2019           06             04                                           2019/ШЦТ/168

 

                              МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж

Шүүх хуралдааны нарийн бичгийн дарга Б.Буянхишиг

Улсын яллагчаар Х.Оюунцэцэг

Шүүгдэгчийн өмгөөлөгч Ц.Хүрэлбаатар

Шүүгдэгч П.Б нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Н овогт П.Б-т холбогдох эрүүгийн 1834009060424 дугаартай эрүүгийн хэргийг 2019 оны 05 дугаар сарын 21-ний өдөр хүлээн авч хянан хэлэлцэв.

Шүүгдэгчийн биеийн байцаалт:

Монгол улсын иргэн, 1998 оны 04 дүгээр сарын 02-ны өдөр, Өвөрхангай аймгийн Баян-Өндөр суманд төрсөн, бүрэн бус дунд боловсролтой, мэргэжилгүй, Төв аймгийн Эрдэнэсант суманд малчин, ам бүл 7, аав, ээж, эгч, ах 2 дүү нарын хамтаар Өвөрхангай аймгийн Баян-Өндөр сумын 5 дугаар багт оршин суух хаягийн бүртгэлтэй боловч Төв аймгийн Эрдэнэсант сумын 4 дүгээр багт оршин суудаг, улсаас авсан гавъяа шагнал, ял шийтгэлгүй, бие эрүүл, хэрэг хариуцах чадвартай гэх Н овогт П.Б /РД:__98040214/.

Холбогдсон хэргийн талаар /яллах дүгнэлтэд дурдагдсанаар/

Шүүгдэгч П.Б нь 2018 оны 11 дүгээр сарын 11-ний өдөр Төв аймгийн Эрдэнэсант сумын “Буянт” 3 дугаар багийн нутаг “Хавчиг хонд” гэх газраас иргэн Э.Цэгмидийн 1 тооны сувай эм хонийг бэлчээр дээрээс нь тээврийн хэрэгсэл хэрэглэн хулгайлж, бусдад 150.000 төгрөг учруулсан гэмт хэрэгт холбогджээ.

 

ТОДОРХОЙЛОХ нь:

Шүүхийн хэлэлцүүлэгт шинжлэн судлагдсан нотлох баримтууд нь энэ хэрэгт хамааралтай хуульд заасан үндэслэл журмын дагуу хэрэгт цугларч бэхжүүлсэн, шүүгдэгч, хохирогч, гэрч нараас мэдүүлэг авах, бусад нотлох баримтуудыг цуглуулж бэхжүүлэхдээ Эрүүгийн хэрэг хянан шийдвэрлэх ажиллагааны журам, шаардлага зөрчөөгүй, мөрдөн шалгах ажиллагааны явцад хэрэг хянан шийдвэрлэх ажиллагааны оролцогчдын хуулиар хамгаалагдсан эрхийг хассан буюу хязгаарласан зөрчил тогтоогдоогүй тул дараах нотлох баримтуудыг хэрэг хянан шийдвэрлэхэд ач холбогдолтой, хамаарал бүхий талаас нь үнэлж, прокуророос шүүхэд ирүүлсэн хэргийн хүрээнд шүүгдэгчийн гэм буруутай талаар дүгнэлт хийж холбогдох хэргийг эцэслэн шийдвэрлэх боломжтой гэж шүүх үзсэн болно.

 

Шүүхийн хэлэлцүүлэгт:

Шүүгдэгч П.Б: “Мөрдөн байцаалтын шатанд үнэн зөв мэдүүлэг өгсөн, гэм буруу дээр маргахгүй тул дахин мэдүүлэг өгөхгүй” гэв.

 

Шүүхийн хэлэлцүүлэгт яллах болон цагаатгах талуудаас дараах нотлох баримтыг шинжлэн судлав.

Үүнд:

• Хохирогч Э.Цэгмидийн мэдүүлэг /хх-ийн 9-10 тал/, хохирогч Э.Цэгмидийн гэрчээр өгсөн мэдүүлэг /хх-ийн 11-12 тал/, Төв аймгийн Эрдэнэсант сумын үнэлгээний комиссын 1 тооны хонийг үнэлсэн үнэлгээний тайлан /хх-ийн 21 тал/, эд хөрөнгө битүүмжилсэн тогтоол /хх-ийн 05 тал/, Эй Жэй Жэй Эм ХХК-ийн үнэлгээний тайлан /хх-ийн 23 тал/, хохирогч Э.Цэгмидийн мал тэжээвэр амьтадын 2017 оны тооллогын маягт /хх-ийн 24 тал/, гэрч О.Навчаагийн мэдүүлэг /хх-ийн 13-14 тал/, шүүгдэгч П.Б-ын гэрчээр өгсөн мэдүүлэг /хх-ийн 15-17 тал/, гэрч Э.Чингэсийн мэдүүлэг /хх-ийн 18 тал/, гэрч Л.Отгонбуянтайгийн мэдүүлэг /хх-ийн 19 тал/, шүүгдэгч П.Б-ын яллагдагчаар өгсөн мэдүүлэг /хх-ийн 40 тал/ зэрэг болон шүүгдэгч П.Б-ын хувийн байдлыг тогтоосон бусад баримтууд болно.

Шүүгдэгч П.Б-ын хэргээ хүлээн мэдүүлсэн мэдүүлэг нь хохирогч, гэрч нарын мэдүүлэг болон бусад нотлох баримтуудаар давхар нотлогдон тогтоогдсон тул шүүгдэгчийн мэдүүлгийг шүүх яллах нотлох баримтад тооцсон.

 

Шүүгдэгч П.Б нь 2018 оны 11 дүгээр сарын 11-ний өдөр Төв аймгийн Эрдэнэсант сумын “Буянт” 3 дугаар багийн нутаг “Хавчиг хонд” гэх газраас иргэн Э.Цэгмидийн 1 тооны сувай эм хонийг бэлчээр дээрээс нь тээврийн хэрэгсэл хэрэглэн хулгайлж, бусдад 150.000 төгрөг учруулсан гэмт хэрэг үйлдсэн болох нь:

• Гэмт хэргийн талаарх гомдол мэдээлэл хүлээн авсан тэмдэглэл /хх-ийн 03 тал/
• Эд хөрөнгө битүүмжилсэн тогтоол /хх-ийн 05 тал/
• Төв аймгийн Эрдэнэсант сумын Орон нутгийн үнэлгээний комиссын “1 тооны сувай эм хонь”-ийг үнэлсэн үнэлгээ /хх-ийн 21 тал/
• хохирогч Э.Цэгмидийн мал тэжээвэр амьтадын 2017 оны тооллогын маягт /хх-ийн 24 тал/,
• Хохирогч Э.Цэгмидийн “Манайх Төв аймгийн Эрдэнэсант сумын Буянт 3 дугаар багийн нутаг Хавчиг хонд гэдэг нэртэй газар өвөлждөг. Би 2018 оны 11 дүгээр сарын 11-ний өдөр...манай эхнэр Навчаа надруу 18 цагийн орчимд залгаж “би Санжаагийн гэрийг барьчихаад харих гэтэл манай хонь бөөгнөрөөд байхаар нь гэрийнхээ зүүн хойд талын уулнаас дурандтал нэг мотоцикльтой хоёр хүн манай хониноос нэгийг хулгайлаад мотоциколь дээрээ дүүрээд сумын төврүү чиглээд явчихлаа гэж хэлэхээр нь өөдөөс нь машинтайгаа амдаад явтал...тааралдаагүй, манай хониноос одоо хар халзан зүсмийн нэг ширхэг хонь дутаж байна. Манай хогньнууд бүгдээрээ хоёр чих нь араасаа ганзага эмтэй...Манай саахалт айлын Б гэдэг залуу манай хонийг хулгайлсан байсан...” гэх мэдүүлэг /хх-ийн 11 тал/
• Гэрч О.Навчаагийн “Би 2018 оны 11 дүгээр сарын 11-ний өдөр саахал айлын Санжаагийн гэрийг барьчихаад гэртээ харих гээд алхаж явтал миний хажуу талаар манай саахалт айлын Баасанбаяр гэх залуу намайг харалгүй манай хоньруу чиглэн очиж хонь бөөгнүүлээд дотроос нэг хонь барьж аваад мотоциколь дээрээ дүүрээд сумруу чиглээд явсан. Би нөхөр Цэгмид рүү утсаар залгаж манай хоньноос мотоцикльтой хоёр хүн хонь хулгайлаад сумын төв рүү чиглээд явчихлаа гээд би араас нь саахалт айлынхаа хүнийг гуйж сум ороолд тэр мототцикльтой хүнийг хайсан боловч олдоогүй. Анх Б-ыг миний хажуугаар гарах үед нь би жалганд алхаж явсан болохоор намайг харалгйү хонин дээр очоод хонь дүүрч явсан...” гэх мэдүүлэг /хх-ийн 13 тал/
• Гэрч Э.Чингисийн “Би Өвөрхангай аймгийн Баян-Өндөр сумын нутгаас Даюун маркийн ногоон өнгийн мотоцикольтой Төв аймгийн Эрдэнэсант сумын нутагт 2018 оны 11 дүгээр сарын 07-ноос 08-нд үед ганцаараа Баасанбаяртай уулзах гэж ирээд уулзаж гэрт нь нэг хоносон. П.Б надад найз нь чамайг ирсэн юм чинь хоол унданд оруулъя ээж аав аавд хэлээд нэг хонь барьж заръяа гэж хэлээд өөрийнхөө цэнхэр өнгийн Даюун маркийн нэхий нударгатай мотоциклио унаж намайг сундлаад гэрийнхээ хойд араас өдрийн 16 цагийн үед нэг төлөг барьж аваад бид хоёр дүүрч сумын төв оруулж Бархамай гэх айлын хашаанд нь оруулж тавьсан юм. Тухайн үед миний утас дугархаар нь хартал Баасанбаярын эх нь залгаж юун хулгай хийгээд байгаан бэ гэхээр нь би П.Б танд хэлсэн гээд өөрийнхөө хоньноос нэг хонь авлаа гэж надад хэлсэн шүү дээ гэхэд хүний хонь гэж хэлэхээр нь буцаагаад нөгөө хонио барьж аваад П.Б-ын хонь сумын төв дээр байсан тул тэдний хонинд нийлүүлж тавьсан. Тэгээд П.Б-т би дөрвөн лааз пиво авч өгөөд хоёулаа хувааж уучихаад Баасанбаярын гэрт нь очиж хоночихоол маргааш нь би гэр лүүгээ явсан...” гэх мэдүүлэг /хх-ийн 18 тал/
• Гэрч Л.Отгонбуянтайгийн “2018 оны 11 дүгээр сарын 11-ний өдөр 18-19 цагийн хооронд Цэгмид манайд орж ирээд танай хүү Баасанбаяр нэг хүнтэй хамт мотоцикльтой ирээд манай хониноос нэгийг дүүрээд сумын төврүү чиглээд явчихлаа гэж надад хэлчихээд явсан. Тэгэхээр нь би Чингисийн гар утасруу залгаж “та хоёр наад хонио зарж үрж болохгүй шүү, Цэгмид манайхаар ирж П.Б-ыг асуучихаад явлаа” гэж Чингист хэлсэн...”гэх мэдүүлэг /хх-ийн 19 тал/
• Шүүгдэгч П.Б-ын яллагдагчаар мэдүүлсэн “Прокурорын тогтоолыг уншиж танилцлаа, хүлээн зөвшөөрч байна. 2018 оны 11 дүгээр сарын 11-ний өдөр манайд манай найз Чингис мотоцикольтойгоо ганцаараа ирэхээр нь би найз нь мөнгө төгрөг алга хоёулаа манай хониноос нэг хонь барьж сумын төв оруулж зараад хоол унд идье, ганц нэг пиво ууя гэж хэлээд Чингисийн мотоциклийг гэрийнхээ гадаа хаяад өөрийнхөө цэнхэр өнгийн Даюун маркийн мотоциколийг өөрөө барьж Чингисийг ардаа сундалж яваад Хавчиг хонд гэх газарт Цэгмээ гэх хүний хонь бэлчиж явахаар нь Чингист манай хонь тэр байна гэж хэлээд хонин дээр нь хоёулаа очоод бөөгнүүлж байгаа би хар халзан сувай эм хонь барьж аваад тэгээд дүүрч яваад Эрдэнэсант сумын төврүү ортол Цэгмээ ах ээжрүү утсаар ярчихсан тэгээд ээж Чингисийн утсаар Чингис бид хоёртой ярьж Цэгмээ гэх хүний хониноос нэг тооны хонь хулгай хийснийг мэдчихсэн байхаар нь бид хоёр шууд Бат-Эрдэний гэх хүний хашаанд оруулж тавьсан...” гэх мэдүүлэг /хх-ийн 40 тал/ зэрэг хэрэгт авагдсан бусад нотлох баримтаар нотлогдон тогтоогдсон болно.

 

Шүүгдэгч П.Б нь бусдын малыг хулгайлах гэмт хэргийн нөхцөл байдалд хийсэн хууль зүйн дүгнэлтийн талаар: 

  Шүүгдэгч П.Б  нь 2018 оны 11 дүгээр сарын 11-ний өдөр Төв аймгийн Эрдэнэсант сумын “Буянт” 3 дугаар багийн нутаг “Хавчиг хонд” гэх газраас иргэн Э.Цэгмидийн 1 тооны сувай эм хонийг бэлчээр дээрээс нь тээврийн хэрэгсэл хэрэглэн хулгайлж, бусдад 150.000 төгрөг учруулсан үйлдэл нь Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн объектив талын шинжүүдийг бүрэн хангасан.

Шүүгдэгч П.Б нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх тул гэм буруугийн санаатай хэлбэрээр үйлдэгдсэн, гэм буруутай байна.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, шүүгдэгч П.Б-ын үйлдэл нь  Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн шинжийг бүрэн хангасан, прокуророос ирүүлсэн хэргийн зүйлчлэл тохирсон байх тул шүүгдэгч П.Б-ыг бусдын малыг хулгайлах гэмт хэрэг үйлдсэн гэм буруутайд тооцож, ял шийтгэл оногдуулах үндэслэлтэй байна.

 

Гэмт хэргийн улмаас учирсан хохирол, хор уршгийн талаар:

Энэ гэмт хэргийн улмаас шүүгдэгч П.Б нь хохирогч Э.Цэгмидэд 150.000 төгрөгийн хохирол учруулсан байна.

Шүүхээс хохирогч Э.Цэгмидэд шүүх хуралдааны тов мэдэгдэхэд “хохирол барагдуулсан, хонио буцаагаад авсан тул гомдолгүй, шүүх хуралдаанд оролцохгүй” гэсэн байх тул энэ шүүх хуралдаанаар хэлэлцэх хохирлын асуудал байхгүй бөгөөд шүүгдэгч П.Б нь бусдад төлөх төлбөргүй байна.

 

Эрүүгийн хариуцлага хүлээлгэх талаар:

-Шүүхийн хэлэлцүүлэгт оролцсон улсын яллагчаас шүүгдэгч П.Б-ыг Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар  280 цагийн нийтэд тустай ажил хийлгэх ялын дүгнэлтийг,  

-Шүүгдэгчийн өмгөөлөгч Ц.Хүрэлбаатар нь “Эрүүгийн хуулийн ерөнхий ангийн 7.1 дүгээр зүйлд зааснаар тэнсэн хянан харгалзаж өгнө үү” гэх саналыг тус тус гаргасан байна.

Шүүгдэгч П.Б-ын холбогдсон Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэрэг нь “Бусдын малыг хулгайлсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 2-т “Энэ хуулийн тусгай ангид хорих ялын дээд хэмжээг таван жил, түүнээс доош хугацаагаар оногдуулахаар тогтоосон, эсхүл хорих ял оногдуулахаар заагаагүй гэмт хэргийг хөнгөн гэмт хэрэг гэнэ” гэж зааснаар хөнгөн гэмт хэргийн ангилалд хамаарч байна.

Шүүх шүүгдэгч П.Б-т эрүүгийн хариуцлага хүлээлгэхдээ мөрдөн байцаалтын шатнаас эхлэн гэм буруугийн талаар маргаагүй, гэмт хэрэг үйлдсэн гэм буруугаа хүлээн зөвшөөрч гэмт хэргийн улмаас учруулсан хохирлыг нөхөн төлж хор уршгийг арилгасан зэрэг хувийн байдлыг харгалзан шүүгдэгч П.Баасанбаярт Эрүүгийн хариуцлага хүлээлгэхдээ Эрүүгийн хуулийн ерөнхий ангийн 7.1 дүгээр зүйлийн 1 дэх хэсэгт заасныг журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар хорих ял оногдуулахгүйгээр 1 жилийн хугацаагаар тэнсэж, Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч П.Б-т үүрэг болгов.

 

            Бусад асуудлаар:

Эрүүгийн 1834009060424 дугаарын хэрэгт эд мөрийн баримтаар хураагдсан зүйлгүй, шүүгдэгч П.Б нь цагдан хоригдсон хоноггүй, бусдад төлөх төлбөргүй болохыг тус тус дурдах нь зүйтэй байна.  

Харин Эрүүгийн хуулийн 7.5 дугаар зүйлийн 2 дахь хэсэгт “гэмт хэрэг үйлдэж олсон хөрөнгө, орлого гэж Монгол Улсад бол энэ хуулийн тусгай ангид заасан, гадаад улсад бол тухайн улсын хуулиар нэг жилээс дээш хугацаагаар хорих ял оногдуулахаар заасан гэмт хэрэг үйлдэж шууд, шууд бусаар олсон эдийн, эдийн бус хөрөнгө, түүний үнэ, түүнээс олсон ашиг, орлого, гэмт хэрэг үйлдэхэд ашигласан, ашиглахаар завдсан техник, хэрэгслийг ойлгоно” гэж, мөн зүйлийн 4 дэх хэсэгт “гэмт хэрэг үйлдэж олсон эд зүйл, түүний үнэ, гэмт хэрэг үйлдэхэд ашигласан тээврийн хэрэгсэл, уналга, галт зэвсэг, зэвсэг, тусгайлан бэлтгэсэн зэвсгийн чанартай зүйл нь тухайн гэм буруутай этгээдийн өмчлөлд байсан нь тогтоогдсон тохиолдолд түүнийг хураан авч хадгалах, устгах, гэмт хэргийн хохирол нөхөн төлөхөд зарцуулна” гэж тус тус зааснаар шийтгэх тогтоол хүчин төгөлдөр болтол шүүгдэгч П.Б-ын гэмт хэрэг үйлдэхдээ ашигласан БНХАУ-д 2016 онд үйлдвэрлэсэн Даюун маркийн цэнхэр өнгийн хуучин 793.500 төгрөгийн үнэлгээтэй мотоциклын битүүмжлэлийг хэвээр үлдээж, шийтгэх тогтоол хүчин төгөлдөр болмогц  шүүгдэгч П.Б-ын гэмт хэрэг үйлдэхдээ ашигласан БНХАУ-д 2016 онд үйлдвэрлэсэн Даюун маркийн цэнхэр өнгийн хуучин 793.500 төгрөгийн үнэлгээтэй мотоциклын битүүмжлэлийг хүчингүй болгож, хурааж, улсын орлого болгох нь зүйтэй байна.  

           

            Монгол Улсын Шүүхийн тухай хуулийн 31 дүгээр зүйлийн 1, 31 дүгээр зүйлийн 3.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг тус тус удирдлага болгон

                                              

ТОГТООХ нь:

 

1. Шүүгдэгч Н овогт П.Б-ыг бусдын малыг хулгайлсан гэмт хэрэг үйлдсэн гэм буруутайд тооцсугай.

 

1. Шүүгдэгч Н овогт П.Б-ыг Эрүүгийн хуулийн ерөнхий ангийн 7.1 дүгээр зүйлийн 1 дэх хэсэгт заасныг журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар хорих ял оногдуулахгүйгээр 1 /нэг/ жилийн хугацаагаар тэнссүгэй.  

 

1. Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч П.Б-т үүрэг болгосугай.

 

1. Эрүүгийн хуулийн ерөнхий ангийн 7.3 дугаар зүйлийн 4, 5-т зааснаар шүүгдэгч П.Б нь шүүхээс хүлээлгэсэн үүргийг биелүүлээгүй, хязгаарлалтыг зөрчсөн бол шүүх тэнссэн шийдвэрийг хүчингүй болгож ял оногдуулахыг сануулсугай.

 

1. Шийтгэх тогтоол хүчин төгөлдөр болтол шүүгдэгч П.Б-т авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

1. Хэрэгт эд мөрийн баримтаар хураагдсан зүйлгүй, иргэний бичиг баримт шүүхэд ирээгүй, шүүгдэгч П.Б нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

 

 

1. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1.1, 1.3 дахь хэсэгт тус тус зааснаар шийтгэх тогтоол хүчин төгөлдөр болтол шүүгдэгч Н овогт П.Б-ын гэмт хэрэг үйлдэхдээ ашигласан БНХАУ-д 2016 онд үйлдвэрлэсэн Даюун маркийн цэнхэр өнгийн хуучин 793.500 төгрөгийн үнэлгээтэй мотоциклын битүүмжлэлийг хэвээр үлдээж, шийтгэх тогтоол хүчин төгөлдөр болмогц шүүгдэгч Н овогт П.Б-ын гэмт хэрэг үйлдэхдээ ашигласан БНХАУ-д 2016 онд үйлдвэрлэсэн Даюун маркийн цэнхэр өнгийн хуучин 793.500 төгрөгийн үнэлгээтэй мотоциклыг хурааж, улсын орлого болгосугай.

 

1. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, хохирогч, иргэний нэхэмжлэгч, иргэний хариуцагч, тэдгээрийг төлөөлөгч, өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах М.Оюунсүрэнд даалгасугай. 

 

1. Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг  дурьдсугай.

 

1. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийтгэх тогтоол танилцуулан сонсгосноор хүчинтэй болох бөгөөд мөн хуулийн 37.1 дүгээр зүйлийн 2 дахь хэсэгт зааснаар шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлж шүүгдэгч Н овогт П.Б-т авсан хувийн баталгаа гаргах таслан сэргийлэх арга хэмжээг авсугай.

 

 

 

 

•