МОНГОЛ УЛСЫН НЭРИЙН ӨМНӨӨС

 

           Хэнтий аймгийн Бор-Өндөр сум дахь Сум дундын шүүхийн иргэний хэргийн шүүх хуралдааныг шүүгч Р.Батбаяр даргалж тус шүүхийн шүүх хуралдааны “Б” танхимд хийсэн нээлттэй хуралдаанаар:

Хүсэлт гаргагч Хэнтий аймгийн Бор-Өндөр сумын 5 дугаар багт оршин суух Хөхийт овогт Данзан-Ишийн Баянжаргалын хүсэлттэй,

            Иргэний эрх зүйн маргаанд хариуцагчаар оролцвол зохих этгээд болох Өлзийт овогт Лхагважавын Амарыг эрэн сурвалжлуулах тухай иргэний хэргийг хянан хэлэлцэв.

Шүүх хуралдаанд хүсэлт гаргагч Д.Баянжаргал, шүүх хуралдааны нарийн бичгийн дарга Б.Туяа нар оролцов.

                                                                                       Т О Д О Р Х О Й Л О Х нь:

Хүсэлт гаргагч Д.Баянжаргал шүүхэд ирүүлсэн хүсэлтдээ: “Лхагважавын Амар нь 2014 оны 05 дугаар сард өвөлжөөнд байшин барьж өгнө гээд 10.000.000 төгрөгийг авсан боловч Амар одоо болтол барьж өгөөгүй. Байшин бариулахаа больж мөнгөө авахаар тохирсон боловч оршин суугаа газартаа байхгүй, хаана байгаа нь тодорхойгүй тул эрэн сурвалжилж өгнө үү” гэжээ.

Хүсэлт гаргагч Д.Баянжаргал шүүх хуралдаанд гаргасан тайлбартаа: “Миний бие Амартай 2014 оны 05 дугаар сарын 22-ны өдөр өвөлжөөнд байшин бариулахаар тохиролцож 10.000.000 төгрөгний гэрээ байгуулсан. Тэгээд Амар нь надаас 10.000.000 төгрөг авсан. Амар нь 2015 оны 9 сарын 17-нд өвөлжөөнд байшин барьж дуусгаж өгнө гэж тохиролцсон. Тэгээд тэр тохиролцсон ёсоор байшингаа бариагүй. Дараа нь мөн 2016 оны 5 сарын 22-нд дахин барьж өгнө гэж гэрээгээ сунгасан боловч өнөөдрийг хүртэл надтай уулзахгүй, олдохгүй байна” гэв.

 Ү Н Д Э С Л Э Х нь:

           Хүсэлт гаргагч Д.Баянжаргал нь Лхагважавын Амарыг эрэн сурвалжлуулахаар  хүсэлт гаргасан байна.

Иргэний эрх зүйн маргаанд хариуцагчаар оролцвол зохих Лхагважавын Амар нь бүртгэлтэй хаяг болох Хэнтий аймгийн Бор-Өндөр сумын Бумбатын 2 дугаар гудамжны 2 тоотод оршин суудаггүй, хаана байгаа нь мэдэгдэхгүй, холбоо барих  боломжгүй байгаа болох нь хүсэлт гаргагчийн тайлбар, тус шүүхийн эвлэрүүлэн зуучлагчийн тэмдэглэл, Бор-Өндөр сумын 3 дугаар багийн зохион байгуулагчийн албан бичиг, шүүхийн мэдэгдэх хуудас зэрэг нотлох баримтуудаар тогтоогдож байх тул Д.Баянжаргалын хүсэлтийг хангаж, Л.Амарын оршин суугаа газрыг тогтоох ажиллагааг цагдаагийн байгууллагад даалгаж шийдвэрлэх нь зүйтэй гэж шүүх үзлээ.

Өлзийт овгийн Лхагважавын Амар нь СЩ74062013 регистрийн дугаартай, эх Балжинням нь 98996031, 99790255, төрсөн ах Л.Зоригт нь 94042627 гэсэн үүрэн холбооны дугаар эзэмшдэг болохыг дурдах нь зүйтэй байна. 

 

  Иргэний хэрэг шүүхэд хянан шийдвэрлэх тухай хуулийн 115 дугаар  зүйлийн 115.2.1, 116, 118, 133 дугаар зүйлийн 133.1.9 дэх хэсэгт заасныг удирдлага болгон                  

Т О Г Т О О Х нь:

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3 дахь хэсэгт зааснаар СЩ74062013 регистрийн дугаартай Өлзийт овогт Лхагважавын Амарыг эрэн сурвалжилсугай.

2.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4 дэх хэсэгт зааснаар иргэний эрх зүйн маргаанд хариуцагчаар оролцвол зохих  Лхагважавын Амарыг эрэн сурвалжилж, оршин суугаа хаягийг тогтоохыг Хэнтий аймаг дахь Цагдаагийн газрын Бор-Өндөр сум дахь Цагдаагийн тасагт даалгасугай.

3.Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 70.200 төгрөгийг төрийн сангийн дансанд хэвээр үлдээж, улсын орлого болгосугай.

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4-т зааснаар шийдвэрийг танилцуулан сонсгомогц хүчинтэй болох бөгөөд зохигч 7 хоног өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэйг мэдэгдсүгэй.

5. Иргэний хэрэг шүүхэд хянан шийдвэрлэх тухай хуулийн 119.7-д зааснаар дээрх хугацаанд шүүхийн шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдсугай.

6. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч шийдвэрийг гардан авсан өдрөөс хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах  гомдол гаргах эрхтэйг тайлбарласугай.

 

 

 

                                                      ДАРГАЛАГЧ                                Р.БАТБАЯР