Хариуцагчийн зөвшөөрлийг баталж

хэргийг хэрэгсэхгүй болгох тухай

 

Баянгол дүүргийн Иргэний хэргийн анхан шатны шүүхийн шүүгч Ж.Кульдана би,

Нэхэмжлэгч: Сүхбаатар дүүрэг, 8 дугаар хороо, Сүхбаатарын талбай-02, Сэнтрал Тауэр, 8 давхарт байрлах, “Юнител” ХХК /РД:5036895/

     Хариуцагч: Баянгол дүүрэг, 8 дугаар хороо, 4 дүгээр хороолол, 9-А байр, 25 тоотод оршин суух, Өөлд овогт Мятавын Ням-Очир /РД:УП88103072/

Утасны лизинги, ярианы төлбөр болон алдангид 1.398.000 төгрөг гаргуулах тухай нэхэмжлэлийг 2016 оны 09 дүгээр сарын 23-ны өдөр хүлээн авч хянаад

 

ТОДОРХОЙЛОХ нь:

 

Нэхэмжлэгч “Юнител” ХХК шүүхэд гаргасан нэхэмжлэлдээ: Нэхэмжлэгч “Юнител” ХХК, хариуцагч М.Ням-Очир нар харилцан тохиролцож 2015 оны 4 дүгээр  сарын 27-ны өдөр үйлчилгээ ашиглах урт хугацааны гэрээ байгуулан 88087039 дугаарт нь Samsung Galaxy S6 маркийн гар утасыг /IМЕI соdе 359845064522985/ 12 сарын хугацаатай төлбөрийг хувааж төлж дуусгахаар тохирсон. Гэвч хариуцагч 2015 оны 7 дугаар сараас эхлэн төлбөр төлөх үүргээ биелүүлээгүй. Иймд 88087039 дугаарын ярианы төлбөр болон утасны лизингийн төлбөрт 932.000  төгрөг, гэрээний 4-р зүйлийн 4.4-т заасны дагуу хугацаа хэтэрсэн хоног тутамд төлөгдөөгүй үнийн дүнгийн 0.3 хувийн алданги 466.000 төгрөг нийт 1.398.000 төгрөгийг хариуцагч М.Ням-Очироос гаргуулж өгнө үү гэжээ.     

 

              Нэхэмжлэгч “Юнител” ХХК-ийн итгэмжлэгдсэн төлөөлөгч Д.Энхбаатар шүүхэд гаргасан хүсэлтдээ: Хариуцагч М.Ням-Очир нь нэхэмжлэлийн шаардлага 1.398.000 төгрөгийг 2016 оны 12 дугаар сарын 31-ний өдрийн дотор бүрэн төлж барагдуулна гэсэн тайлбарыг зөвшөөрч байна. Иймд хариуцагчийн зөвшөөрлийг баталж хэргийг хэрэгсэхгүй болгож өгнө үү гэжээ.

 

Хариуцагч М.Ням-Очир шүүхэд гаргасан хариу тайлбартаа: Миний бие “Юнител” ХХК-ийн нэхэмжлэлийн шаардлагыг хүлээн зөвшөөрч байна. “Юнител” ХХК-ийн нэхэмжилсэн 1.398.000 төгрөгийг 2016 оны 12 дугаар сарын 31-ний өдрийн дотор бүрэн төлж барагдуулах болно. Иймд хариуцагчийн зөвшөөрлийг баталж, хэргийг хялбаршуулсан журмаар шийдвэрлэж өгнө үү гэжээ.

 

                                                   ҮНДЭСЛЭХ нь:

 

Нэхэмжлэгч “Юнител” ХХК нь хариуцагч М.Ням-Очирт холбогдох утасны лизинги, ярианы төлбөр болон алдангид 1.398.000 төгрөг гаргуулах тухай нэхэмжлэлийг гаргажээ.

            Хариуцагч М.Ням-Очир нь нэхэмжлэгч “Юнител” ХХК-тай 2015 оны 4 дүгээр  сарын 27-ны өдөр үйлчилгээ ашиглах урт хугацааны гэрээ байгуулсан болох нь зохигчийн шүүхэд гаргасан тайлбар, 2015 оны 4 дүгээр  сарын 27-ны өдрийн Үүрэн холбооны дараа төлбөрт үйлчилгээ ашиглах урт хугацааны гэрээгээр тогтоогдож байна.

            Хэрэг хянан шийдвэрлэх ажиллагааны явцад хариуцагч М.Ням-Очир нь нэхэмжлэлийн шаардлага 1.398.000 төгрөгийг 2016 оны 12 дугаар сарын 31-ний өдрийн дотор бүрэн төлж барагдуулахаар хүлээн зөвшөөрсөн байна.

  Хариуцагч нэхэмжлэлийн шаардлагыг хүлээн зөвшөөрсөн нь бусдын эрх, эрх чөлөө, хуулиар хамгаалагдсан ашиг сонирхолыг хөндөөгүй, хуульд харшлаагүй байх тул хариуцагч М.Ням-Очирын зөвшөөрлийг баталж, хэргийг хэрэгсэхгүй болгон шийдвэрлэх нь зүйтэй.

              Хэргийг хялбаршуулсан журмаар хянан шийдвэрлэхтэй холбогдуулан Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар улсын тэмдэгтийн хураамжийг тал хувиар бууруулж хариуцагч М.Ням-Очироос 18675 төгрөгийг гаргуулж нэхэмжлэгчид олгож шийдвэрлэв.

             

              Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйлд заасныг удирдлага болгон                                                                       

 

ЗАХИРАМЖЛАХ нь:

 

1. Хариуцагч М.Ням-Очир нь “Юнител” ХХК-ийн нэхэмжлэлийн шаардлага 1.398.000 төгрөгийг 2016 оны 12 дугаар сарын 31-ний өдрийн дотор төлөхөөр хүлээн зөвшөөрсөн хариуцагчийн зөвшөөрлийг баталж, М.Ням-Очирт холбогдох хэргийг хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчээс улсын тэмдэгтийн хураамжид 37350 төгрөг төлснийг дурдаж, Баянгол дүүргийн Татварын хэлтсийн 2602002965 тоот данснаас 18675 төгрөг, хариуцагч М.Ням-Очироос 18675 төгрөгийг тус тус гаргуулан нэхэмжлэгч “Юнител” ХХК-д олгосугай.

 

              3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэх болохыг дурьдсугай.

 

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигчид энэ захирамжинд давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурьдсугай.

 

  

 

 

 

ШҮҮГЧ                                           Ж.КУЛЬДАНА