2016 оны 07 сарын 01 өдөр

Дугаар 102/ШШ2016/04543

Улаанбаатар хот

 

Хариуцагч нэхэмжлэлийн шаардлагыг биелүүлснийг баталж,

хэргийг хэрэгсэхгүй болгох тухай

 

         Баянгол дүүргийн Иргэний хэргийн анхан шатны шүүхийн шүүгч Р.Алтантуяа би,

 

         Нэхэмжлэгч: Сүхбаатар, 1-р хороо, Чингисийн өргөн чөлөөнд байрлах, “Скайтел” ХХК-ийн нэхэмжлэлтэй,

 

         Хариуцагч: Баянгол дүүргийн 4-р хороо, ЭТӨЧ го-парк, 106-р байр, 46 тоотод оршин суух, Ганболдын Энхцэцэгт холбогдох 689 862 төгрөг гаргуулахыг хүссэн иргэний хэргийг хянаад

                                                                                                                ТОДОРХОЙЛОХ нь:

 

          Нэхэмжлэгчийн итгэмжлэгдсэн төлөөлөгч Г.Номин-Эрдэнээс шүүхэд гаргасан хүсэлтдээ: “Скайтел” ХХК нь Г.Энхцэцэгт холбогдуулан 689 862 төгрөгийг нэхэмжилсэн. Г.Энхцэцэг нь нэхэмжлэлийн шаардлагыг хүлээн зөвшөөрч, төлж барагдуулсан байх тул хэргийг хялбаршуулсан журмаар шийдвэрлэж өгнө үү гэжээ.

 

                                                                                                                       ҮНДЭСЛЭХ нь:

 

         Нэхэмжлэгч “Скайтел” ХХК нь хариуцагч Г.Энхцэцэгт холбогдох 689 862 төгрөг гаргуулахыг хүссэн нэхэмжлэлийг шүүхэд гаргажээ.

 

            Хэрэг хянан шийдвэрлэх ажиллагааны шатанд хариуцагч Г.Энхцэцэг нь нэхэмжлэлийн шаардлагыг биелүүлсэн үндэслэлээр нэхэмжлэгч шүүхэд гаргасан нэхэмжлэлээсээ татгалзсан байна. Иймд хариуцагч нэхэмжлэлийн шаардлагыг биелүүлснийг баталж, хэргийг хэрэгсэхгүй болгох нь зүйтэй гэж үзлээ.

 

  Иргэний хэрэг шүүхэд хянан шийдвэрлэх тухай хуулийн 74-р зүйлийн 74.2 дахь хэсэгт заасныг удирдлага болгон

                                                                                                              ЗАХИРАМЖЛАХ нь:

 

1. Г.Энхцэцэгт холбогдох 689 862 төгрөг гаргуулахыг хүссэн “Скайтел” ХХК-ийн нэхэмжлэлийн шаардлагыг хариуцагч Т.Энхцэцэг биелүүлснийг баталж, хэргийг  хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 74-р зүйлийн 74.5 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 21 107 төгрөгийн 10 553,5 төгрөгийг улсын төсвөөс, 10 553,5 төгрөгийг хариуцагч Г.Энхцэцэгээс тус тус гаргуулж  нэхэмжлэгчид олгосугай.

 

3.Хэргийг хялбаршуулсан журмаар хянан шийдвэрлэсэн тохиолдолд зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин шийдвэрлүүлэхээр нэхэмжлэл гаргах эрхгүйг дурьдсугай.

 

 

 

ШҮҮГЧ                                    Р.АЛТАНТУЯА