хойшоо илүү гарсан байсан гэж зааж үзүүлснийг шинжээч Тэмүүжин гэрэл зургаар бэхжүүлэв.

Гэмтлийн автобусны буудал руу ертөнцийн зүгээр урдаас төв зам руу нийлдэг уулзвар буюу гэмтлийн эмнэлгийн ертөнцийн зүгээр хойд талд байх хороолол дундах замын уулзвар дээр очиж машины багаж хэр зэрэг онгорхой байсныг зааж үзүүлэхэд шинжээч Тэмүүжин гэрэл зургаар бэхжүүлэн авав. Тэгээд урд сандлаа хойш налуулан хэвтүүлсэнийг шинжээч Тэмүүжин гэрэл зургаар бэхжүүлэв. Тэгээд самбарыг урагшлуулж багажаа хаасан. Машины хойд талын суудлыг ургаш нь хэвтүүлж зүүн урд сандлыг хойш нь налуулж, урд хоёр сандлын дундуур зүүн урд сандлын баруун мөрөн дээгүүр даруулж лед самбарыг ургаш нь босоо байдлаар байрлуулсан гэж заав гэжээ. (хавтаст хэргийн 13 дугаар хуудас)

           

2015 оны 11 дүгээр сарын 25-ны өдөр камерийн бичлэгт үзлэг хийсэн тэмдэглэлд:

Хяналтын камер нь ертөнцийн зүгээр баруун хойд зүгт харуулсан камерын хяналтанд цас ороод жаахан шуурсан байдалтай, Айрон фитнес гэсэн цагаан өнгийн хаалга харагдах ба тэр хаалганы баруун талд 2 метр орчим зайд төмөр хашаа, хаалга байхгүй байна. 02 цаг 47 минутанд хар бараан өнгийн хувцастай 2 эрэгтэй хүн уг фитнес клубын араар зүүн зүгт өнгөрч яваад 30 секундын дараа нэг эрэгтэй хүн нь буцаж яваад 20 цаг 51 минутанд улсын дугаар нь харагдахгүй машин 2 секунд орчим зогсоод баруун зүгт яваад буцаад 03 цаг 27 секундэд нөгөө машин зүүн зүгт явж өнгөрөөд 03 цаг 01 минут 30 секундэд нөгөө машин арын багажиндаа илүү гаргаж дөрвөлжин урт хэлбэртэй зүйл ачсан байдалтай ухарч зогсоод дахин зүүн зүгт явна. Уг машин нь хойд талын улсын дугаар нь урт, комби загварын 5 хаалгатай, мөн 5 салаатай хайлшин обудтай машин байна гэжээ.  (хавтаст хэргийн 20 дугаар хуудас)

 

Ял шийтгэгдсэн эсэхийг шалгах хуудсанд:

Б.Өлзий 2007 оны 12 дугаар сарын 19-ний өдрийн Сүхбаатар дүүргийн шүүхийн 360 дугаартай шийтгэх тогтоолоор 6 сарын хугацаагаар баривчлах ял шийтгүүлсэн гэжээ. (хэргийн 52 дугаар хуудас)

 

Ял шийтгэгдсэн эсэхийг шалгах хуудсанд:

Б.Жаргал  ял шийтгэлгүй гэжээ. (хэргийн 136 дугаар хуудас)

 

ШҮҮХИЙН ДҮГНЭЛТИЙН ТАЛААР:

 

Баянгол дүүргийн прокурорын газраас Б.Өлзий, Б.Жаргал  нарыг Ээгий гэх хүнтэй бүлэглэж 2015 оны 10 дугаар сарын 26-ны шөнө Баянгол дүүргийн 7 дугаар хорооны нутагт байрлах “Эко”-ийн 101 дүгээр байранд үйл ажиллагаа явуулдаг Фитнес клубын 1 000 000 төгрөгийн үнэ бүхий лед гэрлэн урсдаг хаяг самбарыг машин механизм ашиглан хулгайлж, бусдад бага бус хэмжээний хохирол учруулсан гэмт хэрэг үйлдсэн гэж 2002 оны Эрүүгийн хуулийн тусгай ангийн 145 дугаар зүйлийн 145.2-т зааснаар яллах дүгнэлт үйлдэж, хэргийг тус шүүхэд ирүүлжээ.

Шүүгдэгч Б.Өлзий нь Ээгий гэх хүнтэй бүлэглэж 2015 оны 10 дугаар сарын 26-ны шөнө Баянгол дүүргийн 7 дугаар хорооны нутагт байрлах “Эко”-ийн 101 дүгээр байранд үйл ажиллагаа явуулдаг Фитнес клубын 1 000 000 төгрөгийн үнэ бүхий лед гэрлэн урсдаг хаяг самбарыг машин механизм ашиглан хулгайлж, бусдад бага бус хэмжээний хохирол учруулсан гэмт хэрэг үйлдсэн болох нь хавтаст хэрэгт цугларсан, шүүхийн хэлэлцүүлгээр шинжлэн судласан хохирогч Б.Туулын мэдүүлэг, 2016 оны 5 дугаар сарын 16-ны өдөр мэдүүлгийг газар дээр нь шалгасан тэмдэглэл, гэрэл зургийн үзүүлэлтүүд, 2015 оны 11 дүгээр сарын 25-ны өдөр камерийн бичлэгт үзлэг хийсэн тэмдэглэл, эд зүйлийн үнэлгээ зэрэг хэрэгт авагдсан бусад нотлох баримтаар тогтоогдож байна.

 

Шүүхийн хэлэлцүүлэгт шинжлэн судалсан дээрх нотлох баримтууд нь энэ хэрэгт хамааралтай, ач холбогдолтой, хуульд заасан үндэслэл, журмын дагуу цуглуулж, шалгаж, бэхжүүлсэн, хэргийг хянан шийдвэрлэхэд хангалттай гэж үзлээ.

 

Хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлыг нотлосон, мөрдөн байцаалтад Эрүүгийн хэрэг хянан шийдвэрлэх тухай хуулийг зөрчөөгүй байна.

 

Шүүгдэгч Б.Өлзийын Ээгий гэх хүнтэй бүлэглэж үйлдсэн гэмт хэрэг нь 2015 оны 10 дугаар сарын 26-ны шөнө үйлдэгдсэн бөгөөд мөрдөн байцаалтад түүнд холбогдох хэрэгт 2016 оны 5 дугаар сарын 17-ны өдөр бусдын эд хөрөнгийг машин механизм ашиглан хулгайлсан гэж 2002 оны Эрүүгийн хуулийн тусгай ангийн 145 дугаар зүйлийн 145.2-т зааснаар эрүүгийн хэрэг үүсгэж, яллагдагчаар татаж, улмаар яллах дүгнэлт үйлджээ. 

 

2002 оны Эрүүгийн хуулийн тусгай ангийн 145 дугаар зүйлийн 145.2-т “Энэ гэмт хэргийг давтан бүлэглэж буюу урьдчилан үгсэж тохиролцсон бүлэг, машин механизм, тусгайлан бэлтгэсэн багаж хэрэгсэл хэрэглэж буюу орон байр, агуулах саванд нэвтэрч үйлдсэн, энэ хэргийн улмаас үлэмж хэмжээний хохирол учирсан, олон тооны мал хулгайлсан бол эд хөрөнгийг хураах буюу хураахгүйгээр хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёроос таван жил хүртэл хугацаагаар хорих ял шийтгэнэ”,

2015 оны Эрүүгийн хуулийн тусгай ангийн 17.1 дүгээр зүйлийн 1-д “Бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ”,

17.1 дүгээр зүйлийн 2 дахь хэсгийн 2.4-т “учрах саадыг арилгах зорилгоор зэвсэг, тусгайлан бэлтгэсэн зэвсгийн чанартай зүйл хэрэглэж, машин механизм ашиглаж үйлдсэн бол хоёр жилээс найман жил хүртэл хугацаагаар хорих ял шийтгэнэ” гэж тус тус зааж,

 

2015 оны Эрүүгийн хуулийн ерөнхий ангийн 1.9 дүгээр зүйлийн 1-д “...Үйлдэл, эс үйлдэхүйг гэмт хэрэгт тооцохгүй болсон, оногдуулах ялыг хөнгөрүүлсэн, гэмт хэрэг үйлдсэн этгээдийн эрх зүйн байдлыг дээрдүүлсэн хуулийг буцаан хэрэглэнэ”,

2-т “...Үйлдэл, эс үйлдэхүйг гэмт хэрэгт шинээр тооцсон, оногдуулах ялыг хүндрүүлсэн, гэмт хэрэг үйлдсэн этгээдийн эрх зүйн байдлыг дордуулсан хуулийг буцаан хэрэглэхгүй” гэж тус тус хуульчилжээ.

 

2015 оны Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.4-т заасан нь шүүгдэгчийн эрх зүйн байдлыг дордуулж байна.

Харин 2015 оны Эрүүгийн хуулийн тусгай ангийн 17.1 дүгээр зүйлийн 1-д “Бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэсэн заалт нь түүний эрх зүйн байдлыг дээрдүүлж байх тул уг хуулийн буцаан хэрэглэх нь зүйтэй гэж шүүх үзэв.

 

Б.Жаргал  нь шүүгдэгч Б.Өлзий, Ээгий нартай бүлэглэж 2015 оны 10 дугаар сарын 26-ны шөнө Баянгол дүүргийн 7 дугаар хорооны нутагт байрлах “Эко”-ийн 101 дүгээр байранд үйл ажиллагаа явуулдаг Фитнес клубын 1 000 000 төгрөгийн үнэ бүхий лед гэрлэн урсдаг хаяг самбарыг хулгайлсан гэмт хэрэгт оролцсон болох нь хэрэгт цугларсан нотлох баримтаар нотлогдохгүй тул түүнд холбогдох хэргийг хэрэгсэхгүй болгов. Тэр 2015 оны 10 дугаар сарын 26-ны шөнө Б.Өлзийын жолоодож явсан 35-33 УБЕ улсын дугаартай, “Тоёота румион” маркийн автомашинд сууж явсан нь тогтоогдож байгаа боловч энэ нь түүнийг бусадтай бүлэглэн хулгай хийсэн гэдгийг нотлохгүй байна.

2016 оны 4 дүгээр сарын 19-ний өдрийн мөрдөгчийн тогтоолоор Б.Өлзийын эзэмшлийн 35-33 УБЕ улсын дугаартай “Тоёота румион” маркийн автомашиныг битүүмжилсэн боловч 2002 оны Эрүүгийн хууль хүчин төгөлдөр үйлчилж байх үед дээрх хулгайн гэмт хэргийг үйлдсэн тул автомашиныг нь хурааж улсын орлого болгох үндэслэлгүй байна. Иймд автомашиныг битүүмжилсэн мөрдөгчийн тогтоолыг хүчингүй болгож шийдвэрлэлээ.

Б.Өлзий нь Ээгий гэгчтэй бүлэглэн хулгай хийсэн тул хохирлын 50% хувь буюу 500 000 төгрөгийг түүнээс гаргуулан хохирогчид олгох үндэслэлтэй.

Хэрэгт эд мөрийн баримтаар хураагдсан 2 ширхэг Си ди бичлэгийг хэрэгт хавсарган үлдээж, Б.Жаргал , Б.Өлзий нь энэ хэрэгт цагдан хоригдсон хоноггүй, Б.Өлзийт холбогдох эрүүгийн 2015 2602 2004 дугаартай хэргээс Ээгий гэгчид холбогдох 170501707 тоот эрүүгийн хэргийг тугаарласан болохыг дурдах нь зүйтэй. 

 

            Эрүүгийн хэрэг хянан шийдвэрлэх тухай хуулийн 34.19 дүгээр зүйлийн 1 дэх хэсгийн 1.1, 36.2, 36.3, 36.6, 36.7, 36.8-д заасныг тус тус удирдлага болгон

 

                                                                                                                                        ТОГТООХ НЬ:

 

1. Баянгол дүүргийн прокурорын газраас Жаргал д холбогдуулан 2002 оны Эрүүгийн хуулийн тусгай ангийн 145 дугаар зүйлийн 145.2-т зааснаар яллах дүгнэлт үйлдэж ирүүлсэн хэргийг хэрэгсэхгүй болгосугай.

 

2. Өлзийыг бусадтай бүлэглэн бусдын эд хөрөнгийг хүч хэрэглэхгүйгээр нууцаар, хууль бусаар хулгайлсан гэмт хэрэг үйлдсэн гэм буруутайд тооцсугай.

 

3. 2015 оны Эрүүгийн хуулийн ерөнхий ангийн 1.9 дүгээр зүйлийн 1, 3.7 дугаар зүйлийн 1-д заасныг тус тус журамлан Эрүүгийн хуулийн тусгай ангийн 17.1 дүгээр зүйлийн 1-д зааснаар Б.Өлзийыг 300 цаг нийтэд тустай ажил хийлгэх ялаар шийтгэсүгэй.

 

4. Эрүүгийн хуулийн ерөнхий ангийн 5.4 дүгээр зүйлийн 4-т зааснаар шүүгдэгч Б.Өлзий нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож, хорих ялаар солих болохыг анхааруулсугай.

 

5. Шүүгдэгч Б.Өлзий, Б.Жаргал  нар цагдан хоригдсон хоноггүй болохыг тус тус дурдсугай.

 

6. Иргэний хуулийн 497 дугаар зүйлийн 497.1, 510 дугаар зүйлийн 510.1-д зааснаар Б.Өлзийаас 500 000 төгрөг гаргуулж хохирогч Б.Туулд олгосугай.

 

7. Б.Өлзийт холбогдох эрүүгийн 2015 2602 2004 дугаартай хэргээс Ээгий гэгчид холбогдох 170501707 тоот эрүүгийн хэргийг тусгаарласан болохыг дурдсугай.

 

8. Б.Өлзийын эзэмшлийн 35-33 УБЕ улсын дугаартай, “Тоёота румион” маркийн автомашиныг битүүмжилсэн мөрдөгчийн 2016 оны 4 дүгээр сарын 19-ний өдрийн тогтоолыг хүчингүй болгосугай.

 

9. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсгийн 1.2-т зааснаар хэрэгт эд мөрийн баримтаар хураагдсан 2 ширхэг Си ди бичлэгийг хэрэгт хавсарган үлдээсүгэй.

 

10. Шүүхийн шийтгэх тогтоолыг хуулийн хүчин төгөлдөр болтол Б.Жаргал д авсан хувийн баталгаа гаргах таслан сэргийлэх арга хэмжээг хүчингүй болгож, Б.Өлзийт урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

11. Эрүүгийн хэрэг хянан шийдвэрлэх тухай хуулийн 36.8 дугаар зүйлийн 4 дэх хэсэгт зааснаар шийтгэх тогтоолыг шүүгдэгч, хохирогч, тэдгээрийн хууль ёсны төлөөлөгч, өмгөөлөгч өөрөө гардаж авснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол гаргах, яллагч, дээд шатны прокурор эсэргүүцэл бичих эрхтэйг дурдсугай.

 

           12. Шийтгэх тогтоол нь танилцуулан сонсгосноор хүчинтэй болох ба давж заалдах гомдол, эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол хүчин төгөлдөр болтол шүүгдэгч Б.Өлзийт хувийн баталгаа гаргуулах тухай таслан сэргийлэх арга хэмжээг хэвээр үргэлжлүүлсүгэй.

 

 

 

 

 

ДАРГАЛАГЧ ШҮҮГЧ                                 Л.ОЮУН