Өмнөговь аймаг дахь сум дундын иргэний хэргийн анхан шатны шүүхийн иргэний хэргийн шүүх хуралдааныг шүүгч Л.Угтахбаяр даргалж, тус шүүхийн танхимд хийсэн хуралдаанаар

Нэхэмжлэгч: Халх булгачид овогт Доржийн Наранцэцэг

Улсад ажилласан байдал тогтоолгох тухай нэхэмжлэлийг 2016 оны 04 дүгээр сарын11-ний  өдөр хүлээн авч, 2016 оны 04 дүгээр сарын 12-ны өдөр иргэний хэрэг үүсгэн хянан хэлэлцэв.

Шүүх хуралдаанд: Нарийн бичгийн даргаар шүүгчийн туслах Ч.Түвшинсайхан оролцов.

ТОДОРХОЙЛОХ НЬ:

Нэхэмжлэгч Д.Наранцэцэг шүүхэд гаргасан нэхэмжлэлдээ: Миний бие 1978 оны 10 дугаар сарын 21-ний өдрөөс 1983 оны 08 дугаар сарын 01-ний өдөр хүртэл Дорнод аймгийн геологийн экспедицийн эрдэнэцагааны 4 дүгээр анги, Халх голын 3 дугаар ангид техник, геологичоор, 1986 оны 09 дүгээр сарын 26-ны өдрөөс 1994 оны 12 дугаар сарын 31-ний өдөр хүртэл Мөнххааны ангид зураг буулгагч, Сэдэвчлэхийн 5 дугаар ангид зураг буулгагч, Цавын 2 дугаар ангид техник, геологичоор тус тус ажиллаж байсан. Тус экспедиц нь 1992 оны 06 дугаар сарын 26-ны өдрөөс БНМАУ дахь Аж ахуйн нэгжийн хуулиар хувьцаат компани болон Хаш компани гэж өөрчлөгдсөн учир 1992 оны 06 дугаар сарын 26-ны өдрөөс тус компанид техник, геологич, зурагчнаар 1994 оны 12 дугаар сарын 31-ний өдөр хүртэл ажилласан. Одоо өндөр насны тэтгэвэр тогтоолгох гэтэл 1978 оноос 1994 оны 12 дугаар сарын 31-ний өдөр хүртэлх хөдөлмөрийн дэвтэр олдохгүй үрэгдсэн учраас ажилласан хугацаа маань ажилласан жилд тооцогдохгүй хохироод байна. Иймд миний 1978 оны 10 дугаар сарын 21-ний өдрөөс 1983 оны 08 дугаар сарын 01-ний өдөр, 1986 оны 09 дүгээр сарын 26-ны өдрөөс 1994 оны 12 дугаар сарын 31-ний өдөр хүртэл Дорнодын геологийн экспедиц, Хаш компанид техник геологич, зураг буулгагчаар ажиллаж байсан болохыг тогтоож өгнө үү гэжээ.

Нэхэмжлэгч Д.Наранцэцэг шүүхэд ирүүлсэн хүсэлтдээ: Халх булгачид овгийн Доржийн Наранцэцэг миний 1978-1983, 1986-1994 онуудад Дорнодын геологийн экспедицид хамт ажиллаж байсан Буурайн Халзан, Мөнхбаярын Алтанцэцэг нараас Дорнодын геологийн экспедицид техник, геологич, зураг буулгагчаар 13 жил ажиллаж байсныг минь асууж тогтоож өгнө үү гэжээ.

Нэхэмжлэгч Д.Наранцэцэг шүүхэд ирүүлсэн хүсэлтдээ: Дорж овогтой Наранцэцэг миний шүүх хурлыг эзгүйгээр яаралтай шийдвэрлэж өгнө үү гэжээ.

Шүүх хуралдаанаар хавтаст хэрэгт авагдсан бичгийн нотлох баримтуудыг шинжлэн судлаад

ҮНДЭСЛЭХ НЬ:

Шүүх нэхэмжлэлийн шаардлагыг хангах үндэслэлтэй байна. Учир нь:

Нэхэмжлэгчийн тухайн үеийн ажиллаж байсан байдлын талаар бичсэн хөдөлмөрийн дэвтрээ үрэгдүүлсний улмаас ажилласан хугацаагаа өөр байдлаар тогтоох боломжгүй байх тул нэхэмжлэгчийн хүсэлтийг шүүх хүлээн авч шийдвэрлэх үндэслэлтэй байна.

Нэхэмжлэгч Д.Наранцэцэг 1978 оны 10 дугаар сарын 21-ний өдрөөс 1983 оны 08 дугаар сарын 01-ний өдөр, 1986 оны 09 дүгээр сарын 26-ны өдрөөс 1994 оны 12 дугаар сарын 31-ний өдөр хүртэл Дорнодын геологийн экспедиц, Хаш компанид техник геологич, зураг буулгагчаар тус тус ажиллаж байсан болох нь:

Геологи, Уул уурхайн үйлдвэрийн Яамны харъяа Дорнод аймаг дахь Геологийн Удирдах газрын даргын 1978 оны 10 дугаар сарын 26-ны өдрийн “ажилд авах, ээлжийн амралт олгох, өөрчлөн ажиллуулах тухай”...Д.Наранцэцэгийг 10 дугаар сарын 21-ний өдрөөс Эрдэнэцагааны 4 дүгээр ангид түр хугацаагаар дагалдан техник геологчоор авч ажиллуулсугай... 149 тоот тушаал, Геологи, Уул уурхайн үйлдвэрийн Яамны харъяа Дорнод аймаг дахь Геологийн Удирдах газрын даргын 1979 оны 11 дүгээр сарын 28-ны өдрийн “ээлжийн амралт олгох тухай”...Д.Наранцэцэг техник геологи... 172 тоот тушаалын хавсралт, Геологи, Уул уурхайн үйлдвэрийн Яамны харъяа Дорнод аймаг дахь Геологийн Удирдах газрын даргын 1980 оны 02 дугаар сарын 01-ний өдрийн “ээлжийн амралт олгох, хөдөлмөрийн гэрээ сунгах”...Наранцэцэг нарт 02 дугаар сарын 01-ний өдрөөс эхлэн ажлын 26 өдрөөр бодож 1980 оны ээлжийн амралтыг олгосугай...08 тоот тушаал, Геологи, Уул уурхайн үйлдвэрийн Яамны харъяа Дорнод аймаг дахь Геологийн Удирдах газрын даргын 1981 оны 02 дугаар сарын 25-ны өдрийн “ээлжийн амралтын хуваарь батлах тухай”...Д.Наранцэцэг I/XII... 26 тоот тушаал, Дорнод аймаг дахь Геологийн Экспедицийн даргын 1982 оны 10 дугаар сарын 27-ны өдрийн “төлөвлөгөө биелүүлсний шагнал олгох тухай”...Наранцэцэг т/геологи... 34 тоот тушаалын хавсралт, Геологи, Уул уурхайн үйлдвэрийн Яамны харъяа Дорнод аймаг дахь Геологийн Экспедицийн даргын 1983 оны 03 дугаар сарын 21-ний өдрийн “ажиллах хүн хүчийг анги салбаруудад хуваарилах тухай” ...халх голын 3 дугаар анги Д.Наранцэцэг ... тушаалын хавсралт, Геологи, Уул уурхайн үйлдвэрийн Яамны харъяа Дорнод аймаг дахь Геологийн Экспедицийн даргын 1983 оны 08 дугаар сарын 18-ны өдрийн “ажилласан хугацааны болон амралт олгох, ажлаас чөлөөлж шилжүүлэх тухай” ...Д.Наранцэцэг дээд сургуульд элсэн суралцах болсон тул 8 дугаар сарын 01-ний өдрөөс тасалбар болгон ажлаас нь чөлөөлж, Политехникийн дээд сургуулийн мэдэлд шүижүүлсүгэй... 138 тоот тушаал, Дорнод аймаг дахь Геологийн Экспедицийн даргын 1986 оны 09 дүгээр сарын 29-ний өдрийн “ажилд авах, өөрчлөн ажиллуулах, ажил давхар хариуцуулах тухай” ...Д.Наранцэцэгийг 09 дүгээр сарын 26-ны өдрөөс Мөнххааны ангид зураг буулгагчаар... 130 тоот тушаал, Дорнод аймаг дахь Геологийн Экспедицийн даргын 1987 оны 02 дугаар сарын 04-ний өдрийн “хүн хүч хуваарилан зохицуулах тухай” ...Д.Наранцэцэг зураг буулгагч... 10 тоот тушаалын хавсралт, Дорнод аймаг дахь Геологийн Экспедицийн даргын 1988 оны 01 дүгээр сарын 29-ний өдрийн “хүн хүч хуваарилах тухай” ...Д.Наранцэцэг жирэмсний амралттай Байгалмаагийн оронд... 10 тоот тушаалын хавсралт, Дорнод аймаг дахь Геологийн Экспедицийн даргын 1989 оны 01 дүгээр сарын 10-ны өдрийн “хүн хүч хуваарилах тухай” ...Д.Наранцэцэг техник геологи... 01 тоот тушаалын хавсралт, Дорнод аймаг дахь Геологийн Экспедицийн даргын 1990 оны 01 дүгээр сарын 29-ний өдрийн “ажлаас чөлөөлөх, цалингийн 40 хувь, амралт олгох тухай” ...Д.Наранцэцэг нарыг ажлын 26 хоногоор 1990 оны ээлжийн амралт олгосугай... 15 тоот тушаал, Дорнод аймаг Геологийн Экспедиц 1992 оны 06 дугаар сарын 26-ны өдрийн “ажиллах хүч хуваарилах тухай” ...Д.Наранцэцэг суурин боловсруулалтын групп тех/геологич 1400... 62 тоот тушаал, Дорнод аймаг Геологийн Экспедицийн даргын 1993 оны 05 дугаар сарын 27-ны өдрийн “түр шилжүүлэн ажиллуулах тухай” ...Д.Наранцэцэг ажиллах сар 0,5 нэг сард олгох цалин 2500... 31 тоот тушаал, Дорнод аймаг Хаш компанийн захирлын 1994 оны 12 дугаар сарын 20-ны өдрийн ...Д.Наранцэцэг зурагчин өөр газар ажиллах болсон... 34 тоот тушаалын хавсралт, Д.Наранцэцэгийн хүсэлт, гэрч Б.Халзан, М.Алтанцэцэг нарын иргэний үнэмлэхийн хуулбар, багийн засаг дарын тодорхойлолт, хөдөлмөрийн дэвтрийн хуулбар, Дорнот аймаг дахь сум дундын иргэний хэргийн анхан шатны шүүхийн 2016 оны 07 дугаар сарын 19-ний өдрийн 4/163 дугаартай албан бичиг, гэрч нарын мэдүүлэг зэргээр нотлогдож байна.

Шүүх нэхэмжлэгчийн хүсэлтээр нэхэмжлэгчтэй хамт ажиллаж байсан Б.Халзан, М.Алтанцэцэг нараас гэрчийн мэдүүлэг авсан ба эдгээр хүмүүс нь нэхэмжлэгчтэй нэг байгууллагад ажиллаж байсан болох нь тэдний хөдөлмөрийн дэвтэрт бичилт хийгдсэн байдлаар нотлогдож байх бөгөөд гэрчүүд нь нэхэмжлэгчтэй хамт ажиллаж байсныг гэрчилсэн хууль сануулж авсан мэдүүлэг нь хуульд заасан арга журмын дагуу авагдсан, гэрч нарын хөдөлмөрийн дэвтрийн хуулбар, иргэний үнэмлэхийн хуулбар зэрэг нь Иргэний хэрэг хянан шийдвэрлэх тухай хуулийн 44 дүгээр зүйлийн 44.2 дахь хэсэгт заасан нотлох баримтын шаардлага хангасан, тухайн хэрэгт хамааралтай, ач холбогдолтой байх тул шүүх үнэлж шүүхийн шийдвэрийн үндэслэл болгосон болно.

 Иймд Д.Наранцэцэгийг 1978 оны 10 дугаар сарын 21-ний өдрөөс 1983 оны 08 дугаар сарын 01-ний өдөр, 1986 оны 09 дүгээр сарын 26-ны өдрөөс 1994 оны 12 дугаар сарын 31-ний өдөр хүртэл Дорнодын геологийн экспедиц, Хаш компанид техник геологич, зураг буулгагчаар тус тус ажилласан гэж үзсэн болно. Нэхэмжлэгч Д.Наранцэцэгийн улсын тэмдэгтийн хураамжид төлсөн 70200 төгрөгийг орон нутгийн төсвийн орлогод үлдээх нь зүйтэй байна.

Монгол Улсын Иргэний хэрэг шүүхэд хянан шийдвэрлэх тухай хуулийн  115.1, 115.2.1, 116, 118, 135 дугаар зүйлд заасныг удирдлага болгон ТОГТООХ нь:

1.Монгол Улсын Иргэний хэрэг шүүхэд хянан шийдвэрлэх тухай хуулийн 133 дугаар зүйлийн 133.1 дэх хэсэг, 135 дугаар зүйлийн 135.2.6 дахь хэсэгт зааснаар Халх булгачид овогт  Доржийн Наранцэцэгийн 1978 оны 10 дугаар сарын 21-ний өдрөөс 1983 оны 08 дугаар сарын 01-ний өдөр, 1986 оны 09 дүгээр сарын 26-ны өдрөөс 1994 оны 12 дугаар сарын 31-ний өдөр хүртэл Дорнодын геологийн экспедицийн Хаш компанид техник геологич, зураг буулгагчаар тус тус ажиллаж байсныг сэргээн тогтоосугай.

2 .Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1 дэх хэсэг, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар нэхэмжлэгч Д.Наранцэцэг нь улсын тэмдэгтийн хураамжинд төлсөн 70.200 төгрөгийг орон нутгийн төсвийн орлогод хэвээр үлдээсүгэй.

3.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2 дахь хэсэгт зааснаар шийдвэр нь танилцуулан сонсгосноор хуулийн хүчинтэй болох бөгөөд зохигчид эс зөвшөөрвөл шийдвэрийг гардан авснаас хойш 14 хоногийн дотор анхан шатны шүүхээр дамжуулан Өмнөговь аймгийн Эрүү, Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

ДАРГАЛАГЧ,  ШҮҮГЧ                                              Л.УГТАХБАЯР