2016 оны 06 сарын 16 өдөр

Дугаар 151/ШШ2016/00592

Төв аймаг

 

МОНГОЛ УЛСЫН НЭРИЙН ӨМНӨӨС

Төв аймаг дахь Сум дундын Иргэний хэргийн анхан шатны шүүхийн шүүх хуралдааныг шүүгч Э.Ариунаа даргалж, тус шүүхийн шүүх хуралдааны танхимд нээлттэй хийсэн иргэний шүүх хуралдаанаар,

Нэхэмжлэгч: 1960 оны 11 дүгээр сарын 04 өдөр төрсөн, 56 настай, Төв аймаг, Лүн сум, 3 дугаар баг, Рашаантын 109 тоот оршин суудаг, Малчин овогтой Мэнд-Амарын Баярчимэг РД:/НО60110468/ -ийн нэхэмжлэлтэй,

ажиллаж байсан байдал тогтоолгох тухай иргэний хэргийг хянан хэлэлцэв.

Шүүх хуралдаанд: нэхэмжлэгч М.Баярчимэг, шүүх хуралдааны нарийн бичгийн даргаар А.Солонго нар оролцов.

 

ТОДОРХОЙЛОХ нь:

Нэхэмжлэгч М.Баярчимэг нь шүүхэд гаргасан нэхэмжлэлдээ болон шүүх хуралдаанд гаргасан тайлбартаа:

 

“... Би 1981 оны 9 сард Лүн сумын дунд сургуульд цэвэрлэгчээр ажилд ороод 2015 оны 11 сар хүртэл тасралтгүй ажилласан. Дунд сургуульд цэвэрлэгч үйлчлэгч, дотуур байрны үйлчлэгч, угаагч, жижүүр зэрэг ажлуудыг хийж байсан. 1990 оноос 1997 оны 12 дугаар сарын 31 өдөр хүртэл ажиллаж байсан талаар хөдөлмөрийн дэвтэр дээр бичилт байгаа боловч тушаалууд байхгүй. Нийгмийн даатгалын байцаагч тушаалууд олдохгүй байгаа бол шүүхээр тогтоолго гэсэн. Архиваас лавлагаа авах гэхээр танай сургууль, соёлын төв 2 архивын материалаа өгөөгүй гээд лавлагаа гаргаж өгөөгүй. Улсад 30 гаруй жил ажилласан боловч 27 жил ажилласан гээд ажилласан жил хасагдаад байгаа. 2015 оны 11 сард тэтгэврээ тогтоолгосон боловч ажилласан жилээ нэмүүлж тэтгэврээ дахин тогтоолгох гээд байгаа учраас 1990 оны 09 дүгээр сарын 03 өдрөөс 1997 оны 12 дугаар сарын 31 өдөр хүртэл Төв аймгийн Лүн сумын 8 жилийн сургуулийн дотуур байранд жижүүр, үйлчлэгч хийж байсан хугацааг сэргээн тогтоож өгнө үү...” гэжээ.

 

Шүүх хэрэгт цугларсан /хх 3. 6-9, 11-12, 14-16, 18, 24-25, 30-36/ бичмэл нотлох баримтууд болон нэхэмжлэгчийн тайлбарыг шинжлэн судлаж үнэлээд

ҮНДЭСЛЭХ нь:

 

Нэхэмжлэгч М.Баярчимэг нь Төв аймгийн Лүн сумын 8 жилийн дунд сургуульд 1990 оны 09 дүгээр сарын 01 өдрөөс 1997 оны 12 дугаар сарын 31 өдөр хүртэл угаагч, үйлчлэгч, жижүүрээр ажиллаж байсан байдлыг тогтоолгох тухай хүсэлтийг хангах нь зүйтэй. шүүхэд гаргажээ.

 

М.Баярчимэгийгн ажилд томилсон болон халагдсан тушаал нь Төв аймгийн Архив, Үндэсний төв архиваас гарч ирээгүйгээс нэхэмжлэгч нь Нийгмийн даатгалын сангаас олгох тэтгэвэр, тэтгэмжийн тухай хуулийн 4 дүгээр зүйлд заасны дагуу өндөр насны тэтгэвэр тогтоолгох боломжгүй болсон байна.

Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6-д зааснаар ажиллаж байсан байдлаа тогтоолгохоор М.Баярчимэг нь шүүхэд хүсэлт гаргах эрхтэй болно.

Шүүх хэрэгт цугларсан бичмэл нотлох баримтыг шинжлэн судалж, үнэлвэл: нэхэмжлэгч М.Баярчимэг нь Төв аймгийн Лүн сумын 8 жилийн дунд сургуульд 1990 оны 09 дүгээр сарын 01 өдрөөс 1997 оны 12 дугаар сарын 31 өдөр хүртэл угаагч, үйлчлэгч, жижүүрээр ажиллаж байсан байдал нь:

1. М.Баярчимэгт Төв аймгийн Лүн сумын дундын больницын ерөнхий эмчээс 1971 оны 12 дугаар сарын 01 өдөр олгож байсан хөдөлмөрийн дэвтрийн хуулбар  /хх 3/,
2. Төв аймгийн архивын тасгийн 2016 оны 04 дүгээр сарын 04 өдрийн 235 дугаартай лавлагаа /хх 6/,
3. Төв аймгийн Лүн сумын найман жилийн дунд сургуулийн захирлын 1990 оны 6 дугаар сарын 14 өдрийн ээлжийн амралт олгох тухай “Сургууль,байрны ажилчдын 1990 оны ээлжийн амралтыг доорхи хуваариар олгосугай...5. М.Баярчимэг...” гэх бичилттэй 27 дугаартай тушаал /хх 7/,
4. Төв аймгийн Лүн сумын найман жилийн дунд сургуулийн захирлын 1990 оны 09 дүгээр сарын 07 өдрийн ажилд авах тухай “...угаагч М.Баярчимэг нь үйлчлэгч болсон тул Т.Юмсүрэнг угаагчаар тус тус ажиллуулж...” гэх бичилттэй 32 дугаартай тушаал 1990 оны /хх 8/,
5. Төв аймгийн Лүн сумын найман жилийн дунд сургуулийн захирлын 1991 оны 03 дугаар сарын 28 өдрийн ажлаас чөлөөлөх тухай “Дотуур байрны үйчлэгч М.Баярчимэг нь жирэмсний дараах чөлөөгөө дуусаж, ээлжийн амралтаа авах болсон тул Г.Уранчимэгийг 4 сарын 2 өдрөөс ажлаас нь чөлөөлөв..” гэх бичилттэй 18 дугаартай тушаал /хх 9/,
6. Гэрч Д.Ширмнэнгинжийн 1973 оны 7 дугаар сарын 01 өдөр Улсын багшийн дээд сургуулиас олгосон хөдөлмөрийн дэвтрийн хуулбар /хх 11/, түүний гаргасан тодорхойлолт, шүүхэд гэрчээр өгсөн мэдүүлэг, түүнд 1973 оны 07 дугаар сарын 01 өдөр олгосон хөдөлмөрийн дэвтрийн хуулбар, нийгмийн даатгалын шимтгэл төлсөн баримт /хх 11-12, 24, 30-31/,
7. Гэрч Ц.Алимаагийн гаргасан тодорхойлолт /хх 14/, түүнд 1984 оны 6 дугаар сарын 26 өдөр Улаанбаатар хотын багшийн сургуулиас олгосон 086689 дугаартай хөдөлмөрийн дэвтэрийн хуулбар, түүний гэрчээр өгсөн мэдүүлэг тодорхойлолт, цалин хөлсний хуулбар, хөдөлмөрийн дэвтрийн хуулбар, 000830 дугаартай нийгмийн даатгалын дэвтрийн хуулбар /хх 14-15, 25, 32-33, 34-35/,
8. Гэрч С.Цэндээд 1986 оны 06 дугаар сарын 09 өдөр Төв аймгийн Лүн сумын 8 жилийн дунд сургуулиас олгосон 072611 дугаартай  хөдөлмөрийн дэвтэрийн хуулбар, түүний гаргасан тодорхойлолт /хх 16, 18/,
9. Монгол төрийн нэрт зүтгэлтэн тэргүүн сайд Да лам Гомбын Цэрэнчимэдийн нэрэмжит Төв аймгийн Лүн сумын ерөнхий боловсролын бүрэн дунд сургуулийн захирлын 2016 оны 05 дугаар сарын 16 өдрийн 19 дугаартай тодорхойлолт /хх 20/,
10. “Лүнгийн сургууль, 90 хавар” номын 322 дугаар хуудас /хх 36/ зэрэг бичгийн нотлох баримтуудаар тогтоогдож байна.

 

Нэхэмжлэгч М.Баярчимэгийг Төв аймгийн Лүн сумын 8 жилийн дунд сургуульд 1990 оны 09 дүгээр сарын 01 өдрөөс 1997 оны 12 дугаар сарын 31 өдөр хүртэл үйлчлэгч, жижүүрээр ажиллаж байсан байдлыг тогтоох үндэслэлтэй байна гэж шүүх дүгнэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118-д заасныг удирдлага болгон

ТОГТООХ нь:

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6-д зааснаар Малчин овогт Мэнд-Амарын Баярчимэг нь Төв аймгийн Лүн сумын 8 жилийн дунд сургуульд 1990 оны 09 дүгээр сарын 01 өдрөөс 1997 оны 12 дугаар сарын 31 өдөр хүртэл угаагч, үйлчлэгч, жижүүрээр ажиллаж байсан байдлыг тогтоосугай.

2. Иргэний хэрэг шүүхэд хянан шийдвэрлэх тухай хуулийн 60 дугаар зүйлийн  60.1-д зааснаар хүсэлт гаргагч М.Баярчимэгийн улсын тэмдэгтийн хураамжид урьдчилан төлсөн 70 200 төгрөгийг улсын орлогод хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2-т зааснаар шийдвэр танилцуулан сонсгомогц хүчинтэй болох ба шүүх хуралдаанд оролцсон тал энэ хуулийн 119 дүгээр зүйлийн 119.3-т заасан хугацаа өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах, шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүй болохыг мэдэгдсүгэй.

4. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авснаас хойш 14 хоногийн дотор Өмнөговь, Дундговь, Төв аймгийн иргэний хэргийн давж заалдах шатны шүүхэд гомдол гаргах эрхтэйг дурдсугай.

 

 

 

ДАРГАЛАГЧ, ШҮҮГЧ                                                Э.АРИУНАА