2016 оны 06 сарын 07 өдөр     Дугаар 156/ШШ2016/00350
    Хэнтий аймаг

МОНГОЛ УЛСЫН НЭРИЙН ӨМНӨӨС

 
Хэргийн индекс: 156/2016/00416/И
 
Хэнтий аймаг дахь сум дундын Иргэний хэргийн анхан шатны шүүхийн шүүгч Ж.Болдбаатар даргалж тус шүүхийн шүүх хуралдааны “Б” танхимд нээлттэй хийсэн иргэний хэргийн шүүх хуралдаанаар
 
            Нэхэмжлэгч: Хэнтий аймгийн Хэрлэн сумын 1 дүгээр багт байрлах, Хэнтий аймаг дахь Цагдаагийн газрын нэхэмжлэлтэй, 

    Хэнтий аймгийн Батширээт сумын 4 дүгээр багийн колонк 1-2 тоотод оршин суугч,  иргэн Цэцэгмаагийн Батжаргалыг архины албадан эмчилгээнд хамруулах тухай хүсэлттэй иргэний хэргийг хянан хэлэлцэв.
 
Шүүх хуралдаанд: Нэхэмжлэгч Хэнтий аймгийн Цагдаагийн газрын итгэмжлэгдсэн төлөөлөгч, цагдаагийн хошууч А.Отгонжаргал, бие даасан шаардлага гаргаагүй гуравдагч этгээд Ц. Батжаргал, шүүх хуралдааны нарийн бичгийн дарга Н.Болор-Уянга нар оролцов. 
 
ТОДОРХОЙЛОХ НЬ:
 
    Нэхэмжлэгч  Хэнтий аймаг дахь Цагдаагийн газар нь шүүхэд гаргасан нэхэмжлэлдээ:
          Эрхэлсэн тодорхой ажилгүй Хэнтий аймгийн Батширээт сумын 4 дүгээр багийн колонк 1-2 тоотод оршин суух иргэн Ц.Батжаргал нь Согтуурах, мансуурах донтой өвчтэй нь мэргэжлийн эмчийн үзлэг болон сэтгэцийн эмчийн дүгнэлтээр тогтоогдож байгаа тул захиргааны журмаар албадан эмчилгээнд хамруулж өгнө үү  гэжээ. /хх-ийн 1х/
 
Нэхэмжлэгч байгууллагын итгэмжлэгдсэн төлөөлөгч А.Отгонжаргал нь шүүхэд болон шүүх хуралдаанд гаргасан тайлбартаа:
Ц.Батжаргал нь Хэнтий аймгийн Батширээт сумын 4 дүгээр багийн колонк 1-2 тоотод оршин суудаг, тэрбээр архинд донтох өвчний 2 дугаар зэрэгтэй болох нь мэргэжлийн байгууллагын дүгнэлтээр тогтоогдож байна. Мөн Хэнтий аймгийн Батширээт сумын Норовлин багийн засаг дарга Б.Болдын иргэн Ц.Батжаргал нь 2011 оноос хойш архи хэтрүүлэн хэрэглэх болсон бөгөөд одоо байнга архидан согтуурдаг. Архины албадан болон ховс эмчилгээ, сургалт, цуглаанд хамрагдаж байгаагүй нь үнэн гэх тодорхойлолт, Хэнтий аймгийн Батширээт сумын хэсгийн төлөөлөгч Х.Мөнхдөл нь Ц.Батжаргал бол байнга архидан согтуурдаг, архины хамааралтай иргэн мөн болохыг тодорхойлсон байна, мөн Ц.Батжаргалын өөрийн гаргасан тайлбарт би хөдөө мал дээр байдаг суманд ирээд найз нөхөдтэйгөө тараад архи уудаг гэсэн тайлбар, Мөн хөрш Бямбацогтын нь Ц.Батжаргал нь суманд ирэхээрээ байнга архи уудаг хөдөө мал дээр байдаг эсэхийг нь сайн мэдэхгүй байна.  Нийт зөрчлөөр нь авч үзвэл 3 удаа саатуулагдсан, 2 удаа торгуулж, 1 удаа баривчлагдаж байсан байна. Урьд нь нэг удаа албадан эмчилгээнд хамруулахаар нэхэмжлэл өгч байсан. Шүүгч нэг удаа боломж олгож явуулж байсан.  

Иймд Ц.Батжаргалыг архины албадан эмчилгээнд явуулж өгнө үү гэв.

Бие даасан шаардлага гаргаагүй гуравдагч этгээд Ц.Батжаргал нь шүүхэд болон шүүх хуралдаанд гаргасан тайлбартаа: Миний бие архи уудаг нь үнэн. Хөдөө ээжтэйгээ хоёулхнаа мал дээр байдаг. Хааяа сумын төв орж ирэхээрээ л уудаг. Ээж маань бие нь тааруу байгаа мөн зусландаа ч бууж амжаагүй байна. Иймд би архины албадан эмчилгээнд явмааргүй байна. Надад өөр нэмж хэлэх зүйл байхгүй  

Шүүх хуралдаан дээр хэрэгт авагдсан бичгийн нотлох баримтуудыг шинжлэн судлаад 

ҮНДЭСЛЭХ НЬ:

             Нэхэмжлэгч Хэнтий аймаг дахь Цагдаагийн газар нь Ц.Батжаргалыг архины албадан эмчилгээнд хамруулахаар шүүхэд хүсэлт гаргасан байна. 

            Нэхэмжлэгч байгууллагын хүсэлтийг хангах нь зүйтэй байна гэж шүүх үзлээ. 

Дарьганга овогт Цэцэгмаагийн Батжаргал нь архинд донтох өвчний улмаас байнга архидан согтуурч, захиргааны арга хэмжээ авагдаж байсан, архины хамааралтай болох нь Хэнтий аймгийн Батширээт сумын Норовлин багийн засаг дарга Б.Болдын тодорхойлолт /хх-ийн 7х/, Хэнтий Батширээт сумын хэсгийн төлөөлөгч Х.Мөнхдөлийн тодорхойлолт /хх-ийн 8х/, бие даасан шаардлага гаргаагүй гуравдагч этгээдийн өөрийн тайлбар /хх-ийн 9х/, Хэнтий аймгийн Батширээт сумын иргэн Д.Бямбацогтын тайлбар /хх-ийн 10х/ зэрэг нотлох баримтуудаар нотлогдож байна. 

Мөн тэрбээр архинд донтох өвчний 2 дугаар зэрэгтэй болох нь  Хэнтий аймгийн нэгдсэн эмнэлгийн нарийн мэргэжлийн эмч нарын комиссын дүгнэлт, эмнэлгийн үзлэг, шинжилгээгээр тогтоогдож байна. 

    Иймд Ц.Батжаргалыг архины албадан эмчилгээ хийлгэх шаардлагатай гэж шүүх үзлээ.

Иргэний  хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.1, 135 дугаар зүйлийн 135.2.14-т заасныг удирдлага болгон
                                      
ТОГТООХ НЬ:
1. Согтуурах, мансуурах донтой өвчтэй этгээдийг захиргааны журмаар албадан эмчлэх, албадан хөдөлмөр хийлгэх тухай хуулийн 4 дүгээр зүйлийн 4.1, 12 дугаар зүйлийн 12.1-д заасныг баримтлан Дарьганга овогт Цэцэгмаагийн Батжаргал /РД: СБ78041214/-д архины албадан эмчилгээ хийлгэсүгэй. 
 2. Согтуурах, мансуурах донтой өвчтэй этгээдийг захиргааны журмаар албадан эмчлэх, албадан хөдөлмөр хийлгэх тухай хуулийн 6 дугаар зүйлийн 6.6-д зааснаар Ц.Батжаргалыг албадан эмчлэх газарт хүргэх ажиллагааг Хэнтий аймгийн Цагдаагийн  газарт даалгасугай. 
3. Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч байгууллага нь улсын тэмдэгтийн хураамжаас чөлөөлөгдсөн болохыг дурдсугай. 
4. Энэ шийдвэр нь танилцуулан сонгосноор хуулийн хүчинтэй болох бөгөөд Согтуурах, мансуурах донтой өвчтэй этгээдийг захиргааны журмаар албадан эмчлэх, албадан хөдөлмөр хийлгэх тухай хуулийн 6 дугаар зүйлийн 6.4-т зааснаар албадан эмчилгээнд хамрагдаж буй өвчтөн Ц.Батжаргал, түүний төлөөлөгч, өмгөөлөгч нь энэ шийдвэрийг эс зөвшөөрвөл гардуулснаас хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

ДАРГАЛАГЧ  ШҮҮГЧ                                     Ж.БОЛДБААТАР