Зохигчийн эвлэрлийг баталж,

хэргийг хэрэгсэхгүй болгох тухай

 

 

Сүхбаатар дүүргийн Иргэний хэргийн анхан шатны шүүхийн шүүгч Б.Ууганбаяр даргалж, тус шүүхийн танхимд хийсэн шүүх хуралдаанаар

Нэхэмжлэгч: Улаанбаатар хот, Баянзүрх дүүрэг, 8 дугаар хороо, Улаанхуаран /13302/ 30/4 тоот хаягт байрлах Тэнгэр тауэр ХХК /РД:5556686/-ийн нэхэмжлэлтэй

Хариуцагч: Улаанбаатар хот, Сүхбаатар дүүрэг, 1 дүгээр хороо, Энхтайваны өргөн чөлөө-56 Тижи төвийн 304 тоот хаягт байрлах Их модун ХХК /РД:5310601/-д холбогдох

3 337 110 төгрөг гаргуулах тухай нэхэмжлэлийн шаардлагатай иргэний хэргийг хянан хэлэлцэв.

Шүүх хуралдаанд: Нэхэмжлэгчийн төлөөлөгч Б.Ганцэцэг, хариуцагчийн төлөөлөгч Ц.Нямдорж, шүүх хуралдааны нарийн бичгийн дарга Б.Тамир оролцов.

 

ТОДОРХОЙЛОХ НЬ:

 

            Нэхэмжлэгч шүүхэд гаргасан нэхэмжлэлдээ: “Их модун ХХК нь манай компанитай 2015 оны 5 сарын 6-ны өдөр 2015/13 тоот түрээсийн гэрээ байгуулан тоног төхөөрөмж түрээсэлсэн. Их модун ХХК нь түрээсийн гэрээний үлдэгдэл төлбөр 4 837 110 төгрөг төлөх үүргээ биелүүлэхгүй байх тул анх гэрээ байгуулахад манай компанийн дансанд байршуулсан тоног төхөөрөмж түрээслэгчийн барьцаа болох 2 520 000 төгрөгийг хассан. Үлдэгдэл 2 317 110 төгрөгийг одоог хүртэл төлөөгүй байна. Иймд 2 317 110 төгрөгийг 88 хоногийн алданги 1 020 000 төгрөгийн хамт нийт 3 337 110 төгрөгийг хариуцагчаас гаргуулж өгнө үү” гэжээ.

Нэхэмжлэгчийн нэхэмжлэл, хариуцагчийн тайлбар, хэрэгт авагдсан бичмэл нотлох баримт зэргийг шинжлэн судлаад

                                                                                                                    ҮНДЭСЛЭХ НЬ:

 

Нэхэмжлэгч Тэнгэр тауэр ХХК нь хариуцагч Их модун ХХК-д холбогдуулан түрээсийн гэрээний үүргийн гүйцэтгэлд 3 337 110 төгрөг гаргуулах тухай нэхэмжлэлийг шүүхэд гаргасан байна.

Зохигчид шүүх хуралдаан дээр эвлэрч нэхэмжлэгч Тэнгэр тауэр ХХК нь нэхэмжлэлийн шаардлагаа 2 317 110 төгрөг болгон багасгаж, хариуцагч Их модун ХХК нь 2 317 110 төгрөгийг 2016 оны 11 дүгээр сарын 1-ний өдөр 1 158 555 төгрөг, 2016 оны 12 дугаар сарын 1-ний өдөр 1 158 555 төгрөг төлөх байдлаар нэхэмжлэгч  Тэнгэр тауэр ХХК-д бүрэн төлж барагдуулахаар харилцан тохиролцож байна.

Зохигчийн эвлэрэл нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул зохигч эвлэрснийг баталж, хэргийг хэрэгсэхгүй болгон шийдвэрлэх нь зүйтэй байна.

Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5 дахь заалтыг удирдлага болгон                                               

                                                                                                              ЗАХИРАМЖЛАХ НЬ:

 

1. Нэхэмжлэгч Тэнгэр тауэр ХХК нь нэхэмжлэлийн шаардлагаа 2 317 110 төгрөг болгон багасгаж, хариуцагч Их модун ХХК нь 2 317 110 төгрөгийг 2016 оны 11 дүгээр сарын 1-ний өдөр 1 158 555 төгрөг, 2016 оны 12 дугаар сарын 1-ний өдөр 1 158 555 төгрөг төлөх байдлаар нэхэмжлэгч  Тэнгэр тауэр ХХК-д бүрэн төлж барагдуулахаар харилцан тохиролцож эвлэрсэн зохигчийн эвлэрлийг баталж, хэргийг хэрэгсэхгүй болгосугай.
2. Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6 дахь заалтад зааснаар нэхэмжлэгчээс улсын тэмдэгтийн хураамжид урьдчилан төлсөн 68 350 төгрөгийг улсын төсвийн орлогод хэвээр үлдээж, хариуцагч  Их модун ХХК-аас 52 023 төгрөгийг гаргуулан нэхэмжлэгч Тэнгэр тауэр ХХК-д олгосугай.
3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь заалтад зааснаар энэхүү захирамжийг хариуцагч сайн дураар эс биелүүлбэл шүүхийн шийдвэрийн нэгэн адил албадан гүйцэтгэхийг тайлбарласугай.
4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дахь заалтад зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

                

 

 

 

                        ДАРГАЛАГЧ ШҮҮГЧ                                              Б.УУГАНБАЯР