Баян-Өлгий аймаг дахь сум дундын эрүүгийн хэргийн анхан шатны шүүхийн  шүүх хуралдааныг шүүгч П.Д даргалж,

Шүүх хуралдааны нарийн бичгийн дарга К.Е,

Орчуулагч, хэлмэрч А.Е,

Улсын яллагч М.Ф,

Шүүгдэгчийн өмгөөлөгч С.Т,

Шүүгдэгч О.Н нарыг оролцуулан шүүх хуралдааны танхимд нээлттэй явуулж, Баян-Өлгий аймгийн прокурорын газрын хяналтын прокурор М.Ф Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар яллах дүгнэлт үйлдэж хялбаршуулсан журмаар хянан шийдвэрлүүлэх саналтай ирүүлсэн 1913000490069 дугаартай эрүүгийн хэргийг хянан хэлэлцэв.

 

Шүүгдэгчийн биеийн байцаалт:

Монгол Улсын иргэн, яс үндэс казах, Б овогт Он Н, 1999 оны 01 дүгээр сарын 14-ний өдөр төрсөн, 20 настай, эрэгтэй, бүрэн дунд боловсролтой, мэргэжилгүй, эрхэлсэн ажилгүй, ам бүл ам бүл 6, эцэг, эх, эгч, дүү нарын хамт Баян-Өлгий аймгийн Ногооннуур сумын** дугаар багт оршин суудаг, урьд ял шийтгүүлж байгаагүй, регистрийн дугаар БЮ****

            Шүүгдэгчийн холбогдсон хэргийн талаар:

Шүүгдэгч О.Н нь 2019 оны 01 дүгээр сарын 06-ны өдөр Баян-Өлгий аймгийн Ногооннуур сумын 7 дугаар багийн нутаг дэвсгэрт байрлах бүрэн дунд сургуулийн биеийн тамирын заалны хувцас солих өрөөнд М.Оийн цүнхэн дотор өмдний халаасанд байсан “HUAWEI Y5 Prime” маркийн гар утсыг хулгайлж Эрүүгийн хуулийн тусгай ангийн 17.1 дүгээр зүйлийн 1 дэх хэсэгт хамаарах гэмт хэрэгт холбогджээ.

 

ТОДОРХОЙЛОХ НЬ:

1. Шүүгдэгч О.Ныг гэм буруутайд тооцох үндэслэлийн талаар:

Шүүгдэгч О.Н нь 2019 оны 01 дүгээр сарын 06-ны өдөр Баян-Өлгий аймгийн Ногооннуур сумын 7 дугаар багийн нутаг дэвсгэрт байрлах бүрэн дунд сургуулийн биеийн тамирын заалны хувцас солих өрөөнд М.Оийн цүнхэн дотор өмдний халаасанд байсан “HUAWEI Y5 Prime” маркийн гар утсыг хулгайлсан

гэмт хэргийг үйлдсэн болох нь:

• Эргүүлийн цагдаа, цагдаагийн дэд ахлагч Т.Пын бичсэн илтгэх хуудас, /хх-ийн 9 дүгээр хуудас/,
• Хэргийн газарт нөхөн үзлэг хийсэн тухай тэмдэглэл, гэрэл зургууд /хх-ийн 13-15 дугаар хуудас/,
• Хохирогч М.Оийн мөрдөн байцаалтын шатанд өгсөн: “...2019 оны 01 дүгээр сарын 06-ны өдөр Баян-Өлгий аймгийн Ногооннуур сумын бүрэн дунд сургуулийн зааланд гар бөмбөгийн тэмцээн зохион байгуулагдсан. Би уг тэмцээнд найз нарын хамт оролцсон юм. Тэмцээнд тоглох гэж байхад би өөрийн эзэмшлийн 2018 онд үйлдвэрлэгдсэн шинээр худалдаж аваад 3-4 сар болж байгаа “HUAWEI Y5 Prime” маркийн хар өнгийн гадаргатай, дэлгэцэндээ нууц кодтой гар утсыг өмднийхөө халаасанд хийж ороогоод гадуур нь цамцаараа боож биеийн тамирын хувцас хийх гар цүнхэнд хийгээд амных нь цахилгааныг татаж биеийн тамирын заалны хувцас солих өрөөнд тавьсан байсан. Тэгээд гар бөмбөг тоглож дуусаад тарахаар болж хувцас солих өрөө рүү ороход миний цүнхний цахилгааныг онгойлгож доторх хувцаснуудыг онгичоод хаясан байсан. Би тэр даруй гар утсаа хайгаад өмднийхөө халаасыг харахад хулгайлаад явсан байсан. Тэгээд хажууд явсан ангийн хүүхэд болон ойролцоо явсан хүмүүсээс сураглаад олдохгүй болохоор нь сумын цагдаа нарыг дуудсан юм. Хулгайд алдсан гар утсаа цагдаа нараас бүрэн бүтэн хүлээж авлаа. Миний бие гомдол санал байхгүй, шүүх хуралдаанд оролцохгүй.” гэх мэдүүлэг /хх-ийн 17-21, 25-26 дугаар хуудас/,
• Гэрч Т.П-н мөрдөн байцаалтын шатанд өгсөн:  “...Тэгээд зааланд тоглож байгаа хүмүүсээс асууж “Энэ өрөөнд өөр хүмүүс орсон уу. Ямар ямар хүмүүс орж хувцас сольсон. Чиний цүнхний хажууд хэний цүнх, хувцас нь байсан” гэж тодруулж асуусан чинь тус зааланд явж байсан үл таних залуу “...Намайг сая энэ өрөөнд орж хувцас сольж байхад үл таних нэг хар куртка, шар гутал өмссөн залуу наад цүнхийг онгойлгож нэг юм авч байсан” гэсэн. Тэгээд би нэн даруй тэр залууг заалнаас хайгаад олоогүй. Тэмцээн тарчихсан байсан юм. Тэгээд тэмцээн тарсны дараа үргэлжлүүлээд 22 цагийн үед сумын соёлын төвд залуучуудын шоу нийтийн бүжиг болж байсан бөгөөд тэр шоунд очиж шар гуталтай залууг хайж байсан чинь нэг хар өнгийн куртик өмссөн, шар гуталтай залуу харагдсан. Уг залуу хүмүүсийн ард нуугдаад нэг сэжигтэй харагдсан. Тэгээд би уг залууг дуудаж гадаа гараад ир гээд нэр, хаягийг нь асуухад “Намайг О овогтой Н гэдэг гэсэн. Гар бөмбөгийн тэмцээний үеэр хаана байсан талаар, зааланд очсон эсэх” талаар асуусан чинь би өнөөдөр сургуульд болсон гар бөмбөгийн тэмцээнд орсон нь үнэн. Тэгээд гэртээ хариад сая ирсэн. Би тийм утас хараагүй, мэдэхгүй, аваагүй...” гэсэн. Тэгээд би Нд: “...Чи О гэх залуугийн гар утсыг авсан байна. Тэр зааланд хяналтын камер байсан. Тэр камераас чиний гар утас авсныг би харлаа. Уг утсыг надад авчирч өг” гэж худлаа хэлсэн чинь “Ахаа би гар утас авсан маань үнэн. Та бусад хүмүүст битгий хэлээрэй. Би танд одоо авчирч өгье” гэж үнэнээ хэлээд маргааш нь Н гэх залуу надад М.Оийн “HUAWEI Y5 Prime” маркийн гар утсыг авчирч өгсний дагуу холбогдох албан тушаалтанд хүлээлгэж өгсөн болно.” гэх мэдүүлэг /хх-ийн 29-30 дугаар хуудас/,
• Насанд хүрээгүй гэрч Т.А-ийн мөрдөн байцаалтын шатанд өгсөн: “...2019 оны 01 дүгээр сарын 06-ны өдөр 21 цагийн орчимд Ногооннуур сумын бүрэн дунд сургуулийн биеийн тамирын зааланд оюутнууд гар бөмбөгийн тэмцээн зохион байгуулсан. Уг тэмцээнд сургуулиас манай ангийн баг оролцоод 2 дугаар байранд орсон. Сургуулийн зааланд тэмцээн болоод хамгийн сүүлийн тоглолт болж байхад манай ангийн сурагч О нэлээн ууртай ирээд “...Хувцас солих өрөөнөөс гар утсаа хулгайд алдчихлаа. Миний цүнхэн дотор өмдний халаасанд ороогоод хийчихсэн байсан гар утсыг хулгайлаад явсан байна. Миний утсыг унтраачихсан байна” гэж надад хэлсэн. Тэгээд О зааланд яваа сумын цагдаад очиж хэлж байгаа харагдсан. Улмаар тэмцээн дуусаад тарцгаасан юм. Оийн гар утсыг заалнаас хэн хулгайлсныг мэдээгүй болно.” гэх мэдүүлэг /хх-ийн 31-32 дугаар хуудас/,
• Насанд хүрээгүй гэрч М.Гийн мөрдөн байцаалтын шатанд өгсөн: “...2019 оны 01 дүгээр сарын 06-ны өдөр Ногооннуур сумын оюутны холбооноос Ногооннуур сумын бүрэн дунд сургуулийн биеийн тамирын зааланд сагсан бөмбөг, гар бөмбөгийн тэмцээн зохион байгуулсан. Би уг тэмцээнд аймгаас очиж оролцсон. Тэгээд тэмцээн оройхон тарахаар болоод 21 цагийн орчим болж байхад манай багт тоглож байсан О ирээд “...Хувцас солих өрөөнөөс гар утсаа хулгайд алдчихлаа. Миний цүнхэн дотор өмдний халаасанд хийсэн байсан гар утас алга болсон байна. Утсыг унтраачихсан байна” гэж надад хэлсэн. Тэгээд би От сая намайг хувиас солих өрөөнд байхад нэг шар царайтай, цээжээрээ хар куртик, хөлөндөө шар гутал өмссөн залуу чиний хувцасны цүнхийг миний хажууд уудлаад зогсож байсан. Тэр залуу намайг харангуутаа өөр зүйлээр оролдоод байгаа харагдсан гэж От хэлсэн. Наад үгээ цагдаад хэлээд өг гэхээр нь зааланд яваа сумын цагдаад очиж үзсэн харсан зүйлээ хэлээд явсан.” гэх мэдүүлэг /хх-ийн 35 дугаар хуудас/,
• Шүүгдэгч О.Ны мөрдөн байцаалтын шатанд болон шүүх хуралдааны хэлэлцүүлэгт өгсөн: “...2019 оны 1 дүгээр сарын 06-ны өдөр Ногооннуур сумын бүрэн дунд сургуулийн зааланд гар бөмбөгийн тэмцээн болж байхаар очсон юм. Гар бөмбөгийн тэмцээнд оролцсон. Тэмцээн шөнө 21 цагийн орчимд тараад би заалны хувцас солих өрөөнд хувцсаа солихоор очиход миний ойролцоо хар өнгийн цүнх байсан. Цүнхний амсар онгорхой харагдсан. Хартал амсар хэсэгт хар өнгийн гар утас байхаар нь авсан. Миний хажууд хүн байгаагүй. Гар утсыг аваад халаасандаа хийгээд заал руу орж тэндээсээ шууд гэртээ харих замд уг гар утасны дэлгэцийг харахад унтарчихсан байсан. Асаахад пин код асуугаад утасны дэлгэц нээгдээгүй. Уг утсыг куртикны халаасанд гэрт үлдээгээд гэрээс гарч сумын соёлын төвд бүжигт ирсэн. Ирэхэд О гэх хүүхэд гар утсаа хулгайд алдсан талаар сонссон. Бүжгэнд байхад сумын цагдаа надтай уулзаад “Гар утас хулгайлсан байна. Камераас харлаа” гэж надад хэлэхээр нь өөрийн буруугаа хүлээн зөвшөөрч Оийн гар утсыг тоглоод авсан талаар цагдаад үнэнээ хэлсэн. Өөрийн буруугаа хүлээн зөвшөөрч гэмшиж байна.  Хохирлыг бүрэн барагдуулсан. Хохирогч гомдолгүй гэсэн тул хуулийн хөнгөлөлт үзүүлж өгнө үү” гэх мэдүүлэг /хх-ийн 49-51 дүгээр хуудас болон шүүх хуралдааны тэмдэглэл/,
• Мэдүүлгийг газар дээр нь шалгасан тэмдэглэл, гэрэл зургийн үзүүлэлт /хх-ийн 52-54 дүгээр хуудас/ зэрэг нотлох баримтуудаар үйлдэл нь нотлогдож байна.

 

            Хулгайлах гэмт хэрэг нь бусдын өмчлөлд байгаа эд хөрөнгө, эд юмсыг хувийн ашиг олох шунахай сэдэлт, зорилгоор хүч хэрэглэхгүйгээр бусдын эзэмшлээс нууцаар буюу өмчлөгчид нь мэдэгдэхгүйгээр авч буй үйлдэл бөгөөд шүүгдэгч О.Ны дээрх үйлдэл нь хулгайлах гэмт хэргийн үндсэн шинжийг хангасан байна.

            Иймд шүүгдэгч О.Ны үйлдсэн гэмт хэрэг нь Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэргийн шинжийг бүрэн хангаж байх тул түүнийг бусдын эд хөрөнгийг хүч хэрэглэхгүйгээр, нууцаар, хууль бусаар “Хулгайлах” гэмт хэргийг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй гэж дүгнэлээ.

 Мөн уг гэмт хэрэг нь Эрүүгийн хэрэг хянан шийдвэрлэх тухай хуулийн 17.5 дугаар зүйлд заасан хялбаршуулсан журмаар хянан шийдвэрлэх зарим гэмт хэрэгт хамаарч байх ба Эрүүгийн хэрэг хянан шийдвэрлэх тухай хуульд заасан хялбаршуулсан журмаар хэрэг хянан шийдвэрлэх тусгай журмыг зөрчөөгүй, хуульд заасан журмын дагуу явагдсан байна.

Эрүүгийн хуулийн ерөнхий ангийн 2.3 дугаар зүйлийн 1 дэх хэсэгт “Өөрийн үйлдэл, эс үйлдэхүйг хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэсэн бол санаатай гэмт хэрэгт тооцно” гэж заасан ба шүүгдэгч нь өөрийн үйлдлээ хууль бус шинжтэй болохыг ухамсарлаж байсан ч энэ гэмт хэргийг хүсэж, шунахайн сэдэлтээр уг гэмт хэргийг санаатай үйлдсэн байна.

Уг гэмт хэргийн улмаас хохирогч М.От 340000 /гурван зуун дөчин мянга/ төгрөгийн хохирол учирсан болох нь 2019 оны 03 дугаар сарын 05-ны өдрийн эд зүйлд үнэлгээ хийсэн шинжээчийн дүгнэлтээр тогтоогдож байна. Шүүгдэгч О.Н нь хулгайлсан эд зүйлийг бүрэн хүлээлгэн өгч хохирогчийг хохиролгүй болгосон болох нь хавтаст хэрэгт авагдсан хохирогчийн мэдүүлэг, шүүгдэгчийн мэдүүлэг, эд зүйл хураан авч хүлээлгэн өгсөн тухай мөрдөгчийн тэмдэглэл зэргээр тогтоогдож байх тул түүнийг хохирогчид төлөх төлбөргүй гэж үзлээ. Мөн түүнээс гаргуулах хэрэг хянан шийдвэрлэх ажиллагааны зардалгүй байна.

1. Шүүгдэгч О.Нд  эрүүгийн хариуцлага хүлээлгэх үндэслэл:

            Эрүүгийн хуулийн ерөнхий ангийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ” гэж заасныг баримтлан шүүгдэгч О.Нд үйлдсэн гэмт хэрэгт нь эрүүгийн хариуцлага оногдуулах нь зүйтэй гэж дүгнэлээ.

Эрүүгийн хуулийн ерөнхий ангийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж тус тус заасныг удирдлага болгов.

Шүүх хуралдаанаар шинжлэн судлагдсан баримт болон хэрэгт авагдсан шүүгдэгчийн хувийн байдал болон бусад баримтуудыг үндэслэн шүүгдэгч О.Нд эрүүгийн хариуцлага хүлээлгэхдээ гэмт хэрэг үйлдсэний дараа хохирогчид учруулсан хохирлыг төлснийг эрүүгийн хариуцлага хөнгөрүүлэх нөхцөл байдалд тооцлоо. Харин Эрүүгийн хуулийн ерөнхий ангийн 6.6 дугаар зүйлд заасан эрүүгийн хариуцлага хүндрүүлэх нөхцөл байдал тогтоогдохгүй байна.  

Ял шийтгэгдсэн эсэхийг шалгах хуудсаар шүүгдэгч О.Н нь урьд ял шийтгүүлж байгаагүй болох нь тогтоогдож байх тул анх удаа гэмт хэрэг үйлдсэн гэж үзлээ.

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон дээрх нотлох баримтуудыг үндэслэн шүүгдэгч О.Нд эрүүгийн хариуцлага хүлээлгэхдээ үйлдсэн гэмт хэрэгт нь цээрлүүлэх, ахин гэмт хэрэг үйлдэхээс урьдчилан сэргийлэх зорилгоор учруулсан хохирол, хор уршгийг барагдуулсан байдал, эрүүгийн хариуцлагын хөнгөрүүлэх нөхцөл байдалтай, хүндрүүлэх нөхцөл байдалгүй болон шүүх хуралдаанд улсын яллагч, шүүгдэгчийн өмгөөлөгчийн гаргасан санал зэргийг тус тус харгалзан түүнд Эрүүгийн хуульд заасан шударга ёсны зарчмыг баримтлан, үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэм буруугийн хэлбэр зэргийг харгалзан Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар түүнд 240 цаг Баян-Өлгий аймгийн Ногооннуур сумын засаг даргын тамгын газарт гудамж талбай цэвэрлэх нийтэд тустай ажил хийлгэх ял оногдуулж уг нийтэд тустай ажил хийлгэх ял шийтгэхээр шийдвэрлэв.

Шүүгдэгчид оногдуулсан нийтэд тустай ажил хийлгэх ялыг өдөрт 4 цагаар тогтоож, шүүгдэгч нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг мэдэгдэх нь зүйтэй байна.

Энэ гэмт хэргийн улмаас шүүгдэгч нь цагдан хоригдсон хоноггүй, эд хөрөнгө битүүмжлэгдээгүй, эд мөрийн баримтаар хураагдсан зүйлгүй болно.  

            Шүүгдэгчид  хувийн баталгаа гаргах таслан сэргийлэх арга хэмжээ авагдсан бөгөөд уг таслан сэргийлэх арга хэмжээг шийтгэх тогтоол хуулийн хүчин төгөлдөр болж шүүхийн шийдвэрийг Баян-Өлгий аймаг дахь Шүүхийн шийдвэр гүйцэтгэх газарт хүргүүлэх хүртэл хэвээр үргэлжлүүлэх нь зүйтэй байна. Мөн шүүхэд шүүгдэгчийн хувийн бичиг баримт ирээгүй болохыг дурдаж байна.

Эрүүгийн хэрэг хянан шийдвэрлэх тухай хуулийн 17.5 дугаар зүйлийн 1, 5, 6, 7, 8 дахь хэсэг, мөн хуулийн 36.1 дүгээр зүйл, 36.2 дугаар зүйлийн 1, 2, 3, 4 дэх хэсэг, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйл, 36.13 дугаар зүйл, 37.1 дүгээр зүйлийн 2 дахь хэсэгт заасныг тус тус удирдлага болгон ТОГТООХ нь:                                                                                                                                                                                                                                                                                                                                                                                                                                               

1. Шүүгдэгч Б овогт Ойн Ныг Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан “Хулгайлах” гэмт хэрэг үйлдсэн гэм буруутайд тооцсугай. 

2. Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар Баян-Өлгий аймгийн Өлгий сумын Засаг даргын тамгын газарт шүүгдэгч О.Нд 240 /хоёр зуун дөч/ цаг Баян-Өлгий аймгийн Ногооннуур сумын засаг даргын тамгын газарт гудамж талбай цэвэрлэх нийтэд тустай ажил хийлгэх ял оногдуулж уг нийтэд тустай ажил хийлгэх ял шийтгэсүгэй. 

 3. Эрүүгийн хуулийн ерөнхий ангийн 5.4 дүгээр зүйлийн 2 дахь хэсэгт зааснаар шүүгдэгчид оногдуулсан нийтэд тустай ажил хийлгэх ялыг өдөрт 4 /дөрөв/ цагаар тогтоосугай.

            4. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгч О.Н нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын 8 /найм/ цагийн ажлыг нэг хоногоор тооцож хорих ялаар солихыг мэдэгдсүгэй.

            5. Шүүгдэгч О.Н нь энэ хэрэгт цагдан хоригдсон хоноггүй, бусдад төлөх төлбөргүй, тэндээс гаргуулах хэрэг хянан шийдвэрлэх ажиллагааны зардалгүй, битүүмжилсэн эд хөрөнгөгүй, эд мөрийн баримтаар хураагдаж ирүүлсэн зүйлгүй, шүүгдэгчийн хувийн бичиг баримт шүүхэд ирээгүй болохыг тус тус дурдсугай.

6. Шүүгдэгчид урьд авсан хувийн баталгаа гаргах таслан сэргийлэх арга хэмжээг шийтгэх тогтоол хуулийн хүчин төгөлдөр болж шүүхийн шийдвэрийг Баян-Өлгий аймаг дахь Шүүхийн шийдвэр гүйцэтгэх газарт хүргүүлэх хүртэл хэвээр үргэлжлүүлсүгэй.

7.  Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч, тэдний өмгөөлөгч, хууль ёсны төлөөлөгч нар эс зөвшөөрвөл гардан авсан өдрөөс хойш, эсхүл Эрүүгийн хэрэг хянан шийдвэрлэх тухай хуулийн 11.9 дүгээр зүйлд заасны дагуу хүргүүлснээс хойш 14 хоногийн дотор Баян-Өлгий аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай. 

8. Шийтгэх тогтоолд давж заалдах гомдол гаргасан, эсэргүүцэл бичигдсэн тохиолдолд тогтоолын биелэлтийг түдгэлзүүлсүгэй.

 

 

 

 

ДАРГАЛАГЧ, ШҮҮГЧ                               П.Д