О.Баярцэцэгийн нэхэмжлэлтэй

иргэний хэргийн тухай

 

Нийслэлийн Иргэний хэргийн давж заалдах шатны шүүхийн шүүх хуралдааныг Ерөнхий шүүгч Ж.Оюунтунгалаг даргалж, шүүгч Н.Батзориг, Д.Дэлгэрцэцэг нарын бүрэлдэхүүнтэй тус шүүхийн танхимд хийсэн давж заалдах шатны иргэний хэргийн шүүх хуралдаанаар

 

Сонгинохайрхан дүүргийн Иргэний хэргийн анхан шатны шүүхийн

2016 оны 9 дүгээр сарын 01-ний өдрийн 184/ШШ2016/00765 дугаар шийдвэртэй,

 

Нэхэмжлэгч О.Баярцэцэгийн нэхэмжлэлтэй,

Хариуцагч Б.Бямбажавт холбогдох

 

Гэрлэлт цуцалж, 2 хүүхдийн асрамж тэтгэлэг тогтоолгох, хамтран өмчлөх дундын эд хөрөнгө хуваалгах, орон байраар хангуулах тухай иргэний хэргийг,

 

Хариуцагч Б.Бямбажавын гаргасан давж заалдах гомдлыг үндэслэн,

шүүгч Д.Дэлгэрцэцэгийн илтгэснээр хянан хэлэлцэв.

 

Шүүх хуралдаанд:

Нэхэмжлэгч О.Баярцэцэг,

Нэхэмжлэгчийн өмгөөлөгч П.Амгаланбаатар,

Хариуцагчийн өмгөөлөгч Б.Наранцэцэг,

Шүүх хуралдааны нарийн бичгийн дарга Г.Шинэцэцэг нар оролцов.

 

Нэхэмжлэгч О.Баярцэцэг шүүхэд гаргасан нэхэмжлэл болон шүүх хуралдаанд гаргасан тайлбартаа: Иргэн О.Баярцэцэг миний бие нь Б.Бямбажавтай 2008 оны 2 дугаар сарын 28-ны өдөр анх танилцсан. 2008 оны 10 дугаар сард намайг албан ёсоор гуйж цайллага хийж, хамт амьдарсан. Түүнээс биш би өөрөө очсон зүйл байхгүй. 2008 оны 6 сард Б.Бямбажав амьдарч байсан 2 өрөө байраа зараад 1 өрөө байр худалдан авч 2 удаа өргөтгөл хийж 2009 оны 4 дүгээр сарын 03-ны өдөр кафе паб нээн ажиллуулахад 2009 оны 10 дугаар сард Х.Нэргүй гэх хүүхэн цэвэрлэгчээр ажилд орсноос эхлэн Б.Бямбажав нь X.Нэргүйтэй гэр бүлээс гадуур харилцаа үүсгэсэн. Энэ хугацаанд 2008 оны 12 дугаар сарын 03-ны өдөр охин Б.Анунгоо төрсөн. X.Нэргүй нь 2011 оны 6 дугаар сарын 01-ний өдөр Амарбаясгалан гэх хүү төрүүлсэн гэдэг шалтгаанаар X.Нэргүй нь Б.Бямбажавыг мессеж болон хэл амаар дарамталж улмаар гэрт ирж цонх хагалж танхайрч байсан төдийгүй Б.Бямбажавд архи өгч архидан согтууруулж өдөөн хатгаснаар Б.Бямбажав нь намайг байнга зодож нүдэж, гэрээсээ хөөж туух болсноор 2011 оны 9 дүгээр сарын 06-ны өдрөөс эхлэн тусдаа амьдрах хугацаандаа 2011 оны 10 сард Сонгинохайрхан дүүргийн шүүхэд нэхэмжлэл гаргаж охин Б.Анунгоогийн тэтгэмжийн мөнгө болох 17 сая гаруй төгрөгийг нэг удаагаар гаргуулах шийдвэр гарч шүүхийн шийдвэр гүйцэтгэх албанд өргөдлөө өгсөн байсан. Гэтэл 2011 оны 12 дугаар сард Б.Бямбажав нь 2 охинтойгоо ирж охин Б.Анунгоогоо санаж байна хүүхдүүдээ бодоод эргэж хамтдаа амьдармаар байна гэж гуйхад нь нөхрөө уучилснаар 2012 оны 2 сард гэрлэлтээ батлуулж хамтдаа амьдрах болсноор нэхэмжлэлээ буцаасан. Гэвч Б.Бямбажав нь хүүхдийн тэтгэмж болох 17 сая гаруй төгрөгийг төлөхгүйн тулд X.Нэргүйтэй нийлж хууран мэхэлсэн. 2013 оны 3 дугаар сарын 29-ний өдрөөс хойш миний бие охин Б.Анунгоо /6 нас/, хүү Б.Ананд /2 нас 7 сар/ хоёрын хамт түрээсийн байранд амьдарч байна. Б.Бямбажав нь охин Б.Анунгоо, хүү Б.Ананд нартайгаа уулзах эрхгүйгээс гадна холбоо барих ямар ч утасгүй гэр бүлийн хүчирхийлэл дунд амьдарч, өөрийн төрсөн 2 хүүхдийнхээ өмнө хүлээсэн эцгийнхээ үүрэг хариуцлагыг ухамсарлахгүй гудамжинд гаргаж хаясанд маш их гомдолтой байна. 1 өрөө байрандаа өргөтгөл хийхийн тулд Хаан банкнаас 10 000 000 төгрөгийн зээл авсан. 2011 онд кафе ашиг орлого багатай болохоор нь 2011 оны 6 дугаар сард 100 000 000 төгрөгөөр зарсан. Дараа нь уг кафены 00 тоотыг худалдаж авсан бөгөөд 00 тоотод амьдардаг байхдаа ахаасаа автомашин, 6 өрөөтэй нийтийн байр, газрын хамт худалдаж авсан. 6 өрөөтэй нийтийн байраа өргөтгөх гэж банкнаас зээл авахад нь би хамтран зээлдэгчээр орсон. Ингээд 6 өрөөг өргөтгөж нэмж 5 өрөө барьсан.

Иймд цаашид хамт амьдрах боломжгүй болсон тул шүүхээр гэрлэлтээ цуцлуулж, охин Б.Анунгоо, хүү Б.Ананд нарыг өөрийн асрамжид үлдээж, хүүхдүүдийн эцэг нь Б.Бямбажав мөн учир Гэр бүлийн тухай хуульд зааснаар тэтгэлэг гаргуулах, мөн хүүхдүүдийн цаашдын ирээдүй, эрүүл мэндийг хамгаалах, амьдрах эрүүл саруул аюулгүй орчин бүрдүүлэх шаардлагатай учир орон байраар хангуулах, Б.Бямбажавтай амьдарч байх хугацаанд бий болсон Сонгинохайрхан дүүргийн 30 дугаар хороо, Хилчин хотхон 83 тоотод байрлах газар, байшингаас 2 хүүхэд болон өөрт ногдох хэсгийг нэхэмжилж байна гэжээ.

 

Хариуцагч Б.Бямбажав шүүхэд болон шүүх хуралдаанд гаргасан тайлбартаа: Нэхэмжлэгчийн нэхэмжилж байгаа хөрөнгө бол миний 2 өнчин охин бид гурвын хуваарьт хөрөнгө, би талийгч эхнэртэйгээ Солонгос улсад 10 гаран жил, миний эхнэр хүний нутагт хүүхдээ төрүүлж зовж, хөдөлмөрлөж олсон мөнгөөр бий болсон хөрөнгө юм. Уг мөнгөөр 2007 оны 7 дугаар сард 2 өрөө байр авсан, байраа авахдаа данс хоосон үлдээгүй мөнгөтэй байсан. Энэ талаар дансны хуулга хэрэгт авагдсан. Манай талийгаач эхнэр Хятад улсын Хөх хот руу 2 удаа явж хагалгаа хийлгэж хүнд хагалгаа байсан учраас хагалгаагаа дийлээгүй нас барж би 2 өнчин охинтойгоо үлдсэн. Би дансанд байсан мөнгөөрөө 2 өрөө байрандаа тавилга, автомашин авсан байх үед О.Баярцэцэг надтай танилцсан. О.Баярцэцэг манай гэрээр орж гарч явдаг байсан нэг мэдэхэд гэр бүлийн харилцаатай болж 2008 оны 12 дугаар сард хүүхэдтэй болсон. Түүнээс биш хайр сэтгэлийн улмаас танилцаагүй, хүнээр дамжуулж танилцсан болохоор сэтгэлтэй байгаагүй. Ингээд Х.Нэргүйтэй танилцсан, 2 өрөө байраа 2008 оны 6 дугаар сард зарсан бөгөөд уг байраа 1 жилийн 3 000 000 төгрөгөөр түрээсэлж суугаад үлдсэн мөнгөөрөө 19 дүгээр байранд 1 өрөө байр худалдаж авсан. О.Баярцэцэгээс нэг ч төгрөг ороогүй. 19 дүгээр байраа өргөтгөж ресторан болгосон боловч ашиг орлого байхгүй байсан тул 100 000 000 төгрөгөөр зарсан. Тэр үед О.Баярцэцэгтэй хамтарч Хаан банкнаас 10 000 000 төгрөгийн зээлсэн. Энэ зээлийг хэн төлсөн талаар баримт хэрэгт байгаа, бүгдийг би өөрөө төлсөн. Зээлийн төлбөрөө төлж чадахгүй байсан учраас 19 дүгээр байрны 1 өрөө байраа зарж уг зээлийг төлж үлдсэн мөнгөөрөө Сонгинохайрхан дүүргийн 30 дугаар хороо, Хилчин хотхон 83 тоот байрны 6 өрөө байшин, газрыг 2011 оны 7 дугаар сарын 07-ны өдөр төрсөн ахаасаа худалдаж авсан. 6 өрөөтэй байр авч үлдсэн мөнгөөрөө өргөтгөл хийж 5 өрөө нэмж барьсан. Тэр үед О.Баярцэцэгийн хөрөнгө оруулалт болон хөдөлмөр сэтгэл зүтгэл аль аль нь байгаагүй. Талийгаач эхнэрийн нэр дээр байсан 30 хэдэн сая төрөг болон охин Б.Анударийн нэр байсан 29 000 000 төгрөгийн баримт хэрэгт авагдсан.

О.Баярцэцэг миний 2 өнчин охинд хатуу ханддаг, зөв хүн болгож хүмүүжүүлэх талаас ханддаггүй байсан. Голдон паркад хөлсөлж амьдарч байсан байрнаас эцгээсээ мөнгө авч ир гэж өвлийн хүйтэнд 2 удаа хөөж явуулж байсан. Гэрлэлт цуцлах асуудлыг 2011 оноос энэ хүнд хэлсэн ч надаас салахгүй явсаар өнөөдрийг хүрч байна. Хас банкнаас 25 000 000 төгрөгийг зээлсэн, “АБТС” ББСБ-аас 45 000 000 төгрөгийг эхнэр Х.Нэргүйтэй зээлж авсан. Дүү Цэндсүрэнгээс 23 000 000 төгрөгийг 25 000 000 төгрөг болгож өгнө гэж зээлсэн. Нийт 80 000 000 төгрөгийн өртэй байна.

Иймд гэрлэлт цуцлахыг хүлээн зөвшөөрч байна. 2 хүүхдэдээ тэтгэлэг тогтооно, хүүхдүүдийг ээжийнх нь асрамжид үлдээнэ. О.Баярцэцэгийн нэхэмжилж байгаа хашаа байшин “АБТС” ББСБ-т 45 000 000 төгрөгийн барьцаанд хураагдаж битүүмжлэгдсэн. Нийт өр 90 000 000 төгрөг болсон зээлээ төлөх боломжгүй болсон. Би өөрийн байранд амьдраагүй, өөрийн ажилладаг аж ахуй нэгжийн хажуу буланд 8 хүүхэдтэйгээ 10 ам бүл, орон байргүй, хэзээ гудамжинд гарахаа мэдэхгүй амьдарч байна. О.Баярцэцэгт өөрийн боломжоор мөнгө өгч орон байр түрээслүүлж байсан. Байр түрээслээд зогсохгүй хүүхдийн хэрэглээ хоол хүнс, хэзээ мөнгө нэхнэ тэр бүгдийг өгч байсан. 1 дүгээр хороололд ресторанаа зараад 2 хонож байхад О.Баярцэцэг манай эгч 5 000 000 төгрөг 5 хувийн хүүтэй зээлээч гэж байна гэхэд нь эгчид нь би 5 000 000 төгрөг зээлүүлсэн. Энэ бүгдийг тооцож үзэхэд миний өгсөн мөнгө 26, 27 сая төгрөг болсон. Гэтэл би орон байраа өгөхөд харамсалтай байна. Боломжтой үедээ чадлынхаа хирээр харж үзэж явсан, одоо надад юу ч байхгүй, миний эдгээр эд хөрөнгө бүгд хураагдана. Үлдэх юм байвал хүүхдүүдээ бодоод хувааж болно гэжээ.

 

Шүүх: Гэр бүлийн тухай хуулийн 14 дүгээр зүйлийн 14.1-д зааснаар Боржигон овогт Отгоны Баярцэцэг, Сартуул овогт Балжиннямын Бямбажав нарын гэрлэлтийг цуцалж,

Гэр бүлийн тухай хуулийн 14 дүгээр зүйлийн 14.5-д зааснаар 2008 оны 12 дугаар сарын 03-ны өдөр төрсөн охин Б.Анунгоо, 2013 оны 1 дүгээр сарын 21-ний өдөр төрсөн хүү Б.Анандыг нарыг эх О.Баярцэцэгийн асрамжид үлдээж,

Нэхэмжлэгч О.Баярцэцэг нь охин Б.Анунгоогийн тэтгэлгийг сар бүрээр гаргуулах нэхэмжлэлийн шаардлагыг хэрэгсэхгүй болгож,

Гэр бүлийн тухай хуулийн 40 дүгээр зүйлийн 40.1.1, 40.1.2-д зааснаар 2013 оны 01 дүгээр сарын 21-ний өдөр төрсөн хүү Б.Анандыг 11 нас хүртэл түүний оршин суугаа бүс нутагт тогтоогдсон амьжиргааны доод түвшингийн 50 хувиар, түүнийг 11-16 нас /суралцаж байгаа бол 18 нас/ хүртэл амьжиргааны доод түвшингийн хэмжээгээр сар бүр тэтгэлэг гаргуулан эцэг Б.Бямбажаваар тэжээн тэтгүүлж,

Иргэний хуулийн 125 дугаар зүйлийн 125.1, 126 дугаар зүйлийн 126.1, 129 дүгээр зүйлийн 129.4, 129.6-д зааснаар хариуцагч Б.Бямбажаваас 26 425 000 төгрөгийг гаргуулан нэхэмжлэгч О.Баярцэцэгт олгож,

Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1-д зааснаар хариуцагчаас 70 200 төгрөг гаргуулан нэхэмжлэгчид олгож, нэхэмжлэгчээс улсын тэмдэгтийн хураамжид төлсөн 70 200 төгрөгийг улсын төсвийн орлогод хэвээр үлдээж,

Хариуцагч нь өөрт учирсан хохирлоо О.Баярцэцэгээс нотлох баримтаа бүрдүүлэн жич нэхэмжлэх эрхтэйг дурдаж шийдвэрлэжээ.

 

Хариуцагч Б.Бямбажав давж заалдах журмаар гаргасан гомдолдоо: ...Анхан шатны шүүх хуулийг буруу тайлбарлан хэрэглэсэн гэж үзэж байгаа бөгөөд энэ нь хариуцагч Б.Бямбажав миний хуваарьт хөрөнгийг дундын хөрөнгө хэмээн шүүх тооцож уг дундын хөрөнгийг хуваахад Б.Бямбажав миний төрсөн хүүхдүүд болох 2016 оны 6 дугаар сард төрсөн хүү Б.Амарбаясгалан, 2014 оны 8 дугаар сард төрсөн охин Б.Ану-Эрдэнэ, 2015 оны 12 дугаар сард төрсөн охин Б.Бямбахишиг нарыг оролцуулалгүй 6 хувааж шийдвэрлэсэн шүүхийн шийдвэр, хууль ёсны бөгөөд үндэслэлтэй байх зарчим алдагдаж байна.

Анхан шатны шүүх Б.Бямбажав миний хуваарьт хөрөнгө, дундын хөрөнгийг ялган салгаж тогтоолгүйгээр бүгдийг нь дундын хөрөнгө хэмээн шийдвэрлэсэн нь учир дутагдалтай байна. Үүнийг тодорхойлбол 2011 оны 11 дүгээр сарын 23-ны өдрийн 1843 дугаартай шүүхийн шийдвэрт Б.Бямбажав би болон талийгаач эхнэр X.Шийтэр өнчин 2 охин Б.Анар, Б.Анударь нарын гэр бүлийн гишүүдийн өмчлөлийн үл хөдлөх хөрөнгө юм гэсэн шийдвэр гарсан байгааг баримтаар нотолж байна.

Б.Бямбажав би үл хөдлөх хөрөнгөө үргэлжлүүлэн босгохдоо өнөөдрийн АБТС банк бус санхүүгийн байгууллагаас 2011 оноос хойш хамтран амьдарч байгаа эхнэр X.Нэргүй хамтран зээлдэгчээр орж 61 515 242 төгрөгийг хөрөнгө оруулсан бөгөөд үүнийг цаг хугацаанд нь төлж чадахгүйн улмаас шүүхийн шийдвэрт шилжиж Б.Бямбажав надаар төлүүлэхээр шүүхийн шийдвэр гарсан байгаа. Гэтэл хөрөнгийн үнэлгээг 2016 онд шүүхэд хэлэлцэгдэх үед 75 500 000 төгрөгөөр үнэлгээ гарсан. Гэтэл шүүх 61 сая төгрөгийн хөрөнгө оруулалтыг О.Баярцэцэгийг хийсэн гэж үзэж 75 сая төгрөгөөр 2016 онд үнэлэгдсэн үнэлгээг шууд баримталж дундын хөрөнгө хэмээн үзэж 6 хувааж шийдвэрлэсэн нь үндэслэл муутай байна. Хэрвээ дундын хөрөнгө гэж үзвэл банкны зээлийг хамтран төлөх үндэслэлтэй гэж үзэж байна.

Иргэний хуулийн 127 дугаар зүйлд гэр бүлийн гишүүний хуваарьт хөрөнгийг тодорхой заасан байдаг. Гэтэл Б.Бямбажав би хуваарьт хөрөнгөө тодорхой нотолж зарим зүйл дээр хүсэлт гаргасан. Өөрөө хэлбэл одоо байгаа хуваарьт хөрөнгөө хамтран өмчилж байсан талийгаач эхнэр X.Шийтэрийн нэр дээрх мөнгөн хөрөнгийг нотлох баримтаар авахуулах хүсэлтийг хангаж шийдвэрлээгүй юм. Үүнд X.Шийтэрийн нэр дээрх Хаан банкны дансан дахь 31 сая төгрөг байсныг одоо байгаа үл хөдлөх хөрөнгийг бий болгоход оруулсан. Мөн охин Б.Анударийн тухайн үеийн Хаан банкны дансан дахь 29 сая төгрөгийг шүүх авч хэлэлцээгүй. Эцэст нь хуваарьт хөрөнгө, дундын хөрөнгийг ялгаж салгалгүйгээр шууд дундын хөрөнгө гэж үзэж Б.Бямбажав миний бусад төрсөн 3 хүүхэд болон дагавар 3 хүүхдүүдийг орхигдуулан хувааж хууль бус үндэслэлгүй шийдвэр гарсан гэж үзэж байх тул анхан шатны шүүхийн шийдвэрийг хүчингүй болгож өгнө үү гэжээ.

 

ХЯНАВАЛ:

 

Анхан шатны шүүхийн шийдвэр Иргэний хэрэг шүүхэд хянан шийдвэрлэх тухай хуулийн 116 дугаар зүйлийн 116.2 дахь хэсэгт заасан хууль ёсны бөгөөд үндэслэл бүхий байх хуулийн шаардлагыг хангаагүй байна.

 

Нэхэмжлэгч О.Баярцэцэг нь хариуцагч Б.Бямбажавт холбогдуулан гэрлэлт цуцалж, 2 хүүхдийн асрамж тэтгэлэг тогтоолгох, хамтран өмчлөх дундын эд хөрөнгө хуваалгах, орон байраар хангуулах тухай нэхэмжлэлийн шаардлага гаргасныг хариуцагч эс зөвшөөрч маргажээ.

 

Хариуцагч татгалзлынхаа үндэслэлээ “өөрийн хуваарьт хөрөнгөө зарж Сонгинохайрхан дүүргийн 30 дугаар хороо, Хилчин хотхоны 83 тоотын газар, орон сууц худалдан авсан, уг газар орон сууцыг хамтран амьдрагч Х.Нэргүйн хамт банк бус санхүүгийн байгууллагад барьцаанд тавьж зээл авсан, зээлээ хугацаанд нь төлж чадаагүйгээс газар орон сууцыг шүүхийн шийдвэрийн дагуу хураан авч битүүмжилсэн, маргаж буй газар орон сууцыг хуваавал өр зээлийг ч адил тэнцүү хуваалгана, өөрийн 2 дагавар хүүхэд, хамтран амьдрагч Х.Нэргүйгээс гарсан 3 хүүхдэд хөрөнгө хуваах ёстой” гэж тайлбарлажээ.

 

            Шүүх маргааны зүйл болох хөрөнгийг бий болгоход гэрлэгчдийн оруулсан хувь хэмжээг зөв тогтоох нь хэргийг хянан шийдвэрлэхэд ач холбогдолтой байсан ба гэрлэгчдийг хамтран амьдарснаас хойш хариуцагч Б.Бямбажав гэр бүлийн гишүүнээс өөр этгээд Х.Нэргүйтэй хамтран амьдарч хөрөнгө бий болгосон гэж маргасан тул тэдгээрийн дунд хөрөнгө бий болсон эсэхийг, орон байраар хангуулах тухай шаардлагаа дэмжиж байгаа эсэхийг тодруулах шаардлагатай байжээ.

 

Түүнчлэн гэрлэгчдийн маргаж буй газар болон нийтийн орон сууцыг бий болгоход уг хөрөнгөтэй холбоотойгоор өр төлбөр үүссэн эсэх, хэрэв өр төлбөр үүссэн бол гэр бүлийн гишүүний хэн нэгний нэр дээр байгаагаас үл хамаарч үүссэн өр төлбөрийг хэрхэн хувиарлах талаар шүүх шийдвэрлээгүй орхигдуулсан нь буруу болжээ.

 

            Хэрэгт авагдсан баримтаас үзвэл хариуцагч гэр бүлийн гишүүдийн хамтран өмчлөх дундын эд хөрөнгийг хуваахдаа тэдгээрт ногдох хэмжээгээр өрийг хуваана, өр зээлтэй тул газар орон сууцыг битүүмжилсэн гэх тайлбар гаргасан байхад шүүх сөрөг нэхэмжлэл гаргаагүй гэж дүгнэсэн нь үндэслэлгүй байна.

 

Шүүх маргааны үйл баримтыг бүрэн тогтоогоогүй, хариуцагчийн тайлбарт дүгнэлт хийлгүйгээр хэргийг шийдвэрлэснийг Иргэний хэрэг шүүхэд хянан шийдвэрлэх тухай хуулийн 6 дугаар зүйлийн 6.1 дэх хэсэгт заасны дагуу энэ талаар талуудыг мэтгэлцүүлээгүй тул давж заалдах шатны шүүхээс хэрэгт авагдсан баримтын хэмжээнд дүгнэлт хийж хэргийг шийдвэрлэх боломжгүй.

           

            Мөн хэрэгт авагдсан Сонгинохайрхан дүүргийн шүүхийн 2011 оны 11 дүгээр сарын 23-ны өдрийн 1843 дугаар шийдвэрт охин Б.Анунгоод нэг удаа 17 006 400 төгрөгийг хариуцагч Б.Бямбажаваас гаргуулж шийдвэрлэсэн байх бөгөөд уг шийдвэр хүчин төгөлдөр байхад сар бүр хүүхдийн тэтгэлэг тогтоолгох тухай нэхэмжлэлийн шаардлагыг хэрэгсэхгүй болгож шийдвэрлэсэн нь зөрчилтэй хуульд нийцээгүй байна.

 

            Дээрх үндэслэлээр хариуцагчийн давж заалдах гомдлыг хангаж, анхан шатны шүүхийн шийдвэрийг хүчингүй болгож хэргийг дахин шийдвэрлүүлэхээр анхан шатны шүүхэд буцаах нь зүйтэй гэж давж заалдах шатны шүүх бүрэлдэхүүн дүгнэв.

           

Иргэний хэрэг шүүхэд хянан шийдвэрлэх тухай хуулийн 167 дугаар зүйлийн 167.1.5, 168 дугаар зүйлийн 168.1.3-т заасныг удирдлага болгон ТОГТООХ НЬ:

 

1. Сонгинохайрхан дүүргийн Иргэний хэргийн анхан шатны шүүхийн 2016 оны 9 дүгээр сарын 01-ний өдрийн 184/ШШ2016/00765 дугаар шийдвэрийг хүчингүй болгож хэргийг дахин шийдвэрлүүлэхээр анхан шатны шүүхэд буцаасугай.

 

2. Иргэний хэрэг шүүхэд хянан шийдвэрлэх тухай хуулийн 59 дүгээр зүйлийн 59.3 дахь хэсэгт зааснаар хариуцагч Б.Бямбажавын давж заалдах журмаар гомдол гаргахдаа улсын тэмдэгтийн хураамжид төлсөн 290 075 төгрөгийг шүүгчийн захирамжаар буцаан олгосугай.

 

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7-д зааснаар магадлалыг танилцуулан сонсгож, 7 хоног өнгөрснөөс хойш 14 хоногийн дотор шүүх хуралдааны оролцогч талууд шүүхэд хүрэлцэн ирж магадлалыг өөрөө гардан авах үүргээ биелүүлээгүй нь хяналтын журмаар гомдол гаргах хугацааг тоолоход саад болохгүй бөгөөд шүүх хуралдаанд оролцоогүй талд магадлалыг гардуулснаар гомдол гаргах хугацааг тоолохыг дурдсугай.

 

 

 

                            ЕРӨНХИЙ ШҮҮГЧ                                                Ж.ОЮУНТУНГАЛАГ

 

                                                                                   

                                          ШҮҮГЧИД                                     Н.БАТЗОРИГ

 

 

                                                                                                Д.ДЭЛГЭРЦЭЦЭГ