МОНГОЛ УЛСЫН НЭРИЙН ӨМНӨӨС  

 

 

Хэнтий аймгийн Бор-Өндөр сум дахь Сум дундын шүүхийн иргэний хэргийн шүүх хуралдааныг шүүгч С.Байгальмаа даргалж, тус шүүхийн шүүх хуралдааны “Б” танхимд нээлттэй хийсэн шүүх хуралдаанаар:

Нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэрийн нэхэмжлэлтэй хариуцагч Л.Алтанзулд холбогдох орон сууцны халаалт, халуун, хүйтэн усны төлбөр 322014 төгрөг гаргуулах тухай нэхэмжлэлийг 2016 оны 09 сарын 09-ний өдөр хүлээн авч, 2016 оны 09 сарын 16-ны өдөр иргэний хэрэг үүсгэж, хянан хэлэлцэв. 

Шүүх хуралдаанд шүүх хуралдааны нарийн бичгийн дарга А.Оюун-Эрдэнэ, нэхэмжлэгч байгууллагын итгэмжлэгдсэн төлөөлөгч Б.Чимэгтуяа  нар оролцов.

 

                                                                                                  Т О Д О Р Х О Й Л О Х нь:

           Нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэр шүүхэд гаргасан нэхэмжлэлдээ: Л.Алтанзул нь халаалт, халуун, хүйтэн усны төлбөрөө 2015 оны 4-р сард 417542 төгрөг төлөөд өөр төлөлт хийгээгүй. Иймд халаалт, халуун, хүйтэн усны үлдэгдэл төлбөр 322014 төгрөгийг Л.Алтанзулаас гаргуулж өгнө үү гэжээ.

           Нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэрийн итгэмжлэгдсэн төлөөлөгч Б.Чимэгтуяа шүүх хуралдаанд гаргасан тайлбартаа: Л.Алтанзулын ам бүлийг 1 хүнээр тооцох боломжгүй. Л.Алтанзул нь ам бүл 1 болсон талаарх багийн засаг даргын тодорхойлолтыг Бор-Өндөр уулын баяжуулах үйлдвэрт авчирч өгөөгүй. Иймд нэхэмжлэлийн шаардлага хэвээр байгаа гэжээ. 

Хариуцагч Хэнтий аймгийн Бор-Өндөр сумын 2-р баг 44-р байрны 58 тоотод оршин суух ЕТ82102828 регистрийн дугаартай Боржигин овогт Лувсанпүрэвийн Алтанзул шүүхэд гаргасан тайлбартаа: Миний хүү Б.Баясгалан нь эмээ, өвөөтэйгөө хамт амьдарч байгаа. Харин охин Х.Цэлмэг 48-р байрны 46 тоотод аавтайгаа амьдардаг. Л.Алтанзул миний бие одоогоор 44-р байрны 58 тоотод ам бүл 1-ээр амьдарч байна. Иймээс 2015 оны 4-р сараас 2016 оны 8-р сар хүртэл Бор-Өндөрийн уулын баяжуулах үйлдвэрийн байрны төлбөр халаалт, халуун, хүйтэн усны төлбөр тооцоог 1 ам бүлээр гаргаж өгөхийг хүсэж байна гэжээ.  

        Шүүхийн хэлэлцүүлгээр талуудын тайлбар болон хэрэгт цугларсан  баримтуудыг шинжлэн судлаад                                                                                                                                                                                                                               Ү Н Д Э С Л Э Х нь:

 

Нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэр нь хариуцагч Л.Алтанзулаас орон сууцны халаалт, халуун, хүйтэн усны төлбөр 322014 төгрөг гаргуулахаар нэхэмжлэлийн шаардлага гаргасан байна.

Хариуцагч Л.Алтанзул нь шүүх хуралдаанд хүндэтгэн үзэх шалтгаангүйгээр ирээгүй ба нэхэмжлэгч байгууллагын итгэмжлэгдсэн төлөөлөгч Б.Чимэгтуяа түүний эзгүйд хэргийг шийдвэрлэхэд татгалзах зүйлгүй гэсэн тайлбарыг шүүхэд ирүүлсэн байгаа тул Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3 дахь хэсэгт зааснаар хэргийг шийдвэрлэсэн болно. Хариуцагч Л.Алтанзул нь 2015 оны 01 дүгээр сараас эхлэн ам бүл ганцаараа амьдарч байсан тул орон сууцны халаалт, халуун усны төлбөр тооцоог нэг ам бүлээр тооцож өгнө үү гэсэн байна.

Нэхэмжлэгч Уулын баяжуулах Бор-Өндөр үйлдвэрийн итгэмжлэгдсэн төлөөлөгч Б.Чимэгтуяа нь хариуцагч Л.Алтанзул нь ам бүл өөрчилөгдсөн тухайгаа манайд мэдэгдээгүй байх тул зөвшөөрөхгүй гэж маргаж байгаа бөгөөд ам бүлдээ өөрчлөлт орсон тухайгаа орон сууцны өмчлөгч өөрөө ирж мэдэгдэх үүрэгтэй болох тухай нэхэмжлэгчийн итгэмжлэгдсэн төлөөлөгч Б.Чимэгтуяа нь ИХШХШ тухай хуулийн 25 дугаар зүйлийн 25.2.2 дэх хэсэгт заасан “шүүхэд гаргасан нэхэмжлэлийн шаардлага, түүнийг үгүйсгэх,татгалзах үндэслэл, түүнтэй холбоотой баримтаа өөрөө нотлох,нотлох баримтыг цуглуулах гаргаж өгөх” үүргээ биелүүлээгүй байна.  Хариуцагч Б.Алтанзул нь Бор-Өндөр сумын Холбоо 2 дугаар баг 44 байр 58 тоотод 2015 оны 01 дүгээр сарын 01 ний өдрөөс эхлэн ам бүл нэг амьдарч байгаа болох нь тус багийн засаг дарга Ч.Ган-очирын 2016 оны 10 дугаар сарын 04 ний өдрийн 675 тоот албан бичиг, мөн хүн ам өрхийн бүртгэлийн дэвтэр зэрэг нотлох баримтуудаар хариуцагч Б.Алтанзул нь ам бүл нэг амьдардаг болох нь тогтоогдож байна гэж үзлээ. Иймд нэхэмжлэлийн шаардлагын зарим хэсгийг хангаж шийдвэрлэх нь зүйтэй байна гэж шүүх үзлээ.   

 Нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэрийн хариуцагч Л.Алтанзулаас орон сууцны халаалт, халуун, хүйтэн усны төлбөр 322014 төгрөг гаргуулах тухай нэхэмжлэлийн шаардлагын зарим хэсэг болох 79750 төгрөгийг хасч хэрэгсэхгүй болгож, 242264 төгрөгийг хариуцагч Л.Алтанзулаас гаргуулж шийдвэрлэх нь зүйтэй байна гэж шүүх үзлээ.

 

Иргэний хэрэг шүүхэд хянан шийдвэрлэх тухай хуулийн 82 дугаар зүйлийн

 82.1.1, 100 дугаар зүйлийн 100.3, 115 дугаар зүйлийн 115.1, 115.2.2,

 116, 118-120-д тус тус заасныг удирдлага болгон Т О Г Т О О Х  нь:

 

 1. Монгол Улсын Иргэний хуулийн 147 дугаар зүйлийн 147.1 дэх хэсэгт зааснаар Монголросцветмет ХХК ийн харъяа Бор-Өндөр Уулын Баяжуулах үйлдвэрийн нэхэмжлэлээс 79750 төгрөгийг хасч  хэрэгсэхгүй болгож, 242264 төгрөгийг хариуцагч Л.Алтанзулаас гаргуулж Бор-Өндөр Уулын Баяжуулах үйлдвэрт олгосугай.

 2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.1-т зааснаар нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэрийн улсын тэмдэгтийн хураамжид урьдчилж төлсөн 10310 төгрөгийг төрийн сангийн нэгдсэн дансанд хэвээр үлдээж, улсын орлого болгож, хариуцагч Л.Алтанзулаас улсын тэмдэгтийн хураамж  7918  төгрөгийг гаргуулж,   нэхэмжлэгч Монголросцветмет ХХК-ийн харьяа “Бор-Өндөр” уулын баяжуулах үйлдвэрт олгосугай.

 3. Шийдвэр нь танилцуулан сонсгомогц хүчинтэй болохыг дурдсугай.

           4. Энэхүү шийдвэрийг эс зөвшөөрвөл зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авснаас хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

 

ДАРГАЛАГЧ                                                 С.БАЙГАЛЬМАА