2019           11             07                                          2019/ШЦТ/324

       

МОНГОЛ УЛСЫН НЭРИЙН ӨМНӨӨС

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

Шүүх хуралдааны нарийн бичгийн дарга Г.Ган-Эрдэнэ

Улсын яллагчаар Б.Сувд-Эрдэнэ

Шүүгдэгчийн өмгөөлөгч И.Отгонсүрэн

Шүүгдэгч Б.Б  нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар яллах дүгнэлт үйлдэж ирүүлсэн И  м  овогт Б.Б-д холбогдох эрүүгийн 1734003930138 дугаартай хэргийг 2019 оны 10 дугаар сарын 16-ны өдөр хүлээн авч хянан хэлэлцэв.

Шүүгдэгчийн биеийн байцаалт:

Монгол Улсын иргэн, 1970 оны 2 дугаар сарын 28-ны өдөр Улаанбаатар хотод төрсөн, 49 настай, эрэгтэй, бүрэн бус дунд боловсролтой, мэргэжилгүй, ам бүл ганцаараа Улаанбаатар хот Баянгол дүүргийн 11 дүгээр хороо Зүүн-Ард Аюушийн 1-47 тоотод оршин суух хаягтай, улсаас авсан гавь шагналгүй, урьд нь

-1986 оны 02 дугаар сарын 04-ний өдрийн 22 дугаартай Таслан шийдвэрлэх тогтоолоор Эрүүгийн хуулийн 1096 зүйлд зааснаар 2 жилийн хорих ялаар шийтгүүлж 1 жилээр тогтоол биелүүлэхийг хойшлуулсан,

-1987 оны 3 дугдар сарын 18-ны өдрийн 93 дугаартай Таслан шийдвэрлэх тогтоолоор Эрүүгийн хуулийн 1096-д зааснаар 2 жилийн хорих ял оногдуулан өмнөх шийтгэх тогтоолоор оногдуулсан ялаас 1 жилийн хорих ялыг нэмж бүгд 3 жилийн хорих ялаар шийтгүүлсэн,

-1990 оны 01 дүгээр сарын 26-ны өдрийн 8 дугаартай Таслан шийдвэрлэх тогтоолоор Эрүүгийн хуулийн тусгай ангийн 155.2 дахь хэсэгт зааснаар 15 жилийн хорих ял,

-1991 оны 07 дугаар сарын 27-ний өдрийн 237 дугаартай Таслан шийдвэрлэх тогтоолоор Эрүүгийн хуулийн 153.3-д зааснаар 1 жил 6 сарын хугацаагаар хорих ялаар өмнөх 1990 оны 1 дүгээр сарын 26-ны өдрийн 8 дугаартай Таслан шийдвэрлэх тогтоолоор оногдуулсан 13 жил 2 сар 15 хоногийн хорих ял дээр нэмж бүгд 14 жил 6 сар 15 хоногийн хорих ялыг онцгой дэглэмтэй хорих ангид эдлүүлэхээр шийдвэрлэсэн байх ба 2002 оны 11 дүгээр сарын 15-ны өдөр 1 жил 5 сар 6 хоногийн өмнө тэнсэн суллагдсан,

-Баянгол дүүргийн шүүхийн 2003 оны 12 дугаар сарын 10-ны өдрийн 295 дугаартай шийтгэх тогтоолоор Эрүүгийн хуулийн 145.4 дэх хэсэгт зааснаар 10 жил 1 сарын хорих ял, өмнөх Октябрь дүүргийн шүүхийн 1991 оны 7 сарын 27-ны өдрийн 237 дугаартай таслан шийдвэрлэх тогтоолоор оногдуулсан ялаас эдлээгүй үлдсэн 1 жил 5 сар 6 хоногийн хорих ялыг нэмж нэгтгэн биечлэн эдлэх ялыг 10 жил 6 сарын хорих ялаар тус тус шийтгэгдсэн, бие эрүүл, хэрэг хариуцах чадвартай гэх, И м  овогт Б.Б-д /РД:__70022815/

Холбогдсон хэргийн талаар /яллах дүгнэлтэд дурдагдсанаар/

Яллагдагч Б.Б  нь “Цалиг констракшн” ХХК-нд цэвэрлэгээний ажил хийж байхдаа 2017 оны 10 дугаар сарын 14-ний өдөр Төв аймгийн Сэргэлэн сумын 1 дүгээр багт үйл ажиллагаа явуулдаг “Мөнхийн баян гал” ХХК-ны хашаан дотор байх дамартай цахилгааны зэс голтой кабель утаснаас 9 м 50 см утас тасдан хулайлан авч, тус компанид 1.366.259 төгрөгийн хохирол учруулсан гэмт хэрэгт холбогджээ.

                                                        ТОДОРХОЙЛОХ нь:

            Шүүхийн хэлэлцүүлэгт:

            Шүүгдэгч Б.Б нь: “Мөнхийн Баянгол компанид ажиллаж байхдаа хашааны гадна талд байсан кабелын утсыг авчихаж болмоор юм шиг харагдаад байхаар нь би 9 метрийг аваад уурын зууханд оруулж гадуур хальсыг нь хуулаад байж байтал харуул нь намайг барьсан... 1366259 төгрөгний хохирол учруулсан...” гэв.

           Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хэргийн газар үзлэг хийсэн тэмдэглэл /хх-ийн 1-3 тал/, хэргийн газарт нөхөн үзлэг хийсэн тэмдэглэл /хх-ийн 125 тал/, хохирогч А.Ариунтуяагийн мэдүүлэг /хх-ийн 130 тал/, гэрч Н.Ганбаагийн мэдүүлэг /хх-ийн 14-15 тал/, гэрч Ч.Төгсжаргалын мэдүүлэг /хх-ийн 143-144 тал/, шүүгдэгч Б.Б-ын яллагдагчаар өгсөн мэдүүлэг /хх-ийн 60, 205 тал/ иргэний нэхэмжлэгч Н.Ганчимэгийн мэдүүлэг /хх-ийн 136 тал/, хохирогч Т.Оюунтуяагийн мэдүүлэг /хх-ийн 97 тал/, хохирогч А.Ариунтуяагийн мэдүүлэг /хх-ийн 130 тал/, гэрч Н.Ганбаагийн мэдүүлэг /хх-ийн 14-15 тал/ зэргийг тус тус шинжлэн судлав.

 

            Шүүгдэгч Б.Б нь “Цалиг констракшн” ХХК-нд цэвэрлэгээний ажил хийж байхдаа 2017 оны 10 дугаар сарын 14-ний өдөр Төв аймгийн Сэргэлэн сумын 1 дүгээр багт үйл ажиллагаа явуулдаг “Мөнхийн баян гал” ХХК-ны хашаан дотор байх дамартай цахилгааны зэс голтой кабель утаснаас 9 м 50 см утас тасдан хулайлан авч, тус компанид 1.366.259 төгрөгийн хохирол учруулсан болох нь:

• Гэмт хэргийн талаарх гомдол мэдээлэл хүлээн авсан тэмдэглэл /хх-ийн 02 тал/
• Хэргийн газарт үзлэг хийсэн тэмдэглэл, гэрэл зургийн үзүүлэлтүүд /хх-ийн 3-5 тал/
• Хан Үнэлэмж ХХК-ийн үнэлгээний тайлан /хх-ийн 18 тал/
• Хэргийн газарт нөхөн үзлэг хийсэн тэмдэглэл, гэрэл зургийн үзүүлэлтүүд /хх-ийн 127-128 тал/
• Манай компани нь туслан гүйцэтгэгч “Цалиг констракшн” ХХК-иас хохирлоо барагдуулсан учир гомдол, санал нэхэмжлэх зүйл байхгүй “ гэх мэдүүлэг /хх-ийн 130-131 тал/
• Мөнхийн баян гал ХХК-нийн агуулахаас гаргасан барилгын материалын бүртгэл /хх-ийн 191 тал/
• Мөрдөгчийн тогтоол, гэрэл зургийн үзүүлэлт, 1 хуудас баримт /хх-ийн 139-141 тал/
• Мөнхийн Баян гал ХХК болон Цалиг констракшн ХХК-ны ажил гүйцэтгэх гэрээ /хх-ийн 176-191 тал/
• Эрүүгийн хэрэг үүсгэж яллагдагчаар татах тухай прокурорын тогтоол /хх-ийн 204 тал/
• Хохирогч Т.Оюунтуяагийн мөрдөн байцаалтын шатанд мэдүүлсэн: “...Манай Мөнхийн баян гал” ХХК нь Төв аймгийн Сэргэлэн сумын 1-р багийн нутаг “Цагаан хяр өртөө” гэх газарт цемент үйлдвэрлэх үйл ажиллагааг 2016 оноос хойш тогтвортой явуулж байна. Туслан гүйцэтгэгч “Цалиг констракшн” ХХК-тай 2017 оны 6 сараас хойш цэвэрлэгээ, үйлчилгээ хариуцуулан ажиллуулж байгаа юм. “Цалиг констракшн” ХХК-ний ажилчид манай үйлдвэрийн хашаан дотор байрлаж ажилладаг байсан. Тус “Цалиг констракшн” ХХК-ний ажилчин болох Б.Б нь хулгай хийж байгаад үйлдэлд дээрээ хамгаалалтын ажилтанд баригдсан байсан. Тус зэс утас манай компаний өмч болохыг агуулахаас гаргасан санхүүгийн баримт бичгийг хавсаргахаар өгч байна. Манай компани нь үйлдвэрийн тоног төхөөрөмжийн БНХАУ-д үйл ажиллагаа явуулдаг туслан гүйцэтгэгч угсралт холболтын ажлыг хийж гүйцэтгүүлсэн. Тухайн компани нь манай компаниас хийсэн ажпын хөлс, төлбөр мөнгөө бүрэн авч ажпаа дуусгаад явсан. “...Хулгайлагдсан гэх 32.3 кг зэс утасыг цагдаагаас үзлэг хийгээд манай байгууллага дээр үлдээгээд явсан. Манай компаниас зөвхөн 9 метр 50 см цахилгааны кабель утас алдагдсан. Манай туслан гүйцэтгэгч компани бол “Цалиг констракшн” ХХК байгаа юм, хэрэгг Талиг гэж техникийн алдаа гарч бичигдсэн байна. Манай компани туслан гүйцэтгэгч “Цалиг констракшн” ХХК-иас хохирлоо барагдуулж авсан, байгуулсан гэрээ болон журмын дагуу 5 сая төгрөгийн суутгал хийж авсан...” /хх- ийн 194-195 тал/
• Гэрч Н.Ганбаагийн мөрдөн байцаалтын шатанд мэдүүлсэн: “...2017 оны 10 сарын 14-ний өдрийн 20 цагийн орчим “Мөнхийн баян гал” ХХК-ны хашаан дотор байдаг обьектоо эргээд явж байхад уурын зуухны баруун талд байсан дамартай кабель утаснаас тасдаад уурын зуух руу авч явсан мөр гарсан байсан. Тухайн уурын зуухыг очиж шалгахад уурын зуухны өрөөнд зэс утасыг өөрийнхөө биед ороогоод зогсож байсан...” гэх мэдүүлэг, /хх-ийн 14-15 тал/
• Иргэний нэхмэжлэгч Н.Ганчимэгийн мөрдөн байцаалтын шатанд мэдүүлсэн: “...Би “Цалиг констракшн” ХХК-нд хөдөлмөр хамгааллын инженер ажилтай, уг ажпыг 2017 оны 4 сараас хойш хийж байна. 2017 оны 10 сарын 14-ний өдөр Төв аймгийн Сэргэлэн сумын 1 дүгээр багийн нутагт “Мөнхийн баян гал” ХХК-ны хашаан дотор ажилчдын байранд амарч байхад харуулаас утасдаж намайг дуудсан юм. Тэгээд очих үед манай “Цалиг констракшн” ХХК-ны ажилтан Б  нь зэс кабель хулгайлж 2 ширхэгийг биедээ ороочихсон, 3 ширхэгийг газар харуулын гэрт дотор тавьчихсан байж байсан. Би түүнээс учир байдлыг асуухад “тэрүүгээр цэвэрлэгээ хийж явж байгаад авч болмоор санагдахаар хулгай хийсэн юм” гэж ярьсан. Тэгэд орой нь цагдаа нар үзлэг хийгээд явсан. Манай “Цалиг констракшн” ХХК- нь “Мөнхийн баян гал” ХХК-тай байгуулсан гэрээний дагуу цэвэрлэгээ, үйлчилгээний туслах ажил хийж гүйцэтгэдэг юм. Манай компани “Мөнхийн баян гал” ХХК-тай байгуулсан гэрээний дагуу 5.000.000 төгрөгийг төлж барагдуулсан. Зэс голтой кабель утасны үнэ 1.366.259 төгрөгийн ажилтан Б-ын цалингаас 900.000 төгрөгийг суутгасан үлдэгдэл 466.259 төгрөгийг нэхэмжилж байна. Цагдаагаас үзлэг хийсний дараа килограммыг жинлэж үзээд байгууллагад нь хүлээлгэж өгөөд явсан. Би Б-ын хулгай хийсэн байдлыг нь гэрэл зураг авч угаасан байгаа хэрэгт хавсаргахаар өгч болно...” гэх мэдүүлэг /хх-ийн 135-136 тал/
• Гэрч Ч.Төгсжаргалын мөрдөн байцаалтын шатанд мэдүүлсэн: “...Мөнхийн баян гал” ХХК-ны үйлдвэрийн обьектыг тойрсон ногоон өнгийн том торн хашаатай, уг хашааны дотор Монгол ажилчдын байрны ар талд цэнхэр өнгийн төмөр хашаатай, уг цэнхэр өнгийн хашаан дотор илүү гарсан зэс голтой дамартай кабель утаснуудыг хадгалдаг юм. Тухайн үед цэнхэр өнгийн хашааны гадна талд байсан нэг дамартай утас ил байснаас хулгайлсан байсан. Тус кабель утас нь “Мөнхийн баян гал” ХХК-ний эзэмшлийн эд хөрөнгө байгаа юм. Б.Б  нь үйлдвэрийн хашаан дотор ажиллаж, амьдардаг “Цалиг констракшн" ХХК-ний туслах ажилтан гэж ярьж байсан...” гэх мэдүүлэг /хх-ийн 143-144 тал/
• Шүүгдэгч Б.Б-ын мөрдөн байцаалтын шатанд яллагдагчаар мэдүүлсэн: “...Би Төв аймгийн Сэргэлэн сумын нутагт байрлах “Мөнхийн баян гал” ХХК-ны цементний үйлдвэрт туслан гүйцэтгэгч “Цалиг констракшн” ХХК-ны туслах ажилтнаар 3 сар гаран ажиллаж байсан. Тэгээд 2017 оны 10 дугаар сарын 14-ны орой “Мөнхийн баян гал” ХХК-ны уурын зуухны хажуу талын жижиг цэнхэр өнгийн хашааны гадна талд дан ганц үлдсэн байсан ороосон кабель зэс утаснаас хулгайлан тасдаж аваад уурын зуухны цаад талын хоосон эзэнгүй өрөөнд орж зэс утасны гадна талыг хуулж байгаад хамгаалалтын ажилтанд баригдсан. Дараа нь цагдаа ирээд хэмжиж үзэхэд миний хулгайлсан утасны урт нь 9 метр 50 см хэмжээтэй байсан...” гэх үйлдсэн гэмт хэргээ хүлээн мэдүүлсэн мэдүүлэг, /хх-ийн 60 тал/ зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдож тогтоогдож байна.

Шүүгдэгч Б.Б  нь бусдын эд хөрөнгийг хүч хэрэглэхгүйгээр, нууцаар хууль бусаар хулгайлах гэмт хэргийн нөхцөл байдалд хийсэн хууль зүйн дүгнэлтийн талаар:  

Шүүгдэгч Б.Б  нь “Мөнхийн баян гал” ХХК-ны хашаан дотор байх дамартай цахилгааны зэс голтой кабель утаснаас 9 м 50 см утасыг хүч хэрэглэхгүйгээр, нууцаар хууль бусаар авсан үйлдэл нь Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэргийн объектив талын шинжүүдийг бүрэн хангасан.

Уг гэмт хэрэг нь гэм буруугийн санаатай хэлбэрээр үйлдэгдсэн.

Эрүүгийн хуулийн 2.3 дугаар зүйлийн 1 дэх хэсэгт зааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгоно.

Шүүгдэгч Б.Б  нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байжээ гэж үзэх үндэслэлтэй.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, шүүгдэгч Б.Б-ын үйлдэл нь  Эрүүгийн хуулийн тусгай ангийн 17.1 дүгээр зүйлийн 1 дэх хэсэгт гэмт хэргийн шинжийг бүрэн хангасан, прокуророос ирүүлсэн хэргийн зүйчлэл тохирсон байх тул шүүгдэгч Б.Б-ыг бусдын эд хөрөнгийг хулгайлах гэмт хэрэг үйлдсэн гэм буруутайд тооцож, ял шийтгэл оногдуулах үндэслэлтэй байна.

 

Гэмт хэргийн улмаас учирсан хохирол, хор уршгийн талаар:

            Мөрдөн байцаалтын шатанд хохирогч Т.Оюунтуяагийн “...Манай компани нь туслан гүйцэтгэгч “Цалиг констракшн” ХХК-иас хохирлоо барагдуулсан учир гомдол, санал нэхэмжлэх зүйл байхгүй...” гэх мэдүүлэг /хх-ийн 130-131 тал/, иргэний нэхэмжлэгч Н.Ганчимэгийн “...Манай “Цалиг констракшн” ХХКомпани нь “Мөнхийн баян гал” ХХК-тай байгуулсан гэрээний дагуу цэвэрлэгээ, үйлчилгээний туслах ажил хийж гүйцэтгэдэг юм. Манай компани “Мөнхийн баян гал” ХХК-тай байгуулсан гэрээний дагуу 5.000.000 төгрөгийг төлж барагдуулсан. Зэс голтой кабель утасны үнэ 1.366.259 төгрөгийн ажилтан Б.Батболдын цалингаас 900.000 төгрөгийг суутгасан үлдэгдэл 466.259 төгрөгийг нэхэмжилнэ...” гэсэн мэдүүлэг /хх-ийн 135 тал/ болон шүүхийн хэлэлцүүлэгт шүүгдэгч  Б.Б  нь энэ талаар маргаан гаргаагүй байх тул 466.259 төгрөгийг гаргуулж “Цалиг констракшн” ХХК-д олгох нь зүйтэй байна.

Эрүүгийн хариуцлага хүлээлгэх талаар:

Шүүхийн хэлэлцүүлэгт оролцсон улсын яллагчаас “Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар бусдын эд хөрөнгийг хүч хэрэглэхгүйгээр нууцаар хулгайлах гэмт хэрэгт гэм буруутайд шүүхээс тооцсон тул шүүгдэгч Б.Б-д эрүүгийн хариуцлага хүлээлгэх үндэслэлтэй байна. Шүүгдэгч Б.Б-д Эрүүгийн хуулийн тусгай ангийн 17.1 дугаар  зүйлийн 1 дэх хэсэгт зааснаар хүний эрүүл мэндэд хүндэвтэр хохирол санаатай учруулсан гэмт хэрэгт 2 жил хорих ял оногдуулж, оногдуулсан ялыг эрүүгийн хуулийн ерөний ангийн 5.6 дугаар зүйлийн 1 дэх хэсэгт заасан нээлттэй хорих байгууллагад эдлүүлэх, түүний цагдан хоригдсон хоногийг Эрүүгийн хуулийн ерөнхий ангийн 6.10 дугаар зүйлд зааснаар хорих ялд нь оруулж тооцох” ялын дүгнэлтийг,

Шүүгдэгчийн өмгөөлөгч И.Отгонсүрэн нь “Шүүгдэгч Б  нь хохирол төлбөрийн хувьд төлөгдөөгүй үлдсэн 466269 мянган төгрөгийг төлөхөө илэрхийлж байгаа, шүүгдэгч төлсөн гэх боловч баримт байхгүй байна. Эрүүгийн хуулийн тусгай ангийн 17.1 дүгээр зүйлийн 1 хөнгөн гэмт хэрэг учир 1-5 жилийн хорих ялтай, 240-720 цагийн нийтэд тустай ажил хийлгэх санкцтай, ийм учраас хохирлын 70-80 хувийг нь төлсөн, үлдсэн төлбөрөө төлөхөө илэрхийлсэн зэрэг байдлыг харгалзан үзэж хуульд заасан оногдуулсан ялыг Эрүүгийн хуулийн 6.7 дугаар 1 дэх хэсгийг баримталж тэнсэж өгнө үү гэсэн саналыг шүүхэд оруулж байна. Хэрвээ хорих ялыг тэнсэх боломжгүй гэж үзвэл 240-720 цагийн нийтэд тустай ажил хийлгэх ялыг хэрэглэж өгнө үү” саналыг тус тус гаргасан байна.

Шүүгдэгч Б.Б-ын холбогдсон Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэрэг нь “бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт “Энэ хуулийн тусгай ангид хорих ялын дээд хэмжээг таван жил, түүнээс доош хугацаагаар оногдуулахаар тогтоосон, эсхүл хорих ял оногдуулахаар заагаагүй гэмт хэргийг хөнгөн гэмт хэрэг гэнэ” гэж зааснаар хөнгөн гэмт хэргийн ангилалд хамаарч байна.

Шүүх шүүгдэгч Б.Б-д эрүүгийн хариуцлага хүлээлгэхдээ мөрдөн байцаалтын шатанд болон шүүхийн шатанд гэм буруугийн талаар маргаагүй, гэмт хэрэг үйлдсэн нөхцөл байдал, учирсан хохирол, хор уршгийн шинж чанар зэргийг харгалзан 720 цагийн нийтэд тустай ажил хийлгэх ял оногдуулах нь зүйтэй байна.

Эрүүгийн хуулийн ерөнхий ангийн 6.10 дугаар зүйлийн 2 дахь хэсэгт зааснаар шүүгдэгч Б.Б-ын цагдан хоригдсон 120 хоногийн нэг хоногийг найман цагаар тооцож /8х120=960/, түүнд оногдуулсан 720 цагийн нийтэд тустай ажил хийлгэх ялыг эдэлсэнд тооцож, шийтгэх тогтоол хүчин төгөлдөр болтол шүүгдэгч Б.Б-д авсан цагдан хорих таслан сэргийлэх арга хэмжээг өөрчилж, хувийн баталгаа гаргах таслан сэргийлэх арга хэмжээ авах нь зүйтэй байна.  

Бусад асуудлаар:

Хэрэгт битүүмжлэгдсэн эд хөрөнгөгүй, иргэний бичиг баримт шүүхэд ирээгүй болохыг тус тус дурдаж, Улсын дээд шүүхийн Ерөнхий шүүгч, Улсын Ерөнхий Прокурорын 2017 оны 6 сарын 30-ны өдрийн 36,А/68 дугаартай Эрүүгийн хэрэгт хураан авсан хөрөнгө, орлого, барьцааны мөнгө, эд мөрийн баримтыг шийдвэрлэх журмын 5.3-т “Шүүхийн шийдвэрт устгахаар заасан эд мөрийн баримтыг тухайн шүүхийн эд мөрийн баримт шийдвэрлэх комисс шийдвэрлэнэ” гэж зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдаж ирсэн 1 ширхэг цаасны хутга, 2 ширхэг төмөрийн хөрөө зэргийг устгахыг Төв аймгийн Шүүхийн тамгын газарт даалгах нь зүйтэй байна.

 

            Монгол Улсын Шүүхийн тухай хуулийн 31 дүгээр зүйлийн 1, 31 дүгээр зүйлийн 3.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг тус тус удирдлага болгон

                                             

ТОГТООХ нь:

 

1. Шүүгдэгч И м  овогт Б.Б-ыг бусдын эд хөрөнгийг хүч хэрэглэхгүйгээр, нууцаар, хууль бусаар авсан гэмт хэргийг үйлдсэн гэм буруутайд тооцсугай.

 

1. Шүүгдэгч Б.Б-ыг Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар  720 /долоон зуун хорь/ цагийн нийтэд тустай ажил хийлгэх ялаар шийтгэсүгэй.

 

1. Эрүүгийн хуулийн ерөнхий ангийн 6.10 дугаар зүйлийн 2 дахь хэсэгт заасныг баримтлан шүүгдэгч Б.Б-ын цагдан хоригдсон 120 хоногийн нэг хоногийг найман цагаар тооцож /8х120=960/, шүүгдэгч Б.Батболдыг 720 цагийн нийтэд тустай ажил хийлгэх ялыг эдэлсэнд тооцсугай.

 

1. Шийтгэх тогтоол хүчин төгөлдөр болтол шүүгдэгч Б.Б-д авсан хувийн цагдан хорих таслан сэргийлэх арга хэмжээг өөрчилж, хувийн баталгаа гаргах таслан сэргийлэх арга хэмжээ авч, нэн даруй сулалсугай. 

 

1. Иргэний хуулийн 497 дугаар зүйлийн 1, 510 дугаар зүйлийн 510.1 дэх хэсэгт тус тус зааснаар шүүгдэгч Б.Б-оос 466.259 /дөрвөн зуун жаран зургаан мянга хоёр зуун тавин ес/ төгрөгийг гаргуулж, “Цалиг констракшн” ХХК-д олгосугай.

 

1. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсгийн 1.2-т зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдаж ирсэн 1 ширхэг цаасны хутга, 2 ширхэг төмөрийн хөрөө зэргийг устгахыг Төв аймгийн шүүхийн Тамгын газарт даалгасугай.

 

1. Хэрэгт битүүмжлэгдсэн эд хөрөнгөгүй, иргэний бичиг баримт шүүхэд ирээгүй болохыг тус тус дурдсугай.

 

1. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, хохирогч, иргэний нэхэмжлэгч, иргэний хариуцагч, тэдгээрийг төлөөлөгч, өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах М.Оюунсүрэнд даалгасугай. 

 

1. Давж заалдах гомдол гаргах, эсэргүүцэл бичих эрх бүхий оролцогч шийтгэх тогтоолыг эс зөвшөөрвөл гардан авснаас хойш, эсхүл энэ хуулийн 11.9 дүгээр зүйлд заасны дагуу хүргүүлснээс хойш 14 хоногийн дотор Төв аймаг дахь Эрүү, Иргэний хэргийн Давж заалдах шатны шүүхэд давж заалдах гомдол гаргах, эсэргүүцэл бичих эрхтэй.

 

1.  Анхан шатны шүүхийн шийдвэрт давж заалдах гомдол, эсэргүүцэл бичигдсэн бол шүүхийн шийдвэрийн биелэлтийг түдгэлзүүлж, шүүгдэгч Б.Б-д авсан хувийн баталгаа гаргах таслан сэргийлэх арга хэмжээг авсугай.

 

 

 

 

 

•