Баянгол дүүргийн Эрүүгийн хэргийн анхан шатны шүүхийн Шийтгэх тогтоол

2020 оны 03 сарын 17 өдөр

Дугаар 263

 

 

 

 

 

 

 

 

                           МОНГОЛ УЛСЫН НЭРИЙН ӨМНӨӨС

 

Баянгол дүүргийн эрүүгийн хэргийн анхан шатны шүүхийн шүүх хуралдааныг шүүгч Ч.Отгонбаяр даргалж,

Нарийн бичгийн дарга: Б.Бат-Эрдэнэ,

Улсын яллагч: Н.Мөнхбат,

Шүүгдэгч: О.Г-өөрөө өөрийгөө өмгөөлөн тус шүүхийн шүүх хуралдааны танхимд нээлттэй явуулсан шүүх хуралдаанаар Баянгол дүүргийн прокуророос Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт О.Г-ад холбогдуулж яллах дүгнэлт, ялын санал үйлдэж хэргийг хялбаршуулсан журмаар шийдвэрлүүлэхээр ирүүлсэн эрүүгийн 2005002670269 дугаартай хэргийг 2020 оны 3 дугаар сарын 16-ны өдөр хүлээн авч хянан хэлэлцэв.

Шүүгдэгч: Монгол Улсын иргэн, О.Г-, 1974 оны 7 дугаар сарын 07-ны өдөр Хөвсгөл аймагт төрсөн, 46 настай, эрэгтэй, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл 4, эхнэр, 2 хүүхдийн хамт ..... тоот регистртэй,

Шүүгдэгч О.Г-нь 2020 оны 01 дүгээр сарын 06-ны өдөр Баянгол дүүргийн 9 дүгээр хорооны нутаг дэвсгэр 9-235а тоотод С.Т-ыг хувийн таарамжгүй харьцааны улмаас зодож, эрүүл мэндэд нь хөмсгөнд шарх бүхий хөнгөн хохирол санаатай учруулсан гэмт хэрэгт холбогджээ.

ТОДОРХОЙЛОХ НЬ:

Шүүхийн хэлэлцүүлэгт яллах, өмгөөлөх талаас шинжлэн судалсан болон хэрэгт цугларсан дараах нотлох баримтуудыг тал бүрээс нь бүрэн бодитой шинжлэн судлав. Үүнд:

Шүүгдэгч О.Г-шүүх хуралдаанд: “...С.Т- тухайн үйл явдал болсон өдөр над руу залгаад “би архи уучихсан байна, манайд хүрээд ир” гэсэн. Бид хоёр барилгын ажил хийж байсан багын найзууд. Тэгээд би 2 найзтайгаа С.Т-ынд очсон. Тэднийд очихдоо намайг хашааны хаалгыг нь эвдсэн гэж яриад байгаа. Би хаалгыг нь  2-3 удаа түлхэхэд онгойчихсон. Би С.Т-ынд ороод 2-3 удаа цохисон зүйл байхгүй. С.Т-ынд ороод орон дээр нь сууж байтал намайг С.Т- заамдаж авахаар нь би С.Т-ыг түлхэхэд С.Т- унаад босож ирэхдээ намайг цохчихлоо гээд эхнэр нь хажуунаас хэрүүл болоод тийм л зүйл болсон. Хохирогчийн өгсөн мэдүүлэгт намайг 2-3 удаа цохисон гэдэг тийм зүйл болоогүй. Миний С.Т-ын гарыг тавиулах гэсэн үйлдэл дээр С.Т- унахдаа ширээний булан мөргөсөн. Хоёрдугаарт гэвэл хохирогчийн эхнэрт би гар хүрсэн зүйл байхгүй. Хохирогчийн эхнэр мэдүүлэхдээ намайг 2-3 удаа цохисон, түлхсэн гэсэн тийм зүйл болоогүй. С.Т- бид хоёр багийн найзууд арван жилд хамт байсан одоо барилгын ажил хамт хийдэг. Бид хоёр эвлэрээд учир зүйгээ олчихсон. Намайг ярьсангүй гэж гомдоод ийм асуудал гарсан, хэрүүл зодоон болоогүй” гэв.

Хохирогч С.Т-ын мөрдөн байцаалтад өгсөн: “...2020 оны 01 дүгээр сарын 06-ны өдөр О.Г-гэж манай найз над руу “чамайг ална, хядна, хошногдоно чи өөрийгөө үхсэн гэж бодоорой” гээд өөрийнхөө 99260248 дугаараас залгаж дарамталсан. Би тэгээд гэртээ байж байтал 17 цагийн орчимд Г-, Б-, Г-, Д- гэж 3 залуутай хамт ирсэн. Манай хашааны гадна ирчихээд С.Т-аа гээд орилсон. Энэ үед манай эхнэр М- гэрийнхээ хаалгыг онгойлгох гээд гартал хашааны жижиг хаалгыг өшиглөөд ороод ирсэн. Г- гэрт орж ирэнгүүтээ эхнэр М-ийг түлхэж унагаангуутаа манай гэрийн орон дээр гутлаа тавьж суусан. Тэгтэл манай эхнэр “та нар хаалга үүд эвдэж орж ирлээ” гээд Г-тай хамт ирсэн 3 залууг түлхээд гэрээс гаргасан. Энэ хооронд Г- надтай үлдээд миний толгой руу 3, 4 удаа цохисон. Энэ үед хөмсөг задраад цус гарахаар нь би тонгойтол миний бөөр хэсэг рүү 3, 4 удаа өшиглөсөн. Энэ үед эхнэр М- гүйж орж ирээд “чи миний нөхрийг яаж байгаа юм” гэхэд “энийг нь бас алчихъя” гээд орилсон. Би гэрээс гараад нөгөө 3 залууд нь “та нар хүн дагуулж ирж хүн алуулах нь” гэж хэлтэл тэр 3 залуу манай гэр рүү ороод Г-ыг гэрээс аваад гарсан. Тэгээд гэрийн гадаа байж байтал Г- жижиг эвдэрхий модон хаалгыг миний машиныг эвдэнэ гээд машин руу шидсэн боловч оноогүй. Энэ үед дахиад эхнэр М- гүйгээд очтол “энийг бас алчихъя” гээд цамцаар нь боож байгаад түлхэж унагаагаад яваад өгсөн. Хөмсгөндөө 6-н оёдол хийлгэсэн” гэсэн мэдүүлэг /хх-н 17-18/,

Гэрч Ц.М-ийн мөрдөн байцаалтад өгсөн: “...2020 оны 01 дүгээр сарын 06-ны өдөр манай хаалгыг Г- гээд манай нөхрийн найз нүдэхээр нь би онгойлгох гээд очтол онгойлгохын завдалгүй гэрийн гадна жижиг хаалгыг цөм өшиглөөд ороод ирсэн. Хаалгаар орж ирээд манай гэрт ороод хоймрын орон дээр гутлаа тавьчихсан сууж байхаар нь би “чи айлд орж ирчихээд орон дээр гуталтайгаа суулаа” гэж уурласан чинь гараараа намайг түлхээд би 3 удаа газар унасан. Г- ирэхдээ өөрөөсөө гадна 3 залуутай орж ирсэн. Би Г-тай хамт ирсэн 3 залууг гэрээс түлхэж гаргачихаад эргээд ороод иртэл манай нөхөр цус нүжтэйгээ холилдсон байсан. Би тэр Г-ыг гэрээс гаргах гэсэн боловч дийлээгүй. Тэгээд цуг ирсэн залуучууд гэрт орж ирээд аваад гарсан. Гэрээс гараад гэрийн гадна байж байхдаа Г- эвдэрхий жижиг хаалга аваад манай нөхрийн машины шилийг хагална гээд шидсэн боловч тэр нь оноогүй. Тэгтэл цуг явсан 3 залуу нь чирээд машинд суулгаад яваад явсан” гэсэн мэдүүлэг /хх-н 6-7/,

Шинжээчийн 1201 тоот дүгнэлт: “...С.Т-т баруун хөмсгөнд шарх тогтоогдлоо. Дээрхи гэмтэл нь мохоо зүйлийн, нэг удаагийн цохих үйлдлээр үүсгэгдэнэ. Шүүх эмнэлгийн гэмтлийн зэрэг тогтоох журмын 2.4.1-т зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. Цаашид ерөнхий хөдөлмөрийн чадварын тогтонги алдалтанд нөлөөлөхгүй” гэсэн дүгнэлт /хх-н 23/,

Шинжээч эмч Ц.Г-ын мөрдөн байцаалтад өгсөн: “...энэ гэмтэл нь ширээ мөргөх үед үүсэх боломжгүй. Хэрвээ ширээ мөргөх юм бол зулгаралт болон цус хуралт үүснэ. С.Т-ын биед учирсан гэмтэл нь цохигдох үед үүсэх гэмтэл байна” гэсэн мэдүүлэг /хх-н 24/,

Гэмт хэргийн талаархи гомдол, мэдээлэл хүлээн авсан тэмдэглэл /хх-н 2/, шүүгдэгчийн хувийн байдалтай холбоотой баримтууд /хх-н 41-61/, хохирогчийн хүсэлт /хх-н 67-68/ зэрэг болно.

Шүүхийн хэлэлцүүлгийн үед шинжлэн судалсан дээрх нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай байна гэж үнэлэв.

Шүүгдэгчийн гэм буруу болон хохирол, хор уршигийн талаар:

Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн бөгөөд Эрүүгийн хэрэг хянан шийдвэрлэх тухай хуулийн 17.3 дугаар зүйлд заасны дагуу шүүгдэгч, хохирогч нар нь хэргийг хялбаршуулсан журмаар шийдвэрлүүлэх хүсэлт гаргасан байна.

Уг хүсэлтийн дагуу прокуророос хэргийг хялбаршуулсан журмаар хянан шийдвэрлэх тухай тогтоол гарган, яллах дүгнэлт, ялын санал үйлдэж хэргийг шүүхэд ирүүлснийг шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 2 дахь хэсэгт зааснаар хэргийг шууд хянан шийдвэрлэх боломжтой гэж үзэн хэргийг хялбаршуулсан журмаар ял оногдуулах шүүх хуралдаанаар шийдвэрлэсэн болно. 

Шүүгдэгч О.Г-нь 2020 оны 01 дүгээр сарын 06-ны өдөр Баянгол дүүргийн 9 дүгээр хорооны нутаг дэвсгэр 9-235а тоотод С.Т-ыг хувийн таарамжгүй харьцааны улмаас зодож, эрүүл мэндэд нь хөмсгөнд шарх бүхий хөнгөн хохирол санаатай учруулсан гэм буруутай болох нь:

Шүүгдэгчийн мөрдөн байцаалтын шатанд болон шүүх хуралдаанд үйлдсэн хэргээ хүлээн мэдүүлсэн мэдүүлгүүд, хохирогч С.Т-ын: “...Г- надтай үлдээд миний толгой руу 3, 4 удаа цохисон. Энэ үед хөмсөг задраад цус гарахаар нь би тонгойтол миний бөөр хэсэг рүү 3, 4 удаа өшиглөсөн. ...Хөмсгөндөө 6-н оёдол хийлгэсэн” гэсэн мэдүүлэг /хх-н 17-18/, гэрч Ц.М-ийн: “...Би Г-тай хамт ирсэн 3 залууг гэрээс түлхэж гаргачихаад эргээд ороод иртэл манай нөхөр цус нүжтэйгээ холилдсон байсан. Би тэр Г-ыг гэрээс гаргах гэсэн боловч дийлээгүй. Тэгээд цуг ирсэн залуучууд гэрт орж ирээд аваад гарсан” гэсэн мэдүүлэг /хх-н 6-7/, шинжээчийн 1201 тоот дүгнэлт, шинжээчийн мэдүүлэг болон шүүх хуралдаанаар хэлэлцэгдсэн Эрүүгийн хэрэг хянан шийдвэрлэх тухай хуульд заасан үндэслэл журмын дагуу цуглуулж, бэхжүүлсэн дээрх нотлох баримтуудаар нотлогдон тогтоогдлоо.

Шүүгдэгч О.Г-ын үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан “хүний эрүүл мэндэд хөнгөн хохирол санаатай учруулсан” гэмт хэргийн бүх шинжийг хангасан байх тул шүүгдэгчид холбогдуулж яллах дүгнэлт үйлдэж ирүүлсэн хуулийн зүйл, хэсэг тохирсон байна гэж шүүх дүгнэлээ.

Шүүгдэгч О.Г-нь согтуурсан үедээ хохирогчтой маргалдаж түүний нүүр рүү цохиж эрүүл мэндэд нь хөнгөн хохирол санаатай учруулсан нь өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэсэн гэм буруугийн санаатай хэлбэртэй, Эрүүгийн хуулийн тусгай ангид гэмт хэрэгт тооцохоор заасан нийгэмд аюултай үйлдэл болох нь хэрэгт авагдсан нотлох баримтуудаар нотлогдон тогтоогдсон тул гэм буруутайд тооцох нь зүйтэй байна.

Хохирогч нь мөрдөн байцаалтын шатанд гомдол саналгүй, шүүгдэгчээс 200.000 төгрөг хүлээн авсан, нэхэмжлэх зүйлгүй гэж мэдүүлсэн, бичгээр хүсэлт /хх-н 67-68/ гаргасан байх тул шүүгдэгчийг бусдад төлөх төлбөргүй гэж үзлээ. 

Эрүүгийн хариуцлагын талаар:

Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн, прокурорын сонсгосон ялыг хүлээн зөвшөөрч, хүлээлгэх эрүүгийн хариуцлагыг зөвшөөрөн, гэмт хэргийн улмаас учруулсан хохирлоо нөхөн төлсөн, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаврыг ойлгосон болох нь хавтаст хэрэгт авагдсан шүүгдэгчийн үйлдсэн гэмт хэрэгтээ гэмшиж байна. Хохирол нөхөн төлж хохирогчтой эвлэрсэн. Прокурорын санал болгосон эрүүгийн хариуцлагыг бүрэн хүлээн зөвшөөрч байгаа тул хэргийг хялбаршуулсан журмаар шийдвэрлэж өгнө үү гэсэн мэдүүлэг, хүсэлтүүд, хохирогчийн хүсэлт, эрүүгийн хариуцлагын төрөл хэмжээний талаарх прокурорын саналтай танилцаж зөвшөөрсөн талаарх баримтууд болон шүүхийн хэлэлцүүлэгт шүүгдэгчийн өгсөн мэдүүлэг, шинжлэн судалсан баримтуудаар тогтоогдож байна.  

Прокуророос ялын төрөл хэмжээний талаар гаргасан “шүүгдэгч О.Г-ыг Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 500 нэгж буюу 500.000 төгрөгөөр торгох ял,” оногдуулах саналыг шүүгдэгчид танилцуулсан байх ба прокурорын дээрх санал нь Эрүүгийн хуулийг буруу хэрэглээгүй, Эрүүгийн хэрэг хянан шийдвэрлэх хуулийг зөрчөөгүй байх тул шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэгт заасны дагуу хэргийг хянан шийдвэрлэх нь зүйтэй гэж үзлээ.

          Хэрэгт эд мөрийн баримтаар хураагдсан зүйлгүй, хэрэгт битүүмжлэгдсэн эд хөрөнгөгүй, шүүгдэгч нь цагдан хоригдсон хоноггүй болно.   

Шүүхийн тухай хуулийн 31 дүгээр зүйлийн 31.3.1, Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5, 36.2, 36.6, 36.7, 36.8, 36.10 дугаар зүйлд тус тус заасныг удирдлага болгон ТОГТООХ нь:

  1. Шүүгдэгч О.Г-ыг “хүний эрүүл мэндэд хөнгөн хохирол санаатай учруулсан” гэмт хэрэг үйлдсэн гэм буруутайд тооцсугай.
  2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч О.Г-ыг 500 нэгж буюу 500.000 төгрөгөөр торгох ялаар шийтгэсүгэй.
  3. Шүүгдэгч нь хуульд заасан хугацаанд торгох ялыг биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоног хорих ялаар тооцож солихыг мэдэгдсүгэй.
  4. Энэ хэрэгт эд мөрийн баримтаар хураагдсан зүйлгүй, битүүмжилсэн хөрөнгөгүй, шүүгдэгч нь цагдан хоригдсон хоноггүй, бусдад төлөх төлбөргүй болохыг тус тус дурдсугай.
  5. Эрүүгийн хэрэг хянан шийдвэрлэх тухай хуулийн 36.8 дугаар зүйлийн 4 дэх хэсэгт зааснаар шийтгэх тогтоолыг улсын яллагч, шүүгдэгч, хохирогч, тэдгээрийн хууль ёсны төлөөлөгч, өмгөөлөгч өөрөө гардаж авснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол гаргах, эсэргүүцэл бичих эрхтэй болохыг дурдсугай.
  6. Шийтгэх тогтоол нь уншиж сонсгосноор хүчинтэй болох ба давж заалдах гомдол, эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол хүчин төгөлдөр болтол шүүгдэгч О.Г-ад хувийн баталгаа гаргах таслан сэргийлэх арга хэмжээ авсугай.

 

 

 

ДАРГАЛАГЧ, ШҮҮГЧ                             Ч.ОТГОНБАЯР