2016 оны 09 сарын 23 өдөр                         Дугаар 142/ШШ2016/01162                                   Орхон аймаг

МОНГОЛ УЛСЫН НЭРИЙН ӨМНӨӨС

Орхон аймаг дахь Сум дундын иргэний хэргийн анхан шатны шүүхийн шүүх хуралдааныг шүүгч Р.Үүрийнтуяа даргалж тус шүүхийн хуралдааны танхимд нээлттэй хийсэн хуралдаанаар

Нэхэмжлэгч: “Хөх тэнгэрийн заяа” ХХК-ийн нэхэмжлэлтэй Б.Өлзийтогтохыг эрэн сурвалжлуулахыг хүссэн хэргийг хянан хэлэлцэв.

Шүүх хуралдаанд нэхэмжлэгчийн итгэмжлэгдсэн төлөөлөгч Г.Эрдэнэзул, шүүх хуралдааны нарийн бичгийн дарга Э.Булгантамир нар оролцов.

ТОДОРХОЙЛОХ нь:

Нэхэмжлэгчийн итгэмжлэгдсэн төлөөлөгч шүүхэд гаргасан нэхэмжлэлдээ: “Нэхэмжлэгч Хөх тэнгэрийн заяа ХХК-ны нэхэмжлэлтэй, хариуцагч Орхон аймаг, Баян-Өндөр сум, Рашаант баг, Уртын голын 7-50 тоотод оршин суух Б.Өлзийтогтоход холбогдох 3 108 000 төгрөг гаргуулахийг хүссэн нэхэмжлэлийг шүүх 2016-6-20 ны өдөр хүлээн авч 2016-6-27-ны өдөр иргэний хэрэг үүсгэн хянаад хариуцагч Б.Өлзийтогтох нь дээрх хаягт бүртгэлтэй боловч оршин суудаггүй болох нь тус багийн Засаг даргын тодорхойлолтоор тогтоогдож байна гэсэн үндэслэлээр ИХШХШТХ-н 65.1.9 болон 117.1-д заасныг баримтлан хэргийг хэрэгсэхгүй болгосон. Иймд ИХШХШТХ-н 14.4-р зүйл болон 155-р зүйлд заасны дагуу Б.Өлзийтогтохыг эрэн сурвалжилж, оршин суугаа газрыг тогтоож өгнө үү” гэжээ.

Шүүх хуралдаанаар хэрэгт авагдсан баримтуудыг шинжлэн судлав.

ҮНДЭСЛЭХ нь:

Нэхэмжлэгч “Хөх тэнгэрийн заяа” ХХК нь Б.Өлзийтогтохыг эрэн сурвалжлуулахыг хүссэн хүсэлтийг шүүхэд гаргасан.

Б.Өлзийтогтох нь нэхэмжлэгч “Хөх тэнгэрийн заяа” ХХК-иас  барьцаат зээлийн гэрээ байгуулан 3 000 000 төгрөгийг 60 хоногийн хугацаатай, 10 хувийн хүүтэй зээлж авсан болох нь 2016 оны 01 дүгээр сарын 12-ны өдрийн 1602 тоот зээлийн гэрээгээр тогтоогдож байна.

Гэтэл хариуцагчаар оролцвол зохих этгээдийн оршин суугаа хаяг нь тодорхойгүйгээс хүсэлт гаргагч түүнд холбогдуулж шүүхэд нэхэмжлэл гаргах боломжгүй болсон нь нэхэмжлэгчийн шүүхэд гаргасан нэхэмжлэл, Уртын гол багийн Засаг даргын тодорхойлолт, хэргийг хэрэгсэхгүй болгосон тухай шүүгчийн захирамж зэрэг баримтаар нотлогдож байх тул “Хөх тэнгэрийн заяа” ХХК-ийн нэхэмжлэл гаргах эрхийг хангах үүднээс Б.Өлзийтогтохыг эрэн сурвалжлахаар шийдвэрлэх нь үндэслэлтэй байна.

Б.Өлзийтогтохыг эрэн сурвалжлах, түүний оршин суугаа газрыг тогтоох ажиллагааг хийж гүйцэтгэхийг Орхон аймгийн Цагдаагийн газрын Нийтийн хэв журмыг хамгаалах тасагт даалгаж шийдвэрлэх үндэстэй гэж үзлээ.

Нэхэмжлэлийг хангаж шийдвэрлэсэн тул нэхэмжлэгч “Хөх тэнгэрийн заяа” ХХК-иас улсын тэмдэгтийн хураамжид урьдчилан төлсөн 70 200 төгрөгийг төрийн санд хэвээр үлдээж шийдвэрлэв.

Монгол улсын Иргэний Хэрэг Шүүхэд Хянан Шийдвэрлэх Тухай Хуулийн 115 дугаар зүйлийн 115.2.1, 116, 118 дугаар зүйлүүдийг удирдлага болгон

ТОГТООХ нь:

1.Иргэний Хэрэг Шүүхэд Хянан Шийдвэрлэх Тухай Хуулийн 155 дугаар зүйлийн 155.3-д зааснаар Б.Өлзийтогтохыг /регистрийн дугаар НТ 72011509 / эрэн сурвалжилсугай.

2.Шүүхийн шийдвэрийн дагуу иргэн Б.Өлзийтогтохыг эрэн сурвалжлах, тэдний оршин суугаа газрыг тогтоох ажиллагааг хийж гүйцэтгэхийг Орхон аймгийн Цагдаагийн газрын Нийтийн хэв журмыг хамгаалах тасагт даалгасугай.

3.Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1 дэх хэсэг, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсгүүдэд зааснаар нэхэмжлэгч “Хөх тэнгэрийн заяа” ХХК-иас тэмдэгтийн хураамжид төлсөн 70 200 /далан мянга хоёр зуун/ төгрөгийг төрийн санд хэвээр үлдээсүгэй.

4.Шийдвэр танилцуулан сонсгосноор хүчинтэй болох бөгөөд нэхэмжлэгч шийдвэрийг эс зөвшөөрвөл гардан авснаас хойш 14 хоногийн дотор Орхон аймгийн Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурьдсугай.

 

 

 

 

ДАРГАЛАГЧ ШҮҮГЧ                                   Р.ҮҮРИЙНТУЯА