МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,

Шүүх хуралдааны нарийн бичгийн дарга П.Ундрах,

Улсын яллагчаар, Хөвсгөл аймгийн Прокурорын газрын Ерөнхий прокурор Н.Батмөнх,

Шүүгдэгч Э.Л- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн Прокурорын газрын Ерөнхий прокуророос Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Э.Л-д холбогдох эрүүгийн 1938008100467 дугаартай хэргийг хянан хэлэлцэв.

Шүүгдэгчийн биеийн байцаалт:

Монгол Улсын иргэн, Э.Л.

Шүүгдэгч Э.Л- нь Хөвсгөл аймгийн Түнэл сумын 5 дугаар багийн нутаг дэвсгэр “Шомбоодой” гэх газраас 2019 оны 11 дүгээр сарын 13-ны өдөр зөвшөөрөлгүйгээр 3.1 м.куб хэмжээтэй шинэс мод бэлтгэж, улмаар уг модыг 2019 оны 11 дүгээр сарын 13-наас 14-нд шилжих шөнө ... ХӨҮ улсын дугаартай “Пронтер” маркийн тээврийн хэрэгслээр гарал үүслийн бичиггүйгээр тээвэрлэж, экологи-эдийн засагт 186.000 төгрөг, нөхөн төлбөрт 558.000 төгрөг, нийт 744.000 төгрөгийн хохирол учруулсан гэмт хэргийг үйлдсэнд холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгчийн гэм буруугийн талаар:

Шүүгдэгч Э.Л- нь ашиг хонжоо олох зорилгоор Хөвсгөл аймгийн Түнэл сумын 5 дугаар багийн нутаг дэвсгэр “Шомбоодой” гэх газраас 2019 оны 11 дүгээр сарын 13-ны өдөр зохих зөвшөөрөлгүйгээр 3.1 м.куб хэмжээтэй шинэс мод бэлтгэж, улмаар уг модыг 2019 оны 11 дүгээр сарын 13-наас 14-нд шилжих шөнө ... ХӨҮ улсын дугаартай “Пронтер” маркийн тээврийн хэрэгслээр гарал үүслийн бичиггүйгээр тээвэрлэж, экологи-эдийн засагт 558.000 төгрөгийн хохирол учруулан “Хууль бусаар мод бэлтгэх” гэмт хэргийг үйлдсэн байна. 

Шүүгдэгчийн гэмт хэрэг үйлдсэн гэм буруутай болох нь хэрэгт авагдсан нотлох баримтууд болох:

• Эрх бүхий албан тушаалтан хуулиар хүлээсэн чиг үүргээ хэрэгжүүлэх явцад зөрчлийн шинжтэй үйлдэл, эс үйлдэхүйг илрүүлсэн тухай тэмдэглэл /хх-ийн 8-9 дүгээр хуудас/,
• Шүүгдэгч Э.Л-гийн эзэмшлийн ... ХӨҮ улсын дугаартай “Пронтер” маркийн тээврийн хэрэгслийн гэрчилгээний хуулбар /хх-ийн 10 дугаар хуудас/,
• Эд мөрийн баримт түр хураан авсан тэмдэглэл, гэрэл зургийн үзүүлэлт /хх-ийн 14-15 дугаар хуудас/,
• Эд хөрөнгө битүүмжлэх тухай прокурорын тогтоол, тэмдэглэл, гэрэл зургийн үзүүлэлт /хх-ийн 18-21 дүгээр хуудас/,
• Хохирогч С.Б-ийн мөрдөн шалгах ажиллагааны үед өгсөн: “...Би сум орон нутгаас томилсон Засаг даргын шийдвэрийн дагуу уг хэрэгт хохирогчоор оролцож байна. Надад дүгнэлттэй холбоотой санал хүсэлт байхгүй. Би учирсан хохирлыг нэхэмжлэх саналтай байна. Гэм буруутай хүн нь учирсан хохирлыг нөхөн төлж барагдуулбал надад өөр нэхэмжлэх зүйл гомдол санал байхгүй. Хохирол нөхөн төлөхөөр бол манай сумын төрийн сангийн орлогын данс 100171300988 тоот дансанд тушаавал болно” гэх мэдүүлэг /хх-ийн 25-26 дугаар хуудас/,
• Гэрч Х.Б-ийн мөрдөн шалгах ажиллагааны үед өгсөн: “...Би 11 дүгээр сарын 13-ны өдөр Э.Л- өвөлжөөний хооронд мод ачилцаад өгөөч гээд гуйхаар нь зөвшөөрөөд “Түнэл сумын” 5 дугаар баг “Шомбоодой” гэх газраас түлшний модыг нь ачилцаж өгсөн. Тэгээд оройтоод модоо ачаад явж байтал замд хяналтын байцаагч таараад Э.Л-гийн машинтай модыг журмын хашаанд аваачаад эрхийн бичиггүй байна, маргааш ирж уулзаарай гэж байсан. Би тэр талаар асууж лавлаагүй өвөлжөөний хооронд мод ачилцаад өгөөч гээд гуйхаар нь тус болчихъё гээд явсан. Хөдөөний айлууд өрхийн гоожин гээд мод бэлтгэх эрхийн бичиг авчихсан байдаг болохоор зөвшөөрөлтэй л юм байх гэж бодсон. Э.Л- өөрийнхөө моторт хөрөөгөө ашиглаж модоо бэлдсэн. Би бэлтгэсэн модыг нь ачилцаж өгч тусалсан” гэх мэдүүлэг /хх-ийн 38-39 дүгээр хуудас/,
• Гэрч Х.Б-ийн мөрдөн шалгах ажиллагааны үед өгсөн: “...Би сумын байгаль хамгаалагч С.Б-, Байгаль орчны хяналтын улсын байцаагч Ц.Э нарын хамт 2019 оны 11 дүгээр сарын 13-наас 14-нд шилжих шөнө 22 цагийн орчимд шалгалтын ажил хийх явцад ... ХӨҮ улсын дугаартай “Пронтер” маркийн тээврийн хэрэгслээр түлшний зориулалтаар мод тээвэрлэж явсан иргэн Э.Л-г шалгахад зохих зөвшөөрөл эрхийн бичиггүй байсан... бид нар зохих зөвшөөрөлгүй мод тээвэрлэж яваа нь зөрчилтэй байна, саатуулж шалгах шаардлагатай гэж тайлбарлаж хэлээд мод ачсан тээврийн хэрэгслийг нь түр саатуулсан. Бидний шаардлагыг эсэргүүцэж ямар нэг зүйл хэлсэн асуудал байхгүй, шаардлага биелүүлсэн. Уг асуудлыг Ц.Эрдэнэчимэг байцаагч шалгасан” гэх мэдүүлэг /хх-ийн 40-41 дүгээр хуудас/,
• Хөвсгөл аймгийн “Дэлгэрмөрөн” сум дундын ойн ангийн 2019 оны 11 дүгээр сарын 25-ны өдрийн: “...3.1 м.куб хэмжээтэй хэрэглээний хуурай шинэс модны экологи-эдийн засгийн үнэлгээ 186.000 төгрөг” гэх дүгнэлт, бөөрөнхий модон материалын хэмжилтийн хүснэгт /хх-ийн 51-52 дугаар хуудас/,
• 2019 оны 12 дугаар сарын 12-ны өдрийн улсын байцаагчийн 04-34/01 дугаартай: “ойн санд учирсан хохирол ойн экологи-эдийн засгийн үнэлгээг гурав дахин нэмэгдүүлсэнтэй тэнцэх 186.000х3=558.000 төгрөг” гэх акт /хх-ийн 53 дугаар хуудас/,
• 2019 оны 12 дугаар сарын 06-ний өдрийн прокурорын 175 дугаартай зөвшөөрөлгүй мод бэлтгэхэд ашигласан шаргал өнгийн моторт хөрөөг хураан авсан прокурорын зөвшөөрөл /хх-ийн 13 дугаар хуудас/,
• 2019 оны 12 дугаар сарын 06-ний өдрийн 50 дугаартай хууль бусаар мод тээвэрлэж явсан ... ХӨҮ улсын дугаартай тээврийн хэрэгсэл болон зохих зөвшөөрөлгүй бэлтгэсэн 3.1м.куб хэмжээтэй модыг битүүмжилсэн тогтоол /хх-ийн 18 дугаар хуудас/,
• Шүүгдэгч Э.Л-гийн мөрдөн шалгах ажиллагааны үед өгсөн: “...Би 2019 оны 11 дүгээр сарын 13-наас 14-нд шилжих шөнө Хөвсгөл аймгийн Түнэл сумын 5 дугаар багийн нутаг “Шомбоодой” гэх газраас түлшний хэрэгцээнд хуурай хар модны унаанги тайрч бэлдээд ачих үедээ өөрийн найз Батхишигийг мод түлээ ачилцаад өгөөч гэж гуйсан чинь зөвшөөрөөд миний түлшний модыг ачилцаж өгсөн. Тэгээд бид хоёр ... ХӨҮ улсын дугаартай тээврийн хэрэгслээр тээвэрлэж яваад байгаль орчны хяналтын улсын байцаагч, сумын хоёр байгаль хамгаалагч нартай тааралдаад шалгуулсан. Тухайн үед би мод бэлтгэх эрхийн бичиг аваагүй байсан болохоор тээврийн хэрэгсэл болон модыг маань түр саатуулсан. ... ХӨҮ улсын дугаартай тээврийн хэрэгсэл миний өөрийн тээврийн хэрэгсэл байгаа юм. Би учирсан хохирлоо бүрэн төлж барагдуулна” гэх мэдүүлэг /хх-ийн 61-62 дугаар хуудас/ болон шүүхийн хэлэлцүүлэгт мэдүүлэхдээ “...үйлдсэн хэргээ хүлээн зөвшөөрч байна” гэж хариулж байсан болон бусад нотлох баримтуудаар нотлогдож байна.

Шүүгдэгчийн хувийн байдлыг тогтоосон дараах баримтуудыг шүүх шинжлэн судлав. Үүнд:

• Хөвсгөл аймгийн Түнэл сумын 5 дугаар багийн Засаг даргын тодорхойлолт /хх-ийн 65 дугаар хуудас/,
• Шүүгдэгч Э.Л-гийн иргэний үнэмлэхний хуулбар /хх-ийн 66 дугаар хуудас/,
• Э.Л-, Б.Д нарын гэрлэлтийн гэрчилгээний хуулбар /хх-ийн 68 дугаар хуудас/,
• Урьд нь ял шийтгүүлж байгаагүй болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 70 дугаар хуудас/ зэрэг баримт бичиг болно.

Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл байдлуудыг бүрэн гүйцэд тогтоосон гэж үзлээ.

Гэмт хэрэг гарахад шүүгдэгчийн байгаль орчин, экологийн мэдлэг дутмаг байдал дээрх гэмт хэргийг үйлдэх шалтгаан нөхцөл болсон байна.

Шүүгдэгч Э.Л- нь дээрх гэмт хэргийг үйлдсэн болох нь гэрчүүдийн мэдүүлгээр нотлогдож байна.

Шүүгдэгч нь Монгол Улсын Үндсэн хууль, Эрүүгийн хуулиар хамгаалагдсан

төрийн хамгаалалтад байх ойн санд хохирол учруулан хүрээлэн байгаа орчны эсрэг гэмт хэргийг үйлдэж, байгаль экологийн тэнцвэрт байдлыг алдагдуулсан хор уршигт зориуд хүргэж, “Хууль бусаар мод бэлтгэх” гэмт хэргийг үйлдсэн нь дээрх гэмт хэргийг гэм буруугийн санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Хэрэгт авагдсан баримтуудыг үндэслэн прокурорын үйлдсэн яллах дүгнэлт нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн хэргийн газрын үзлэг хийсэн тэмдэглэл, эд зүйлд үзлэг хийсэн тэмдэглэл, гэрч, шүүгдэгч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Шүүгдэгч Э.Л- нь ашиг хонжоо олох зорилгоор Хөвсгөл аймгийн Түнэл сумын 5 дугаар багийн нутаг дэвсгэр “Шомбоодой” гэх газраас 2019 оны 11 дүгээр сарын 13-ны өдөр зохих зөвшөөрөлгүйгээр 3.1 м.куб хэмжээтэй шинэс мод бэлтгэж, улмаар уг модыг 2019 оны 11 дүгээр сарын 13-наас 14-нд шилжих шөнө ... ХӨҮ улсын дугаартай “Пронтер” маркийн тээврийн хэрэгслээр гарал үүслийн бичиггүйгээр тээвэрлэж, экологи-эдийн засагт 186.000 төгрөг, нөхөн төлбөрт 558.000 төгрөгийн хохирол учруулан “Хууль бусаар мод бэлтгэх” гэмт хэргийг үйлдсэн нь шунахайн сэдэлтээр, санаатайгаар дээрх гэмт хэргийг үйлдсэн байна.    

Байгаль орчныг хамгаалах тухай хуулийн 49 дүгээр зүйлийн 4 дэх хэсгийн 4.1-т “ойн санд учирсан хохирлыг ойн экологи–эдийн засгийн үнэлгээг гурав дахин нэмэгдүүлсэнтэй тэнцэх хэмжээгээр” тогтоосон байх тул шүүгдэгч Э.Л-гийн үйлдсэн энэхүү гэмт хэргийн улмаас шууд учирсан үр дагавар нь байгаль орчин, экологи-эдийн засагт 558.000 төгрөгийн хохирол учирсан гэж шүүх дүгнэлээ.

Шүүгдэгч Э.Л-гээс 2019 оны 12 дугаар сарын 23-ны өдөр Хөвсгөл аймгийн Түнэл сумын төрийн сангийн 100171300988 дугаартай данс руу 186.000 төгрөгийг шилжүүлсэн ХААН банкны банк хоорондын шилжүүлгийн баримт /хх-ийн 74/, 2019 оны 12 дугаар сарын 26-ны өдөр Хөвсгөл аймгийн Түнэл сумын төрийн сангийн 100171300988 дугаартай данс руу 558.000 төгрөгийг шилжүүлсэн ХААН банкны банк хоорондын шилжүүлгийн баримт /хх-ийн 75/ хэрэгт авагдсан байх ба шүүгдэгч Э.Л- нь шүүх хуралдаанд “хохиролыг харилцан тохиролцож, сайн дураараа төлсөн” гэж мэдүүлж байх шүүгдэгчийг бусдад төлөх төлбөргүй гэж үзэв.

Хавтаст хэрэгт баримтжуулсан шүүгдэгчээс гаргуулах хэрэг хянан шийдвэрлэх ажиллагааны зардалгүй байна.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Э.Л-д эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгчийг анх удаа гэмт хэрэг үйлдсэн, шүүгдэгчийн хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан “зөвшөөрөлгүйгээр ойд мод бэлтгэж, тээвэрлэсэн” үйлдэлд нь Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар эрүүгийн хариуцлага хүлээлгэх нь зүйтэй гэж үзлээ.

Шүүгдэгчийн хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, гэмт хэрэг үйлдсэнээ хүлээн зөвшөөрсөн, гэм буруугийн талаар маргахгүй байгаа байдал, үйлдсэн гэмт хэрэг, хохирол, хор уршигт хандаж буй хандлага, шүүх хуралдаанд мэдүүлэг өгөхдөө гэмшиж байгаа зэргийг харгалзан үзсэн болно.

Шүүгдэгч Э.Л- нь урьд гэмт хэрэг үйлдэж байгаагүй болох ял шийтгэлийн лавлагаагаар тогтоогдож байна.

Шүүгдэгчийн хувьд эрүүгийн хариуцлагыг хүндрүүлэх нөхцөл байдалгүй байна.

Шүүх шүүгдэгч Э.Л-д эрүүгийн хариуцлага хүлээлгэхдээ шүүх хуралдаанд улсын яллагчаас шүүгдэгчид Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар 500 цагийн хугацаагаар нийтэд тустай ажил хийлгэх ял оногдуулах санал гаргасныг харгалзан шүүгдэгчид торгох ял оногдуулах нь зүйтэй байна.

Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсэгт зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдсан моторт хөрөөг хэрэгцээний дагуу ашиглуулахаар “Хөвсгөл аймгийн хот тохижуулах үйлчилгээний төв” ХХК-д шилжүүлэхийг шүүгчийн туслах С.Дэмбэрэлсамбууд, хэрэгт битүүмжлэгдсэн шүүгдэгч Э.Л-гийн хууль бусаар бэлтгэсэн 3.1м.куб хэмжээтэй, 186.000 төгрөгийн үнэлгээ бүхий хэрэглээний хуурай шинэс модыг хураан авч худалдан борлуулж, улсын орлогод оруулахыг Хөвсгөл аймаг дахь Шүүхийн шийдвэр гүйцэтгэх газарт тус тус даалгаж, шүүгдэгч нь бусдад төлөх төлбөргүй, түүнээс гаргуулах хэрэг хянан шийдвэрлэх ажиллгааны зардалгүй байх тул шүүгдэгч Э.Л-гийн эзэмшлийн “Пронтер” маркийн ... ХӨҮ улсын дугаартай тээврийн хэрэгслийг битүүмжлэлээс чөлөөлж шийдвэрлэв.

Шүүгдэгч Э.Л- нь цагдан хоригдоогүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.  

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон 

ТОГТООХ нь:

1. Шүүгдэгч Э.Л-г Эрүүгийн хуулийн тусгай ангийн 24.6 дугаар зүйлийн 1 хэсэгт заасан “Зөвшөөрөлгүйгээр ойд мод бэлтгэж, тээвэрлэн хууль бусаар мод бэлтгэх” гэмт хэргийг үйлдсэн гэм буруутайд тооцсугай.

2. Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар шүүгдэгч Э.Л-г 450 /дөрвөн зуун тавь/ нэгжтэй тэнцэх хэмжээний буюу 450.000 /дөрвөн зуун тавин мянга/ төгрөгөөр торгох ялаар шийтгэсүгэй.

3. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар шүүгдэгч Э.Л- нь торгох ялыг биелүүлээгүй бол  хорих ялаар солихыг анхааруулсугай.

4. Шүүгдэгч Э.Л-д оногдуулсан торгох ялыг гүйцэтгэхийг Хөвсгөл аймаг дахь Шүүхийн шийдвэр гүйцэтгэх газарт даалгасугай.

5. Шүүгдэгч нь цагдан хоригдоогүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдсугай.

6. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсэгт зааснаар шийтгэх тогтоол хүчин төгөлдөр болмогц хэрэгт эд мөрийн баримтаар хураагдсан моторт хөрөөг хэрэгцээний дагуу ашиглуулахаар “Хөвсгөл аймгийн хот тохижуулах үйлчилгээний төв” ХХК-д шилжүүлэхийг шүүгчийн туслах С.Д-д, хэрэгт битүүмжлэгдсэн шүүгдэгч Э.Л-гийн хууль бусаар бэлтгэсэн 3.1м.куб хэмжээтэй, 168.000 төгрөгийн үнэлгээ бүхий хэрэглээний хуурай шинэс модыг хураан авч, худалдан борлуулж улсын орлогод оруулахыг Хөвсгөл аймаг дахь Шүүхийн шийдвэр гүйцэтгэх газарт тус тус даалгаж, хэрэгт битүүмжлэгдсэн “Пронтер” маркийн ... ХӨҮ улсын дугаартай тээврийн хэрэгслийг битүүмжлэлээс чөлөөлсүгэй.

7. Шийтгэх тогтоол хүчин төгөлдөр болтол шүүгдэгч Э.Л-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч, өмгөөлөгч нар эс зөвшөөрвөл тогтоолыг гардан авсан өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

                 ДАРГАЛАГЧ, ШҮҮГЧ                               Д.АЗЖАРГАЛ