2016 оны 08 сарын 15 өдөр

Дугаар 181/ШШ2016/00496

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

 

Сүхбаатар дүүргийн Иргэний хэргийн анхан шатны шүүхийн шүүгч Д.Нямбазар даргалж, тус шүүхийн танхимд хийсэн шүүх хуралдаанаар,

 

Нэхэмжлэгч: Сүхбаатар дүүрэг, 8-р хороо, Амарын гудамж-4, Интер оффист оршин байгаа, “Интерном” ХХК /рд:5044251/-ийн нэхэмжлэлтэй,

 

“Есөн мэргэн” ХХК /рд:5709792/, гүйцэтгэх захирал Э.Туул нарыг эрэн сурвалжлуулах тухай иргэний хэргийг хянан хэлэлцэв.

 

Шүүх хуралдаанд: Нэхэмжлэгчийн төлөөлөгч Г.Урантогос, П.Урангоо, шүүх хуралдааны нарийн бичгийн дарга М.Өлзийгэрэл оролцов.

ТОДОРХОЙЛОХ нь:

 

Нэхэмжлэгч “Интерном” ХХК нь шүүхэд гаргасан нэхэмжлэл болон шүүх хуралдаанд гаргасан тайлбартаа: “Есөн мэргэн” ХХК нь ном нийлүүлэн хамтран ажилладаг байсан. 2013 оноос 2014 оны 12 сар хүртэл хамтран ажилласан. Хамтран ажиллаж байх хугацаандаа “Есөн мэргэн” ХХК нь төлбөрөө хүлээн зөвшөөрөөд байгаа боловч төлөлгүй удаад байсан учраас шүүхэд нэхэмжлэл гаргасан боловч 2015 оны 8 сарын 24-ний өдрийн 26513 тоот шүүгчийн захирамжаар хэргийг хэрэгсэхгүй болгож шийдвэрлэсэн. Дахиад нэхэмжлэл гаргахад дахин хариуцагчийн хаяг тодорхой бус байна гээд хэргийг хэрэгсэхгүй болгож шийдвэрлэсэн. Иймд “Есөн мэргэн” ХХК болон захирал Э.Туулыг эрэн сурвалжилж өгнө үү гэжээ.

ҮНДЭСЛЭХ нь:

 

Нэхэмжлэгч “Интерном” ХХК нь “Есөн мэргэн” ХХК, гүйцэтгэх захирал Э.Туул нарыг эрэн сурвалжлуулах тухай нэхэмжлэлийн шаардлага гаргасныг шүүх хангаж шийдвэрлэв.

 

“Есөн мэргэн” ХХК, гүйцэтгэх захирал Э.Туул нар нь иргэний эрх зүйн маргаанд хариуцагчаар оролцвол зохих этгээд бөгөөд оршин суух хаяг нь тодорхойгүй байгаа болох нь Баянзүрх, Сүхбаатар, Чингэлтэй дүүргийн иргэний хэргийн анхан шатны шүүхийн шүүгчийн 2015 оны 8 сарын 24-ний өдрийн “Хэргийг хэрэгсэхгүй болгох тухай” 26513 дугаар захирамж, 2015 оны 11 сарын 04-ний өдрийн “Хэргийг хэрэгсэхгүй болгох тухай” 35455 дугаар захирамж, нэхэмжлэгчийн төлөөлөгч нарын тайлбар зэрэг баримтаар нотлогдож байна.

 

Эрх зүйн маргаанд хариуцагчаар оролцвол зохих этгээдийн хаяг тодорхойгүйгээс нэхэмжлэгч нь Монгол Улсын Үндсэн хууль болон Иргэний хэрэг шүүхэд хянан шийдвэрлэх тухай хуульд заасан шүүхэд мэдүүлэх эрхээ хэрэгжүүлэх боломжгүй нөхцөл байдал бий болсон байх тул хариуцагчийг эрэн сурвалжлуулах тухай нэхэмжлэлийг хангаж шийдвэрлэх үндэслэлтэй байна гэж үзэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.9-д тус тус заасныг удирдлага болгон

ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3-т зааснаар “Интерном” ХХК-ийн нэхэмжлэлээр эрх зүйн маргаанд хариуцагчаар оролцвол зохих этгээд болох “Есөн мэргэн” ХХК /рд:5709792/, гүйцэтгэх захирал Гүр овогт Эрхэмбаярын Туул /рд:ТВ69112609/ нарыг эрэн сурвалжилсугай.

 

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4-д зааснаар “Есөн мэргэн” ХХК, гүйцэтгэх захирал Э.Туул нарыг эрэн сурвалжилж, тэдгээрийн оршин байгаа хаягийг олж тогтоох ажиллагааг Цагдаагийн байгууллагаар гүйцэтгүүлсүгэй.

 

1. “Есөн мэргэн” ХХК нь Баянзүрх дүүрэг, 25-р хороолол, Манлайбаатар Дамдинсүрэн гудамж, 58-7 тоот хаягт бүртгэлтэй болохыг, гүйцэтгэх захирал Э.Туул нь Баянзүрх дүүрэг, 25-р хороо, 13-р хороолол, 27-р байрны 21 тоот хаягт бүртгэлтэй болохыг тус тус дурдсугай.

 

1. Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1-т зааснаар нэхэмжлэгчээс тэмдэгтийн хураамжид төлсөн 70.200 төгрөгийг улсын төсвийн орлогод хэвээр үлдээсүгэй.

 

1. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр танилцуулан сонсогмогц хүчинтэй болох ба зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргаж болохыг дурдсугай.

 

                                                                                                

 

 

ДАРГАЛАГЧ, ШҮҮГЧ                                      Д.НЯМБАЗАР