2016 оны 08 сарын 22 өдөр

Дугаар 151/ШШ2016/00845

Төв аймаг

МОНГОЛ УЛСЫН НЭРИЙН ӨМНӨӨС

Төв аймаг дахь Сум дундын Иргэний хэргийн анхан шатны шүүхийн шүүх хуралдааныг шүүгч Э.Ариунаа даргалж, тус шүүхийн шүүх хуралдааны танхимд нээлттэй хийсэн иргэний шүүх хуралдаанаар,

Нэхэмжлэгч: 1957  оны 05 дугаар сарын 04 өдөр төрсөн, эрэгтэй, 59 настай, Төв аймгийн Өндөрширээт сумын 3 дугаар баг, Уянга гэх газар оршин суудаг, Баярт овогт Ожмаагийн Лувсансампил РД:/НР57050478/-ын нэхэмжлэлтэй,

бичиг баримтын жинхэнэ эзэмшигчээр тогтоолгох, ажиллаж байсан байдал тогтоолгох тухай хэргийг хянан хэлэлцэв.

Шүүх хуралдаанд: нэхэмжлэгч О.Лувсансампил, шүүх хуралдааны нарийн бичгийн даргаар А.Солонго нар оролцов.

 

ТОДОРХОЙЛОХ нь:

Нэхэмжлэгч О.Лувсансампил нь шүүхэд гаргасан нэхэмжлэлдээ болон шүүх хуралдаан дээр гаргасан тайлбартаа:

 

“Би 1975 онд цэргийн албанд Хайлаастын 121 дүгээр цэргийн  ангид татагдаж 1978 онд халагдсан. Энэ үед цэргийн батлахын овог нэрийг нагац ах Д.Пүрэвээр бичигдчихсэн байсан. Гэрийн эзэн гээд Пүрэвээр овоглочихсон цэргийн зарлан ирчихсэн байсан. Иймд цэргийн батлахыг Ожмаагийн Лувсансампил миний цэргийн батлах мөн болохыг баталж өгнө үү. Мөн цэргээс халагдаж ирээд 1979 оноос 1991 оныг дуустал “Хөгжил” нэгдэлд малчнаар ажиллаж байсан. Тэтгэврээ тогтоолгох гэтэл нийгмийн даатгалын байцаагч ажилласан жилээ тогтоолгох шаардлагатай гэж хэлсэн. Хөдөлмөрийн дэвтрийн зарим бичилт нь дутуу байгаа учраас 1979 оны  1991 оны 12 дугаар сарын 31 өдрийг хүртэл Төв аймгийн Өндөрширээт сумын Хөгжил нэгдэлд малчнаар ажиллаж байсан жилийг сэргээн тогтоож өгнө үү” гэв.

 

Шүүх хэрэгт цугларсан /хх 7-10, 13-15, 17, 19, 21-22, 25, 27-29, 37, 39, 46-48 / бичмэл нотлох баримтууд болон нэхэмжлэгчийн тайлбарыг шинжлэн судлаж үнэлээд

ҮНДЭСЛЭХ нь:

Нэхэмжлэгч О.Лувсансампил нь Төв аймгийн Өндөрширээт сумын Хөгжил нэгдэлд 1979 оны 01 сарын 01 өдрөөс 1991 оны 12 сарын 31 өдөр хүртэл малчинаар ажиллаж байсан байдлаа тогтоолгох, 1975 оны 01 сарын 03 өдрийн 307525 дугаартай цэргийн батлахын жинхэнэ эзэмшигч нь Ожмаагийн Лувсансампил мөн болохыг тогтоолгох тухай хүсэлтийг шүүхэд гаргажээ.

 

О.Лувсансампилын 1991 онд ажлаас халагдсан тушаалын бичилт хөдөлмөрийн дэвтэр дээр бичигдээгүй, ажлаас халагдсан тушаал нь Төв аймгийн Архив, Үндэсний төв архиваас гарч ирээгүйгээс нэхэмжлэгч нь Нийгмийн даатгалын сангаас олгох тэтгэвэр, тэтгэмжийн тухай хуулийн 4 дүгээр зүйлд заасны дагуу өндөр насны тэтгэвэр тогтоолгох боломжгүй болсон байна.

Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.4-д зааснаар бичиг баримтийн жинхэнэ эзэмшигч мөн болохоо тогтоолгох, 135.2.6-д зааснаар ажиллаж байсан байдлаа тогтоолгохоор О.Лувсансампил нь шүүхэд хүсэлт гаргах эрхтэй болно.

Хугацаат цэргийн алба хаасныг нотлох 1975 оны 01 сарын 03 өдрийн 307525 дугаартай цэргийн батлах дээр Пүрэв гэж дурдсан эцгийн нэр нь иргэний үнэмлэхэд Ожмаагийн гэж бичигдсэнтэй тохирохгүй байна. Гэвч О.Лувсансампилын эх нь Нацаг юмын Ожмаа гэсэн нэртэй байсан нь Улын бүртгэлийн төв архивын газрын 2016 оны 07 сарын 21 өдрийн 00/004576 дугаартай лавлагаа болон гэрчийн мэдүүлгээр /хх 39, 46/ нотлогдож байна. Иймд эрх олгосон дээрх баримт бичгийн жинхэнэ эзэмшигч нь О.Лувсансампил мөн болохыг тогтоох үндэслэлтэй байна гэж үзлээ.

О.Лувсансампил нь Төв аймгийн Өндөрширээт сумын Хөгжил нэгдэлд 1979 оны 01 сарын 01 өдрөөс 1991 оны 12 сарын 31 өдөр хүртэл малчинаар ажиллаж байсан  болох нь:

1. О.Лувсансампилд Төв аймгийн Өндөрширээт сумын Хөгжил нэгдлээс 1981 оны 06 сарын 10 өдөр О.Лувсансампилд олгосон хөдөлмөрийн дэвтрийн хуулбар /хх 7-8/,
2. Төв аймгийн Архивын тасгийн 2016 оны 06 дугаар 27 өдрийн 526 дугаартай албан тоот /хх 9/,
3. Төв аймгийн Өндөрширээт сумын “Хөгжил” нэгдлийн даргын 1981 оны 06 дугаар сарын 06 өдрийн ажилд томилох тухай “1, 2, 3 дугаар хавсралтад нэр дурдсан ...хүмүүсийг 1991 оны 01 дүгээр сарын 01 өдрөөс эхлэн томилон ажиллуулсугай...3 дугаар хавсралт...35-д Лувсансампил...” гэх бичилттэй 43 дугаартай тушаал /хх 10/,
4.  Төв аймгийн Өндөрширээт сумын “Хөгжил” нэгдлийн даргын 1983 оны 05 дугаар сарын 13 өдрийн ажилд томилох тухай “...Ожмаагийн Лувсансампил...нарыг  1983 оны 05 дугаар сарын 12 өдрөөс эхлэн тус тус томилон ажиллуулсугай...” гэх бичилттэй 33 дугаартай тушаал /хх 13/,
5. Төв аймгийн Өндөрширээт сумын “Хөгжил” нэгдлийн даргын 1983 оны 10 дугаар сарын 12 өдрийн ажилд томилох тухай “Ожмаагийн Лувсансампилыг 1983 оны 10 дугаар сарын 12 өдрөөс эхлэн уурын зууханд галчаар томилон ажиллуулсугай...” гэх бичилттэй 93 дугаартай тушаал /хх 14/,
6.  Төв аймгийн Өндөрширээт сумын “Хөгжил” нэгдлийн даргын 1985 оны 05 дугаар сарын 14 өдрийн ажилд томилох тухай “...Е.Лувсанбалдан, Д.Дагва, Лувсанжамбаагийн тасгийн үхэр хариулагчаар Лувсансампил.... нарыг 1985 оны 01 сарын 01 өдрөөс эхлэн тус тус томилон ажиллуулсугай...” гэх бичилттэй 49 дугаартай тушаал /хх 15/,
7. Төв аймгийн Өндөрширээт сумын “Хөгжил” нэгдлийн даргын 1984 оны 05 дугаар сарын 04 өдрийн ажилд томилох тухай “...О.Лувсансампил...нарыг үхэр хариуцлагчаар 1984 оны 04 дүгээр сарын 20 өдрөөс эхлэн тус тус томилон ажиллуулсугай” гэх бичилттэй 29 дугаартай тушаал /хх 17/,
8. Төв аймгийн Өндөрширээт сумын “Хөгжил” нэгдлийн даргын 1986 оны 06 дугаар сарын 25 өдрийн гардан хээлтүүлгийн цэгийн техникч томилох тухай “Саалийн тасгуудад үнээнд гардан хээлтүүлэг хийх техникчээр доорх хүмүүсийг томилсугай...3. О.Лувсансампил...” гэх бичилттэй 51 дугаартай тушаал /хх 19/,
9. Төв аймгийн Өндөрширээт сумын Хөгжил нэгдлийн даргын 1989 оны 11 дүгээр сарын 03 өдрийн ээлжийн амралт олгох тухай “1989 оны 11 сард амрах хүмүүсийн нэрсийг 1 дүгээр хавсралтаар баталсугай...хавсралтын 74-т О.Лувсансампил...” гэх бичилттэй 82 дугаартай тушаал, хавсралт /хх  21-22/,
10.  Төв аймгийн Өндөрширээт сумын “Хөгжил” нэгдлийн даргын 1988 оны 10 дугаар сарын 13 өдрийн ажилд томилох тухай “Ожмаагийн Лувсансампилыг 1988 оны 10 дугаар сарын 12 өдрөөс эхлэн уурын зууханд галчаар томилон ажиллуулсугай...” гэх бичилттэй 33 дугаартай тушаал /хх 25/,
11.  Төв аймгийн Өндөрширээт сумын “Хөгжил” нэгдлийн даргын 1990 оны 12 дугаар сарын 15 өдрийн ээлжийн амралт олгох тухай “1990 оны 12 сард амрах хүмүүсийн нэрсийг 1 дүгээр хавсралтаар баталсугай...хавсралтын 57-д О.Лувсансампил...” гэх бичилттэй 110 дугаартай тушаал, хавсралт /хх 27-29/,
12.  Улсын бүргэлийн ерөнхий газрын 2016 оны 07 дугаар сарын 21 өдрийн 4576 дугаартай төрсний бүртгэлийн лавлагаа /хх 37/,
13.  гэрч Д.Пүрэвсүрэнгийн мэдүүлэг /хх 39/,
14.  гэрч Ж.Энхцогийн мэдүүлэг /хх 46/, 1989 оны 04 дүгээр сарын 10 өдөр олгосон Ж.Энхцогийн хөдөлмөрийн дэвтрийн хуулбар /хх 47/, Төв аймгийн Өндөрширээт сумын 10 жил анхны төгсөлтийн гэрэл зураг  /хх 48/  зэрэг нотлох баримтуудаар тогтоогтдож байна гэж шүх дүгнэлээ.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118, 133 дугаар зүйлийн 133.1.1-д заасныг удирдлага болгон

ТОГТООХ нь:

1. Иргэний  хэрэг шүүхэд  хянан  шийдвэрлэх  тухай хуулийн 135 дугаар зүйлийн 135.2.6-д зааснаар Баярт овогт Ожмаагийн Лувсансампил нь Төв аймгийн Өндөрширээт сумын Хөгжил нэгдэлд 1979 оны 07 сарын 01 өдрөөс 1991 оны 12 сарын 31 өдөр хүртэл малчнаар ажиллаж байсан байдлыг тогтоосугай.

2. Иргэний  хэрэг  шүүхэд  хянан  шийдвэрлэх тухай хуулийн 135 дугаар зүйлийн 135.2.4-д заасны дагуу 1975 оны 01 сарын 03 өдрийн 307525 дугаартай цэргийн батлахын жинхэнэ эзэмшигч нь Баярт овогт Ожмаагийн Лувсансампил болохыг тогтоосугай.

3. Иргэний хэрэг шүүхэд хянан шийдвэрлэх тухай хуулийн 60 дугаар зүйлийн 60.1-д зааснаар хүсэлт гаргагч О.Лувсансампилын улсын тэмдэгтийн хураамжид урьдчилан төлсөн 70 200 төгрөгийг улсын орлогод хэвээр үлдээсүгэй.

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2-т зааснаар шийдвэр танилцуулан сонсгомогц хүчинтэй болох ба шүүх хуралдаанд оролцсон тал энэ хуулийн 119 дүгээр зүйлийн 119.3-т заасан хугацаа өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах, шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүй болохыг мэдэгдсүгэй.

5. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авснаас хойш 14 хоногийн дотор Төв аймгийн Эрүү, Иргэний хэргийн давж заалдах шатны шүүхэд гомдол гаргах эрхтэйг дурдсугай.

 

 

 

ДАРГАЛАГЧ, ШҮҮГЧ                                               Э.АРИУНАА