2016 оны 08 сарын 04 өдөр

Дугаар 181/ШШ2016/00446

Улаанбаатар хот

 

Зохигчийн эвлэрлийг баталж, хэргийг

хэрэгсэхгүй болгох тухай

 

 

Сүхбаатар дүүргийн Иргэний хэргийн анхан шатны шүүхийн шүүгч Д.Нямбазар даргалж, тус шүүхийн шүүх хуралдааны тамхимд хийсэн шүүх хуралдаанаар,

 

Нэхэмжлэгч: Сүхбаатар дүүрэг, 8-р хороо, 11-р хороолол, 34-р байр, 11 тоот хаягт оршин суух Торгууд овогт Шовгорын Баттөмөр /рд:ХН82080871/, Атаган овогт Энхболдын Хоролсүрэн /рд:ЦБ83032366/ нарын нэхэмжлэлтэй,

 

Хариуцагч: Сүхбаатар дүүрэг, 6-р хороо, 11-р хороолол, Их сургуулийн гудамж, 32/1/-604 тоот хаягт оршин байгаа “Легаси групп” ХХК /рд:5556538/-д холбогдох,

 

Метр квадратын зөрүү 4.026.000 төгрөг гаргуулах тухай иргэний хэргийг хянан хэлэлцэв.

 

Шүүх хуралдаанд: Нэхэмжлэгч Ш.Баттөмөр, Э.Хоролсүрэн нар, хариуцагчийн төлөөлөгч А.Гантулга, шүүх хуралдааны нарийн бичгийн дарга Д.Золзаяа нар оролцов.

  ТОДОРХОЙЛОХ нь:

 

Нэхэмжлэгч нар нь шүүхэд гаргасан нэхэмжлэлдээ: Бид хариуцагч “Легаси групп” ХХК-тай 2013 оны 9 сарын 16-ны өдөр “Захиалгаар орон сууцны барилгын ажил гүйцэтгэх гэрээ”-ний дагуу тус компанийн барьсан Сүхбаатар дүүрэг, 8-р хороо, 11-р хороолол, 34-р байрны 11 тоот хаягт байрлах 43.95 м.кв 2 өрөө орон сууцыг 1 м.кв-тыг нь 2.200.000 төгрөгөөр худалдан авч, төлбөрийг хийсэн. 2015 оны 9 сард “Гега гранд” ХХК-иар орон сууцны талбайн хэмжилт хийлгэхэд 42.12 м.кв гэж гарсан. Иймд 1.83 м.кв-тын төлбөр болох 4.026.000 төгрөгийг гаргуулж өгнө үү гэжээ.

 

Хэрэг хянан шийдвэрлэх ажиллагааны явцад зохигч талууд эвлэрч, 2016 оны 8 сарын 04-ний өдөр эвлэрлийн гэрээ байгуулсан байна.

ҮНДЭСЛЭХ нь:

 

Нэхэмжлэгч Ш.Баттөмөр, Э.Хоролсүрэн нар нь хариуцагч “Легаси групп” ХХК-д холбогдуулан, метр квадратын зөрүү 4.026.000 төгрөг гаргуулах тухай нэхэмжлэлийн шаардлагыг шүүхэд гаргажээ.

 

Хэрэг хянан шийдвэрлэх ажиллагааны явцад зохигч талууд эвлэрч эвлэрлийн гэрээ байгуулсан байх ба уг гэрээгээр хариуцагч “Легаси групп” ХХК нь нэхэмжлэлийн шаардлага болох 4.026.000 төгрөгийг хүлээн зөвшөөрч, 2016 оны 10 сарын 01-ний өдрийн дотор төлж барагдуулахаар харилцан тохиролцжээ.

 

Зохигчийн эвлэрэл нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул зохигчийн эвлэрлийг баталж, хэргийг хэрэгсэхгүй болгох нь зүйтэй гэж үзлээ.

 

Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5 дахь хэсгийг удирдлага болгон

ЗАХИРАМЖЛАХ нь:

 

1. Нэхэмжлэгч Ш.Баттөмөр, Э.Хоролсүрэн нарын нэхэмжилсэн нь метр квадратын зөрүү төлбөр 4.026.000 төгрөгийг хариуцагч “Легаси групп” ХХК нь хүлээн зөвшөөрч, 2016 оны 10 дугаар сарын 01-ний өдрийн дотор төлж барагдуулахаар харилцан тохиролцож эвлэрснийг баталж, хэргийг хэрэгсэхгүй болгосугай.

 

1. Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6-д зааснаар нэхэмжлэгч нараас улсын тэмдэгтийн хураамжид урьдчилан төлсөн 79.400 төгрөгийг улсын төсөвт хэвээр үлдээж, хариуцагчаас тэмдэгтийн хураамжид 79.400 төгрөгийг гаргуулан нэхэмжлэгч нарт буцаан олгосугай.  

 

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

 

 

ДАРГАЛАГЧ, ШҮҮГЧ                                         Д.НЯМБАЗАР