МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,   

Шүүх хуралдааны нарийн бичгийн дарга П.Ундрах,

Улсын яллагчаар, хяналтын прокурор Ч.Батзориг,

Шүүгдэгчийн өмгөөлөгч В.Энхболд, 

Шүүгдэгч Л.Б- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн прокурорын газрын хяналтын прокуророос Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Л.Б-эд холбогдох эрүүгийн 1938006650432 дугаартай хэргийг хянан хэлэлцэв.

Шүүгдэгчийн биеийн байцаалт:

Монгол Улсын иргэн, Л.Б.

Шүүгдэгч Л.Б- нь Хөвсгөл аймгийн Рашаант сумын 2 дугаар багийн нутаг дэвсгэр “Зүүн түрүү” гэх газраас 2019 оны 08 дугаар сарын 02-ны өдөр 69 ширхэг буюу 9.6 м.куб хэмжээтэй хэрэглээний хуурай шинэс мод зохих зөвшөөрөлгүй бэлтгэж экологи-эдийн засагт 1.036.800 төгрөгний шууд хохирол учруулсан гэмт хэргийг үйлдсэнд холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгчийн гэм буруугийн талаар:

Шүүгдэгч Л.Б- нь ашиг хонжоо олох зорилгоор Хөвсгөл аймгийн Рашаант сумын 2 дугаар багийн нутаг дэвсгэр “Зүүн түрүү” гэх газраас 2019 оны 08 дугаар сарын 02-ны өдөр 69 ширхэг буюу 9.6 м.куб хэмжээтэй хэрэглээний хуурай шинэс мод зохих зөвшөөрөлгүй бэлтгэж экологи-эдийн засагт 3.110.400 төгрөгийн хохирол учруулан “Хууль бусаар мод бэлтгэх” гэмт хэргийг үйлдсэн байна. 

Шүүгдэгчийн гэмт хэрэг үйлдсэн гэмт буруутай болох нь хэрэгт авагдсан нотлох баримтууд болох:

• Зөрчлийн талаар амаар болон холбоо, мэдээллийн хэрэгслээр гаргасан гомдол, мэдээллийг  хүлээн авсан тэмдэглэл /хх-ийн 6 дугаар хуудас/,
• Холбогдогчоос мэдүүлэг авсан тэмдэглэл /хх-ийн 7-8 дугаар хуудас/,
• Хэргийн газрын үзлэг хийсэн тэмдэглэл, гэрэл зургийн үзүүлэлт /хх-ийн 9-11 дүгээр хуудас/,
• Эд мөрийн баримтаар улаан, цагаан өнгийн моторт хөрөөг хураан авсан тэмдэглэл /хх-ийн 14 дүгээр хуудас/,
• 2 метрийн урттай, 380 ширхэг хэрэглээний хуурай шинэс модыг битүүмжилсэн тэмдэглэл /хх-ийн 18-19 дүгээр хуудас/,
• STEYR маркын ... ХӨВ улсын дугаартай тээврийн хэрэгслийг битүүмжилсэн тэмдэглэл /хх-ийн 22-23 дугаар хуудас/,
• Хохирогч Э.А-гийн мөрдөн шалгах ажиллагааны үед өгсөн: “...Экологи-эдийн засгийн үнэлгээний дагуу учирсан хохирлыг орон нутгийн дансанд буруутай этгээд нь тушаах хэрэгтэй байна” гэх мэдүүлэг /хх-ийн 29-30 дугаар хуудас/,
• Гэрч М.Б-ийн мөрдөн шалгах ажиллагааны үед өгсөн: “...Би байгаль хамгаалагч Ө-тай хамт хоёулаа очиж мод бэлтгэсэн газарт нь үзлэг хийсэн. Үзлэг хийхэд ойролцоогоор 100:50 метр квадрат талбайд 69 ширхэг босоо модыг унагааж бэлтгэсэн ул мөр илэрсэн. Л.Б-ийн бэлтгэсэн мод нь босоо хуурай мод байсан. Мэдүүлэг авахад мод бэлтгэсэн гэдгээ хүлээн зөвшөөрсөн, эрхийн бичиг аваагүй гэдгээ ч зөвшөөрсөн” гэх мэдүүлэг /хх-ийн 32-33 дугаар хуудас/,
• Гэрч Э.Ө-ын мөрдөн шалгах ажиллагааны үед өгсөн: “...Өнгөрсөн 8 дугаар сард би ард иргэдийн ярианаас манай сумын 2 дугаар багийн иргэн Л.Б- 2 дугаар багийн нутаг дэвсгэр “Зүүн түрүү” гэх газраас босоо мод бэлтгэсэн гэсэн мэдээлэл авсан. Ингээд улсын байцаагчийг ажилдаа ороход 09 дүгээр сард хяналт шалгалтаар явахад Зүүн түрүү гэх газарт 69 ширхэг босоо мод унагаасан ул мөр байсан. Л.Б- гуайн мод бэлтгэсэн газарт үзлэг хийхэд хэрэглээний мод бэлтгэсэн гэдэг нь мэдэгдэж байсан. Дандаа босоо хуурай мод унагааж бэлтгэсэн байсан” гэх мэдүүлэг /хх-ийн 35 дугаар хуудас/,
• Гэрч М.Г-ын мөрдөн шалгах ажиллагааны үед өгсөн: “...08 дугаар сарын 10-дын үеэр ...манай захирал А- намайг очоод мод ачаад тариалангийн талбайн тэнд хашаа барих газарт буулгаарай гэсний дагуу би очиж модыг нь ачаад буулгах ёстой газарт нь буулгасан. ...Л.Б- гуай 380 мод гэж байх шиг байсан. ...Би “Улаан-Од” ХХК-ийн эзэмшлийн Стэер маркын ... ХӨВ улсын дугаартай тээврийн хэрэгслээр модыг тээвэрлэсэн” гэх мэдүүлэг /хх-ийн 39 дүгээр хуудас/,
• Гэрч Ц.А-ын мөрдөн шалгах ажиллагааны үед өгсөн: “Би яг худалдаж аваагүй. Л.Б- надаас 1.500.000 төгрөг зээлж авсан байсан. Тэгээд тэр мөнгөнийхөө оронд тариалангийн талбай тойруулж хашаа барих шонгийн мод өгье гээд мод өгсөн. Одоо миний санаж байгаагаар 380 орчим ширхэг мод өгсөн. ...Шонгийн модыг манай компаний жолооч Гантулга гэдэг хүн ачиж ирж буулгасан” гэх мэдүүлэг /хх-ийн 41 дүгээр хуудас/,
• Хөвсгөл аймгийн “Дэлгэрмөрөн” сум дундын ойн ангийн 2019 оны 11 дүгээр сарын 04-ний өдрийн: “...9.6 м.куб хэмжээтэй хэрэглээний хуурай шинэс модны экологи-эдийн засгийн үнэлгээ 1.036.800 төгрөг” гэх дүгнэлт, бөөрөнхий модон материалын хэмжилтийн хүснэгт /хх-ийн 44-45 дугаар хуудас/,
• 2019 оны 11 дүгээр сарын 11-ний өдрийн 23-04-337/04 дугаартай хууль бусаар бэлтгэсэн модыг хурааж улсын орлого болгох тухай улсын байцаагчийн “хохирлыг 3 дахин нэмэгдүүлсэн мөнгөн дүн 3.110.400 төгрөг” гэх акт /хх-ийн 46-47 дугаар хуудас/,
• 2001 онд үйлдвэрлэгдсэн STEYR маркын ... ХӨВ улсын дугаартай тээврийн хэрэгслийг 6.000.000 төгрөгөөр, 2 метрийн урттай 380 ширхэг хэрэглээний хуурай шинэс модыг 760.000 төгрөгөөр, моторт хөрөөг 50.000 төгрөгөөр үнэлсэн тайлан /хх-ийн 49 дүгээр хуудас/,
• Шүүгдэгч Л.Б-ийн мөрдөн шалгах ажиллагааны үед өгсөн: “...Би “Улаан-Од” ХХК-ний захирал А- гэж хүнээс 1.500.000 төгрөг зээлээд авчихсан байсан юм. Тэр мөнгөнийхөө оронд шонгийн мод хэрэгтэй гэхээр нь 380 ширхэг шонгийн мод ойгоос бэлтгэж өгсөн. Би ганцаараа нийт 69 ширхэг босоо модыг өөрийн хөрөөгөөр бэлтгэж 2 метрээр тайрж бэлэн болгочихоод А-д хэлсэн бөгөөд А- компанийхаа машиныг жолооч Тулгын хамт явуулж бид хоёр модыг нь ачиж Тулга модоо аваад явсан. Миний тухайд ойгоос мод бэлтгэхдээ эрхийн бичиг аваагүй. Тийм учраас гэм буруугаа хүлээн зөвшөөрч байна. Гарсан хохирлыг төлж барагдуулна. ...Манай нөхөрлөлийн тусгаарлуулж авсан талбайгаас нарийн шонгийн мод гарахгүй түлшний түлээ л гарахаар талбай байсан учраас өөр газраас модоо бэлтгэчихсэн юм. ...Би өөрөө хувь хүний зүгээс л мод бэлтгэсэн. А-д өгөх ёстой байсан мөнгө бид хоёрын хоорондын л асуудал. Манай нөхөрлөлтэй бол ямар ч хамаагүй. Би хувийн өрөө төлөхийн тулд өөрөө 69 ширхэг модыг унагааж бэлтгэсэн” гэх мэдүүлэг /хх-ийн 58 дугаар хуудас/ болон шүүхийн хэлэлцүүлэгт мэдүүлэхдээ “...үйлдсэн хэргээ хүлээн зөвшөөрч байна” гэж хариулж байсан болон бусад нотлох баримтуудаар нотлогдож байна.

Шүүгдэгчийн хувийн байдлыг тогтоосон дараах баримтуудыг шүүх шинжлэн судлав. Үүнд:

• Хөвсгөл аймгийн Рашаант сумын Талын Ус багийн Засаг даргын тодорхойлолтын хуулбар /хх-ийн 60 дугаар хуудас/,
• Шүүгдэгч Л.Б-ийн иргэний үнэмлэхний хуулбар /хх-ийн 61 дүгээр хуудас/,
• Урьд нь ял шийтгүүлж байгаагүй болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 63 дугаар хуудас/ зэрэг баримт бичиг болно.

Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл байдлуудыг бүрэн гүйцэд тогтоосон гэж үзлээ.

Гэмт хэрэг гарахад шүүгдэгчийн байгаль орчин, экологийн мэдлэг дутмаг байдал дээрх гэмт хэргийг үйлдэх шалтгаан нөхцөл болсон байна.

Шүүгдэгч Л.Б- нь дээрх гэмт хэргийг ганцаараа үйлдсэн болох нь гэрчийн мэдүүлгээр нотлогдож байна.

Шүүгдэгч нь Монгол Улсын Үндсэн хууль, Эрүүгийн хуулиар хамгаалагдсан төрийн хамгаалалтад байх ойн санд хохирол учруулан хүрээлэн байгаа орчны эсрэг гэмт хэргийг үйлдэж, байгаль экологийн тэнцвэрт байдлыг алдагдуулсан хор уршигт зориуд хүргэж, “Хууль бусаар мод бэлтгэх” гэмт хэргийг үйлдсэн нь дээрх гэмт хэргийг гэм буруугийн санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Хэрэгт авагдсан баримтуудыг үндэслэн прокурорын үйлдсэн яллах дүгнэлт нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн хэргийн газрын үзлэг хийсэн тэмдэглэл, эд зүйлд үзлэг хийсэн тэмдэглэл, гэрч, шүүгдэгч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Шүүгдэгч Л.Б- нь ашиг хонжоо олох зорилгоор Хөвсгөл аймгийн Рашаант сумын 2 дугаар багийн нутаг дэвсгэр “Зүүн түрүү” гэх газраас 2019 оны 08 дугаар сарын 02-ны өдөр 69 ширхэг буюу 9.6 м.куб хэмжээтэй хэрэглээний хуурай шинэс мод зохих зөвшөөрөлгүй бэлтгэж экологи-эдийн засагт 3.110.400 төгрөгийн хохирол учруулан “Хууль бусаар мод бэлтгэх” гэмт хэргийг үйлдсэн нь шунахайн сэдэлтээр, санаатайгаар дээрх гэмт хэргийг үйлдсэн байна.  

Байгаль орчныг хамгаалах тухай хуулийн 49 дүгээр зүйлийн 4 дэх хэсгийн 4.1-т “ойн санд учирсан хохирлыг ойн экологи–эдийн засгийн үнэлгээг гурав дахин нэмэгдүүлсэнтэй тэнцэх хэмжээгээр” тогтоосон байх тул шүүгдэгч Л.Б-ийн үйлдсэн энэхүү гэмт хэргийн улмаас шууд учирсан үр дагавар нь байгаль орчин, экологи-эдийн засагт 3.110.400 төгрөгийн хохирол учирсан гэж шүүх дүгнэлээ.

Шүүгдэгч Л.Б-ээс 2019 оны 11 дүгээр сарын 14-ний өдөр Хөвсгөл аймгийн Рашаант сумын төрийн сангийн 100170800952 дугаартай данс руу 3.110.400 төгрөгийг шилжүүлсэн ХААН банкны банк хоорондын шилжүүлгийн баримт, Хөвсгөл аймгийн Рашаант сумын Засаг даргын Тамгын газрын 2019 оны 11 дүгээр сарын 14-ний өдрийн “Тус сумын Талын ус багийн иргэн Л.Б- () нь Байгаль орчны хяналтын улсын байцаагчийн 23-04-337/04 тоот актаар тогтоогдсон нөхөн төлбөр болох 3.110.400 (гурван сая нэг зуун арван мянга дөрвөн зуун) төгрөгийг 2019 оны 11 дүгээр сарын 14-ний өдөр 100170800952 тоот дансанд төлж барагдуулсан нь үнэн болно” гэх албан тоот хэрэгт авагдсан байх тул шүүгдэгчийг бусдад төлөх төлбөргүй гэж үзэв.

Хавтаст хэрэгт баримтжуулсан шүүгдэгчээс гаргуулах хэрэг хянан шийдвэрлэх ажиллагааны зардалгүй байна.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Л.Б-эд эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгчийг анх удаа гэмт хэрэг үйлдсэн, шүүгдэгчийн хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан “зөвшөөрөлгүйгээр ойд мод бэлтгэсэн” үйлдэлд нь Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар эрүүгийн хариуцлага хүлээлгэх нь зүйтэй гэж үзлээ.

Шүүгдэгчийн хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, гэмт хэрэг үйлдсэнээ хүлээн зөвшөөрсөн, гэм буруугийн талаар маргахгүй байгаа байдал, үйлдсэн гэмт хэрэг, хохирол, хор уршигт хандаж буй хандлага, шүүх хуралдаанд мэдүүлэг өгөхдөө гэмшиж байгаа зэргийг харгалзан үзсэн болно.

Шүүгдэгч Л.Б- нь урьд нь гэмт хэрэг үйлдэж байгаагүй болох ял шийтгэлийн лавлагаагаар тогтоогдож байна.

Шүүгдэгчийн хувьд эрүүгийн хариуцлагыг хүндрүүлэх нөхцөл байдалгүй байна.

Шүүх шүүгдэгч Л.Б-эд Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар эрүүгийн хариуцлага хүлээлгэхдээ шүүх хуралдаанд улсын яллагчаас шүүгдэгчид 700 нэгжтэй тэнцэх хэмжээний төгрөгөөр торгох санал гаргасан, шүүгдэгчийн өмгөөлөгчөөс “тохиолдлын шинжтэй нөхцөл байдлын улмаас анх удаа гэмт хэрэг үйлдсэн, ам бүл 7 зэрэг хувийн байдлыг харгалзан торгох ялын доод хэмжээг оногдуулж өгнө үү” гэх хүсэлтийг харгалзан шүүгдэгчид торгох ял оногдуулах нь зүйтэй байна.

Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсэгт зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдсан улаан, цагаан өнгийн моторт хөрөөг хэрэгцээний дагуу ашиглуулахаар “Хөвсгөл аймгийн хот тохижуулах үйлчилгээний төв" ХХК-д шилжүүлэхийг шүүгчийн туслах С.Дэмбэрэлсамбууд,

хэрэгт битүүмжлэгдсэн шүүгдэгч Л.Б-ийн хууль бусаар бэлтгэсэн 2 метрийн урттай, шонгийн зориулалт бүхий 380 ширхэг, 760.000 төгрөгийн үнэлгээ бүхий хэрэглээний хуурай шинэс модыг хураан авч “Хөвсгөл аймгийн хот тохижуулах үйлчилгээний төв" ХХК-д шилжүүлэхийг Хөвсгөл аймаг дахь Шүүхийн шийдвэр гүйцэтгэх газарт тус тус даалгаж, хэрэгт битүүмжлэгдсэн STEYR маркын ... ХӨВ улсын дугаартай тээврийн хэрэгслийг битүүмжлэлээс чөлөөлж шийдвэрлэв.

Шүүгдэгч Л.Б- нь цагдан хоригдоогүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.  

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон 

ТОГТООХ нь:

1. Шүүгдэгч Л.Б-ийг Эрүүгийн хуулийн тусгай ангийн 24.6 дугаар зүйлийн 1 хэсэгт заасан “Зөвшөөрөлгүйгээр ойд мод бэлтгэж, хууль бусаар мод бэлтгэх” гэмт хэргийг үйлдсэн гэм буруутайд тооцсугай.

2. Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар шүүгдэгч Л.Б-ийг 600 /зургаан зуу/ нэгжтэй тэнцэх хэмжээний буюу 600.000 /зургаан зуун мянга/ төгрөгөөр торгох ялаар шийтгэсүгэй.

3. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар шүүгдэгч Л.Б- нь торгох ялыг биелүүлээгүй бол хорих ялаар солихыг анхааруулсугай.

4. Шүүгдэгч Л.Б-эд оногдуулсан торгох ялыг гүйцэтгэхийг Хөвсгөл аймаг дахь Шүүхийн шийдвэр гүйцэтгэх газарт даалгасугай.

5. Шүүгдэгч нь цагдан хоригдоогүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдсугай.

6. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсэгт зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдсан улаан, цагаан өнгийн моторт хөрөөг хэрэгцээний дагуу ашиглуулахаар “Хөвсгөл аймгийн хот тохижуулах үйлчилгээний төв" ХХК-д шилжүүлэхийг шүүгчийн туслах С.Дэмбэрэлсамбууд, хэрэгт битүүмжлэгдсэн шүүгдэгч Л.Б-ийн хууль бусаар бэлтгэсэн 2 метрийн урттай, 380 ширхэг, 760.000 төгрөгийн үнэлгээ бүхий хэрэглээний хуурай шинэс модыг хураан авч “Хөвсгөл аймгийн хот тохижуулах үйлчилгээний төв" ХХК-д шилжүүлэхийг Хөвсгөл аймаг дахь Шүүхийн шийдвэр гүйцэтгэх газарт тус тус даалгаж, хэрэгт битүүмжлэгдсэн STEYR маркын ... ХӨВ улсын дугаартай тээврийн хэрэгслийг битүүмжлэлээс чөлөөлсүгэй.

7. Шийтгэх тогтоол хүчин төгөлдөр болтол шүүгдэгч Л.Б-эд урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч, өмгөөлөгч нар эс зөвшөөрвөл тогтоолыг гардан авсан өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

                       ДАРГАЛАГЧ, ШҮҮГЧ                                  Д.АЗЖАРГАЛ