МОНГОЛ УЛСЫН НЭРИЙН ӨМНӨӨС

 

Багануур дүүргийн Иргэний хэргийн анхан шатны шүүхийн шүүгч Г.Ариунаа даргалж, тус шүүхийн шүүх хуралдааны танхимд нээлттэй хийсэн хуралдаанаар

Хүсэлт гаргагч: Багануур дүүргийн 3 дугаар хороо, 33 дугаар байрны 11 тоотод оршин суух, Мэргэд овогт Базарсүрэнгийн Батдагвын хөдөлмөрийн дэвтрийн жинхэнэ эзэмшигчээр тогтоолгох тухай хүсэлтийг 2016 оны 11 дүгээр сарын 09-ний өдөр хүлээн авч хянан хэлэлцэв.

Шүүх хуралдаанд: Хүсэлт гаргагч Б.Батдагва, нарийн  бичгийн дарга Д.Оргил нар оролцов.

ТОДОРХОЙЛОХ нь:

Хүсэлт гаргагч Б.Батдагва хүсэлт болон шүүх хуралдаанд гаргасан тайлбартаа: Миний бие 1961 оны 10 дугаар сарын 25-нд Хэнтий аймгийн Цэнхэрмандал суманд төрсөн. 1977-1979 онд ОХУ-ын ТМС-д суралцаад, 1979 онд ББМҮ- яамны харьяа Зөвлөлтийн барилгын СОТ-2-т цахилгаанчинаар томилогдон ажиллахаар болж, хөдөлмөрийн дэвтрээ нээлгэхдээ ээжийнхээ нэрээр овоглож алдаа гаргасан. Энэ үед би иргэний үнэмлэх аваагүй, миний эцэг, эх гэр бүлийн хувьд тусдаа амьдарч байсан.          

Мөн тэтгэвэр тогтоолгох нас маань болоод тэтгэврээ тогтоолгох гэтэл хөдөлмөрийн дэвтрийн овог нэр зөрүүтэй байна гэсэн. Ийм учраас миний овог нэрийг залруулж, хөдөлмөрийн дэвтрийн эзэмшигчээр тогтоож өгнө үү, гэжээ.

ҮНДЭСЛЭХ нь

           Хүсэлт гаргагч Б.Батдагва хөдөлмөрийн дэвтрийн жинхэнэ эзэмшигчээр тогтоолгох шаардлагыг шүүхэд гаргажээ.

Хүсэлт гаргагч нь Иргэний хэрэг шүүхэд хянан шийдвэрлэх тухай хуулийн 133 дугаар зүйлийн 133.1 дэх хэсэгт зааснаар эрх зүй ач холбогдол бүхий үйл явдлыг тогтоолгох хүсэлтээ шүүхэд гаргаж, шаардах эрхтэй байна. 

           Б.Батдагва нь 1979 оны 7 дугаар сарын 01-ний өдөр нээсэн “Хөдөлмөрийн дэвтэр”-ийн жинхэнэ эзэмшигч болох нь шүүх хуралдаанд гаргасан тайлбар, иргэний үнэмлэхний нотариатаар батлуулсан хуулбар, эцэг Базарсүрэн, эх Тамжав нарын 00/009234 дугаартай төрсний бүртгэлийн лавлагаа, 1995 оны 01 дүгээр сарын 05-ны өдрийн 055094 дугаартай олгогдсон Нийгмийн даатгалын дэвтэр, “6-10 киловаттын хүчдэлийн хаалттай хувиарлах байгууламжийн тоноглолын засварын монтёр”-ын сургалтанд онолоор “Онц” дүнтэй төгссөн 7588 дугаартай “Сертификат” мөн 1006 дугаартай Мэргэжлийн үнэмлэх зэрэг бичгийн нотлох баримтуудаар тогтоогдож байна.

              Иймд шүүх дээрх хэргийг онцгой ажиллагааны журмаар хянан хэлэлцээд нэхэмжлэгчийн нэхэмжлэлийн шаардлагыг хангах үндэстэй байна гэж үзлээ.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн

115.2.1, 116, 118, 133 дугаар зүйлийн 133.1.1 дэх хэсэгт заасныг тус тус удирдлага болгон ТОГТООХ нь

 

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.4 дэх хэсэгт заасныг баримтлан Мэргэд овогтой Базарсүрэнгийн Батдагвыг  1979 оны 7 дугаар сарын 01-ний өдөр нээсэн “Хөдөлмөрийн дэвтэр”-ийн жинхэнэ эзэмшигч мөн болохыг тогтоосугай.
2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 70200 төгрөгийг улсын орлогод хэвээр үлдээсүгэй.
3.  Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7 дахь хэсэгт зааснаар шийдвэр нь танилцуулан сонсгомогц хүчинтэй болох бөгөөд зохигч 7 хоног өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэй бөгөөд дээрх хугацаанд шүүхийн шийдвэрийг гардан аваагүй нь гомдол гаргах хугацааг хуулинд заасан журмын дагуу тоолоход саад болохгүйг дурдсугай.
4. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар зохигч, тэдгээрийн төлөөлөгч буюу өмгөөлөгч, гуравдагч этгээд анхан шатны шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

                                   

 

ДАРГАЛАГЧ ШҮҮГЧ                             Г.АРИУНАА