Хялбаршуулсан журмаар хэрэг хянан шийдвэрлэх тухай

 

Багахангай, Налайх дүүргийн Иргэний хэргийн анхан шатны шүүхийн шүүгч Н.Баярсүрэн  би

Нэхэмжлэгч: Чингэлтэй дүүрэг, 1 дүгээр хороо, Бага тойруу 3/9 тоот “Жи мобайл” ХХК /РД:5055873/-ийн

Хариуцагч: Налайх дүүрэг 7 дугаар хороо, Өвөршандын 9 дүгээр гудамж 10 тоотод оршин суух Боржигон овгийн Сүхбаатарын Ариунтуяа /РД:УЕ72032706/-д холбогдох Зээлээр худалдах, худалдан авах гэрээний үүргийн биелэлт 90.000 төгрөг гаргуулахыг шаардсан  нэхэмжлэлийг 2016 оны 8 дугаар сарын 24-ний өдөр хүлээн авч, 2016 оны 8 дугаар сарын 31-ний өдөр иргэний хэрэг үүсгээд ТОДОРХОЙЛОХ нь:

Нэхэмжлэгч “Жи мобайл” ХХК шүүхэд гаргасан нэхэмжлэлдээ: С.Ариунтуяа нь манай байгууллагатай 2015 оны 1 дүгээр сарын 15-ны өдөр 1188227 тоот төхөөрөмж зээлээр худалдах, худалдан авах гэрээ байгуулж, 240.000 төгрөгийн үнэ бүхий NP-10 төхөөрөмжийг урьдчилгаа 20.000 төгрөг төлж, үлдэгдэл 220.000 төгрөгийг 12 сарын хугацаанд сар бүр 20.000 төгрөг төлөх нөхцөлтэйгээр  авсан. Гэвч С.Ариунтуяа нь 2015 оны 10,11,12 дугаар саруудад төлөх 60.000 төгрөгийг төлөөгүй, гэрээний үүргээ биелүүлэхээс зайлсхийж байна. Иймд С.Ариунтуяагаас төхөөрөмжийн үлдэгдэл төлбөр 60.000 төгрөг, алданги 30.000 төгрөг, нийт 90.000 төгрөгийг гаргуулж өгнө үү гэжээ.

Хэрэг хянан шийдвэрлэх ажиллагааны явцад нэхэмжлэгчийн итгэмжлэгдсэн төлөөлөгч С.Амаржаргал шүүхэд гаргасан тайлбартаа: С.Ариунтуяагаас 90.000 төгрөг нэхэмжилсэн. Гэвч С.Ариунтуяа нь үндсэн төлбөр 60.000 төгрөгийг төлсөн учраас алданги 30.000 төгрөгөөс татгалзаж байгаа тул хэргийг хялбаршуулсан журмаар шийдвэрлэж өгнө үү гэжээ. 

Хариуцагч С.Ариунтуяа шүүхэд гаргасан хариу тайлбартаа: Би төхөөрөмж зээлээр худалдан авсан нь үнэн. 2015 оны 10,11,12 саруудад төлөх 60.000 төгрөгийг 2016 оны 8 дугаар сарын 15-нд төлсөн тул алданги 30.000 төгрөгөөс чөлөөлж өгнө үү гэжээ.

Шүүх энэ хэрэгт  иргэний хэрэг шүүхэд хянан шийдвэрлэх тухай хуульд заасан журмын дагуу цугларсан бичмэл нотлох баримтууд болон зохигчдын тайлбар зэргийг шинжлэн судлаад ҮНДЭСЛЭХ нь:

“Жи мобайл” ХХК нь хариуцагч С.Ариунтуяагаас зээлээр худалдах, худалдан авах гэрээний үүргийн биелэлт 60.000 төгрөг, алданги 30.000 төгрөг нийт 90.000 төгрөг гаргуулахыг шаардсан боловч хэрэг хянан шийдвэрлэх ажиллагааны явцад хариуцагч С.Ариунтуяа үндсэн төлбөр 60.000 төгрөгийг төлсөн үндэслэлээр нэхэмжлэгчийн итгэмжлэгдсэн төлөөлөгч С.Амаржаргал алданги 30.000 төгрөгөөс татгалзжээ.

Хариуцагч С.Ариунтуяа NP10 төхөөрөмжийн үлдэгдэл төлбөр 60.000 төгрөгийг 2016 оны 8 дугаар сарын 15-ны өдөр  төлсөн нь зохигчдын тайлбар, мөнгө төлсөн баримт /хх- 19/-аар тогтоогдсон тул хэрэг хянан шийдвэрлэх ажиллагааг дуусгавар болгож хариуцагч нэхэмжлэлийн шаардлагыг биелүүлснийг баталж хэргийг хэрэгсэхгүй болгох үндэслэлтэй гэж үзлээ.

Хялбаршуулсан журмаар хэргийг шийдвэрлэж байгаатай холбогдуулан улсын тэмдэгтийн хураамжийн хэмжээг тал хувиар бууруулж тогтоон нэхэмжлэгчийн улсын тэмдэгтийн хураамжид төлсөн 4.550 төгрөгийг улсын төсвийн орлогод хэвээр үлдээж,  2.275 төгрөгийг улсын төсвийн орлогоос, үлдэх 2.275 төгрөгийг хариуцагч С.Ариунтуяагаас  тус тус гаргуулж нэхэмжлэгчид олгож шийдвэрлэв. 

Монгол Улсын Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2, 75,123 дугаар зүйлийн 123.1-д заасныг удирдлага болгон ЗАХИРАМЖЛАХ нь:

1. “Жи мобайл” ХХК-ийн нэхэмжлэлтэй Боржигон овгийн Сүхбаатарын Ариунтуяад холбогдох зээлээр худалдах, худалдан авах гэрээний үүргийн биелэлт 60.000 /жаран мянга/ төгрөг гаргуулах нэхэмжлэлийн шаардлагыг хариуцагч С.Ариунтуяа  биелүүлснийг баталж хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн  74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчээс улсын тэмдэгтийн хураамжид төлсөн 4.550 /дөрвөн мянга таван зуун тавь/ төгрөгийг улсын төсвийн орлогод хэвээр үлдээж, 2.275 /хоёр мянга хоёр зуун далан тав/ төгрөгийг улсын төсвийн орлогоос, үлдэх 2.275 /хоёр мянга хоёр зуун далан тав/ төгрөгийг  хариуцагч С.Ариунтуяагаас  гаргуулж нэхэмжлэгч “Жи мобайл” ХХК-нд олгосугай.

3. Иргэний  хэрэг  шүүхэд хянан шийдвэрлэх тухай хуулийн 74  дүгээр зүйлийн 74.4-д зааснаар энэхүү шүүгчийн захирамжид зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг заасугай.

4. Иргэний хэрэг шүүхэд хянан шийдвэрлэх тухай  хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.      

 

                                                ШҮҮГЧ                                         Н.БАЯРСҮРЭН