МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,

Шүүх хуралдааны нарийн бичгийн дарга Б.Энхтүвшин,

Улсын яллагчаар, хяналтын прокурор Б.Амартүвшин,

Шүүгдэгчийн өмгөөлөгч Ч.Будхүү, 

Шүүгдэгч Д.О- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн Прокурорын газрын хяналтын прокуророос Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Д.О-т холбогдох эрүүгийн 1838001390195 дугаартай хэргийг хянан хэлэлцэв.

Шүүгдэгчийн биеийн байцаалт:

Монгол улсын иргэн, Д.О.

Шүүгдэгч Д.О- нь 2019 оны 01 дүгээр сарын 29-ний өдөр Хөвсгөл аймгийн Мөрөн сумын 8 дугаар багийн нутаг дэвсгэрт иргэн Б.О-ыг халамжид оруулж өгнө гэж хуурч, 165.000 төгрөгийг авч, “Залилах” гэмт хэргийг үйлдсэнд холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгчийн гэм буруугийн талаар: 

Шүүгдэгч Д.О- нь шунахайн сэдэлтээр 2019 оны 01 дүгээр сарын 29-ний өдөр Хөвсгөл аймгийн Мөрөн сумын 8 дугаар багийн нутаг дэвсгэрт иргэн Б.О-ыг “халамжид оруулж өгнө” гэж хууран мэхлэх аргаар түүний 165.000 төгрөгийг нь авч, “Залилах” гэмт хэргийг үйлдсэн байна.

Шүүгдэгчийн гэмт хэрэг үйлдсэн гэмт буруутай болох нь хэрэгт авагдсан нотлох баримтууд болох:

• Хохирогч Б.О-аас Хөвсгөл аймгийн Цагдаагийн газарт гаргасан гэмт хэргийн талаарх гомдол /хх-ийн 6 дугаар хуудас/,
• Камерын бичлэгт үзлэг хийсэн тэмдэглэл /хх-ийн 11 дүгээр хуудас/,
• Хохирогч Б.О-ы мөрдөн шалгах ажиллагааны үед өгсөн: “Би 2019 оны 01 дүгээр сарын 29-ний өдөр өглөөний 10 цагийн үед Капитал банкнаас хүүхдийн хадгаламжийн хугацаа дуусахаар нь мөнгийг нь очиж авсан юм. Мөнхзул, Мөнхболор нарын нийтдээ 295.000 төгрөг авсан юм. Тэгээд Тэвхэн дэлгүүр дотор зогсож байхад нэг хүн хүрч ирж уулзаад “таныг би таньдаг, та намайг танихгүй байна уу” гэж ярилцаад өөрийгөө Уламбаяр гэж танилцуулаад ... гэсэн дугаарын утас өгч, “би таныг халамжид оруулж өгье, дарга нь манай ээжтэй их ойрхон төрөл, таныг халамжид оруулж өгч чадна, та харин дараа нь юм ярьж болохгүй шүү” гэж хэлсэн. Тэгээд Тэвхэн дэлгүүрээс гараад шууд нэгдсэн эмнэлэг ороод намайг сандал дээр сууж байгаарай гээд паспорт авч ороод эргэж гарч ирээд 23.000 төгрөг байна уу гэхээр нь би бутархай мөнгө байхгүй гээд 25.000 төгрөг өгсөн. Буцаж гарч ирээд “та шовгорт нь хэдэн төгрөг өгөх юм бэ” гэж хэлэхээр нь би 20.000 төгрөг өгье гэхэд арай бага байна гэхээр нь би 40.000 төгрөг өгсөн. Тэгээд тэр мөнгийг авч 2 давхар руу гарч яваад өгчихлөө гээд буцаад ирсэн. Би хэн гэдэг хүнтэй уулзсаныг нь мэдэхгүй, аль өрөө рүү орсныг нь бас хараагүй. Буцаж ирээд одоо Нийгмийн даатгал орж даатгалаа төлөхгүй бол болохгүй юм байна гээд Нийгмийн даатгал орсон. Тэгэхэд ундны цаг болсон байна, гүйлгээ хийхгүй гэхэд тэр хүн надад дээд давхарт суудаг таньдаг хүн байгаа би төлбөрийг нь төлөөд өгье гэж хэлээд 40.000 төгрөг аваад намайг наанаа сууж бай гэж хэлээд 2 давхарт нэг өрөө рүү ороод буцаад гараад ирсэн. Тэгээд би хүнд үлдээчихлээ, 14 цагаас ирж ав гэж байна гэж байсан. Тэгээд Нийгмийн даатгалаас хамт төв ХААН банк орсон. Би өөрөө хүүхдийн асаргааны мөнгө авдаг юм, тэр дэвтрээ барьцаалж мөнгө авдаг юм гэж ярьсан. Тэгээд ХААН банкны 2 давхар руу гараад хэсэг байж байгаад буцаж бууж ирсэн. Тэгэхдээ 40.000 төгрөг хэрэг боллоо, би танд 50.000 төгрөг болгоод өгье гээд 40.000 төгрөг авсан. Тэгээд буцаж ирээд дахиад 20.000 төгрөг хэрэг боллоо нэг нарийн бичиг хийлгэж авч байж мөнгөө авдаг юм байна гээд 20.000 төгрөг авсан. Тэгээд ХААН банкнаас гараад эмнэлэг рүү уруудаад явж байхад намайг хүүхдийнхээ бичиг баримтыг өөрийнхөө бичиг баримттай хуулбарлуулаад араас хүрээд ир, би хуралд орох дараалал аваад зогсож байя гээд надаас салаад явсан. Би тэгээд бичиг баримтаа хуулбарлуулаад буцаад эмнэлэгт хурал болдог газар очиход тэр хүн байхгүй байсан. Тэгээд нөгөө надад өгсөн дугаар руу залгаж үзэхэд ашиглалтанд байхгүй гэсэн хариу өгч байсан. Тэгээд би тэндээсээ Нийгмийн даатгал орж нөгөө орсон өрөө рүү орж нийгмийн даатгал, мөнгө өгсөн үү гэж нийгмийн даатгалын ажилтнуудаас асуухад тийм зүйл байхгүй, хүний бичиг баримт, мөнгө бэлнээр авдаггүй гэсэн. ...Надаас тэр эмэгтэй эмнэлэг дээр 25.000, 40.000, Нийгмийн даатгал дээр 40.000, ХААН банкин дээр 40.000, 20.000 төгрөг, нийтдээ 165.000 төгрөг авсан. ...надад учруулсан хохирол болох 165.000 төгрөгөө бэлнээр өгсөн. Иймээс одоо надад ямар нэгэн гомдол санал, нэхэмжлэх зүйл байхгүй” гэх мэдүүлэг /хх-ийн 18-21 дүгээр хуудас/,
• Шүүгдэгч Д.О-ийн мөрдөн шалгах ажиллагааны үед өгсөн: “...2019 оны 01 дүгээр сарын 29-ний өдөр байсан санагдаад байна. Капитал банкин дээр цалинтай ээжийн 50.000 төгрөгөө авах гэж яваад зүс таних эмэгтэй буюу О-тай таарсан. Ингээд банкнаас гараад Тэвхэн дотор уулзсан. Тухайн үед нэрийг нь мэддэггүй байсан. Би тэр эмэгтэйг “би таныг группт оруулж өгье” гэхэд “за тэгье” гэж зөвшөөрсөн. Би тухайн үед ямар ч мөнгө төгрөггүй болсон байсан болохоор маш их мөнгөний хэрэгтэй байсан. Ингээд тэр хүнээс худлаа хэлж мөнгийг нь авсан. Тухайн үед үнэнээ хэлье гэж бодож байсан боловч чадаагүй юм. Би тэр хүнийг дагуулж ХААН банк, Нийгмийн даатгал, Нэгдсэн эмнэлэг орсон. Би худлаа хэлээд дагуулж явсан юм. Надад энэ газруудаар ямар ч таньж мэдэх хүн байхгүй. Би энэ хүнийг итгүүлэх гэж ингэж явсан. Би тэр хүнээс нийт 165.000 төгрөг авснаа эргүүлээд бэлнээр нь төлж өгсөн” гэх мэдүүлэг /хх-ийн 33-37 дугаар хуудас/ болон шүүхийн хэлэлцүүлэгт “...Хийсэн хэрэгтээ гэмшиж байна. ...гэм буруугаа хүлээн зөвшөөрч байна” гэх мэдүүлэг болон бусад нотлох баримтуудаар нотлогдож байна.

Шүүгдэгчийн хувийн байдлыг тогтоосон дараах баримтуудыг шүүх шинжлэн судлав. Үүнд:

- Ш.М-н төрсний бүртгэлийн лавлагааны хуулбар /хх-ийн 40 дүгээр хуудас/,

- Б.Б-ийн төрсний гэрчилгээний хуулбар /хх-ийн 41 дүгээр хуудас/,

- Б.Б-н төрсний гэрчилгээний хуулбар /хх-ийн 42 дугаар хуудас/,

- Хөвсгөл аймгийн Мөрөн сумын 4 дүгээр багийн Засаг даргын тодорхойлолт /хх-ийн 43 дугаар хуудас/,

- Хөвсгөл аймгийн Хөдөлмөр, Халамжийн үйлчилгээний газрын албан бичиг /хх-ийн 44 дүгээр хуудас/,

- Д.О-ийн иргэний үнэмлэхний хуулбар /хх-ийн 46 дугаар хуудас/,

- Урьд нь ял шийтгүүлж байгаагүй болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 47 дугаар хуудас/ зэрэг баримт бичиг болно.

Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл байдлуудыг бүрэн гүйцэд тогтоосон гэж үзлээ.

 Мөрдөн шалгах ажиллагааны үед шүүгдэгчээс авсан гэрчийн мэдүүлгийг Эрүүгийн хэрэг хянан шийдвэрлэх тухай хуулийн 7.4 дүгээр зүйлийн 2 дахь хэсэгт заасан “яллагдагч өөрийн эсрэг мэдүүлэг өгөх, хэргийн байдлыг нотлох үүрэг хүлээхгүй” гэх үндэслэлээр шүүх үнэлээгүй болохыг дурдаж байна.

Гэмт хэрэг гарахад иргэдийн гэнэн итгэмтгий байдал, шүүгдэгчийн хууль зүйн болоод ёс суртахууны мэдлэг дутмаг байдал зэрэг нөхцөл байдал нөлөөлсөн байна.

Шүүгдэгч Д.О- нь дээрх гэмт хэргийг ганцаараа үйлдсэн болох нь камерийн бичлэг үзлэг хийсэн тэмдэглэл, хохирогчийн мэдүүлгээр нотлогдож байна.

Шүүгдэгч Д.О- нь шунахайн сэдэлтээр 2019 оны 01 дүгээр сарын 29-ний өдөр Хөвсгөл аймгийн Мөрөн сумын 8 дугаар багийн нутаг дэвсгэрт иргэн Б.О-ыг “халамжид оруулж өгнө” гэж хууран мэхлэх аргаар түүний 165.000 төгрөгийг нь авч, “Залилах” гэмт хэргийг үйлдсэн болох нь хохирогч Б.О-аас Хөвсгөл аймгийн Цагдаагийн газарт гаргасан гэмт хэргийн талаарх гомдол /хх-ийн 6 дугаар хуудас/, камерын бичлэгт үзлэг хийсэн тэмдэглэл /хх-ийн 11 дүгээр хуудас/, хохирогч Б.О-ы мөрдөн шалгах ажиллагааны үед өгсөн мэдүүлэг /хх-ийн 18-21 дүгээр хуудас/, шүүгдэгч Д.О-ийн мөрдөн шалгах ажиллагааны үед өгсөн мэдүүлэг /хх-ийн 33-37 дугаар хуудас/ болон шүүхийн хэлэлцүүлэгт өгсөн мэдүүлэг зэрэг шүүхийн шийдвэрийн үндэслэл болсон дээрх нотлох баримтуудаар тогтоогдож, шалтгаант холбоотой байна. 

Шүүгдэгч нь Монгол Улсын иргэний Үндсэн хууль, Эрүүгийн хуулиар хамгаалагдсан бусдын өмчлөл, эзэмшилд байгаа эд юмс, түүнийг хуулиар тогтоосон хэмжээ, хязгаарын дотор өөрийн үзэмжээр чөлөөтэй эзэмших, ашиглах, захиран зарцуулах эрхийг зөрчсөн хор уршигт зориуд хүргэж, өмчлөх эрхийн эсрэг гэмт хэргийг үйлдсэн нь дээрх гэмт хэргийг гэм буруугийн шууд санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Шүүгдэгч Д.О- нь шунахайн сэдэлтээр, бусдын эд хөрөнгийг буцааж өгөхгүй, хариу төлбөр огт хийхгүй байх санаа зорилгыг агуулж, бусдыг хуурч, ...эзэмшигч, өмчлөгчийн эд хөрөнгийг шилжүүлэн авч өөрийн өмчийн нэгэн адил захиран зарцуулах бодит боломж бүрдүүлсэн нь “Залилах” гэмт хэргийн шинжийг бүрэн хангаж байна.

Хэрэгт авагдсан баримтуудыг үндэслэн прокурорын үйлдсэн яллах дүгнэлт нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн гэрч, хохирогч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Иргэд өөрсдийн эд хөрөнгөндөө хайхрамжгүй хандах, бусдад хэт итгэх, шүүгдэгчийн амар хялбар аргаар мөнгөтэй болох санаа зорилго зэрэг нөхцөл байдал дээрх гэмт хэргийг үйлдэх шалтгаан нөхцөл болсон гэж үзэхээр байна. 

Шүүгдэгч Д.О-ийн үйлдсэн энэхүү гэмт хэргийн улмаас шууд учирсан үр дагавар нь бусдын өмчлөх эрхийн халдашгүй байдалд 165.000 төгрөгийн бодит хохирол учирсан гэж шүүх дүгнэлээ.

Шүүгдэгч Д.О- нь хохирогч Б.О-д 165.000 төгрөгийн хохирол учруулснаа нөхөн төлсөн нь хохирогчийн мэдүүлэг /хх-ийн 21 дүгээр хуудас/-аар тогтоогдож байх тул шүүгдэгчийг бусдад төлөх төлбөргүй гэж үзэв.

Хавтаст хэрэгт баримтжуулсан шүүгдэгчээс гаргуулах эрүүгийн хэрэг хянан шийдвэрлэх ажиллагааны зардалгүй байна.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Д.О-т эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгчийг анх удаа гэмт хэрэг үйлдсэн, шүүгдэгчийн хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан “Хуурч, эзэмшигч, өмчлөгчийн эд хөрөнгийг шилжүүлэн авсан..” үйлдэлд нь Эрүүгийн хуулийн тусгай ангийн 17.3 дугаар зүйлийн 1 дэх хэсэгт зааснаар эрүүгийн хариуцлага хүлээлгэх нь зүйтэй гэж үзлээ.

Шүүгдэгчийн хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, эрүүгийн хариуцлагыг хөнгөрүүлэх, хүндрүүлэх нөхцөл байдалгүй,  гэмт хэрэг үйлдсэнээ хүлээн зөвшөөрч, гэм буруугийн талаар маргахгүй байгаа байдал, түүний үйлдсэн гэмт хэрэг, нийгмийн аюулын хэр хэмжээ, шинж чанар, хохирол, хор уршигт хандаж буй хандлага, хохирол төлбөргүй байдал, шүүх хуралдаанд мэдүүлэг өгөхдөө гэмшиж байгаа зэргийг харгалзан үзсэн болно.

Шүүгдэгч Д.О- нь урьд нь гэмт хэрэг үйлдэж байгаагүй болох ял шийтгэлийн лавлагаагаар тогтоогдож байна.

Эрүүгийн хуулийн ерөнхий ангийн 7.1 дүгээр зүйлийн 1 дэх хэсэг “Хөнгөн гэмт хэрэг үйлдсэн хүн гэм буруугаа хүлээн зөвшөөрч гэмт хэргийн улмаас учруулсан хохирлоо нөхөн төлж хор уршгийг арилгасан, эсхүл гэмт хэргийн улмаас учруулсан хохирлоо нөхөн төлөхөө илэрхийлсэн бол гэмт хэрэг үйлдсэн нөхцөл байдал, гэмт хэрэг үйлдсэн хүний хувийн байдлыг харгалзан тухайн зүйл, хэсэг, заалтад заасан хорих ялыг оногдуулахгүйгээр таван жил хүртэл хугацаагаар тэнсэж болно” гэж заасныг баримтлан дээрх нөхцөл байдалд тус бүрд нь дүгнэлт хийж, шүүгдэгч Д.О-т Эрүүгийн хуулийн тусгай ангийн тухайн зүйл хэсэгт заасан хорих ялыг оногдуулахгүйгээр тэнсэж, 7.3 дугаар зүйлийн 1, 2 дахь хэсгийн 2.2-т зааснаар шүүгдэгч Д.О-т тэнссэн хугацаанд “зан үйлээ засах, хөдөлмөрлөх дадал олгох сургалтад хамрагдах” үүрэг хүлээлгэх албадлагын арга хэмжээ авахаар шийдвэрлэв.

Шүүх шүүгдэгч Д.О-т ял оногдуулахдаа шүүх хуралдаанд улсын яллагчаас шүүгдэгчид “6 сарын хугацаагаар хорих ял оногдуулж, хорих ялыг нээлттэй дэглэм бүхий хорих байгууллагад эдлүүлэх саналтай байна” гэснийг, мөн шүүгдэгчийн өмгөөлөгчөөс “...хохирогчид төлөх төлбөргүй, үйлдсэн гэмт хэрэгтээ гэмшиж байгаа зэргийг харгалзан хорих ял оногдуулахгүйгээр тэнсэж өгнө үү” гэснийг тус тус харгалзан үзлээ.

Шүүгдэгч Д.О-т урьд авсан хувийн баталгаа гаргах таслан сэргийлэх арга хэмжээг шийтгэх тогтоол хүчин төгөлдөр болтол хэвээр үргэлжлүүлэх нь зүйтэй байна.

Хэрэгт эд мөрийн баримтаар хураагдсан DVD-R гэсэн бичиглэл бүхий шар өнгийн 1 ширхэг CD-ийг хэргийг хадгалах хугацаа дуустал хэрэгт хавсаргаж, энэ хэрэгт битүүмжлэгдсэн эд хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, шүүгдэгчээс гаргуулах эрүүгийн хэрэг хянан шийдвэрлэх ажиллагааны зардалгүй болохыг тус тус дурдлаа.

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон 

ТОГТООХ нь:

1. Шүүгдэгч Д.О-ийг Эрүүгийн хуулийн тусгай ангийн 17.3 дугаар зүйлийн 1 дэх хэсэгт заасан “Хуурч эзэмшигч, өмчлөгчийн эд хөрөнгийг шилжүүлэн авч залилах” гэмт хэргийг үйлдсэн гэм буруутайд тооцсугай.

2. Эрүүгийн хуулийн ерөнхий ангийн 7.1 дүгээр зүйлийн 1 дэх хэсэгт заасныг журамлан Эрүүгийн хуулийн тусгай ангийн 17.3 дугаар зүйлийн 1 дэх хэсэгт заасан хорих ял оногдуулахгүйгээр шүүгдэгч Д.О-ийг 2 /хоёр/ жилийн хугацаагаар тэнссүгэй.

  3. Эрүүгийн хуулийн ерөнхий ангийн 7.3 дугаар зүйлийн 1 дэх хэсэг, мөн зүйлийн 2 дахь хэсгийн 2.2-т зааснаар шүүгдэгч Д.О-т тэнссэн 2 жилийн хугацаанд “зан үйлээ засах, хөдөлмөрлөх дадал олгох сургалтанд хамрагдах” үүрэг хүлээлгэх албадлагын арга хэмжээ авсугай.

4. Эрүүгийн хуулийн ерөнхий ангийн 7.1 дүгээр зүйлийн 4 дэх хэсэгт зааснаар шүүгдэгч Д.О- нь тэнссэн хугацаанд шүүхээс хүлээлгэсэн үүргийг биелүүлээгүй бол шүүх тэнссэн шийдвэрийг хүчингүй болгож ял оногдуулахыг анхааруулсугай.

5. Үүрэг хүлээлгэх албадлагын арга хэмжээ авагдсан, тэнссэн шүүгдэгч Д.О-т хяналт тавихыг Хөвсгөл аймаг дахь Шүүхийн шийдвэр гүйцэтгэх газарт даалгасугай.

6. Эд мөрийн баримтаар хураагдсан DVD-R гэсэн бичиглэл бүхий шар өнгийн 1 ширхэг CD-ийг хэргийг хадгалах хугацаа дуустал хэрэгт хавсаргаж, энэ хэрэгт битүүмжлэгдсэн эд хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, түүнээс гаргуулах эрүүгийн хэрэг хянан шийдвэрлэх ажиллагааны зардалгүй болохыг тус тус дурдсугай.

7. Шийтгэх тогтоол хүчин төгөлдөр болтол шүүгдэгч Д.О-т урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч, түүний өмгөөлөгч нар эс зөвшөөрвөл шийтгэх тогтоолыг гардан авсан өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

 

                 ДАРГАЛАГЧ, ШҮҮГЧ                                  Д.АЗЖАРГАЛ