2016 оны 08 сарын 29 өдөр

Дугаар 181/ШШ2016/00570

Улаанбаатар хот

 

 

     МОНГОЛ УЛСЫН НЭРИЙН ӨМНӨӨС

 

Сүхбаатар дүүргийн Иргэний хэргийн анхан шатны шүүхийн шүүгч Д.Нямбазар даргалж, тус шүүхийн танхимд хийсэн шүүх хуралдаанаар,

 

Нэхэмжлэгч: Сүхбаатар дүүрэг, 8-р хороо, Ерөнхий сайд Амарын гудамж, өөрийн байранд оршин байгаа “Хас банк” ХХК /рд:2578697/-ийн нэхэмжлэлтэй,

 

Раднаагийн Бадрал /рд:ШЗ66041618/, Базаррагчаагийн Ганболд /рд:ХЙ69081913/ нарыг эрэн сурвалжлуулах тухай  иргэний хэргийг хянан хэлэлцэв.

 

Шүүх хуралдаанд: Шүүх хуралдааны нарийн бичгийн дарга Д.Золзаяа оролцов.

ТОДОРХОЙЛОХ нь:

 

Нэхэмжлэгч “Хас банк” ХХК нь шүүхэд гаргасан нэхэмжлэлдээ: “Хас банк” ХХК нь зээлдэгч Р.Бадрал, Б.Ганболд нарын авсан 2 удаагийн зээлийн үлдэгдэл төлбөртэй холбогдуулан 2016 оны 06 сарын 08-ны өдөр шүүхэд нэхэмжлэл гаргасан. Хариуцагч нарын оршин суугаа хаяг тодорхойгүй талаар тодорхойлолтууд шүүхэд ирж, хэргийг хэрэгсэхгүй болгосон байх тул Р.Бадрал, Б.Ганболд нарыг эрэн сурвалжилж оршин суугаа хаягийг нь тогтоож өгнө үү гэжээ.

ҮНДЭСЛЭХ нь:

 

Нэхэмжлэгч “Хас банк” ХХК нь Р.Бадрал, Б.Ганболд нарыг эрэн сурвалжлуулах тухай нэхэмжлэлийн шаардлагыг шүүхэд гаргажээ.

 

Р.Бадрал, Б.Ганболд нар иргэний эрх зүйн маргаанд хариуцагчаар оролцвол зохих этгээд бөгөөд тэдгээрийн оршин суух хаяг тодорхойгүй байгаа болох нь “Хас банк” ХХК-тай тэдгээрийн байгуулсан 2013 оны 4 сарын 29-ний өдрийн 1080012785 тоот барьцаат зээлийн гэрээ, 1080012785-01 тоот баталгаат ипотекийн гэрээ, Сүхбаатар дүүргийн Иргэний хэргийн анхан шатны шүүхийн шүүгчийн 2016 оны 7 сарын 27-ны өдрийн “Хэргийг хэрэгсэхгүй болгох тухай” 181/ШЗ2016/02129 дүгээр захирамж, нэхэмжлэгчийн тайлбар зэрэг баримтаар нотлогдож байна.

 

Эрх зүйн маргаанд хариуцагчаар оролцвол зохих этгээдийн хаяг тодорхойгүйгээс нэхэмжлэгч нь Монгол Улсын Үндсэн хууль болон Иргэний хэрэг шүүхэд хянан шийдвэрлэх тухай хуульд заасан шүүхэд мэдүүлэх эрхээ хэрэгжүүлэх боломжгүй нөхцөл байдал бий болсон байх тул хариуцагчийг эрэн сурвалжлуулах тухай нэхэмжлэлийг хангаж шийдвэрлэх үндэслэлтэй байна гэж үзэв.

 

Нэхэмжлэгчийн төлөөлөгч С.Батцэцэг нь өөрийн эзгүйд шүүх хуралдааныг хийлгэх талаар хүсэлтээ ирүүлсэн байх тул Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.1-д заасны дагуу нэхэмжлэгчийг оролцуулахгүйгээр хэргийг хянан шийдвэрлэсэн болно.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.9-д заасныг удирдлага болгон

 

ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 155 дугаар  зүйлийн 155.3-т зааснаар “Хас банк” ХХК-ийн нэхэмжлэлээр эрх зүйн маргаанд хариуцагчаар оролцвол зохих этгээд болох Даянбүүвэй овогт Базаррагчаагийн Ганболд /рд:ХЙ69081913/, Шүүлэнкэн овогт Раднаагийн Бадрал /рд:ШЗ66041618/ нарыг эрэн сурвалжилсугай.

 

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4-д зааснаар Даянбүүвэй овогт Базаррагчаагийн Ганболд, Шүүлэнкэн овогт Раднаагийн Бадрал нарыг эрэн сурвалжилж, тэдгээрийн оршин суух хаягийг олж тогтоох ажиллагааг Цагдаагийн байгууллагаар гүйцэтгүүлсүгэй.

 

1. Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1-т зааснаар нэхэмжлэгчээс тэмдэгтийн хураамжид төлсөн 70,200 төгрөгийг улсын төсвийн орлогод хэвээр үлдээсүгэй.

 

1. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр танилцуулан сонсогмогц хүчинтэй болох ба зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргаж болохыг дурдсугай.

 

                                                                                                

 

 

ДАРГАЛАГЧ, ШҮҮГЧ                                      Д.НЯМБАЗАР