2016 оны 06 сарын 20 өдөр

Дугаар 182/ШШ2016/00095

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

Чингэлтэй дүүргийн иргэний хэргийн анхан шатны шүүхийн шүүгч С.Буд даргалж хийсэн шүүх хуралдаанаар

 

Нэхэмжлэгч: Э.Н

 Хариуцагч: А.А

 эцэг тогтоож, хүүхдийн тэтгэлэг гаргуулахыг хүссэн иргэний хэргийг хянан хэлэлцэв.

 

Шүүх хуралдаанд нэхэмжлэгч Э.Н , хариуцагч А , шүүх хуралдааны нарийн бичгийн дарга Б.Даваахишигмаа нар оролцов.

 

                                                                                                                    ТОДОРХОЙЛОХ нь:

 

Нэхэмжлэгч нэхэмжлэл болон шүүх хуралдаан дээр гаргасан тайлбартаа: Э.Н миний бие 2012 онд А.А тай танилцаж, 2014 оноос хамтран амьдарсан. 2015 оны 07 сарын 03-нд бидний дундаас хүү Н.О төрсөн. Хүүг төрөхөөс өмнө буюу 2015 оны 02 сараас бид салж, тусдаа амьдрах болсон. Хүү О нь одоо эх Э.Н миний асрамжид байна. Цаашид хамтран амьдрах боломжгүй болсон тул хүү Н.Оын эцэг А.А мөн болохыг тогтоож, хүүхдийн тэтгэлэг гаргуулж өгнө үү гэв.

 

Хариуцагч шүүхэд болон шүүх хуралдаанд гаргасан тайлбартаа: А.А миний бие Э.Н той 2012 онд танилцаж, 2014 оноос хамт амьдарч байгаад зан харилцааны таарамжгүй байдлын улмаас хүү төрөхөөс өмнө салж тусдаа амьдарсан. Хүү Н.О нь миний хүүхэд мөн бөгөөд Э.Н гийн гаргасан нэхэмжлэлийг хүлээн зөвшөөрч өөрийн хүү Н.Оыг эхийнх нь асрамжид үлдээж, хүүхдийн тэтгэлэг өгөхийг хүлээн зөвшөөрч байна гэв.

 

Шүүх нэхэмжлэл болон хүүхдийн төрсний гэрчилгээний хуулбар, хорооны засаг дарга, эмнэлгийн тодорхойлолт, иргэний үнэмлэхний хуулбар зэрэг нотлох баримтуудыг  шинжлэн судлаад              

                                                                                                              

    ҮНДЭСЛЭХ нь:

 

Э.Н , А.А нар 2014 оноос 2015 оны 02 сар хүртэл хамтран амьдарч, 2015 оны 07 сарын 03-ны өдөр хүү Н.Оыг төрүүлсэн. Тэд хоорондын таарамжгүй харьцааны улмаас салж тусдаа амьдарсан байна. Тэд гэрлэлтээ бүртгүүлээгүй ба А.А нь Н.Оын эцэг мөн болох нь өөрийнх нь тайлбар, зөвшөөрлөөр тогтоогдож байна.

Хүү Н.О нь эх Э.Н гийн хамт амьдарч байна.

Хариуцагч нь хүү Н.Оыг эхийн асрамжид байлгахад татгалзахгүй байгаа ба охин Н.Од хүүхдийн тэтгэлэг төлөхийг зөвшөөрч байх тул эцгээс нь тэтгэлэг гаргуулахаар тогтов. 

Хариуцагч А.А ас улсын тэмдэгтийн хураамжид 70.200 төгрөгийг гаргуулж нэхэмжлэгч Э.Н д олгохоор шийдвэрлэв.

 

Монгол Улсын Иргэний Хэрэг Шүүхэд Хянан Шийдвэрлэх тухай хуулийн 115-р зүйлийн 115.2.1, 118-р зүйлийг удирдлага болгон

 

ТОГТООХ НЬ:

 

1. Монгол улсын Гэр бүлийн тухай хуулийн 23 дугаар зүлийн 23.1-ийг баримтлан А.А нь Н.Оын эцэг мөн болохыг тогтоож, мөн хуулийн 14-р зүйлийн 14.5-ыг баримтлан 2015 оны 07 сарын 03-ны өдөр төрсөн хүү Н.Оыг эх Э.Н гийн асрамжинд үлдээсүгэй.

 

1. Монгол улсын Гэр бүлийн тухай хуулийн 40 дүгээр зүйлийн 40.1.1, 40.1.2-т зааснаар 2015 оны 07 сарын 03-ны өдөр төрсөн хүү Н.Оыг 11 нас хүртэл тухайн бүс нутагт тогтоогдсон амьжиргааны доод түвшингийн 50 хувиар, 11-16 нас /суралцаж байгаа бол 18 нас/ хүртэл уг түвшингийн хэмжээгээр сар бүр эцэг А.А ас тэтгэлэг гаргуулж, тэжээн тэтгүүлсүгэй.

 

1. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлд зааснаар хариуцагч  А.А ас тэмдэгтийн хураамжид 70.200 төгрөгийг гаргуулж, нэхэмжлэгч Э.Н д олгож, нэхэмжлэгчээс тэмдэгтийн хураамжид төлсөн 70.200 төгрөгийг улсын орлогод хэвээр үлдээсүгэй. 

 

1. Шийдвэр танилцуулан сонсгомогц хүчинтэй болох бөгөөд зохигч, тэдгээрийн төлөөлөгч 7 хоногт бэлэн болох шийдвэрийг 14 хоногт гардан авах үүрэгтэй, шийдвэрийг эс зөвшөөрвөл гардан авснаас хойш 14 хоногийн дотор Нийслэлийн иргэний хэргийн давж заалдах шатны шүүхэд давж заалдах гомдол гаргах эрхтэй.

 

 

 

 

                                       

                                 ДАРГАЛАГЧ                                          С. БУД