2016 оны 08 сарын 10 өдөр

Дугаар 184/ШШ2016/00557

Улаанбаатар хот

 

 

 

 

 

Хариуцагчийн зөвшөөрлийг баталж,

хэргийг хэрэгсэхгүй болгох тухай

 

 

Сонгинохайрхан дүүргийн Иргэний хэргийн анхан шатны шүүхийн шүүгч Ж.Лхагвасүрэн би

Нэхэмжлэгч: Сонгинохайрхан дүүргийн 3-р хороо, Бага наран, 19-66 тоотод орших “Үлэмж их оргил” ХХК-ийн нэхэмжлэлтэй,

Хариуцагч: Сонгинохайрхан дүүргийн 24-р хороо, Шороотын задгайд оршин суух Балдангийн Баярсайхан /БЕ65120514/-д холбогдох

Барьцаат зээлийн гэрээний үүрэг 5,101,250 төгрөг гаргуулах тухай нэхэмжлэлийг хүлээн авч, хянаад

ТОДОРХОЙЛОХ нь:

 

Нэхэмжлэгч “Үлэмж их оргил” ХХК нь шүүхэд гаргасан нэхэмжлэлдээ “Б.Баярсайхан нь 2016 оны 02-р сарын 18-ны өдөр манай компанитай барьцаат зээлийн гэрээ байгуулан 3,500,000 төгрөгийг сарын 6 хувийн хүүтэйгээр 30 хоногийн хугацаатай зээлсэн. Гэвч зээлдэгч нь гэрээний үүргээ зөрчиж зээлийн эргэн төлөлтөө хийгээгүй тул гэрээг цуцалсан. Иймд Б.Баярсайханаас үндсэн зээл 3,500,000 төгрөг, зээлийн хүү 210,000 төгрөг, алданги 1,391,250 төгрөг, нийт 5,101,250 төгрөгийг гаргуулж өгнө үү.” гэжээ

Хариуцагч Б.Баярсайхан нь шүүхэд гаргасан тайлбартаа “Миний бие Үлэмж их оргил ХХК-ийн нэхэмжилсэн 5,101,250 төгрөгийг төлөхийг хүлээн зөвшөөрч байна. Иймд хэргийг хялбаршуулсан журмаар шийдвэрлэж өгнө үү.” гэжээ.

ҮНДЭСЛЭХ нь:

Нэхэмжлэгч Үлэмж их оргил ХХК нь хариуцагч Б.Баярсайханд холбогдуулан барьцаат зээлийн гэрээний үүрэг 5,101,250 төгрөг гаргуулах тухай нэхэмжлэл гаргажээ.

Хэрэг хянан шийдвэрлэх ажиллагааны явцад хариуцагч нь нэхэмжлэлийн шаардлагыг зөвшөөрсөн талаар тайлбараа бичгээр гаргасан байна.

Иймд шүүх хариуцагчийн зөвшөөрлийг баталж, хэргийг хэрэгсэхгүй болгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 123 дугаар зүйлийн 123.1 дэх хэсэгт заасныг удирдлага болгон

ЗАХИРАМЖЛАХ нь:
 

1. Нэхэмжлэгч “Үлэмж их оргил” ХХК-ийн нэхэмжлэлтэй, хариуцагч Б.Баярсайханд холбогдох барьцаат зээлийн гэрээний үүрэг 5,101,250 төгрөг гаргуулах тухай иргэний хэрэгт нэхэмжлэлийн шаардлагыг хариуцагч Б.Баярсайхан нь төлөхийг хүлээн зөвшөөрснийг баталж, хэргийг хэрэгсэхгүй болгосугай.
2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчээс улсын тэмдэгтийн хураамжид урьдчилан төлсөн 96,570 төгрөгийн тал хувь болох 48,285 төгрөгийг улсын төсвөөс буцаан гаргуулж, хариуцагчаас 48,285 төгрөгийг тус тус гаргуулж нэхэмжлэгчид олгосугай.

3. Энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг дурдсугай.

4. Зохигчид давж заалдах, хяналтын журмаар хянан шийдвэрлүүлэхээр гомдол гаргах, энэ асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

 

•