2016 оны 09 сарын 16 өдөр

Дугаар 101/ШШ2016/05842

Улаанбаатар хот

 

 

Хариуцагчийн зөвшөөрлийг баталж,

хэргийг хэрэгсэхгүй болгох тухай

 

 

   Баянзүрх дүүргийн Иргэний хэргийн анхан шатны шүүхийн шүүгч Б.Ундраа би,

Нэхэмжлэгч: Улаанбаатар хот, Хан-Уул дүүрэг, 15 дугаар хороо, Гэгээнтэн хотхон Фидес Цамхаг, 202 тоотод байрлах, Эм Эй Эф ББСБ /хуулийн этгээдийн регистрийн дугаар 5617375/-ын нэхэмжлэлтэй,

Хариуцагч: Улаанбаатар хот, Баянзүрх дүүрэг, 15 дугаар хороо, 72 дугаар байр 60 тоотод оршин суух, Боржигон овогт Жамсранжавийн Болормаа /регистрийн дугаар ЦВ66092521/-д холбогдох,

  309,822,049 төгрөг гаргуулах тухай иргэний хэргийг хянаад

 

ТОДОРХОЙЛОХ нь:

 

Нэхэмжлэгч “Эм Эй Эф ББСБ” ХХК нь шүүхэд гаргасан нэхэмжлэлдээ: “Ж.Болормаа нь 2015 оны 3 дугаар сарын 18-ны өдөр Эм Эй Эф Банк бус санхүүгийн байгууллагаас №15030077 тоот зээлийн гэрээ байгуулан 191,000,000 төгрөгийн зээлийг эргэлтийн хөрөнгийн зориулалтаар, сарын 3,4 хувийн хүүтэй, 36 сарын хугацаатай авсан. Гэтэл зээлдэгч Ж.Болормаа нь авсан зээлээ зээлийн гэрээнд заасан төлбөрийн хуваарийн дагуу төлөхгүй гэрээний үүргээ зөрчсөөр ирсэн. Бид зээлдэгч Ж.Болормаад зээлээ тохиролцсон хуваарийн дагуу төлөхийг удаа дараа шаардаж, сануулсан боловч зээлээ төлөхгүй гэрээний үүргээ ноцтой зөрчиж биднийг хохироож байна.

Иймд үндсэн зээл 190,876,654 төгрөг, хүү 100,048,318 төгрөг, нэмэгдүүлсэн хүү 18,906,077 төгрөгийн хамт нийт 309,822,049 төгрөгийг Ж.Болормаагаас гаргуулан өгнө үү. Иргэний хэрэг шүүхэд хянан шийдвэрлэх тухай хуульд заасны дагуу шүүхээс гарах шийдвэрийн биелэлтийг баталгаажуулж хариуцагчийн эд хөрөнгийг нэхэмжлэлийн үнийн дүнгийн хэмжээгээр битүүмжилж, дансны зарлагын хөдөлгөөнийг нэхэмжлэлийн үнийн дүнгийн хэмжээгээр хязгаарлаж өгнө үү” гэжээ.

Хариуцагч Ж.Болормаа нь шүүхэд гаргасан хариу тайлбартаа: “Жамсранжав овогтой Болормаа миний бие “Эм Эй Эф ББСБ” ХХК-ийн нэхэмжилсэн 309,822,049 төгрөгийг төлж барагдуулна. Нэхэмжлэлийн шаардлагыг хүлээн зөвшөөрч байна” гэжээ.

ҮНДЭСЛЭХ нь:

 

Нэхэмжлэгч “Эм Эй Эф ББСБ” ХХК нь хариуцагч Ж.Болормаад холбогдуулан 309,822,049 төгрөг гаргуулах тухай нэхэмжлэлийг шүүхэд гаргажээ.

 

Хэрэг хянан шийдвэрлэх ажиллагааны явцад хариуцагч Ж.Болормаа нь нэхэмжлэлийн шаардлага болох 309,822,049 төгрөгийг бүрэн төлж барагдуулахаар хүлээн зөвшөөрсөн тайлбарыг шүүхэд ирүүлсэн байна.

 

Иймд Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1-т заасны дагуу хариуцагчийн зөвшөөрлийг баталж, хэргийг хялбаршуулсан журмаар шийдвэрлэх нь зүйтэй гэж үзлээ.

 

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйлүүдэд заасныг удирдлага болгон

 

ЗАХИРАМЖЛАХ  нь:

 

1. Нэхэмжлэгч “Эм Эй Эф ББСБ” ХХК-ийн нэхэмжлэлтэй Ж.Болормаад холбогдох 309,822,049 төгрөг гаргуулах тухай нэхэмжлэлийн шаардлагыг хариуцагч Ж.Болормаа нь хүлээн зөвшөөрснийг баталж, хэргийг хэрэгсэхгүй болгосугай.

 

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5.-д заасныг баримтлан, “Эм Эй Эф ББСБ” -аас улсын тэмдэгтийн хураамжид 2016 оны 09 дүгээр сарын 05-ны өдөр урьдчилан төлсөн 1,707,100 төгрөгийн тал хувь болох 853,550 төгрөгийг улсын төсвийн орлогод хэвээр үлдээж, тал хувь 853,550 төгрөгийг Баянзүрх дүүргийн татварын хэлтсийн 2609006167 дугаар данснаас, хариуцагч Ж.Болормаагаас улсын тэмдэгтийн хураамжид 853,550 төгрөгийг тус тус гаргуулан, нэхэмжлэгч “Эм Эй Эф” ББСБ-д олгосугай.

 

1. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

 

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн  74.4-т зааснаар хэргийг хялбаршуулсан журмаар хянан шийдвэрлэсэн захирамжид зохигч давж заалдах журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

 

ШҮҮГЧ                                               Б.УНДРАА