Хялбаршуулсан журмаар хэрэг хянан шийдвэрлэх тухай

 

Багахангай, Налайх дүүргийн Иргэний хэргийн анхан шатны шүүхийн шүүгч Л.Энхбилэг би

Нэхэмжлэгч: Чингэлтэй дүүргийн, 1 дүгээр хороо, Багатойруу-3/9 тоот хаягт байрлах “Жи мобайл” ХХК /РД:15160/-ийн нэхэмжлэлтэй,

Хариуцагч: Налайх дүүргийн 4 дүгээр хороо, Нисэх 5 дугаар байр 18 тоотод оршин суух, Боржигон овгийн Цэрэндэндэвийн Нина /РД:УД46102004/-д холбогдох

Төхөөрөмж зээлээр худалдах худалдан авах гэрээний үүргийн биелэлт 120.000  төгрөг гаргуулахыг хүссэн нэхэмжлэлийг 2016 оны 8 дугаар сарын 24-ний өдөр хүлээн авч, 2016 оны 8 дугаар сарын 31-ний өдөр иргэний хэрэг үүсгээд ТОДОРХОЙЛОХ нь:

Нэхэмжлэгч “Жи мобайл” ХХК шүүхэд гаргасан нэхэмжлэлдээ: Хэрэглэгч Ц.Нина  нь 2015 оны 01 дүгээр сарын 19-ний өдөр манай компанитай “Төхөөрөмж зээлээр худалдах худалдан авах гэрээ” байгуулан 240.000 төгрөгийн үнэтэй NP10 төхөөрөмжийг 12 сарын хугацаатай, урьдчилгаа 20.000 төгрөгийг төлж, үлдэгдэл мөнгийг сар бүр хуваарийн дагуу 20.000 төгрөгөөр төлж дуусгах нөхцөлтэйгээр худалдан авсан. Ц.Нина 2015 оны 9-12 дугаар сарын төлбөр нийт 80.000 төгрөгийг төлөөгүй. Гэрээний 5 дугаар зүйлийн 5.3.-т заасны дагуу 327 хоногийн алданги  40.000 төгрөг нийт 120.000 төгрөгийг  гаргуулж өгнө үү  гэжээ.

Хэрэг хянан шийдвэрлэх ажиллагааны явцад нэхэмжлэгчийн төлөөлөгч С.Амаржаргалаас: Ц.Нина үндсэн төлбөрийн үлдэгдэл 80.000 төгрөгийг төлсөн тул алданги 40.000 төгрөг гаргуулахаас татгалзаж байна гэжээ. /хх-18/

Хариуцагч Ц.Нина шүүхэд гаргасан хариу тайлбартаа: Төхөөрөмж худалдан авсаны үлдэгдэл төлбөр 80.000 төгрөгийг 2016 оны 09 дүгээр сарын 01-ний өдөр “Жи-Мобайл” ХХК-ийн кассанд тушаасан тул алданги 40.000 төгрөгөөс чөлөөлж өгнө үү гэжээ. /хх-17/        

Шүүх энэ хэрэгт Иргэний хэрэг шүүхэд хянан шийдвэрлэх тухай хуульд заасан журмын дагуу цугларсан бичмэл нотлох баримт, зохигчдын тайлбар зэргийг шинжлэн судлаад ҮНДЭСЛЭХ нь:

Нэхэмжлэгч “Жи мобайл” ХХК нь хариуцагч Ц.Нинагаас төхөөрөмж зээлээр худалдах худалдан авах гэрээний үүргийн биелэлт 80.000 төгрөг, алданги 40.000 төгрөг нийт 120.000 төгрөг гаргуулахыг шаардсан.

Хэрэг хянан шийдвэрлэх ажиллагааны явцад “үндсэн төлбөр төлсөн” үндэслэлээр алданги 40.000 төгрөг гаргуулахаас татгалзаж, үндсэн төлбөр 80.000 төгрөгийн шаардлагаа дэмжсэн. /хх-20/      

Хариуцагч Ц.Нина нэхэмжлэлийн шаардлагыг бүхэлд нь хүлээн зөвшөөрч 80.000 төгрөгийг төлж биелүүлсэн болох нь  нэхэмжлэгчийн тайлбар, мөнгө төлсөн баримтаар  тогтоогдсон.        

ИХШХШТ хуулийн 74 дүгээр зүйлийн 74.1.-д “Хэрэг үүсгэснээс хойш шүүх хуралдаан хүртэлх хугацаанд ... нэхэмжлэлийн шаардлагыг хариуцагч бүрэн биелүүлсэн бол хэргийг хялбаршуулсан журмаар хянан шийдвэрлэнэ.”  мөн хуулийн 74 дүгээр зүйлийн 74.2.-т “Хэргийг хялбаршуулсан журмаар хянан шийдвэрлэх боломжтой гэж үзвэл шүүгч ...хариуцагч нэхэмжлэлийн шаардлагыг бүрэн биелүүлснийг баталж хэргийг хэрэгсэхгүй болгосон тухай захирамж гаргана.” гэж заасны дагуу энэ хэргийн хянан шийдвэрлэх ажиллагааг дуусгавар болгож, хариуцагч Ц.Нина нэхэмжлэлийн шаардлагыг бүрэн биелүүлснийг баталж хэргийг хэрэгсэхгүй болгох хууль зүйн үндэслэл тогтоогдсон гэж үзэв.

Хэргийг хялбаршуулсан журмаар хянан шийдвэрлэж байгаатай холбогдуулан Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5.-д зааснаар нэхэмжлэгчийн улсын тэмдэгтийн хураамжид төлсөн 4.550 төгрөгийг улсын орлогод оруулж, нэхэмжлэгчийн улсын тэмдэгтийн хураамжид урьдчилан төлсөн 4.550 төгрөгний тал хувь буюу 2.275 төгрөгийг хариуцагч Ц.Нинагаас, үлдэх 2.275 төгрөгийг улсын төсвийн данснаас буцааж нэхэмжлэгчид тус тус олгож шийдвэрлэлээ.       

Монгол Улсын Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1., 74.2., 75., 123 дугаар зүйлийн 123.1.-д заасныг удирдлага болгон ЗАХИРАМЖЛАХ нь:

1. Нэхэмжлэгч “Жи Мобайл” ХХК-ийн нэхэмжлэлтэй Боржигон овгийн Цэрэндэндэвийн Нинад холбогдох NP10 төхөөрөмжийг зээлээр худалдах, худалдан авах гэрээний үүргийн биелэлт 80.000 /наян мянга/ төгрөг гаргуулах шаардлагыг хариуцагч Ц.Нина  биелүүлснийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5., Улсын тэмдэгтийн хураамжийн тухай хуулийн 7 дугаар зүйлийн 7.1.1.-д зааснаар нэхэмжлэгч “Жи Мобайл” ХХК-ийн улсын тэмдэгтийн хураамжид төлсөн 4.550 /дөрвөн мянга таван зуун тавь/ төгрөгийг улсын орлогод оруулж, хариуцагч Ц.Нинагаас 2.275 /хоёр мянга хоёр зуун далан тав/ төгрөгийг, ХААН банкны 5749909359 тоот улсын төсвийн данснаас 2.275 /хоёр мянга хоёр зуун далан тав/ төгрөгийг тус тус гаргуулж нэхэмжлэгч “Жи Мобайл” ХХК-д олгосугай.

3. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4.-д зааснаар шүүгчийн захирамжид зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг заасугай.

4. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6.-д зааснаар энэхүү захирамжийн 2 дахь заалтыг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

 

ШҮҮГЧ                                    Л.ЭНХБИЛЭГ