МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь Сум дундын Эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,

Шүүх хуралдааны нарийн бичгийн дарга П.Ундрах,

Улсын яллагч, хяналтын прокурор Д.Оюунбилэг, 

Хохирогч Д.Д-,

Шүүгдэгч нарын өмгөөлөгч Б.Батдорж,

Шүүгдэгч Х.А-, Л.Э- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн Прокурорын газрын хяналтын прокуророос Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж ирүүлсэн Х.А-, Л.Э- нарт холбогдох эрүүгийн 1938001820115 дугаартай хэргийг хялбаршуулсан журмаар хянан хэлэлцэв.

Шүүгдэгч нарын биеийн байцаалт:

Монгол Улсын иргэн, Х.А.

Монгол Улсын иргэн, Л.Э.

Шүүгдэгч Х.А-, Л.Э- нар нь бүлэглэн 2019 оны 03 дугаар сарын 15-наас 16-нд шилжих шөнө Хөвсгөл аймгийн Тосонцэнгэл сумын 3 дугаар баг “Тээл” гэх газарт хохирогч Д.Д-ы гэрт согтуугаар хувийн таарамжгүй харилцааны улмаас маргалдан зодож Д.Д-ы биед нь тархи доргилт, духны зүүн дээд хэсэгт шарх, духны баруун зүүн хэсэг, баруун, зүүн хөмсөг, баруун чихний гэдэс, зүүн чихний дэлбэн, хамрын үзүүр хэсэг, баруун хацар, дууд уруулын дээд хэсэг, хүзүүний гол дээд хэсэг, баруун сарвууны чигчий хурууны 3 дугаар үе, зүүн сарвууны эрхий хурууны 2 дугаар үенд зулгаралт, зүүн доод зовхинд цус хуралт бүхий хөнгөн хохирол учруулж, хүний эрүүл мэндэд хөнгөн хохирол учруулах гэмт хэргийг үйлдсэнд холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгч нарын гэм буруугийн талаар:

Шүүгдэгч Х.А-, Л.Э- нар нь бүлэглэн согтуугаар 2019 оны 03 дугаар сарын 15-наас 16-нд шилжих шөнө Хөвсгөл аймгийн Тосонцэнгэл сумын 3 дугаар баг “Тээл” гэх газарт хохирогч Д.Д-ы гэрт хувийн таарамжгүй харилцааны улмаас маргалдан Д.Д-ыг зодож, биед нь тархи доргилт, духны зүүн дээд хэсэгт шарх, духны баруун зүүн хэсэг, баруун, зүүн хөмсөг, баруун чихний гэдэс, зүүн чихний дэлбэн, хамрын үзүүр хэсэг, баруун хацар, дууд уруулын дээд хэсэг, хүзүүний гол дээд хэсэг, баруун сарвууны чигчий хурууны 3 дугаар үе, зүүн сарвууны эрхий хурууны 2 дугаар үенд зулгаралт, зүүн доод зовхинд цус хуралт бүхий хөнгөн гэмтэл учруулж, хүний эрүүл мэндэд хөнгөн хохирол учруулах гэмт хэргийг үйлдсэн байна.

Шүүгдэгч нарын гэмт хэрэг үйлдсэн гэмт буруутай болох нь хэрэгт авагдсан нотлох баримтууд болох:

• Гэмт хэргийн талаарх гомдол, мэдээллийг хүлээн авсан тухай тэмдэглэл /хх-ийн 9 дүгээр хуудас/,
• Эд зүйлд үзлэг хийсэн тэмдэглэл, гэрэл зураг /хх-ийн 10-11 дүгээр хуудас/,
• Хохирогч Д.Д-ы мөрдөн шалгах ажиллагааны үед өгсөн: “...А- надад “Та манайхныг хоёр тооны морь авсан гэж хүмүүст хэлсэн юм уу” гэж хэлэхээр нь “би танайхныг авчихлаа гэж өөрөө очиж хэлээгүй биз дээ” гэж хэлтэл А- уурлаад над руу хоёр ч удаа босч ирээд буцаж суусан. Тэгтэл А- босч ирээд миний толгой хэсэг рүү гараараа нэг удаа цохьтол би газарт унах үед А- миний нуруу болон цээж хэсэг рүү хоёроос гурван удаа өшиглөж байсан талаар санаж байгаа юм. Түүнээс хойш юу болсон талаар огт санахгүй байна. Учир нь би тухайн үед ухаан алдчихсан байсан. А-той хамт явж байсан Э- гэдэг залуу намайг төмөр түмпэнгээр хоёр удаа толгой руу цохьсон гэж манай хүү Гантөмөр хэлж байсан. А-, Э- нар нь архи уучихсан согтуу байдалтай байсан. Энэ гэмтлүүдийг А-, Э- нар л учруулсан. Тэр хоёр намайг хоёулаа нийлж байгаад зодсон. Би Мөрөн сумын Нэгдсэн эмнэлгийн мэс заслын тасагт 7 хоног хэвтсэн. Эмнэлгээс 13А маягтаар Улаанбаатар хот руу оношлуулж, эмчлүүл гэсэн. Ингээд Улаанбаатар хот руу яваад Гэмтлийн эмнэлэг дээр очиход шинжилгээнүүд хийлгэ гэсэн. Тэгээд тэр гэмтлийн нэг эмч нь “Пирамид” гээд хувийн эмнэлэгт хэвтүүлсэн. Энэ эмнэлэгт 12 хоног хэвтсэн” гэх мэдүүлэг /хх-ийн 17-18, 20-21 дүгээр хуудас/, болон шүүхийн хэлэлцүүлэгт өгсөн мэдүүлэг,
• Арван найман насанд хүрээгүй гэрч Ч.Г-н мөрдөн шалгах ажиллагааны үед өгсөн: “2019 оны 02 дугаар сарын 15-ны өдрөөс 02 дугаар сарын 16-ны өдрийг шилжих шөнө аав Г бид хоёр гэртээ байж байтал гэрийн гадаа машинтай хүмүүс ирсэн. Тэр үед манай гэрт Б ах, Э- ах, Д ах, У ах зэрэг нийт дөрвөн хүн орж ирээд цай унд уугаад сууж байсан. ...тэр үед би энэ хүмүүс ингээд удахгүй яваад өгөх байх гэж бодоод унтаад өгсөн юм. Тэгтэл удалгүй түс тас гээд хүмүүс маргалдаад зодолдоод эхлэх үед би гэнэт сэрээд хартал А- ах манай аавыг орны толгойны дор газарт унагаачихсан байдалтай аавын дээр нь гараад суучихсан гараараа аавыг цохиж зодоод байж байсан. Харин Э- ах аавын энгэрээс зулгааж байгаад орны доод талын төмөр рүү дөрвөөс таван удаа татаж мөргүүлсэн. Дараа нь А- ах газраас босч ирээд надад “пизда минь танайхныг бүгдийг нь ална шүү” гэж хэлээд миний толгойны зулай хэсэг рүү нэг удаа гараараа цохьтол Э- ах А- ахыг салгаад түмпэнг нь барьж аваад аавыг цохиод эхэлсэн. Дараа нь А- ах Э- ах хоёр нийлээд аавын бүснээс нь бариад гадагшаа чирч гаргаад гэрийн гадна зодоод байх шиг байж байгаад А- ах аавыг гаднаас чирээд оруулж ирэхэд нь хартал аавын толгойноос цус гарчихсан байдалтай толгой нь хагарчихсан байсан” гэх мэдүүлэг /хх-ийн 26-27 дугаар хуудас/,
• Гэрч Л.Б-н мөрдөн шалгах ажиллагааны үед өгсөн:

“...Д ах А- нар хашаа барих газрын талаар ярилцаж байгаад хоорондоо маргалдаж эхэлсэн. Д- ах А-ыг “танайхныг энд буулгахгүй, хашаа бариулахгүй” гэтэл А- “яахаараа та бид нарыг буулгадаггүй юм бэ” гэтэл Д- ах “танайхан хулгайч” гэтэл А- ах Д- ахын нүүрэн хэсэгт нь нэг удаа гараараа цохьтол Д- ах орныхоо хажуу руу унаад цаашаа орны доогуур яваад орчихоор нь А- ах Д- ахын энгэрээс нь барьж аваад наашаа таттал орны хөндлөн төмрийг нүүрээрээ мөргөх шиг болсон. А- ах Д- ахын дээр нь гарч сууж байгаад гараараа нүүр рүү нь цохиод байсан” гэх мэдүүлэг /хх-ийн 33 дугаар хуудас/,

• Шүүхийн шинжилгээний албаны шинжээчийн 2019 оны 02 дугаар сарын 22-ны өдрийн 100 дугаартай: “1. Д.Д-ы биед тархи доргилт, духны зүүн дээд хэсэгт шарх, духны баруун зүүн хэсэг, баруун, зүүн хөмсөг, баруун чихний гэдэс, зүүн чихний дэлбэн, хамрын үзүүр хэсэг, баруун хацар, дууд уруулын дээд хэсэг, хүзүүний гол дээд хэсэг, баруун сарвууны чигчий хурууны 3 дугаар үе, зүүн сарвууны эрхий хурууны 2 дугаар үенд зулгаралт, зүүн доод зовхинд цус хуралт бүхий гэмтэл тогтоогдлоо. 2. Дээрх гэмтлүүд нь мохоо зүйлийн хэд хэдэн удаагийн үйлчлэлээр тухайн цаг хугацаанд үүссэн гэмтэл байх боломжтой. 3. Д.Д-ы биед үүссэн гэмтэл нь гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. 4. Цаашид хөдөлмөрийн чадварт нөлөөлөхгүй” гэх дүгнэлт /хх-ийн 49 дүгээр хуудас/,
• Шүүхийн шинжилгээний албаны шинжээчийн 2019 оны 04 дүгээр сарын 05-ны өдрийн 100 дугаартай: “3. Д.Д-ы биед үүссэн тархи доргилт болон сорви бүхий гэмтэл нь нийтдээ гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна” гэх дүгнэлт /хх-ийн 54 дүгээр хуудас/,
• Шүүгдэгч Х.А-ын мөрдөн шалгах ажиллагааны үед өгсөн: “...Ял сонсгож байгаа зүйл ангийг хүлээн зөвшөөрч байна. Анх хашаа баръя гэсэн асуудлаас болж бид хоёр маргалдсан. Тэгээд намайг удмаараа хулгайч гэхээр нь уур хүрээд зодсон. ...энэ гэмтлийг би учруулсан” гэх мэдүүлэг /хх-ийн 66-67 дугаар хуудас/,
• Шүүгдэгч Л.Э-ын мөрдөн шалгах ажиллагааны үед өгсөн: “...би Д- ахыг түмпэнгээр хоёр удаа цохисон. Толгой руу нь цохисон байх” гэх мэдүүлэг /хх-ийн 70 дугаар хуудас/ болон шүүхийн хэлэлцүүлэгт шүүгдэгч Х.А- мэдүүлэхдээ “...үйлдсэн хэргээ хүлээн зөвшөөрч байна” гэж, шүүгдэгч Л.Э- “...үйлдсэн хэргээ хүлээн зөвшөөрч байна” гэж хариулж байсан болон бусад нотлох баримтуудаар нотлогдож байна.

Шүүгдэгч Л.Э-ын хувийн байдлыг тогтоосон дараах баримтуудыг шүүх шинжлэн судлав. Үүнд:

• Шүүгдэгч Л.Э-ын иргэний үнэмлэхний хуулбар /хх-ийн 75 дугаар хуудас/,
• Хөвсгөл аймгийн Мөрөн сумын Үерт багийн Засаг даргын тодорхойлолт /хх-ийн 76 дугаар хуудас/,
• Урьд нь ял шийтгүүлж байгаагүй болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 77 дугаар хуудас/ зэргийг,

Шүүгдэгч Х.А-ын хувийн байдлыг тогтоосон дараах баримтуудыг шүүх шинжлэн судлав. Үүнд:

• Тайжууд Х.А-ын иргэний үнэмлэхний хуулбар /хх-ийн 80 дугаар хуудас/,
• Урьд нь ял шийтгүүлж байгаагүй болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 81 дүгээр хуудас/ зэрэг баримт бичиг болно.

Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нар нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл

байдлуудыг бүрэн гүйцэд тогтоосон гэж үзлээ.

Гэмт хэрэг гарахад шүүгдэгч нарын архи, согтууруулах ундааны зүйл хэрэглэсэн, хууль зүйн мэдлэг дутмаг байдал, гэмт хэргээс урьдчилан сэргийлэх чиг үүрэг бүхий байгууллага холбогдох хууль журмыг сурталчлах, соён гэгээрүүлэх ажил хангалтгүй хийгдсэн зэрэг нь дээрх гэмт хэргийг үйлдэх шалтгаан нөхцөл байдал нөлөөлсөн байна.

     Шүүгдэгч Х.А-, Л.Э- нар нь дээрх гэмт хэргийг бүлэглэн үйлдсэн болох нь гэрч, хохирогч нарын мэдүүлгээр нотлогдож байна.

Шүүгдэгч нар нь Монгол Улсын Үндсэн хууль, Эрүүгийн хуулиар хамгаалагдсан хүний эрүүл мэндийн халдашгүй байдлын эсрэг гэмт хэргийг бүлэглэн үйлдэж хүний эрүүл мэндэд хөнгөн гэмтэл учруулсан хор уршигт зориуд хүргэж, “хүний эрүүл мэндэд хөнгөн хохирол учруулах” гэмт хэргийг хүндрүүлэх бүрэлдэхүүнтэйгээр үйлдсэн нь дээрх гэмт хэргийг гэм буруугийн санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Хэрэгт авагдсан баримтуудыг үндэслэн прокурорын үйлдсэн яллах дүгнэлт нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн шижээчийн дүгнэлт, гэрч, хохирогч, шүүгдэгч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Шүүгдэгч Х.А-, Л.Э- нар нь бүлэглэн согтуугаар 2019 оны 03 дугаар сарын 15-наас 16-нд шилжих шөнө Хөвсгөл аймгийн Тосонцэнгэл сумын 3 дугаар баг “Тээл” гэх газарт хохирогч Д.Д-ы гэрт “хашаа бариулахгүй байна” гэдгээр шалтаглан хувийн таарамжгүй харилцааны улмаас маргалдан Д.Д-ы биед тархи доргилт, духны зүүн дээд хэсэгт шарх, духны баруун зүүн хэсэг, баруун, зүүн хөмсөг, баруун чихний гэдэс, зүүн чихний дэлбэн, хамрын үзүүр хэсэг, баруун хацар, дууд уруулын дээд хэсэг, хүзүүний гол дээд хэсэг, баруун сарвууны чигчий хурууны 3 дугаар үе, зүүн сарвууны эрхий хурууны 2 дугаар үенд зулгаралт, зүүн доод зовхинд цус хуралт бүхий гэмтэл учруулан зодож, хүний эрүүл мэндэд хөнгөн хохирол учруулсан нь танхайн сэдэлтээр, санаатайгаар дээрх гэмт хэргийг үйлдсэн байна.

Шүүгдэгч Х.А-, Л.Э- нарын үйлдсэн энэхүү гэмт хэргийн улмаас шууд учирсан үр дагавар нь хүний эрүүл мэндийн халдашгүй байдалд хөнгөн хохирол учирсан гэж шүүх дүгнэлээ.

Хохирогч Д.Д- шүүхийн хэлэлцүүлэгт “гомдол санал, нэхэмжлэх

зүйлгүй” гэж байх тул шүүгдэгч Х.А-, Л.Э- нарыг бусдад төлөх төлбөргүй гэж үзлээ.

Хавтаст хэрэгт баримтжуулсан шүүгдэгч нараас гаргуулах хэрэг хянан шийдвэрлэх ажиллагааны зардалгүй байна.

2. Шүүгдэгч нарт эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Х.А-, Л.Э- нарт эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгч нарыг гэмт хэрэг бүлэглэж үйлдсэн, шүүгдэгч нарын хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан “бүлэглэж хүний эрүүл мэндэд хөнгөн хохирол учруулсан” үйлдэлд нь Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар эрүүгийн хариуцлага хүлээлгэх нь зүйтэй гэж үзлээ.

Шүүгдэгч нарын хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, гэмт хэрэг үйлдсэнээ хүлээн зөвшөөрсөн, гэм буруугийн талаар маргахгүй байгаа байдал, хохирогчоос уучлалт гуйж эвлэрсэн, үйлдсэн гэмт хэрэг, хохирол, хор уршигт хандаж буй хандлага, шүүх хуралдаанд мэдүүлэг өгөхдөө гэмшиж байгаа зэргийг харгалзан үзсэн болно.

Шүүгдэгч Х.А-, Л.Э- нар нь урьд нь гэмт хэрэг үйлдэж байгаагүй болох нь ял шийтгэлийн лавлагаагаар тогтоогдож байна.

Шүүгдэгч нарын хувьд “хүний эрүүл мэндэд хөнгөн хохирол учруулах” гэмт

хэргийг /Эрүүгийн хуулийн тусгай ангийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн/ байна.

Шүүхээс шүүгдэгч Х.А-, Л.Э- нарт Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар эрүүгийн хариуцлага хүлээлгэхдээ шүүгдэгч нар нь хохирогчтой эвлэрч, өөрт холбогдох хэргийг хялбаршуулсан журмаар шийдвэрлүүлэх хүсэлт гаргасан, хяналтын прокуророос яллах дүгнэлт үйлдэж, шүүгдэгч Х.А-, Л.Э- нарт 500 нэгжтэй тэнцэх хэмжээний төгрөгөөр торгох ялын саналтайгаар хэргийг хялбаршуулсан журмаар шийдвэрлүүлэхээр шилжүүлсэн байх тул прокурорын саналыг харгалзан шүүгдэгч нарт торгох ял оногдуулах нь зүйтэй байна.

Эрүүгийн хуулийн 5.3 дугаар зүйлийн 4 дэх хэсэгт зааснаар шүүгдэгч нарын ажил хөдөлмөр эрхлэлт, хөрөнгө орлого, орлого олох боломж нөхцлийг харгалзан шүүхээс оногдуулсан торгох ялыг өөрсдийн боломжит хэмжээгээр, тодорхой хугацаанд хэсэгчлэн төлүүлэхээр тогтоох нь зүйтэй гэж үзлээ.

Шүүгдэгч Х.А-, Л.Э- нар нь цагдан хоригдоогүй, хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нараас гаргуулах эрүүгийн хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.

Эрүүгийн хуулийн ерөнхий ангийн 5.3 дугаар зүйлийн 5-д зааснаар шүүгдэгч Х.А-, Л.Э- нар нь шүүхээс тогтоосон хугацаанд торгох ялыг биелүүлээгүй бол торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг анхааруулж, шийтгэх тогтоол хүчин төгөлдөр болтол шүүгдэгч Х.А-, Л.Э- нарт урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлэх нь зүйтэй.

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 17.4, 17.5, 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон  

ТОГТООХ нь:

1. Шүүгдэгч Х.А-, Л.Э- нарыг Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан “бүлэглэж хүний эрүүл мэндэд хөнгөн хохирол учруулах” гэмт хэргийг үйлдсэн гэм буруутайд тус тус тооцсугай.

2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Х.А-, Л.Э- нарыг тус бүр 500 /таван зуу/ нэгжтэй тэнцэх хэмжээний буюу 500.000 /таван зуун мянга/ төгрөгөөр торгох ялаар шийтгэсүгэй.

3. Эрүүгийн хуулийн ерөнхий ангийн 5.3 дугаар зүйлийн 4-т зааснаар шүүгдэгч Х.А-, Л.Э- нарт оногдуулсан торгох ялыг тус бүр 6 /зургаа/ сарын хугацаанд хэсэгчлэн төлүүлэхээр тогтоосугай.

4. Эрүүгийн хуулийн ерөнхий ангийн 5.3 дугаар зүйлийн 5-д зааснаар шүүгдэгч Х.А-, Л.Э- нар нь шүүхээс тогтоосон хугацаанд торгох ялыг биелүүлээгүй бол торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг анхааруулсугай.

5. Шүүгдэгч Х.А-, Л.Э- нар нь бусдад төлөх төлбөргүй болохыг дурдсугай.

6. Энэ хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нар нь цагдан хоригдоогүй, бусдад төлөх төлбөргүй, шүүгдэгч нараас гаргуулах эрүүгийн хэрэг хянан шийдвэрлэх ажиллагааны зардалгүй болохыг тус тус дурдсугай.      

7. Шүүгдэгч нарын ял эдлэлтэнд хяналт тавихыг Хөвсгөл аймаг дахь Шүүхийн шийдвэр гүйцэтгэх газарт даалгаж, шийтгэх тогтоол хүчин төгөлдөр болтол шүүгдэгч Х.А-, Л.Э- нарт урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч, тэдгээрийн өмгөөлөгч нар эс зөвшөөрвөл тогтоол гардан авсан өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

                 ДАРГАЛАГЧ, ШҮҮГЧ                                 Д.АЗЖАРГАЛ