2016 оны 09 сарын 06 өдөр

Дугаар 181/ШШ2016/00620

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

Сүхбаатар дүүргийн Иргэний хэргийн анхан шатны шүүхийн шүүгч Д.Нямбазар даргалж, тус шүүхийн танхимд нээлттэй хийсэн хуралдаанаар

 

Нэхэмжлэгч: Сүхбаатар дүүрэг, 17-р хороо, Дамбадаржаа аос гудамж, 26б тоот хаягт оршин суух Халх овогт Пеодерын Цогзолмаа /рд:ДВ75021606/-гийн нэхэмжлэлтэй,

 

        Хамтын амьдралтай байсныг тогтоолгох тухай иргэний хэргийг хянан хэлэлцэв.

 

Шүүх хуралдаанд: нэхэмжлэгч П.Цогзолмаа, шүүх хуралдааны нарийн бичгийн дарга Д.Золзаяа нар оролцов.

ТОДОРХОЙЛОХ нь:

 

Нэхэмжлэгч П.Цогзолмаа нь шүүхэд гаргасан нэхэмжлэл болон шүүх хуралдаанд гаргасан тайлбартаа: Миний бие Ц.Ариундэлгэртэй 1996 оны 10 сарын 20-ны өдөр танилцаж, 1997 оноос хамтран амьдарч эхэлсэн. 2005 оны 11 сарын 16-ны өдөр хүү А.Пүрэвбаатарыг төрүүлсэн. 1997 оноос хойш бид хоёр нэг гэрт хамтран амьдарч байгаад нөхөр Ц.Ариундэлгэр маань 2016 оны 5 сарын 28-ны өдөр нас барсан. Бид энэ хугацаанд гэрлэлтээ батлуулаагүй байсан юм. Хүү А.Пүрэвбаатарт тэжээгчээ алдсаны тэтгэвэр тогтоолгох болсон тул бид хоёрыг 1997 оны 10 сараас 2016 оны 5 сарын 28-ны өдөр хүртэлх хугацаанд хамтран амьдарч байсныг тогтоож өгнө үү гэжээ.

ҮНДЭСЛЭХ нь:

 

Нэхэмжлэгч П.Цогзолмаа нь талийгаач Ц.Ариундэлгэртэй 1997 оны 10 сараас 2016 оны 5 сарын 28-ны өдөр хүртэлх хугацаанд хамтын амьдралтай байсан болохыг тогтоолгох тухай нэхэмжлэлийн шаардлагыг шүүхэд гаргасныг хангах үндэслэлтэй байна.

 

Нэхэмжлэгч П.Цогзолмаа, талийгаач Ц.Ариундэлгэр нар дээр дурдсан хугацаанд хамтран амьдарч, тэдний дундаас 2005 оны 11 сарын 16-ны өдөр хүү Ариундэлгэрийн Пүрэвбаатар /рд:ДВ05311635/ төрсөн болох нь нэхэмжлэгчийн тайлбар, хүүгийн төрсний гэрчилгээний хуулбар, Сүхбаатар дүүргийн 17-р хорооны Засаг даргын тодорхойлолт, талийгаач Ц.Ариундэлгэрийн төрсөн дүү Ц.Гэрэлмаа /рд:ДВ72042807/, төрсөн эгч Ц.Лхамсүрэн /рд:ДВ66080408/ нарын гэрчийн мэдүүлэг, гэр бүлийн фото зураг зэрэг баримтаар тогтоогдож байна.

 

        Ц.Ариундэлгэр нь авто ослын улмаас 2016 оны 5 сарын 28-ны өдөр 47 настайдаа нас барсан болох нь 0000179061 тоот нас барсны гэрчилгээгээр тогтоогдож байна.

 

Иймд нэхэмжлэгч П.Цогзолмаагийн нэхэмжлэлийн шаардлагыг хангаж, Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.14-т заасныг баримтлан П.Цогзолмааг талийгаач Ц.Ариундэлгэртэй хамтын амьдралтай байсныг тогтоох нь зүйтэй гэж шүүх дүгнэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1-т заасныг удирдлага болгон

 

ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.14-т зааснаар Халх овогт Пеодерын Цогзолмаа /рд:ДВ75021606/-г 1997 оны 10 сараас 2016 оны 5 сарын 28-ны өдөр хүртэлх хугацаанд талийгаач Халх овогт Цэрэндолгорын Ариундэлгэр /рд:ДВ69090515/-тэй хамтын амьдралтай байсныг тогтоосугай.

 

1. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгч П.Цогзолмаагаас тэмдэгтийн хураамжид төлсөн 70,200 төгрөгийг улсын төсөвт хэвээр үлдээсүгэй.

 

1. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр танилцуулан сонсогмогц хүчинтэй болох ба зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргаж болохыг дурдсугай.

 

 

ДАРГАЛАГЧ, ШҮҮГЧ                                      Д.НЯМБАЗАР