МОНГОЛ УЛСЫН НЭРИЙН ӨМНӨӨС

            Баянгол дүүргийн Иргэний хэргийн анхан шатны  шүүхийн шүүгч Х.Энхзаяа даргалж, тус шүүхийн шүүх хуралдааны танхимд хийсэн шүүх хуралдаанаар:

Нэхэмжлэгч: Баянгол дүүргийн 5 дугаар хороо, 10 дугаар хороолол, 104-57 тоотод оршин суух, Борижгон овогт Одгэрэлийн Цэнд-Аюуш /РД:ВЮ93082006/-ийн нэхэмжлэлтэй,

            Хариуцагч: Сонгинохайрхан дүүргийн 31 дүгээр хороо, Алтай 3-337 тоотод оршин суух, Чонос овогт Амарсайханы Нямдаваа /РД:НО90050578/-д холбогдох,

Хүүхдийн тэтгэлэг гаргуулах тухай хэргийг хянан хэлэлцэв.

Шүүх хуралдаанд: Нэхэмжлэгч О.Цэнд-Аюуш, хариуцагч А.Нямдаваа, шүүх хуралдааны нарийн бичгийн дарга Т.Анхцэцэг  нар  оролцов. 

                                                                                                     ТОДОРХОЙЛОХ нь:

Нэхэмжлэгч О.Цэнд-Аюуш миний бие нь 2012 онд А.Нямдаваатай хамтран амьдарсан. Энэ хугацаанд 2013 оны 02 сарын 15-ны өдөр охин Нямдаваагийн Энхжин төрсөн. Хамтран амьдарснаас хойш хардах, сэрдэх, зодох дарамтлах гэх мэтчилэн зан авирынх нь таарамжгүй байдлаас болж 2016 оны 6 сарын 29-ний өдрөөс хойш тусдаа амьдрах болсон. Охин Н.Энхжин одоо миний асрамжинд байгаа. Энэхүү байнгын хүчирхийллийг тэвчиж чадахгүй болсон учраас хүүхдийн тэтгэмж төлөхийг нэхэмжилж байна гэв. 

Хариуцагч А.Нямдаваа шүүхэд болон шүүх хуралдаанд гаргасан тайлбартаа: А.Нямдаваа миний бие О.Цэнд-Аюушийн гаргасан нэхэмжлэлийн шаардлагыг хүлээн зөвшөөрч байна. Хүүхдийн тэтгэлэгийг хуульд заасан хэмжээгээр өгнө гэв.

Шүүх хуралдаанаар: зохигчдын тайлбар, шүүх хуралдаанаар хэлэлцэгдсэн бичмэл нотлох баримтуудыг шинжлэн судлаад 

                                                                                                        ҮНДЭСЛЭХ нь:

Нэхэмжлэгч О.Цэнд-Аюуш нь хариуцагч А.Нямдаваад холбогдуулан хүүхдийн тэтгэлэг гаргуулах  тухай нэхэмжлэлийг тус шүүхэд гаргажээ.

Шүүх нэхэмжлэлийн шаардлагыг хангаж шийдвэрлэх нь зүйтэй гэж дүгнэв.

О.Цэнд-Аюуш, А.Нямдаваа нар 2012 онд танилцаж, 2013 оны 02 сарын 15-ны өдөр охин Н.Энхжинг төрүүлсэн болох нь хүүхдийн төрсний гэрчилгээ /хэргийн 7 дахь тал/ зэрэг бичмэл нотлох баримт, зохигчдын гаргасан тайлбараар тогтоогдож байна.

Зохигчид хоорондын зан харьцааны таарамжгүй байдлын улмаас цаашид хамтран амьдрах боломжгүй болж 2016 оны 6 сарын 29-ний өдрөөс хойш  тус тусдаа амьдрач байна.

Охин Н.Энхжин одоо 3 настай байх ба  эхийнх асрамжид үлдээхийг нэхэмжлэгч, хариуцагчийн хэн алин нь хүлээн зөвшөөрч, маргаагүй тул Гэр бүлийн тухай хуулийн 14 дүгээр зүйлийн 14.5 дахь хэсэгт заасны дагуу 2013 оны 02 сарын 15-ны өдөр охин Н.Энхжинг эх О.Цэнд-Аюушийн асрамжид үлдээж шийдвэрлэв.

Хариуцагч А.Нямдаваа нь хуульд заасан хэмжээгээр хүүхдийн тэтгэлэг төлөхийг хүлээн зөвшөөрч байх тул,  эцэг А.Нямдаваагаас хуульд заасан хэмжээгээр хүүхдийн тэтгэлэг гаргуулан  Охин Н.Энхжинг тэжээн тэтгүүлэх нь зүйтэй байна. 

Хүүхдийн эрхийн тухай хуулийн 5 дугаар зүйлийн 5.3 дахь хэсэгт “Хүүхэд эцэг, эхтэйгээ амьдрах, тэдний анхаарал халамжид байх,  эцэг эхээсээ буюу хэн нэгнээс нь тусдаа амьдрах үед тэдэнтэй байнгын харилцаатай байх...эрхтэй”. Иймд эцэг, эхийн хэн нэг нь нөгөөдөө Гэр бүлийн тухай хуульд заасан үүргээ хэрэгжүүлэхэд нь  саад учруулахыг хориглохыг шүүхийн шийдвэрт дурдах нь зүйтэй байна.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                       

            Зохигч эд хөрөнгийн маргаангүй гэснийг дурдах нь зүйтэй байна.

             Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1 дэх хэсэг, 116, 118 дугаар зүйл, 132 дугаар зүйлийн 132.6 дахь хэсэгт заасныг удирдлага болгон   

                                                                                                          ТОГТООХ нь:  

1.Гэр бүлийн тухай хуулийн 14 дүгээр зүйлийн 14.5 дахь хэсэгт зааснаар 2013 оны 02 сарын 15-ны өдөр охин Н.Энхжинг эх О.Цэнд-Аюушийн асрамжид үлдээсүгэй.

            2.Гэр бүлийн тухай хуулийн 40 дүгээр зүйлийн 40.1.1, 40.1.2 дахь хэсэгт зааснаар охин Н.Энхжинг 11 нас хүртэл нь тухайн бүс нутагт тогтоогдсон  амьжиргааны доод түвшингийн 50 хувиар, 11-16 нас /суралцаж байгаа бол 18 нас/ хүртэл нь амьжиргааны доод түвшингийн хэмжээгээр эцэг А.Нямдаваагаас сар бүр тэтгэлэг гаргуулан, тэжээн тэтгүүлсүгэй.

 3.Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1 дэх хэсэгт зааснаар нэхэмжлэгчээс улсын тэмдэгтийн хураамжид төлсөн 70,200 төгрөгийг улсын төсвийн орлогод хэвээр үлдээж, хариуцагч А.Нямдаваагаас улсын тэмдэгтийн хураамжид 70,200 төгрөг гаргуулан нэхэмжлэгч О.Цэнд-Аюушд олгосугай. 

            4.Гэр бүлийн хуулийн 26 дугаар зүйлийн 26.1, 26.6 дахь хэсэгт зааснаар эцэг, эх хүүхдээ хүмүүжүүлэхэд тэгш эрх эдэлж, үүрэг хүлээхийн зэрэгцээ хүүхдийн эрх, ашиг сонирхолд харшлахааргүй бол гэрлэлтээ цуцлуулсан эцэг, эхийн хэн нэг нь нөгөөдөө хүлээсэн үүргээ хэрэгжүүлэхэд нь саад учруулахыг хориглоно.

 5.Зохигчид эд хөрөнгийн талаар маргаангүй  гэснийг дурдсугай.

 6.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7, 120 дугаар зүйлийн  120.2 дахь хэсэгт зааснаар зохигч  нь  шийдвэрийг гардан аваагүй нь гомдол гарсан хугацааг хуулинд заасан журмын дагуу тоолоход саад болохгүй ба шүүхийн шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай.

 

 

 

                                    ДАРГАЛАГЧ                                Х.ЭНХЗАЯА