Нэхэмжлэгч нэхэмжлэлээсээ татгалзсныг баталж,

хэргийг хэрэгсэхгүй болгох тухай  

 

 

Хан-Уул дүүргийн Иргэний хэргийн анхан шатны шүүхийн шүүгч Д.Хулан      би,

            Нэхэмжлэгч: Чингэлтэй дүүрэг, 1 дүгээр хороо, Бага тойруу, 3-9 тоотод  байрлах “Жи Мобайл” ХХК-ийн нэхэмжлэлтэй                                          

Хариуцагч: Хан-Уул дүүрэг, 3 дугаар хороо, үйлдвэр гудамж, 26б байр, 922  тоотод оршин суух Боржигон овогт Баатарын Ганбаярт /РД:ЗЮ82032300/ холбогдох        Ярианы төлбөрт 60 542 төгрөгийг гаргуулахыг хүссэн нэхэмжлэлийг 2016 оны 07 дугаар сарын 06-ны өдөр хүлээн авч, 2016 оны 07 дугаар сарын 08-ны өдөр иргэний хэрэг үүсгэн хянаад

ТОДОРХОЙЛОХ нь:

 

            Нэхэмжлэгч “Жи Мобайл” ХХК-ийн захиргаа, хүний нөөцийн газрын захирал Д.Довчинням шүүхэд гаргасан нэхэмжлэлдээ:

            Б.Ганбаяр нь Жи Мобайл ХХК-тай 2011 оны 07 дугаар сарын 05-ны өдөр “Хувь хэрэглэгчид үүрэн холбооны дараа төлбөрт үйлчилгээ үзүүлэх” гэрээ байгуулан 98231838 дугаарын хэрэглэгч болсон. Б.Ганбаяр нь одоогийн байдлаар манай компанид 2014 оны 02 дугаар сарын ярианы төлбөр 60 361 төгрөг, нийт 60 361 төгрөгийн хэрэглээний өртэй байна. Ярианы төлбөрөө төлж барагдуулах талаар удаа дараа утсаар мэдэгдэж байсан боловч одоог хүртэл төлбөрөө төлж барагдуулаагүй болно.

            Иймд Б.Ганбаярын ярианы төлбөр 60 361 төгрөгнөөс барьцаанд байршуулсан 20 000 төгрөгийг хасч тооцон 40 361 төгрөг, алданги 20 181  төгрөг, нийт 60 542  төгрөгийг гаргуулан өгч, манай компанийг хохиролгүй болгож өгнө үү гэжээ.

 

            Нэхэмжлэгчийн итгэмжлэгдсэн төлөөлөгч М.Мөнхсувд шүүхэд гаргасан хүсэлтдээ:

           Жи Мобайл  ХХК нь хариуцагч Б.Ганбаяраас 60 542 төгрөгийг нэхэмжилсэн нэхэмжлэлийг шүүхэд гаргасан. Гэвч хариуцагч Б.Ганбаяр нь төлбөрөө бүрэн төлж барагдуулсан байх тул шүүхэд гаргасан нэхэмжлэлээсээ бүхэлд нь татгалзаж байна. Өөр нэхэмжлэх зүйлгүй, ямар нэгэн санал хүсэлт байхгүй тул хэргийг хялбаршуулсан журмаар шийдвэрлэж өгнө үү гэжээ.  

 ҮНДЭСЛЭХ нь:

 

Нэхэмжлэгч “Жи Мобайл” ХХК нь хариуцагч Б.Ганбаярт холбогдуулан ярианы төлбөрт 60 542 төгрөгийг гаргуулахыг хүссэн нэхэмжлэлийн шаардлагыг шүүхэд гаргажээ.

            Иргэний хэрэг үүсгэснээс хойш нэхэмжлэгчийн нэхэмжлэлийн шаардлага 60 542 төгрөгийг хариуцагч Б.Ганбаяр нь маргаангүйгээр хүлээн зөвшөөрч, бүрэн төлж барагдуулсан тул нэхэмжлэгчийн итгэмжлэгдсэн төлөөлөгч нь шүүхэд гаргасан нэхэмжлэлээсээ татгалзаж, шүүхэд бичгээр хүсэлтээ ирүүлсэн байна.

            Иймд нэхэмжлэгчийн татгалзлыг баталж, хэргийг хэрэгсэхгүй болгох нь зүйтэй гэж үзэв.    

 

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйлд заасныг удирдлага болгон                                                                                                       

                                                                                         

ЗАХИРАМЖЛАХ нь:

 

1. ”Жи Мобайл” ХХК-ын нэхэмжлэлтэй, хариуцагч Б.Ганбаярт холбогдох ярианы төлбөрт 60 542 төгрөгийг гаргуулахыг хүссэн иргэний хэргийн нэхэмжлэгчийн татгалзлыг баталж, хэргийг хэрэгсэхгүй болгосугай.  

             

            2.Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.5, 59 дүгээр зүйлийн 59.4, 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгч  “Жи Мобайл” ХХК-ын   улсын тэмдэгтийн хураамжид урьдчилан төлсөн 4 550 төгрөгний 2 275 төгрөгийг улсын төсвийн орлогод хэвээр үлдээж, Хан-Уул дүүргийн татварын хэлстийн 2603030349 тоот данснаар 2 275 төгрөг, хариуцагч Б.Ганбаяраас 2 275 төгрөгийг тус тус гаргуулан нэхэмжлэгчид олгосугай. 

 

3.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар хэргийг хялбаршуулсан журмаар хянан шийдвэрлэсэн захирамжид зохигч давж заалдах, хяналтын журмаар гомдол гаргах, анхан шатны шүүхэд дахин нэхэмжлэл гаргах эрхгүй болохыг дурдсугай.                        

 

             

 

ШҮҮГЧ                           Д.ХУЛАН